Historia 45
Cadíʼdicabe guiiguʼ Jordán
¡BIIYAʼ! ¡Ca israelita ca cadíʼdicabe guiiguʼ Jordán! Peru, paraa nuu nisa ca pue. Purtiʼ ca dxi que nabé riaba nisaguié ne guiiguʼ ca dxáʼtipa ni. ¡Peru yanna guiráʼ nisa ca maʼ gastiʼ! ¡Ne ca israelita ca cadíʼdicaʼ ra nabidxi cásica gudíʼdicabe ndaaniʼ nisadóʼ Xiñáʼ que! Paraa zeʼ guiráʼ nisa ca pue. Guidúʼyanu.
Ora bidxiña dxi tiidiʼ ca israelita ca guiiguʼ Jordán que la? ndiʼ nga ni bicaa Jiobá gabi Josué ca binni guidxi que: Ca ni ruzaaquiʼ guʼxhuʼ ca naquiiñeʼ guácabe guiña stiʼ pactu ca ne sanírucabe nezalunu. Ora laacabe guzuhuaa ñeecabe ndaaniʼ guiiguʼ Jordán ca la? ca nisa ca zabeeza de guxooñeʼ ni.
Pur nga runi, ca ni ruzaaquiʼ guʼxhuʼ ca rindísacabe guiña stiʼ pactu que ne rizanírucabe nezalú guiráʼ ca binni que. Ora ridxíñacabe guiiguʼ Jordán ca la? riuucabe ndaaniʼ nisa. Guiiguʼ ca nagueenda ruxooñeʼ ne ziaʼ ni. ¡Peru cásipeʼ bizuhuaa ñeecabe ndaaniʼ ni la? nisa ca ruzulú ribeeza! ¡Ti milagru ndiʼ! Jiobá biteeguʼ neza nisa zeeda de guiaʼ. ¡Ne guiiguʼ que bibidxi!
Ca ni ruzaaquiʼ guʼxhuʼ nuaʼ guiña stiʼ pactu ca la? ridíʼdicabe galaa guiiguʼ bidxi que. Zanda guuyuʼ laacabe lu dibuju ca la? ¡Laga nuucabe raqué la? guiráʼ ca israelita ridíʼdicaʼ ra nabidxi stiʼ guiiguʼ Jordán!
Gudiʼdiʼ si guirácabe la? Jiobá gúdxibe Josué gabi doce hombre nadipaʼ: Laché ra guiiguʼ ra nuuné ca ni ruzaaquiʼ guʼxhuʼ ca guiña stiʼ pactu ca. Raqué lagutopa doce guié ne la cuaʼquiʼ cani ra tiiditu gueelaʼ. Zacá despué la? ora ca xiiñitu guinaba diidxaʼ laatu xi riníʼ ca guié riʼ la? nápatu xidé gábitu laacabe de que nisa ca bisaana de guxooñeʼ ni ora guiña stiʼ pactu stiʼ Dios ca gudiʼdiʼ ndaaniʼ Jordán que. ¡Ca guié ca zusietenalaʼdxiʼ ni laacabe milagru riʼ! Josué laaca rindisaʼ doce guié ndaaniʼ guiiguʼ ra guyuu ca ni ruzaaquiʼ guʼxhuʼ ca.
Oraqueruʼ gudxi Josué ca ni ruzaaquiʼ guʼxhuʼ ni ziné guiña stiʼ pactu que: Laguiree ndaaniʼ guiiguʼ Jordán ca. Ora rireecabe que la? guiiguʼ que ruxooñeʼ ni sti tiru.