Ora gaca huará ti binnilídxinu

1, 2. Ximodo biquiiñeʼ Binidxabaʼ desgracia ne guendahuará para nucaa Job nucheené Dios.

DXIQUÉ guyuu tobi hombre ni bibaniné binnilidxi nayecheʼ, biree labe Job. Biblia na «beeda gaca hombre que tobi de cani jma risaca guleza lu guidxilayú». Gúpabe chii xiiñibe, gadxe hombre ne chonna gunaa. Laaca gúpabe stale bidxichi para bidiibe binnilídxibe stale cosa. Ne ni jma risaca bíʼnibe nga biyúbibe chuʼbe gaxha de Dios ne chuulaʼdxiʼ Jiobá cani runi ca xiiñibe. Guiráʼ cani bíʼnibe que gucanécani para chúʼcabe tobi si ne guibánicabe nayecheʼ (Job 1:1-5).

² Binidxabaʼ, ni jma xhenemigu Jiobá Dios, biiyabe modo nabani Job. Cumu qué rusaanabe de guyúbibe modo gucheené ca xpinni Dios laa la? binduuxebe binnilidxi Job. Despué bicaabe «ti guendahuará Job ni gundisaʼ caadxi guiʼdxuʼ malu ladi, dede ndaaniʼ batañee hasta galaa ique». Biquiiñeʼ Binidxabaʼ desgracia ne guendahuará para nucaa Job nucheené Dios (Job 2:6, 7).

3. Bizeeteʼ xi guiráʼ guca Job pur guendahuará ni gupa.

³ Biblia cadi cuzeeteʼ diʼ lapeʼ guendahuará ni gupa Job, peru cuzeeteni ximodo gucanabe. Bidxá bicutiʼ ládibe, gucuá biquiixhu ládibe ne laaca biuʼdxuʼ ni. Bindáʼ dxabaʼ ruaabe ne bindáʼ yuudxuʼ guidubi ládibe. Ne biuubaʼ dede ndaaniʼ dxita ládibe (Job 7:5; 19:17; 30:17, 30). Job gurí ndaaniʼ dé ludé pur yuubaʼ ni cadiʼdiʼ que ne biquiiñeʼ ti ndaa bisiʼñaʼ para guduuñe ladi (Job 2:8). ¡Aque naná yuubaʼ ni gúpabe que!

4. Xi ridxaagalú stale familia nuu tiru.

⁴ Xi ñúniluʼ pa ñápaluʼ ti guendahuará malu casi gupa Job que yaʼ. Ca dxi stinu riʼ, qué rucaa Binidxabaʼ guendahuará ca xpinni Dios para guniná laacabe casi bíʼnibe né Job. Peru nuu tiru raca huará binnilídxinu. Xiñee yaʼ. Purtiʼ ralenenu donda, ridxaagalunu guendanagana lu xquendanabáninu ne zeʼ dxi ziyaca biidiʼ Guidxilayú ra nabáninu riʼ. Guiranu raca huaranu neca gápanu laanu, peru qué racananu casi gucaná Job. Ora gaca huará tuuxa binnilídxinu, zándaca gaca nagana para laanu gudxíʼlunu ni. Nga runi, guidúʼyanu ximodo racané Biblia laanu para gudxíʼlunu xhenemígunu ni qué rusaana de guniná laanu (Eclesiastés 9:11; 2 Timoteo 3:16).

XI NAQUIIÑEʼ GÚNINU

5. Xi runi ca familia ca ora gapa tobi de laacaʼ xiixa guendahuará ni nagueenda rianda.

⁵ Nabé raca nagana para binni ora guchaa xquendanabani casi ora gueeda gaca huará tuuxa binnilidxi, jmaruʼ si pa qué guiandagabe. Ne ora gapa tuuxa ti guendahuará ni nagueenda rianda laaca ruchaa modo nabani binnilidxi, zándaca caquiiñeʼ guchaacabe cani rúnicabe para guni tendércabe laa. Zándaca cadi naquiiñeʼ guni ca binnilídxibe ridxi ti ganda guiziiláʼdxibe. Ne zándaca maʼ qué zúnicabe chupa chonna cosa ni maʼ biaacabe gúnicabe. Ni dxandíʼ nga stale de ca familia ca, dede né cani nahuiiniʼ, riacaʼ binnilídxicaʼ ni huará, peru nuu tiru galán gusietenalaʼdxiʼ tuuxa laacabe nápacabe ti binni huará (Colosenses 3:12). Ora gapa tobi de laacabe xiixa guendahuará ni nagueenda rianda, zacanécabe laabe dede biaʼ gándatiʼ. Ne cada tobi de cani nuu lu ti familia ribézacaʼ gúnicabe laacaʼ zaqueca ora gaca huaracaʼ (Mateo 7:12).

6. Xi zándaca guni sentir ti familia ora gapa binnilidxi ti guendahuará malu ne guindaa para guianda.

⁶ Peru xi rizaaca ora gapa tuuxa xiixa guendahuará malu ni rindaa para guianda ne pur laani naquiiñeʼ guchaa ca binnilidxi modo nabánicaʼ, casi pa gatiʼ galaabe, gápabe cáncer o sti guendahuará ni gunduuxeʼ laabe chaahuidugá yaʼ. Sti guendanagana ni zanda gapa binni nga gaca huará xquendabiaaniʼ, casi esquizofrenia. Primeca ni runi binni nga riacaʼ binni huará ca ne riuucaʼ triste purtiʼ nadxiicaʼ laabe. Peru laaca runi sentircaʼ xcaadxi cosa ora gúʼyacaʼ cuchaa xquendanabánicaʼ ne maʼ qué ganda gúnicaʼ ni racaláʼdxicaʼ: guixhacaláʼdxicaʼ ne guiniʼcaʼ: «Xiñee cazaacaʼ ndiʼ pue».

7. Xi guníʼ xheelaʼ Job ora biʼyaʼ huarabe, ne xi zándaca biaandaʼ laa.

⁷ Zándaca zacaca guníʼ ique xheelaʼ Job. Guietenaláʼdxinu birá xiiñibe guti. Guiráʼ cani bizaacabe nabé bininácani laabe. Ngue runi, ora bíʼyabe xheelabe, ti hombre ni riuulaʼdxiʼ guni dxiiñaʼ ne daʼ gana, cayuniná ti guendahuará malu laa, zándaca biaandaʼ laabe ti cosa nabé risaca ni racané binni gudxiilú ca guendanagana stiʼ: nuuné Dios laacabe. Biblia na: «Para na xheelabe rabi laabe: “Ñee dede yanna nga cayúniluʼ ni jneza la? ¡Guluu dí Dios, ne guti!”» (Job 2:9).

8. Ora gaca huará tuuxa, xi textu zanda gacané binnilídxibe para cadi guireecaʼ gana.

⁸ Stale binni qué ridxela xi guni ora guchaa modo nabani pur huará tuuxa binnilidxi. Peru ti xpinni Cristu naquiiñeʼ ganna óraca nga zanda gusihuinni dxandíʼ nadxii binni. Biblia na ora dxandíʼ nadxii binni tuuxa, qué zadxiichinegá laabe ne ziá laabe, qué zuyubi puru para laa si. Ne zuni huantar laabe, zuni cré laabe ne intiica guidxaagalube ziuuné laabe tobi si ne qué zaree gana laabe (1 Corintios 13:4-7). Lugar de guidxiichi binni pur ni cazaaca, naquiiñeʼ guni stipa pur gucueeza laa (Proverbios 3:21).

9. Xi zanda gacané ti familia cadi guixeleʼ de Jiobá ora ruluíʼ qué zanda guni huantarcaʼ ni cazaacacaʼ.

⁹ Pa lade ti familia nuu tuuxa napa ti guendahuará nabé malu ne ruluíʼ maʼ qué zanda guni huantarcaʼ, xi zanda gúnicaʼ para cadi guixélecaʼ de Dios yaʼ. Nánnanu gadxé gadxé modo runi tender binni cada guendahuará ne gadxé tratamientu caquiiñeʼ cada tobi de laacani, nga runi cadi jneza diʼ guzeeteʼ libru riʼ xi tratamientu chinanda binni ne ximodo gápacabe ti binni huará. Peru cadi guiaandaʼ laanu Jiobá cayacané «guiráʼ cani nuu triste» ti chuʼcaʼ gaxha de laabe (Salmo 145:14). Rey David bicaa: «Nayecheʼ riuu tutiica binni ni gusihuinni riene ca pobre; dxi tiidibe lu guendanagana zulá Jiobá laabe. Zapa Jiobá laabe ne qué zudii lugar gátibe. [...] Jiobá zudii stipa laabe ora maʼ huarabe» (Salmo 41:1-3). Jiobá racané ca xpinni para cadi guixélecaʼ de laabe ne laaca racanebe laacaʼ ora guidxaagalucaʼ xiixa guendanagana ni ruluíʼ qué zanda guni huantarcaʼ (2 Corintios 4:7). Stale binni ni huayapa tuuxa binnilidxi xiixa guendahuará malu huaniʼcaʼ ca diidxaʼ ni guníʼ salmista riʼ: «Nabé maʼ gucanaʼyaʼ stale. Bilá naa Jiobá casi maʼ bidii stiidxaluʼ» (Salmo 119:107).

XIMODO ZANDA CUʼNU GANA TI BINNI HUARÁ

10, 11. 1) Xii nga ni jma zacané ca familia ca para gánnacaʼ ximodo gudxiilucaʼ guendahuará ni gapa binnilídxicaʼ. 2) Ximodo bidxiilú ti gunaa guendahuará ni gupa xheelaʼ.

¹⁰ Ti proverbio ni zeeda lu Biblia na: «Espíritu stiʼ ti hombre nga ni racané laa guni huantar guendananá stiʼ, peru espíritu ni maʼ gucaná, tu zanda guni huantar ni» (Proverbios 18:14). Riuu «espíritu stiʼ ti hombre» triste pur guiráʼ ni cazaaca, ne zaqueca riuu binnilidxi. Peru «ora nuudxí ladxidóʼ binni la? nazaaca ziuu» (Proverbios 14:30). Ni zacané ti familia gudxiilú intiica guendahuará ni gueeda gapa binnilídxicaʼ nga guiníʼ íquecaʼ zanda gudxiilucaʼ ni (zanda gúʼndaluʼ Proverbios 17:22).

¹¹ Ti gunaa xpinni Cristu ni napa xhoopaʼ iza de bichaganáʼ, gupa xidé biʼniʼ huantar ora guca huará xheelaʼ de apoplejía, ti guendahuará ni qué rudii lugar guiniibi binni. Sicaríʼ guniʼbe: «Maʼ qué ñándapeʼ niníʼ xheelaʼ, ne guizáʼ nagana para güeniáʼ laabe diidxaʼ. Bineʼ stipa pur guieneʼ laabe ora racaláʼdxibe gábibe naa xiixa». Xheelaʼ gunaa riʼ laaca guyuu triste pur ni gudiʼdiʼ que. Xi bíʼnicabe yaʼ. Neca zitu nabézacabe de ra ridagulisaacabe, biʼniʼ gunaa riʼ stipa pur cadi guixeleʼ de Jiobá ne biindaʼ guiráʼ ca guiʼchiʼ nacubi cabee xquidxi Dios, ne laaca biindaʼ ca revista Torre stiʼ ni rapa ne ¡Despertad! Guiráʼ nga gucané laabe para cadi guixélebe de Jiobá ne guni tenderbe xheelabe guidapaʼ iza guca huará que dede dxi guti.

12. Ximodo racané ti binni huará binnilidxi, cásica biʼniʼ Job.

¹² Job, hombre ni maca bizéʼtenu que, stubi si bidxiilú guendanagana gupa. Laabe gunabadiidxabe xheelabe: «Xiñee dxi cudiibe laanu guiráʼ ni galán qué niguiche ruaanu yaʼ» (Job 2:10). Nga runi, qué ridxagayaanu xiñee guníʼ Santiagu naca Job ti ejemplu, purtiʼ qué nireebe gana ne biʼniʼ huantarbe. Santiago 5:11 na sicaríʼ: «Casi uca Job: nabé naná ni beeda luguiá be, peru qué nibí sa be atrá. Ne nanna tu xi biʼni Señor para laabe óraque, purti riá Señor binni, ne rilaselaʼdxi laacaʼ». Zaqueca yanna riʼ, ora guʼyaʼ ca familia ca pabiáʼ nadxibalú binnilídxicaʼ ni huará ca racaneni laacaʼ cadi guireecaʼ gana.

13. Xi cadi naquiiñeʼ guni binni pa napa tuuxa binnilidxi ti guendahuará malu.

¹³ Stale de cani huayaca huará ti binnilidxi huaniʼcaʼ cadi casi zecaʼ runi crecaʼ ni cazaacacaʼ, sínuque rácani nagana para laacaʼ. Laaca huaníʼcabe nabé risaca nga modo guidxaagalú ti familia guendanagana ca. Zándaca gaca nagana para laacabe guchaacabe modo nabánicabe, peru zanda guiaacabe ni pa gúnicabe stipa. Peru cadi galán diʼ guchaagacabe modo nabánicabe ne modo nabani xcaadxi binni ni qué gapa ti binni huará. Laaca cadi jneza guiníʼ íquecabe jma galán modo nabani ca binni ca que laacabe o guiníʼ íquecabe cadi jneza ni cazaacacabe. Ni dxandíʼ nga guirutiʼ ganna xi guendanagana cadiʼdiʼ xcaadxi binni. Ca diidxaʼ ni guníʼ Jesús riʼ riguixhedxícani ladxidóʼ guiráʼ ca xpínnibe: «Latáʼ ra nuaa irá ni ma bidxaga de cuyubi modo guía ladxidóʼ, cani ma qué ganda guni irá ni rucaa cabe laa guni [...]. Latáʼ ra nuaaʼ, zaziilaʼdxi ladxidóʼ to» (Mateo 11:28).

CANI JMA NAQUIIÑEʼ QUIXHE ÍQUENU GÚNINU

14. Xii nga ni jma naquiiñeʼ quixhe ique binni guni.

¹⁴ Ora gaca huará tuuxa, galán guietenalaʼdxiʼ binnilídxibe ca diidxaʼ riʼ: «Peru ra nuu stale tu gudii conseju la? raca cani» (Proverbios 15:22). Galán guidaaguʼ guidubi familia ca para gúʼyacaʼ xi guiráʼ chiguidxaagalucaʼ pur guendahuará ca. Ora gúnicabe nga, jma jneza guiniʼnécabe Dios ne gúʼyacabe xi cusiene Stiidxabe (Salmo 25:4). Xi naquiiñeʼ guiníʼcabe óraca yaʼ. Naquiiñeʼ guiníʼcabe xi tratamientu guicaabe, pagala chiguiree ni ne ximodo zanda gacanécabe. Tuu nga primé ni naquiiñeʼ guʼyaʼ binni huará ca. Ximodo zanda gacané xcaadxi binnilídxicabe. Ximodo zuchaa modo nabani cada tobi de laacabe pur cani chigúnicabe. Ximodo zanda gacanécabe binni ni guʼyaʼ laabe para cadi gusaana de guiziidiʼ de Dios ne para cadi guiaadxaʼ xcaadxi cosa laa.

15. Ximodo racané Jiobá ca familia ni napa tuuxa binnilidxi ti guendahuará malu.

¹⁵ Ora guinábacabe gacané Jiobá laacabe lu cani gúnicabe, guiníʼ íquecabe ni na Stiidxabe ne chinándacabe ni gúʼndacabe la? zacaacabe stale ndaayaʼ jma que biaʼ ni guiníʼ íquecabe. Zándaca qué guianda guendahuará stiʼ binnilídxicabe. Peru pa guiráʼ ora guyúbicabe gacané Jiobá laacabe, zanda gacanebe laacaʼ lu intiica si ni guidxaagalucaʼ (Salmo 55:22). Ti salmista bicaa: «Guendanachaʼhuiʼ stiluʼ, Jiobá, bidiini stipa naa. Ora bidale cani ruchiiñaʼ xquendabiaaneʼ, lii gudixhedxiluʼ xhialmaʼ pur guiráʼ ni gúdxiluʼ naa» (Salmo 94:18, 19; laaca zanda gúʼndaluʼ Salmo 63:6-8).

XIMODO GACANENU XIIÑINU

16, 17. Ximodo zanda gusiene binni xiiñiʼ xi guendahuará napa bíʼchicaʼ o bizáʼnacaʼ.

¹⁶ Ca guendahuará malu ca zanda gucaacani xiiñiʼ binni gapa guendanagana. Nga runi, zanda gacané bixhózecabe laacabe guiénecabe xi guendanagana napa binnilídxicabe ne ximodo zanda gacanécabe. Pa tobi de ca xiiñicabe nga huará la? naquiiñeʼ gacanécabe xcaadxi xiiñicabe guiénecaʼ cadi pur cayuni tendércabe ne cayápacabe ni huará ca maʼ cadi nadxiicabe laacaʼ. Ne cadi naquiiñeʼ gudii binni lugar chuʼ xiana ladxidóʼ xiiñicaʼ nin tindesaacaʼ, sínuque naquiiñeʼ gacanécabe laacaʼ gannaxhiisaacaʼ ti ganda gudxiilú guiracaʼ guendanagana ni nápacaʼ pur guendahuará ca.

¹⁷ Jma zacanécabe ca xiiñicabe ni nahuiiniʼ pa guinabadiidxacabe laacaʼ xi runi sentircaʼ, lugar de gusiénecabe laacaʼ né stale diidxaʼ xi guendahuará nga napa binni ca, neca zanda gábicabe laacaʼ xi yuubaʼ nga cayuniná laabe. Pa ca xiiñicabe ni nazaaca gudiicaʼ cuenta qué zanda guni binni huará ca stale cosa ni rúnicabe la? jma zacané nga laacabe gannaxhiicabe ne guiácabe laabe (1 Pedro 3:8).

18. Ximodo zanda gacané binni ca xiiñiʼ ni huaniisi guiénecaʼ guendanagana nápacaʼ pur huará ti binnilídxicaʼ, ne ximodo zanda gacané nga laacaʼ.

¹⁸ Naquiiñeʼ gacanécabe ca xiiñicabe ni huaniisi guiénecaʼ xi guendanagana cadxaagalúcabe ne pur nga zuchaa caadxi cosa ni maʼ biaa cada tobi de laacaʼ gúnicaʼ. Cumu naquiiñeʼ quíxecabe saca chebe doctor ne ca medicina stibe la? zándaca maʼ qué zazíʼcabe guiráʼ cosa ni gacalaʼdxiʼ xcaadxi xiiñicabe. Ñee zadxiichi ca xiiñicabe ne zaníʼ íquecaʼ cadi cudiicabe laacaʼ ni caquiiñecaʼ la? o ziénecaʼ ni cazaacacabe dede gusaana de guinábacaʼ caadxi cosa ni ñuuláʼdxicaʼ ñápacaʼ la? Pur modo gúʼyacabe guendanagana ca ne pur modo guiniʼnécabe ca xiiñicabe zándaca guidxiichicaʼ o guiénecaʼ ni cazaacacabe. Ne stale familia ni napa ti binnilidxi huará rusiidicaʼ xiiñicaʼ chinándacaʼ conseju bicaa Pablu riʼ: «Cadi guni tu xiixa para si tidi tu lú stobi, nin para chuʼ tu udxiiba laatu, sínuque cada tobi gaca nadóʼ ne usisaca stobi, ne cadi laca laa. Cadi sti si tu ma cá ique tu, sínuque laucaa ique ni caquiiñe stobi» (Filipenses 2:3, 4).

XI NAQUIIÑEʼ GUʼYAʼ BINNI ORA CUÍ MODO GUIANDA BINNILIDXI

19, 20. 1) Xi naquiiñeʼ guni ti binni ni naca xaíque ndaaniʼ ti yoo ora gaca huará binnilidxi. 2) Neca cadi naca Biblia ti libru de medicina, xi conseju rudiini para gudxiilú binni ca guendahuará stiʼ.

¹⁹ Ca xpinni Cristu ricaacaʼ ca tratamientu ni qué zucaa laacaʼ gucheenecaʼ ley stiʼ Dios. Ora gaca huará tuuxa binnilídxicabe, nagueendaca ruyúbicabe modo guianda. Zándaca caquiiñeʼ gúʼyacabe xii nga ni jma jneza gúnicabe ora gadxé gadxé ni guiníʼ ca doctor ca. Ne lu ca últimu iza huadiʼdiʼ ca, huahuinni xcaadxi guendahuará, ne stale de laacani gastiʼ ti tratamientu galán para ganda guiándacani. Nuu biaje raca nagana para binni guidxela ti doctor ni gabi laa xipeʼ guendahuará napa. Xi naquiiñeʼ guni ti xpinni Cristu óraca yaʼ.

²⁰ Neca tobi de cani bicaa Biblia guca doctor ne apóstol Pablu gudxi Timoteu xi gueʼ para guendahuará stiʼ la? Stiidxaʼ Dios cadi ti libru de medicina diʼ ni, sínuque rusiidini ximodo guibani binni jneza ne ximodo chuʼcaʼ gaxha de Dios (Colosenses 4:14; 1 Timoteo 5:23). Nga runi, ti xpinni Cristu ni naca xaíque ndaaniʼ ti yoo naquiiñeʼ guʼyaʼ xi tratamientu zanda guicaa binnilidxi. Zándaca gacaláʼdxibe chiguuyabe xi na xcaadxi doctor (zanda gúʼndaluʼ Proverbios 18:17). Nanna dxíchinu racaláʼdxibe guyúbibe tuuxa doctor para gacané binni huará ca cásica runi stale binni. Nuu tu laa jma riuulaʼdxiʼ guyubi xcaadxi tratamientu. Lu ca cosa riʼ laaca cada tobi naquiiñeʼ guʼyaʼ xi guni. Peru ora guidxaagalú ca xpinni Cristu xiixa guendanagana rudiicaʼ lugar gueeda gaca Stiidxaʼ Dios ti biaaniʼ para ñeecaʼ ne ti biaaniʼ para neza rizacaʼ (Salmo 119:105). Ne qué rusaanacaʼ de chinándacaʼ ca conseju ni zeeda lu Biblia (Isaías 55:8, 9). Nga runi, qué lica ruyúbicabe binni ni riquiiñeʼ espiritismo para gánnacabe xi guendahuará nápacabe, nin guicaacabe xcaadxi tratamientu ni gucaa laacabe gucheenécabe Stiidxaʼ Dios (Salmo 36:9; Hechos 15:28, 29; Apocalipsis 21:8).

21, 22. Xi guníʼ ique ti gunaa de Asia de ca conseju ni zeeda lu Biblia, ne xi guleendube pur bíʼnibe ni nácani.

²¹ Zacá bizaaca ti gunaa de Asia. Cadi xadxí de bizulú cayuundané ca testigu stiʼ Jiobá laabe, gúpabe ti dxaapahuiiniʼ ante guizaa xpeeu ne gunaa 1 kilu ne 470 gramu. Nabé guyuube xizaa ora gudxi doctor laabe zaca huará xquendabiaaniʼ baʼduhuiiniʼ que ne qué zanda saʼ. Doctor que gudxi laabe chisaanabe xiiñibe ra ricaacabe ca baʼduhuiiniʼ ni huará. Xheelabe laaca qué ganna xi guni. Yanna, tu zanda gacané laabe yaʼ.

²² Sicaríʼ guníʼ gunaa que: «Rietenalaʼdxeʼ biziideʼ lu Biblia zeeda gaca xiiñiʼ binni ti herencia ni rudii Jiobá, ngue runi biiyaʼ baʼduhuiiniʼ que casi ti regalu ni bidii Jiobá naa» (Salmo 127:3). Pur ngue gudixhe íquebe chinebe herencia bidii Dios laabe que ra lídxibe ne gápabe laa. Primegá que gúcani nagana para laabe, peru ca xhamígube xpinni Cristu, ni nuu lade ca binni ridagulisaa de raqué, gucanecaʼ laabe, ngue runi gunda bidxiilube guendanagana que ne gúpabe xiiñibe casi naquiiñeʼ gúnibe ni. Doce iza despué, dxaapahuiiniʼ que maʼ rié ca guendaridagulisaa ni rápacabe ndaaniʼ Yoo stiʼ Reinu ne riuulaʼdxiʼ guidxaaga xcaadxi ni nahuiiniʼ biaʼ laa. Jñaabe guníʼ sicaríʼ: «Nayecheʼ nuaaʼ pur ca conseju ni zeeda lu Biblia, purtiʼ gucanécani naa guneʼ ni jneza. Biblia gucané naa gapaʼ xquendabiaaneʼ nayá nezalú Jiobá Dios ne pur nga qué ñuneʼ xiixa ni nucaa naa ñaca arrepentir despué».

23. Ximodo riguixhedxí Biblia ladxidóʼ ca binni ni huará ne cani ruuyaʼ laacabe.

²³ Nánnanu ziuu dxi zaree guiráʼ guendahuará. Isaías, ti hombre ni riguixhená, guníʼ zedandá dxi «guirutiʼ tu [...] zaníʼ: “Huaraʼyaʼ”» (Isaías 33:24). Maʼ cadi candaa zaca ni na ca diidxaʼ riʼ ndaaniʼ guidxilayú cubi stiʼ Dios. Peru napa xidé gudxíʼlunu guiráʼ ca guendahuará ni gápanu ne guendaguti dede ora guedandá guidxilayú cubi ca. Galanpeʼ nga nápanu Stiidxaʼ Dios para gacané laanu ne gabi laanu xi naquiiñeʼ gúninu. Ca ley ni cudii Biblia laanu para gánnanu ximodo sanu qué ziuu dxi guininu maʼ qué zaquiiñeʼ cani, ne laaca qué zadxaacani casi ruchaa cani riníʼ binni guidxilayú. Nga runi, binni ni nuu xpiaaniʼ riníʼ ique biaʼsi ni bicaa salmista riʼ: «Qué ruchee diʼ ley stiʼ Jiobá, riguixhedxini ladxidóʼ binni. Jneza ni rusietenalaʼdxiʼ Jiobá laanu, ne riguuni xpiaaniʼ binni ni qué ganna. [...] Ca ley stiʼ Jiobá ni caníʼ modo gaca juzgar binni dxandíʼ cani; huahuinni jneza cani [...]; cani guni ni nácani zacaa ti premiu» (Salmo 19:7, 9, 11).