7 ndaa

Ximodo guni orarnu para ganda guidxíñanu Dios

Xiñee risácapeʼ guiníʼnenu Dios guiráʼ ora (1)

Tuu nga naquiiñeʼ guiníʼnenu lu oración stinu, ne ximodo (2, 3)

Xii ndiʼ naquiiñeʼ guinábanu lu oración stinu (4)

Pora zanda guiníʼneluʼ Dios (5, 6)

Ñee rucaadiaga Dios guiráʼ ca oración ca la? (7)

1. Orar nga guiníʼnenu Dios ne respetu. Naquiiñeʼ guiníʼnenu laabe guiráʼ ora. Pa gúninu ni la? zadxíñanu gaxha de laabe casi ti xhamígunu ni nadxiinu stálepeʼ. Nécapeʼ Jiobá naca ti Dios roʼ ne nandxóʼ rucaadiágabe laanu ora guiníʼnenu laabe. Ñee riníʼneluʼ Dios guiráʼ ora la? (Salmo 65:2; 1 Tesalonicenses 5:17.)

2. Ora riníʼnenu Dios runi adorarnu laabe. Pur nga runi, naquiiñeʼ guni orarnu tobi lucha si Dios, Jiobá. Dxi biuu Jesús lu Guidxilayú riʼ la? biʼniʼ orarbe Bixhózebe guiráʼ ora, guirútiruʼ. Pur nga runi laanu naquiiñeʼ gúninu zacaca (Mateo 4:10; 6:9). Cada guni orarnu la? naquiiñeʼ gúninu ni lu lá Jesús. Purtiʼ zacá rusihuínninu nápanu respetu puestu stibe ne nápanu fe ra bidiibe laabe gátibe para quíxebe pur laanu (Juan 14:6; 1 Juan 2:1, 2).

3. Ora guiníʼnenu Dios la? naquiiñeʼ gúninu ni de guidubi ladxidoʼno. Cadi naquiiñeʼ guininu ca oración ca de memoria, nin gúʼndanu ni lu ti guiʼchiʼ ra ca stale oración (Mateo 6:7, 8). Zanda guni orarnu modo tiisi chuʼnu peru ne respetu, ora tiica ne ratiica nuunu, purtiʼ Dios runadiaga ca oración rúninu chaahuigá o ni gúninu ndaaniʼ ladxidoʼno (1 Samuel 1:12, 13). Ora guiníʼnenu Dios laasinu la? zanda guyúbinu ti lugar ra chuʼnu stúbisinu ne ra gastiʼ ridxi (Marcos 1:35).

4. Xi naquiiñeʼ guinábanu ora guiníʼnenu Dios yaʼ. Intiica ni zanda guchiña laanu Jiobá (Filipenses 4:6, 7). Oración ni gulaquistí Jesús ruluíʼ ni laanu de que naquiiñeʼ guni orarnu pur lá Dios ne pur ni naguixhe íquebe gaca. Laaca zanda guinábanu laabe ni caquiiñenu para guibáninu, gutiidiláʼdxibe stóndanu ne gacanebe laanu gucaananu ni racalaʼdxiʼ beela ládinu (Mateo 6:9-13). Ca oración stinu cadi naquiiñeʼ gaca cani para laasinu. Naquiiñeʼ guinábanu ni riulaʼdxiʼ si Dios gaca (1 Juan 5:14).

5. Zanda guiníʼneluʼ Dios ora guniibi ladxidoʼloʼ gudiiluʼ xquíxepeʼ Dios o para gusisácaluʼ laabe (1 Crónicas 29:10-13). Cadi gusaanuʼ de guni orarluʼ ora gapuʼ guendanagana ne ora fe stiuʼ guihuinni pa dxandíʼ ni (Salmo 120:1; 1 Pedro 5:7). Laaca jneza nga guiníʼnenu Dios ante guidoʼnoʼ (Mateo 14:19). Jiobá cayabi laanu guiníʼnenu laa sin «guiaana dxí [n]u» (Efesios 6:18).

6. Pa laanu gucheenu la? nápanu xidé guni orarnu ne guinábanu Jiobá gutiidilaʼdxiʼ ca stóndanu ne guiubaláʼdxibe laanu. Purtiʼ Jiobá nuuca «para guxhiá stóndanu» pa laanu guininu guiráʼ ni maʼ bíninu ne gúninu ti stipa naroʼbaʼ pur maʼ cadi guibiguetaʼ gúninu ni (Salmo 86:5; Proverbios 28:13).

7. Jiobá rucaadiaga ca oración stiʼ si ca binni nachaʼhuiʼ. Para ganda gucaadiágabe oración stiuʼ la? naquiiñeʼ gúniluʼ stale stipa pur guibániluʼ casi modo na ley stiʼ Dios (Proverbios 28:9; 1 Pedro 3:12). Cadi gacuʼ naroʼ ora guiníʼneluʼ Dios (Lucas 18:9-14). Guiráʼ ni guinabuʼ ora guni orarluʼ naquiiñepeʼ gúniluʼ cani, purtiʼ zacá zuluiʼluʼ napuʼ fe ne caníʼneluʼ laabe de guidubi ladxidoʼloʼ. Zacatiʼ zacabi Jiobá ca oración ni gúniluʼ (Hebreos 11:6).