1 Ndaa

Dios cayabi lii gaca xhamíguluʼ laa

Dios racalaʼdxiʼ gácaluʼ xhamigu. Nannuʼ de que lii zanda gaca xhamíguluʼ ti Binni ni jma risaca lu guidubi naca Guibáʼ ne Guidxilayú la? Abraán, ni bibani ma raca stale iza biree lá xhamigu Dios (Santiago 2:23). Biblia ruzeeteruʼ de xcaadxi hombre ne gunaa ni biéchecaʼ gúcacaʼ xhamigu Dios ne gucuaacaʼ stale ndaayaʼ. Ca dxi riʼ la? laaca nuu stale binni lu guidubi naca Guidxilayú ni maʼ nácacaʼ xhamigu Dios. Lii laaca zanda gácaluʼ xhamígube.

Gácaluʼ xhamigu Dios nga ni jma galán que stiʼ tutiica binni. Dios qué lica rucheené ca xhamigu ni qué rusaana laa (Salmo 18:25). Guendaraca xhamigu Dios nga ni jma galán que guendarapa bidxichi. Ora rati  ca binni napa ca la? gadxé binni riaanané xpidxíchicaʼ. Peru, cani riecheʼ gaca xhamigu Dios laa la? nápacaʼ ti ni risaca stale ne guirutiʼ zanda gaxha ni laacaʼ (Mateo 6:19).

Zándaca chuʼ tuuxa ni qué zaná guiziidirouʼ de cani rusiidiʼ Dios. Zándaca laaca ca xhamíguluʼ pacaa ca binnilídxiluʼ nga guni ni (Mateo 10:36, 37). Pa chuʼ tuuxa guxidxi o náʼ guniná lii la? gunabadiidxaʼ laaca lii: «Tuu nga riuulaʼdxeʼ gusiecheʼ, binni la? o Dios». Guníʼ ique si: pa ñuu tuuxa ñabi lii gusaanu de goú, ñuʼnuʼ ni la? Coʼ njaʼ. Para guibáninu la? naquiiñeʼ guidoʼno. Dios la? zanda gudii lii guendanabani ni qué zaluxe. Nga runi, biziidiruʼ ximodo zanda gaca xhamíguluʼ Dios ne cadi chuʼ tu gucueeza lii (Juan 17:3).