7 Ndaa
Ti guendarulidxi de dxiqué
Jiobá qué zaná diʼ gunitilú binni malu Paraisu ca. Ca xhamígusibe nga chiguibani luni. Xi chigaca ca binni malu ca yaʼ. Para gannuʼ xi la? biiyaʼ xi guca dxi bibani Noé. Maʼ raca stale iza bibani Noé. Gúcabe tobi hombre nachaʼhuiʼ ni nabé gucalaʼdxiʼ guni ni na Jiobá ne stale stipa. Peru xcaadxi de ca binni Guidxilayú que bíʼnicaʼ ni malu. Ngue runi Jiobá gúdxibe Noé chigueedanebe ti nisaguie naroʼbaʼ para gunitilú guiráʼ binni malu que. Laaca gúdxibe Noé guzáʼ ti arca para cadi gati laa ne ca binnilidxi ora gueeda Nisaguie naroʼbaʼ que (Génesis 6:9-18).
Noé ne ca binnilidxi bíʼnicaʼ arca que. Noé yeguidxi xcaadxi binni que chigueeda ti nisaguie naroʼbaʼ, peru guirutiʼ nucaadiaga laabe. Bíʼnirucabe ni malu. Ora Noé biluxe arca que la? guluube stale maniʼ ndaaniʼ ni, ne guyuube laabe ne ca binnilídxibe. Óraque, Jiobá bedané nisaguie naroʼbaʼ que. Biaba nisaguie que cuarenta dxi ne cuarenta gueelaʼ, ne nisa que bindaahua Guidxilayú que (Génesis 7:7-12).
Ca binni malu que gúticaʼ, peru Noé ne ca binnilidxi bilacaʼ. Jiobá gupa laacabe ca dxi biaba Nisaguie naroʼbaʼ que, ne bisaana laacabe lu ti Guidxilayú nayá sin guendamalu (Génesis 7:22, 23). Biblia na, zabiguetaʼ dxi Jiobá zunitilú cani qué naʼ guni ni jneza. Ca binni nachaʼhuiʼ qué zanitilúdicaʼ. Ora maʼ naca Guidxilayú riʼ ti Paraisu la? zabánicabe lu ni sin qué guiuu dxi gáticabe (2 Pedro 2:5, 6, 9).
Ca dxi riʼ stale binni runi ni malu. Guidxilayú riʼ dxaʼ de guendanagana. Jiobá nabé ruseendaʼ ca Testigu stiʼ para gulídxicaʼ binni, peru jma stale qué riulaʼdxiʼ gucaadiaga stiidxaʼ Jiobá. Qué nacaʼ guchaacaʼ modo nabánicaʼ nin la nacaʼ gabi Dios laacaʼ xii nga jneza ne xii nga ni cadi jneza. Xi chiguizaaca ca binni riʼ yaʼ. Ziuu dxi guchaacabe la? stale de laacabe qué lica zuchaacabe. Maʼ cadxiña dxi guinitilú binni malu (Salmo 92:7).
Guidxilayú riʼ qué zanitilú diʼ ni; zácani ti paraisu. Cani gaca xhamigu Dios zabánicaʼ ndaaniʼ Paraisu ca sin qué guiuu dxi gáticaʼ lu Guidxilayú riʼ (Salmo 37:29).