Capítulo 12
Xiñee riuunísanu
1. Xiñee naquiiñeʼ guizaaláʼdxinu gánnanu xi pur riuunísanu.
LU IZA 29 que Juan guluunísabe Jesús ora guluube laa ndaaniʼ guiiguʼ Jordán que, ne Jiobá peʼ biʼyaʼ ni guca que ne bisihuínnibe jneza ni (Mateo 3:16, 17). Ora guyuunisa Jesús que gudíxhebe xi naquiiñeʼ guni ca discípulo stibe. Gudiʼdiʼ si chonna iza arondaʼ que gúdxibe laacaʼ: «Irá xixé ni nuu ibáʼ ne ni nuu guidxilayú ma nexhe ladxi nayaʼ» (Stiidxa Dios Didxazá). Ne gúdxibe laacaʼ gúnicaʼ sicaríʼ: «Laché ne lachigusiidiʼ binni de guiráʼ guidxi sananda naa, ne lacuunisa laacaʼ lu lá Bixhozeʼ, ne lu lá Xiiñiʼ ne lu lá espíritu santu» (Mateo 28:18, 19, NM). Ñee maʼ guyuunísaluʼ modo biʼniʼ mandar Jesús ca la? Pa caʼruʼ, ñee maʼ cayuuluʼ listu para laani la?
2. Gunáʼ nga ca guendarinabadiidxaʼ ni naquiiñeʼ guicábinu pa racaláʼdxinu chúʼnisanu.
2 Neca maʼ guyúʼnisanu o cayuʼnu listu para laani la? cada tobi de laanu naquiiñeʼ guiene xi pur chichuunisa pa racalaʼdxiʼ guni ni na Jiobá ne guibani ndaaniʼ guidxilayú cubi ca. Ca ndiʼ nga caadxi guendarinabadiidxaʼ ni naquiiñeʼ guicábinu: Ñee laaca pur ni guyuunisa Jesús nga riuunisa ca xpínnibe yanna riʼ la? Xii nga na Jesús ora guníʼ «lacuunisa laacaʼ lu lá Bixhozeʼ, ne lu lá Xiiñiʼ ne lu lá espíritu santu». Ximodo naquiiñeʼ guibáninu pa riénenu xiñee nga riúʼnisanu.
Cani guluunisa Juan
3. Tu si ngue naquiiñeʼ cúʼnisa Juan.
3 Biaʼ xhoopaʼ beeu ante chúʼnisa Jesús, bizulú Juan ni guluunisa que bicheeche diidxaʼ lu desiertu stiʼ Judea, sicaríʼ guniʼbe: «Lainaba perdón Dios [«lagaca arrepentir», NM], purti ma zeda dxiña dxi guni mandar» (Mateo 3:1, 2). Cani bicaadiaga laabe que bizuubacaʼ diidxaʼ ne guniʼcaʼ stóndacaʼ, guca arrepentircaʼ ne guyecaʼ ra nuu Juan para cúʼnisabe laacaʼ ndaaniʼ guiiguʼ Jordán. Juan guca mandar cuʼnisa ca judíu si (Lucas 1:13-16; Hechos 13:23, 24).
4. Xiñee naquiiñeʼ ñaca arrepentir ca judíu ni guyuu lu primé siglu que nagueendaca.
4 Ca judíu que naquiiñeʼ ñaca arrepentircaʼ nagueendaca. Lu iza 1513 ante de ca dxi stiʼ Jesús, guidubi guidxi que biʼniʼ ti pactu ne Jiobá Dios lu dani Sinaí, ca bixhoze gola ca judíu que bidii stiidxacaʼ laabe dxandíʼ zúnicaʼ ni nabe. Peru ra bíʼnicabe ca cosa ni nabé malu que la? qué ñúnicabe casi bidii stiidxacabe Jiobá lu pactu que, ngue runi guniʼbe xi zazaacacaʼ. Ca dxi stiʼ Jesús que maʼ zeeda guidxiña ti guendananá guidxi que. Maʼ gaxha nuu «dxi stiʼ Jiobá, naroʼbaʼ ne ruchibi», laani nga dxi ni guníʼ Malaquías gueeda que. «Dxi» que beedani lu iza 70 despué de ca dxi stiʼ Jesús, ora binitilú ca soldadu stiʼ Roma Jerusalén ne yuʼduʼ stiʼ, ne biiticabe jma de ti millón judíu. Juan, ni guluunisa ne biʼniʼ adorar Dios jneza ne stale gana que, biseendacabe laabe ante guinitilú guidxi que para «quixhe chaahui be binni» para Jiobá. Ca judíu que naquiiñeʼ ñaca arrepentircaʼ purtiʼ bicheenecaʼ pactu stiʼ Ley ni bicaa Moisés que, ne naquiiñeʼ ñuucabe listu para nidxagalúcabe ni chiguseendaʼ Jiobá que, Xiiñibe, Jesús (Malaquías 4:4-6; Lucas 1:17; Hechos 19:4).
5. 1) Xiñee qué ninagá Juan niguunísabe Jesús ora guyé ra nuube. 2) Xi para guyuunisa Jesús.
5 Lade ca binni ni guyé ra nuu Juan para chúʼnisa que laaca guyuu Jesús. Peru xiñee yaʼ. Cumu nanna Juan qué liica nucheebe para guiniʼbe xi bíʼnibe la? gudxi laabe: «Jma naquiñe cuʼ nisa lu naa, yanna nouʼ cua niʼsa lii la?». Peru maʼ gadxé ngue xi pur chichuunisa Jesús, ngue runi gúdxibe Juan: «Zaa, peru biʼni ni yanna, purti jma naquiiñe guni nu irá ni gudixhe Dios gacaʼ» (Mateo 3:13-15). Cumu qué ñalené Xiiñiʼ Dios donda la? cadi chichuunísadibe purtiʼ cayaca arrepentirbe, ne cadi caquiiñeʼ gudiibe laabe Jiobá purtiʼ nácabe de ti guidxi ni maca bidiicaʼ laacaʼ Dios. Dxi gúpabe 30 iza que guyuunísabe para guʼyaʼ Bixhózebe ni nuu guibáʼ maʼ nuube listu para gúnibe ni na, ne laasibe guyuunísabe pur nga.
6. Pabiáʼ bisisaca Jesús cani gudxi Dios laa guni.
6 Lade cani gudixhe Dios guni Cristu Jesús nga, gúnibe xhiiñaʼ Reinu (Lucas 8:1) ne gudiibe guendanabani sin donda stibe que para guilá binni ne para guzulú ti pactu cubi (Mateo 20:28; 26:26-28; Hebreos 10:5-10). Jesús qué nusiaandaʼ diʼ xi pur guyuunisa, ngue runi qué nudiibe lugar ñuu xiixa ni nucá laabe para ñúnibe cani. Dxiiñaʼ ni jma bisisácabe nga gucheechebe stiidxaʼ Reinu que, ne dede dxi gútibe bíʼnibe ni na Dios sin nucheebe (Juan 4:34).
Ca discípulo stiʼ Cristu que guyuunísacaʼ
7. Ximodo guluunisa ca xpinni Jesús binni lu iza Pentecostés stiʼ iza 33 que.
7 Juan guluunisa cani beeda gaca primé discípulo stiʼ Jesús ne guluu nézabe laacaʼ ra nuu Jesús, ne ngue nga ni chigacané laacabe chúʼcabe lu Reinu ni nuu guibáʼ ca despué (Juan 3:25-30). Ca discípulo stiʼ Jesús laaca guluunísacaʼ binni modo gúdxibe laacaʼ gúnicaʼ ni, ne laaca pur ni guluunisa Juan binni que nga guluunísacabe binni (Juan 4:1, 2). Peru lu Pentecostés stiʼ iza 33 que nga bizulú bíʼnicabe ni biʼniʼ mandar Jesús que: «Lacuunisa laacaʼ lu lá Bixhozeʼ, ne lu lá Xiiñiʼ ne lu lá espíritu santu» (Mateo 28:19). Pa gúʼyaluʼ xiná ca diidxaʼ riʼ la? dxandipeʼ zacaneni lii.
8. Ximodo nga chúʼnisanu lu lá Bixhoze Jesús.
8 Ximodo nga chúʼnisanu lu lá Bixhoze Jesús yaʼ. Nga nga guni crenu Jiobá nga labe, gánnanu tu laabe, pabiáʼ nandxoʼbe, xi maʼ bizabiruaabe gúnibe ne gunáʼ nga ca ley stibe. Guiníʼ íquenu ximodo naquiiñeʼ guiénenu cani: 1) Sicaríʼ caníʼ Salmo 83:18 de labe: «Lii, ni laluʼ Jiobá ca, lii si nga Ni Nuu Jma Luguiáʼ lu guidubi naca guidxilayú». 2) Yanna ra caníʼ tu laabe nga 2 Reyes 19:15: «Jiobá [...], lii si nga Dios ni dxandíʼ». 3) Ra caníʼ pabiáʼ nandxoʼbe nga Apocalipsis 4:11: «Señor Dios stidu, lii siouʼ nga naquiiñe udxiʼba du ne usisaca du ne iní du nandxóʼ loʼ. Purti lii bizáʼ lu irá xixé ni nuu. Uyáʼ ni ne nuu ru ni purti nga ni na luʼ». 4) Cumu laabe nga ni rudii guendanabani la? laaca naquiiñeʼ gánnanu gudíxhebe gulabe laanu de donda ne guendaguti: «Jiobá nga rulá» (Salmo 3:8; 36:9). 5) Ne naquiiñeʼ guiénenu laabe nga jma risaca ley ni rudiibe: «Jiobá nga Juez stinu, Jiobá nga riguixhe xi gaca, Jiobá nga Rey stinu» (Isaías 33:22). Cumu guiráʼ nga nácabe la? naquiiñeʼ gúninu ni na ca diidxaʼ riʼ: «Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ» (Mateo 22:37).
9. Ximodo nga chúʼnisanu «lu lá Xiiñiʼ» Dios.
9 Ximodo nga chúʼnisanu «lu lá Xiiñiʼ» Dios. Nga nga guni crenu Jesús nga labe, xi puestu nápabe ne pabiáʼ nandxoʼbe. Lá Jesús ca riniʼni «Jiobá nga rulá». Puestu ni nápabe ca gucuaabe ni purtiʼ laabe nga tobi lucha Xiiñiʼ Dios, ne laabe nga bizáʼ Dios primé (Mateo 16:16; Colosenses 1:15, 16). Lu Juan 3:16 caníʼ de laabe sicaríʼ: «Nadxii xhaata Dios binni guidxilayú [guiráʼ xixé binni ni chiguilá] ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe». Cumu qué nuchee Jesús dede dxi guti la? bisibani Dios laabe sti biaje ne jma bidii laabe derechu para guni mandarbe. Apóstol Pablu na «bidxiiba Dios laabe ne bisisaca laabe» lu guidubi naca guibáʼ ne Guidxilayú, nécaxa Jiobá si nga ni jma risaca que laabe. Nga runi «ora guiete lá be [naquiiñeʼ] guzuxibi irá [binni], ne iníʼ ca nezalú iráʼ: “Jesucristu nga Señor”, ne zacá usisaca ca Dios Bixhoze be» (Filipenses 2:9-11). Para gúninu nga la? naquiiñeʼ guzúʼbanu stiidxaʼ Jesús purtiʼ ni na Jiobá nga riniʼbe (Juan 15:10).
10. Ximodo nga chúʼnisanu «lu lá espíritu santu».
10 Ximodo nga chúʼnisanu «lu lá espíritu santu». Nga nga gánnanu xi dxiiñaʼ rúnini. Yanna, xii nga espíritu santu yaʼ. Nga nga stipa stiʼ Dios ni riquiiñebe para gúnibe cani maʼ gudixhe íquebe. Jesús gudxi ca discípulo stiʼ: «Naa zanaba lu Bixhoze udii laatu stobi ni guiaana né ca laatu para acané laatu ne usieche laatu. Cuzeete Espíritu ni riníʼ puru si ni dxandíʼ» (Juan 14:16, 17). Xi zacaneni laacabe gúnicabe yaʼ. Sicaríʼ bisiene Jesús laacabe: «Ora ma ucuaa tu Espíritu Santu la? zapa pe tu enda nandxóʼ sti Dios, ne óraque ma zanda iree tu, chi güi tu stiidxa ndaani guidxi Jerusalén ne idubi Judea ne Samaria ne idubi naca guidxilayú» (Hechos 1:8). Espíritu santu ca nga biquiiñeʼ Jiobá para gucuá Biblia: «Ca profeta sti Dios qué nusiidi ca ni ucalaʼdxi si caʼ, sínuque uníʼ ca ni na Dios casi gudxi Espíritu Santu ni laacaʼ» (2 Pedro 1:21). Nga runi ora ridúʼndanu Biblia la? ruluinu nánnanu xi dxiiñaʼ runi espíritu santu. Sti modo ruluinu nánnanu xi dxiiñaʼ rúnini nga guinábanu Jiobá gacané laanu gápanu ca guenda ni rudiini, ne tu napa cani la? «nadxii binni ne nayeche nuu, ne nuu dxí ladxidóʼ. Qué rixhacalaʼdxi stobi, ne qué runiná binni, ne nachaʼhuiʼ. Qué zaree chu de neza sti Dios, ne nadóʼ, ne rapa xpiaʼ» (Gálatas 5:22, 23).
11. 1) Xi pur riúʼnisanu yanna. 2) Xiñee casi ora ñátinu ne nibáninu nga ora riúʼnisanu.
11 Cani guyuunisa primé modo guníʼ Jesús que nga ca judíu ne ca binni de sti guidxi ni guyuucaʼ lade judaísmu, ne bizuluni dede lu iza 33 que. Qué nindaa diʼ laaca gunda guca ca samaritanu que discípulo stiʼ Cristu, ne lu iza 36 que maʼ dede ne cani cadi naca judíu ni qué ñaca circuncidar. Ante chúʼnisa ca samaritanu que ne ca binni ni cadi judíu que la? gúpacaʼ xidé laapecaʼ bidiicaʼ laacaʼ Jiobá para gúcacaʼ discípulo stiʼ Xiiñibe. Dede yanna riʼ laaca pur ngaca riuunisa cani zinanda Cristu. Ora chuʼ guidúbinu ndaaniʼ nisa ca rusihuínninu laapenu nga bidiʼnu laanu Jiobá, ne jnézape nga rácani zacá purtiʼ ora riúʼnisanu ca casi ñaca nigáʼchinu nga. Chuʼ guidúbinu ndaaniʼ nisa ca nga casi ora ñátinu purtiʼ maʼ bisaananu modo bibáninu dxiqué, ne ora guireʼnu ndaaniʼ nisa ca nga casi ora cabáninu sti biaje para gúninu ni na Dios. «Tobi si xi pur riuu nisa irá binni» ni dxandíʼ raca xpinni Cristu. Ora riuunísacabe ca rácacabe testigu stiʼ Jiobá ni zinanda Cristu ne cayuni xhiiñaʼ Dios jneza (Efesios 4:5; 2 Corintios 6:3, 4).
12. Xii nga zeeda gaca guendariuunisa stiʼ ca xpinni Cristu, ne xiñee.
12 Nezalú Dios la? risaca stale nga chúʼnisanu para guilanu. Casi dxi biluxe bizeeteʼ si apóstol Pedru modo guyáʼ arca ra bilá Noé ne binnilidxi lu Nisaguié roʼbaʼ que la? bicaabe: «Zanda gabi nu zeda gaca nisa que [ni guca Noé ora beeda Nisaguié roʼbaʼ que] casi ra uyúʼ nisa nu para bilá nu. Ne uyúʼ nisa nu, cadi para usiá nisa que ra nabiidi ladi nu, sínuque para usihuinni nu ma bia ladxidóʼ no ne canaba nu lu Dios acané laanu sa nu modo na. Bilá be laanu purti bibani Cristu de lade gueʼtuʼ» (1 Pedro 3:21). Arca que bisihuínnini dxandíʼ biʼniʼ Noé dxiiñaʼ que cásipeʼ modo gudxi Dios laa. Biluxe guyáʼ si arca que «binitilú [binni] guidxilayú chiqué, dxi bilaahua[cabe] que» (2 Pedro 3:6). «Peru xhono si binni [Noé ne binnilidxi] bilá ndaani arca que ra undisa nisa ni.» (1 Pedro 3:20.)
13. Xidé nga calá ca xpinni Cristu pur guyuunísacaʼ.
13 Yanna riʼ, cani rudiicaʼ laacaʼ Jiobá pur fe ni nápacaʼ Cristu ni biasa lade ca gueʼtuʼ ca la? riuunísacabe purtiʼ zacá rusihuínnicabe maʼ bidiicabe laacabe Dios. De racá maʼ rúnicabe ni na Dios gaca ca dxi stinu riʼ ne zacá calácabe de ca cosa malu nuu lu guidxilayú riʼ (Gálatas 1:3, 4). Maʼ qué zanitiludícabe ra guinitilú guiráʼ cosa malu ni nuu yanna riʼ. Zalácabe luni, ne Dios zudii laacabe ti guendabiaaniʼ nayá. Ndiʼ nga ni naquiiñeʼ ganna dxichi ca xpinni Jiobá na apóstol Juan: «Canitilú guidxilayú ne irá ni nuu ndaani ni que, peru qué ziuu dxi initilú ni guni ni na Dios» (1 Juan 2:17).
Gúninu dxiiñaʼ stinu
14. Xiñee cadi purtiʼ si chúʼnisanu maca bilanu.
14 Cadi jneza diʼ guiníʼ íquenu ne chuʼnisasinu maca bilanu. Zanda guilanu pa de ladxidoʼno gudiʼnu laanu Jiobá de lu lá Jesucristu ne guzulú gúninu ni na Dios sin gucheʼnu dede dxi gueeda fin. «Tu qué ixhacalaʼdxi [«guni huantar», NM] dede dxi iluxe irá ni la? zalá.» (Mateo 24:13.)
15. 1) Yanna riʼ, xii nga ni canabaʼ Dios ca xpinni Cristu ni maʼ guyuunisa. 2) Pabiáʼ naquiiñeʼ gusisácanu lu xquendanabáninu nácanu xpinni Cristu.
15 Dios laaca gudixhe ximodo guibani Jesús lu Guidxilayú riʼ. Naquiiñeʼ gátibe para gudiibe xquendanabánibe Dios. Laanu la? naquiiñeʼ gudiʼnu xquendanabáninu Dios ne gúninu guiráʼ ni nabe neca gucáʼnanu cani racaláʼdxinu (Romanos 12:1, 2). Cadi cayúnidinu ni na Dios pa neca ti lade si gúninu ni runi binni guidxilayú ni nuunu lade riʼ, o pa nabáninu para gúninu ni racaláʼdxisinu ne gúnisinu xhiiñaʼ Dios para gucáʼchinu tu nácanu. (1 Pedro 4:1-3; 1 Juan 2:15, 16). Ora bicabi Jesús ti judíu ni gunabadiidxaʼ laabe xi naquiiñeʼ guni para gapa guendanabani ni qué zaluxe la? bisihuínnibe naquiiñeʼ guibani binni jneza, peru bizeetebe sti cosa ni jma risaca: naquiiñeʼ chinándacabe laabe, o gácacabe discípulo stibe. Nga nga ni naquiiñeʼ icá íquenu gúninu lu xquendanabáninu. Qué zanda diʼ gusaananu ni dede últimu ne gúninu primeru ni racaláʼdxinu (Mateo 19:16-21).
16. 1) Xi dxiiñaʼ stiʼ Reinu naquiiñeʼ guni guiráʼ xpinni Cristu. 2) Ximodo zanda gucheechenu stiidxaʼ Reinu jneza casi rihuinni lu yaza 116 ne 117. 3) Xi rusihuínninu ora rucheechenu diidxaʼ de guidubi ladxidoʼno.
16 Galán guzéʼtenu ndiʼ sti biaje, lade ca dxiiñaʼ bidii Dios Jesús que laaca gudíxhebe guni dxiiñaʼ risaca stiʼ Reinu stiʼ Dios. Dios gulí Jesús para gaca Rey, ne dxi guyuube lu Guidxilayú riʼ bicheechebe stiidxaʼ Reinu ca ne stale gana. Laanu laaca zacaca naquiiñeʼ gucheechenu diidxaʼ, ne nápanu stale razón para gúninu ni de guidubi ladxidoʼno. Zacá nga zusihuínninu rudiʼnu xquíxepeʼ Jiobá purtiʼ laasibe nga nápabe derechu de guni mandarbe, ne zusihuínninu nadxiinu binni (Mateo 22:36-40). Laaca rusihuínninu nuunu tobi si ne guiráʼ cani runi adorar Jiobá lu guidubi naca Guidxilayú riʼ, nga nga cani rucheeche stiidxaʼ Reinu ca. Guiranu nuunu ugaandanu guendanabani ni qué zaluxe ni chichuu dxi guni mandar Reinu ca lu Guidxilayú riʼ.
Ni guietenaláʼdxinu
• Xiñee laaca pur ni guyuunisa Jesús nga riúʼnisanu ca dxi riʼ, ne ximodo nga gadxé ni.
• Xi riníʼ ca diidxaʼ riʼ: «Lacuunisa laacaʼ lu lá Bixhozeʼ ne lu lá Xiiñiʼ ne lu lá espíritu santu».
• Xi guiráʼ nga naquiiñeʼ gúninu ora maʼ guyúʼnisanu.
Ne ca binnilídxinu
[Ca dibuju/foto ni zeeda lu yaza 116]
CAADXI MODO ZANDA GUCHEECHENU STIIDXAʼ REINU
Ne cani runinenu dxiiñaʼ
Ne cani rinenu scuela
Lu calle
De yoo pur yoo
Ora guibiguetaʼ chigánnanu cani riuulaʼdxiʼ guiziidiʼ
Cani rigúʼndanenu Biblia ralídxicaʼ