Capítulo 18
Cadi zinándanu binni guidxilayú
1. 1) Xi gunabaʼ Jesús pur ca discípulo stiʼ ante gati. 2) Xiñee cadi naquiiñeʼ chinándanu binni guidxilayú.
GUEELAʼ ante gati Jesús que biʼniʼ orarbe pur ca discípulo stibe. Cumu nánnabe nabé zucaalú Binidxabaʼ ca xpínnibe la? sicaríʼ gunábabe Bixhózebe: «Cadi canaba lii gaxhu laacabe de ndaani guidxilayú, sínuque ulá lu laacabe de binidxabaʼ. Cásica naa cadi zinanda [binni] guidxilayú zaqueca laacabe, cadi zinanda cabe [binni] guidxilayú» (Juan 17:15, 16). Xiñee cadi naquiiñeʼ chinándanu binni guidxilayú yaʼ. Purtiʼ Binidxabaʼ nga cayuni mandar laacabe, ne laanu ca xpinni Cristu qué racaláʼdxidinu chuʼnu lade cani cayuni mandarbe laacaʼ (Lucas 4:5-8; Juan 14:30; 1 Juan 5:19).
2. Ximodo bisihuinni Jesús qué ninanda binni guidxilayú.
2 Cadi purtiʼ qué ninanda Jesús binni guidxilayú guininu qué ñánnaxhiibe laacaʼ, sínuque ni bíʼnibe nga bisiándabe binni huará, gundísabe gueʼtuʼ, bisiidibe binni xii nga Reinu stiʼ Dios ne dede gútibe pur laacaʼ. Peru qué ñuuláʼdxidibe xpiáʼ ca binni ni rihuinni cayúnicaʼ ni na Binidxabaʼ nin ca guendaquéiquiiñeʼ ni bíʼnicaʼ. Ngue runi, gudixhenabe ca discípulo stibe lu stale cosa, cásixa cadi chúʼnecaʼ tuuxa ni cadi xheelacaʼ, ne cadi icá íquecaʼ bidxichi nin guyúbicaʼ guisácacaʼ jma (Mateo 5:27, 28; 6:19-21; Lucas 20:46, 47). Nga runi qué ridxagayaadinu gánnanu xiñee laaca qué ninabe ñuube lu política. Neca judíu laabe la? qué ñuudibe ra gudinde ca judíu ne ca romanu que pur política.
Jesús qué ñeeda gaca diʼ rey lu Guidxilayú
3. 1) Xi donda bigaanicabe Jesús nezalú Pilatu, ne xiñee. 2) Xi rusihuinni qué niná diʼ Jesús ñuni ca binni que laa rey.
3 Guiníʼ íquenu xi guca ora guníʼ cani naca xaíque lu religión stiʼ ca judíu que igaa Jesús ne chinécabe laabe nezalú Poncio Pilatu, ti gobernador stiʼ Roma. Ca binni que nabé bidxiichicabe purtiʼ gudxi Jesús laacabe cadi jneza diʼ nga rusihuinnisícabe cayúnicabe ni na Dios. Peru para gusabanáʼ gobernador que laabe la? bigaanicabe donda riʼ laabe: «Unaʼze du hombre ri caguite ca binni xquidxi du. Cayabi be laaca cadi naquiiñe quixe ca lu ná gobiernu, ne laca na be laabe nga Cristu ni zeda tí de rey» (Lucas 23:2). Rihuínnica cusiguiicabe, purtiʼ ti iza ante gaca nga gucalaʼdxiʼ binni ñuni Jesús rey, peru laabe qué ninádibe (Juan 6:15). Cristu maca nanna zaca Rey, peru guibáʼ (Lucas 19:11, 12). Ne cadi binni diʼ nga chigucuí laabe, sínuque Jiobá.
4. Ñee jneza nga na Jesús quixe binni impuestu la?
4 Maʼ xhonna gubidxa si cayaadxaʼ para guinaazecabe Jesús, ca fariseu que gucaláʼdxicaʼ niniʼbe pa zaa quixe binni impuestu o coʼ ti nugaanicaʼ donda laabe. Peru gúdxibe laacaʼ: «Latané moneda ca guuyaʼ. Tu cá lú ni». Ora bicábicabe laabe «César» la? gúdxibe laacaʼ: «Laudii César sti César, ne laudii Dios sti Dios» (Lucas 20:20-25).
5. 1) Xi bisiidiʼ Jesús ca discípulo stiʼ ora gunaazecabe laa. 2) Xi pur ngue guníʼ Jesús bicueeza Pedru. 3) Xi bíʼnicabe últimu que.
5 Qué liica ñuu dxi nucaa Jesús binni nucaalú cani runi mandar ndaaniʼ xquidxi. Ora guyé caadxi soldadu ne xcaadxi binni para guinaazecaʼ laabe la? gulee Pedru ti espada para bicaalú tobi de laacabe ne bigabe ti chu diaga. Peru Jesús gudxi laabe: «Guluu espada stiuʼ jlugar, purti irá ni cuʼ ná espada la? zati né espada» (Mateo 26:51, 52). Sti dxi que gúdxibe Pilatu xiñee bicueezabe Pedru, rábibe laa: «Cadi beda aca diaʼ rey ndaani guidxilayú riʼ, purti pa ñaca beda aca rey rarí la? ñasa ca xpinneʼ, nucaa lú para cadi ninaaze ca judíu naa» (Juan 18:36). Nécapeʼ Pilatu bidii cuenta qué liica gapa Jesús donda pur guiráʼ ni cugaanicabe laa que la? bíʼnibe ni na ca binni ni cadxiichi que ne biʼniʼ mandarbe guicá Jesús lu yaga (Lucas 23:13-15; Juan 19:12-16).
Ca discípulo zinándacaʼ ejemplu stiʼ Jesús
6. Ximodo bisihuinni ca primé xpinni Cristu cadi zinándacaʼ binni guidxilayú peru gunnaxhiicaʼ laacabe.
6 Ca discípulo stiʼ Jesús que biénecaʼ ximodo nga cadi chinándacaʼ binni guidxilayú. Biénecaʼ naquiiñeʼ gucaanacaʼ modo nácacabe ne guiráʼ ca guendaquéiquiiñeʼ ni rúnicabe, cásixa dxiqué rié ca binni de Roma que riguuya circo ra ridíndecabe ne teatru ra ruluíʼcabe binni stale cosa dxabaʼ. Ne pur bicaanaʼ ca discípulo que ca nga la? nácabe nanaláʼdxicaʼ guiráʼ binni. Peru cadi dxandí diʼ ni, purtiʼ ca discípulo que bisiidicaʼ binni guiráʼ ni maʼ biʼniʼ Dios ti ganda guilacaʼ.
7. 1) Xi bizaaca ca primé discípulo que purtiʼ qué ninándacaʼ binni guidxilayú. 2) Ñee bizuubacabe stiidxaʼ cani runi mandar ndaaniʼ xquídxicabe ne gudíxecabe impuestu la? Xiñee bíʼnicabe cani yaʼ.
7 Cásica Jesús, cani guzané laabe laaca guzanándacabe laacaʼ, stale biaje cani runi xhiiñaʼ gobiernu nga guzánanda laacabe purtiʼ biʼniʼ crecaʼ guiráʼ falsu ni gundisaʼ binni luguiácabe. Neca zaqué la? ora bicaa apóstol Pablu ti carta ra nuu ca xpinni Cristu de Roma lu iza 56 despué de beeda Jesús que gúdxibe laacaʼ «naquiiñe uzuuba[caʼ] stiidxa cani runi mandar ndaani [xquídxicaʼ], purti iruti ñuni mandar pa ñaca cadi zeeda ni de Dios». Peru qué riníʼ diʼ nga Jiobá peʼ rucuí laacabe, sínuque rudiibe lugar zaa nuucaʼ dede dxi maʼ guni mandar Reinu si stibe lu Guidxilayú riʼ. Nga runi, jneza nga gudxi Pablu laacabe gápacabe respetu cani runi mandar ndaaniʼ xquídxicabe ne quíxecabe impuestu (Romanos 13:1-7; Tito 3:1, 2).
8. 1) Dede pabiáʼ nga naquiiñeʼ guzuubaʼ ca xpinni Cristu stiidxaʼ cani runi mandar ndaaniʼ xquídxicaʼ. 2) Ximodo yenanda ca primé discípulo que ejemplu stiʼ Jesús.
8 Neca naquiiñeʼ guzúʼbanu stiidxaʼ ca gobiernu ca la? cadi guiráʼ diʼ ni nácabe nga gúninu. Ora maʼ gadxepeʼ ni na ley gudixhe binni de ni na ley stiʼ Dios la? ca xpínnibe naquiiñeʼ chinándacaʼ ni na ley stibe. Guidúʼyanu ni cayeeteʼ de ca primé xpinni Cristu lu ti libru: «Ca xpinni Cristu qué ninádicaʼ ñúnicaʼ caadxi cosa ni naquiiñeʼ guni ca binni de Roma [...] Para laacabe la? cucheenécabe Dios nga pa chécabe de soldadu. Qué ninácabe nicaacabe xiixa puestu lu política ne ñuni adorárcabe xaíque stiʼ Roma» (On the Road to Civilization—A World History [Ximodo cabani binni jma galán. Ni huazaaca lu guidubi Guidxilayú]). Ora biʼniʼ mandar ca juez ni jma risaca stiʼ ca judíu que ca discípulo maʼ cadi gucheechecaʼ diidxaʼ la? sicaríʼ bicábicabe laacaʼ: «Jma naquiiñe uzuʼba du stiidxa Dios que stiidxa binni» (Hechos 5:27-29).
9. 1) Xi bicaa ca xpinni Cristu guireecaʼ de Jerusalén lu iza 66 despué de beeda Jesús. 2) Xiñee zanda guininu nabé zacané ejemplu bidiicabe ca laanu.
9 Ca discípulo que qué liica ñuucaʼ lu política ne qué ñecaʼ de soldadu. Lu iza 66 despué de beeda Jesús bicaalú ca judíu que César, ngue runi ca soldadu romanu que nagueendaca guluucaʼ leʼ Jerusalén. Xi biʼniʼ ca xpinni Cristu yaʼ. Bietenaláʼdxicabe gudxi Jesús laacabe guireecabe de raqué. Ngue runi ora bíʼyacabe bixeleʼ ca romanu que caadxi dxi la? bixooñecabe de raqué ne guyécabe lu ca dani ngola stiʼ guidxi Pela, ni nuu deche guiiguʼ Jordán (Lucas 21:20-24). Cumu qué ñuucabe lu política ne qué ñécabe de soldadu la? beeda gácacabe ejemplu para cani gácacaʼ xpinni Cristu despué.
Ca xpinni Cristu cadi zinándadicaʼ binni guidxilayú lu ca últimu dxi riʼ
10. 1) Xi dxiiñaʼ nga qué huasaana ca testigu stiʼ Jiobá de gúnicaʼ, ne xiñee. 2) Xi lu nga qué liica riuucabe.
10 Lu ca iza ni maʼ gudiidiʼ ca, ñee rihuinni pa nuu ti grupu lu ca últimu dxi riʼ ni cayuni casi biʼniʼ ca primé xpinni Cristu la? Rihuinni, ne laacabe nga ca testigu stiʼ Jiobá purtiʼ zacapeʼ cayúnicabe. Dede dxi bizulú ca últimu dxi riʼ qué huasaanacabe de guiníʼcabe Reinu si stiʼ Dios nga zedané guendariuudxi, zacané binni guibani jma galán ne cadi chuʼ dxi gusaana de guibani ca binni ni riuulaʼdxiʼ guni ni jneza ca nayecheʼ (Mateo 24:14). Ne ora ridinde ca guidxi ca la? qué liica riuucabe.
11. 1) Ximodo rihuinni maʼ gadxepeʼ ni runi ca testigu stiʼ Jiobá de ni runi ca xaíque stiʼ ca religión ni cadi dxandíʼ ca. 2) Xi runi ca testigu stiʼ Jiobá ora xcaadxi binni racalaʼdxiʼ chuʼ lu política.
11 Rihuinni dxíchica maʼ gadxepeʼ nga ca xaíque stiʼ ca religión ca purtiʼ laacaʼ nabé riuucaʼ lu política. Nuu guidxi rábicabe binni chuʼ pur tuuxa ni racalaʼdxiʼ gapa ti puestu lu gobiernu o para cadi chinanda binni laa. Nuu de cani rusiidiʼ ndaaniʼ ca religión ca nápacaʼ ti puestu ra runi mandar gobiernu. Xcaadxi de laacaʼ rucaacaʼ ca políticu ca gacané laacaʼ lu cani cá íquecaʼ gúnicaʼ purtiʼ ca xaíque stiʼ ca religión sticaʼ nacaʼ zaa gácacani. Peru ca testigu stiʼ Jiobá qué riuudícabe lu política. Ne qué ruguruaadícabe pa xcaadxi binni racalaʼdxiʼ chuʼ lu xiixa partidu, o gacalaʼdxiʼ gapa xiixa puestu lu política o chiguni votar. Jesús guníʼ cadi zinanda diʼ ca xpínnibe binni guidxilayú, nga runi ca testigu stiʼ Jiobá qué liica riuucabe lu política.
12. Xi huabeendú ca religión ca pur riuucaʼ lu política.
12 Casi guníʼ Jesús que, ca guidxi ca cadi cusaanacaʼ de tíndecaʼ. Dede nuu grupu de binni cadíndecaʼ ndaaniʼ ti guidxi si (Mateo 24:3, 6, 7). Ca xaíque stiʼ ca religión ca riuupécabe pur ti guidxi o pur ti grupu ne rucaacabe ca xpínnicabe guni zaqueca. Xi huabeendúcabe yaʼ. Ca binni ni nuucaʼ lade ti religión si la? cayuutisaacaʼ laacaʼ purtiʼ si de gadxé gadxé guidxi o de gadxé tribu laacaʼ. Dios cadi zacá diʼ na gúnicabe (1 Juan 3:10-12; 4:8, 20).
13. Xi rusihuinni dxandíʼ qué riuu ca testigu stiʼ Jiobá lu política ne nin lu guendaridinde.
13 Peru ca testigu stiʼ Jiobá qué liica riuucaʼ lu guiráʼ guendaridinde ni raca lu Guidxilayú riʼ. La Atalaya stiʼ marzo iza 1940 na: «Guiráʼ cani nuu ladu stiʼ Señor qué ziuucaʼ lu ca guendaridinde stiʼ ca guidxi ca». Ca testigu stiʼ Jiobá dede yanna zacá laacaʼ neca de gadxé gadxé guidxi laacaʼ ne gadxé gadxé modo nuucaʼ. Qué rudiidícabe lugar guxheleʼ política laacabe de xcaadxi bíʼchicabe ne bizáʼnacabe ni nuu lu guidubi naca Guidxilayú. «[R]únicabe guiibaʼ duxhuʼ guiibaʼ derechu para aradu ne lanza [r]únicabe ni tijera para ugá guixi.» Cumu qué riuucabe lu política la? maʼ qué riziidirúcabe tíndecabe (Isaías 2:3, 4; 2 Corintios 10:3, 4).
14. Xi huazaaca ca testigu stiʼ Jiobá purtiʼ cadi zinándacaʼ binni guidxilayú.
14 Xi huazaacacabe pur cadi zinándacabe binni guidxilayú yaʼ. Jesús na: «Nanalaʼdxi cabe laatu, purti cadi de laacabe laatu» (Juan 15:19). Stale testigu stiʼ Jiobá huateguyoocabe laacaʼ purtiʼ cayúnicaʼ ni na Dios. Caadxi de laacaʼ huayuninácabe ne dede huayuuticabe laacaʼ cásica bíʼnicabe ne ca xpinni Cristu lu primé siglu que. Rizaacacabe nga purtiʼ Binidxabaʼ «xaíque sti guidxilayú» riʼ nga cucaalú ca xpinni Jiobá, ni cadi nácacaʼ de guidxilayú stibe (Juan 14:30; Apocalipsis 12:12).
15. 1) Xi chigaca guiráʼ binni guidxilayú. 2) Xiñee cadi naquiiñeʼ chinándanu binni guidxilayú.
15 Laanu, ca xpinni Jiobá riéchenu nga cadi zinándanu binni guidxilayú, purtiʼ guirácabe zanitilúcabe lu Armagedón (Daniel 2:44; Apocalipsis 16:14, 16; 19:11-21). Laanu qué zanitilúdinu racá purtiʼ cadi zinándadinu laacabe. Nuunu ndaaniʼ ti guidxi ni nuucaʼ tobi si lu guidubi naca Guidxilayú ne nuucaʼ pur Reinu stiʼ Dios. Dxandíʼ nga zuni feúcabe laanu ne zazanándacabe laanu purtiʼ cadi zinándanu binni guidxilayú. Peru qué zandaa maʼ chiguiluxe guiráʼ nga, purtiʼ chiguinitilú guidxilayú malu stiʼ Binidxabaʼ riʼ ne maʼ qué liica ziuuni. Ne cani runi ni na Jiobá la? zápacaʼ ti guendanabani ni qué zaluxe lu guidxilayú cubi ra chigaca ni jneza si ne ra chiguni mandar Reinu stiʼ Dios (2 Pedro 3:10-13; 1 Juan 2:15-17).
Ni guietenaláʼdxinu
• Ximodo bisihuinni Jesús qué ninanda diʼ binni guidxilayú.
• Ximodo biʼyaʼ ca primé xpinni Cristu 1) ni runi binni guidxilayú, 2) ca gobiernu políticu, 3) quixe binni impuestu.
• Ximodo rusihuinni ca testigu stiʼ Jiobá cadi zinándacaʼ binni guidxilayú ca dxi stinu riʼ.
[Dibuju/foto ni zeeda lu yaza 165]
Jesús na nin laa nin ca discípulo stiʼ cadi zinándacaʼ binni guidxilayú