Nuu binni jma dxiʼbaʼ que laanu

ZÁNDACA laaca riníʼ íqueluʼ nuu binni jma dxiʼbaʼ ne jma nadipaʼ que laanu. Casi tu yaʼ.... Tobi de laacabe nga Jiobá Dios. Yanna Xiiñibe, Maestru Ni Jma Nanna Gusiidiʼ que yaʼ. Jma nadípabe que laanu la?... Jma pue.

Jesús bibaninebe Dios guibáʼ. Ne ti espíritu nga laabe, o ti ángel. Ñee bizáʼ Dios stuudxi ángel la?... Bizaʼbe pue, bizaʼbe millón de ángel. Ca ángel ca laaca jma dxíʼbacaʼ ne jma nadípacaʼ que laanu (Salmo 104:4; Daniel 7:10).

Rietenaláʼdxiluʼ lá ángel ni guniʼné María que la?... Labe Gabriel. Laabe gúdxibe María Xiiñiʼ Dios nga baʼduhuiiniʼ chigale que. Jiobá guluube guendanabani stiʼ Xiiñibe ndaaniʼ María para ganda gale lu Guidxilayú riʼ (Lucas 1:26, 27).

Runi creluʼ milagru ca la? Runi creluʼ bibaniné Jesús Dios guibáʼ la?... Jesús guníʼ bibaniné Bixhoze. Ximodo gúnnabe ni yaʼ. Zándaca dxi nahuiinibe guniʼné María laabe ca diidxaʼ ni guníʼ Gabriel que. Laaca zándaca gudxi José laabe Dios nga bixhózepebe.

Dxi guyuunisa Jesús la? Dios guníʼ dede guibáʼ ne na: «Ndi nga Xiiñe» (Mateo 3:17). Ne huaxhinni ante gátibe que, Jesús biʼniʼ orarbe Dios ne nabe: «Bixhozeʼ, bisisaca naa ra nuu luʼ casi bisaca raqué dxi caʼru uzáʼ lu guidxilayú» (Juan 17:5). Ya, Jesús gunábabe guibiguétabe guibáʼ para chúʼnebe Dios raqué. Ximodo zanda gaca ndiʼ yaʼ.... Zanda gácani pa Jiobá Dios guibiguetaʼ guni laabe ti espíritu ni qué rihuinni, o ti ángel.

Yanna racalaʼdxeʼ guinabadiidxaʼ lii xiixa. Ñee nachaʼhuiʼ guiráʼ ca ángel ca la? Xi raʼbuʼ yaʼ.... Guyuu ti tiempu guirácabe gúcacabe nachaʼhuiʼ. Jiobá bizáʼ laacabe, ne guiráʼ ni ruzáʼ Jiobá jneza rúnibe cani. Peru ti dxi tobi de laacabe guca malu. Ximodo guca ndiʼ yaʼ.

Para gánnanu ni la? naquiiñeʼ guietenaláʼdxinu dxi bizáʼ Dios primé hombre ne primé gunaa que, Adán ne Eva. Nuu binni na cadi dxandíʼ gúcani, sínuque ti cuentu si ni, peru Maestru Ni Jma Nanna Gusiidiʼ que gúnnabe dxandíʼ ni.

Ora bizáʼ Dios Adán ne Eva, guluube laacaʼ ndaaniʼ ti paraísu guizáʼ galán, guyuu ni ti lugar láʼ Edén. Ñándaca ñápacabe stale xiiñicabe ne nidale binnilídxicabe ne nibánicabe sin qué ñuu dxi ñáticabe ndaaniʼ paraísu que. Peru gupa xidé biziidicabe xiixa ni nabé risaca casi maʼ bizíʼdinu. Guidúʼyanu pa ganda guietenaláʼdxinu ni.

Jiobá gúdxibe Adán ne Eva zanda gocaʼ ca cuananaxhi stiʼ ca yaga zuhuaa ndaaniʼ jardín que, peru cuananaxhi si stiʼ ti yaga cadi gócabe. Pa gócabe ni la? Dios gudxi laacabe dxandipeʼ záticabe (Génesis 2:17). Xii ndiʼ chiguiziidiʼ Adán ne Eva raríʼ yaʼ....

Chiguiziidicabe guzuubacabe diidxaʼ. Ya, para guibani binni riquiiñeʼ guzuubaʼ stiidxaʼ Jiobá Dios. Qué zanda guiníʼ si Adán ne Eva zuzuubacaʼ diidxaʼ. Naquiiñeʼ gusihuínnicabe ni ne ni gúnicabe. Pa guzuubacabe stiidxaʼ Dios la? zusihuínnicabe nadxiicabe laabe ne racaláʼdxicabe guni mandar Dios laacabe. Zaqué ñanda nibánicabe ndaaniʼ paraísu que sin qué ñuu dxi ñáticabe. Peru, xi zusihuínnicabe pa gócabe cuananaxhi que yaʼ....

Zusihuínnicabe cadi nuudíʼcabe nayecheʼ ne guiráʼ ni maʼ bidii Dios laacabe. Ñee nuzuubaluʼ diidxaʼ pa ñuuluʼ raqué la?... Primé la? Adán ne Eva bizuubacaʼ diidxaʼ. Peru despué, tobi ni jma nadipaʼ que laacabe bisiguii Eva ne laa maʼ qué nuzuubaʼ stiidxaʼ Jiobá. Tu bisiguii laabe yaʼ....

Biblia na ti beendaʼ nga bisiguii Eva. Ximodo guca ndiʼ, pa ca beendaʼ ca qué riniʼcaʼ yaʼ.... Ti ángel nga biquiiñeʼ ti beendaʼ, ti guihuinni casi ora maniʼ que nga caníʼ. Peru ni dxandíʼ la? ángel que nga caníʼ. Ángel que bizulú guníʼ ique puru ni nadxabaʼ. Ni gucaláʼdxibe nga ñuni adorar Adán ne Eva laabe, ne ñúnicaʼ guiráʼ ni ñábibe laacaʼ. Gucaláʼdxibe nicaabe lugar stiʼ Dios.

Ngue runi ángel qué iquiiñeʼ que guluube ni nadxabaʼ ndaaniʼ xquendabiaaniʼ Eva. Biquiiñebe beendaʼ que para guiníʼ: Dios bisiguii laatu. Qué zátiditu pa goto cuananaxhi ca. Ziuu xpiaanitu casi Dios. Ñuni creluʼ ni guníʼ beendaʼ que la?...

Eva guyuulaʼdxiʼ nicaa ni cadi cudii Dios laa. Gudobe cuananaxhi ni gudxi Dios laabe cadi gobe que, ne despué bidiibe ni Adán. Laabe qué ñuni crédibe ni guníʼ beendaʼ que, peru cumu jma guyuuláʼdxibe chúʼnebe Eva que gannaxhiibe Dios la? ngue runi laaca gudobe cuananaxhi que (Génesis 3:1-6; 1 Timoteo 2:14).

Xi gúcacabe pur ngue yaʼ.... Adán ne Eva beeda gácacabe binni ruchee, bióʼxhocabe ne gúticabe. Cumu maʼ binni ruchee laacabe la? ca xiiñicabe laaca zaqueca gúcacaʼ, ne laaca bióʼxhocaʼ ne gúticaʼ. Dios qué nusiguii diʼ. Nga runi, pa guzúʼbanu stiidxaʼ Dios la? zabáninu (Romanos 5:12). Biblia na Binidxabaʼ nga láʼ ángel bisiguii Eva que, ne ca ángel ni gúcacaʼ malu que biree lacaʼ demonio (Santiago 2:19; Apocalipsis 12:9).

Rieʼnuʼ yanna xiñee guca ángel nachaʼhuiʼ que malu la?... Purtiʼ bizulú guníʼ íquebe puru si ni nadxabaʼ. Gucaláʼdxibe laasibe nga nisácabe. Cumu gúnnabe gudxi Dios Adán ne Eva gápacaʼ xiiñicaʼ la? guyuube ñuni adorar guiráʼ ca xiiñiʼ Adán ne Eva que laabe. Binidxabaʼ racalaʼdxiʼ pa ñanda si guiranu cadi nuzúʼbanu stiidxaʼ Jiobá. Nga runi ruguube ni nadxabaʼ ndaaniʼ xquendabiaaninu (Santiago 1:13-15).

Binidxabaʼ na guirutiʼ nadxii Jiobá. Nabe nin tobi de laanu cadi nadxiinu Dios ne qué racaláʼdxinu gúninu ni cayabi Dios laanu. Ne laaca nabe ruzúʼbanu stiidxaʼ Jiobá ora si riree cani rúninu casi modo riuláʼdxinu. Dxandíʼ nga ni na Binidxabaʼ ca la? Zacá laanu la?

Maestru Ni Jma Nanna Gusiidiʼ que guníʼ nabé rusiguii Binidxabaʼ. Jesús bisihuinni dxandíʼ nadxiibe Jiobá ra bizuubabe stiidxaʼ. Ne cadi ora cadiidisibe ra nagana, sínuque guiráʼ ora, dede ne ora xcaadxi binni gucaláʼdxicaʼ nucheenebe Dios. Bisihuínnibe qué nusaanabe Jiobá dede ora gútibe. Pur nga, Dios bisibani laabe sti tiru, ne yanna riʼ para cadi chuʼruʼ dxi gátibe.

Yanna, tuu nga raʼbuʼ ni jma xhenemígunu yaʼ.... Ya, nga nga Binidxabaʼ. Zanda gúʼyanu laabe la?... Qué zanda diʼ. Peru nánnanu nuube ne jma dxíʼbabe ne nadípabe que laanu. Yanna, tuu nga jma dxiʼbaʼ ne jma nadipaʼ que Binidxabaʼ yaʼ.... Jiobá Dios. Nga runi nannadxíchinu Dios nga zanda gapa laanu.