Ni zacané laanu para cadi guidxíbinu

ÑEE raca nagana para lii gúniluʼ ni na Jiobá la?... Maestru Ni Jma Nanna Gusiidiʼ que guníʼ nagana zácani para laanu. Gueelaʼ ante guuticabe laabe que bisiénebe ca apóstol stibe: «Pa gaca nanalaʼdxi binni laatu la? laguietenalaʼdxi [primé] uca nanalaʼdxi cabe naa» (Juan 15:18).

Pedru guluu naróʼ stiʼ ora guníʼ qué ziuu dxi gusaana Jesús. Peru Jesús guníʼ gueelaʼ queca Pedru zaníʼ chonna tiru qué runibiáʼ laabe. Ne nguepeʼ nga ni guca (Mateo 26:31-35, 69-75). Ximodo beeda gaca ndiʼ yaʼ.... Gúcani purtiʼ Pedru ne stuudxi apóstol que bidxíbicaʼ.

Ñee nannuʼ xiñee bidxíbicabe la?... Purtiʼ qué ñunidícabe xiixa ni nabé risaca. Pa gánnanu xi laani la? zanda gúninu ni na Jiobá neca intiica guiníʼcabe o gúnicabe laanu. Para guzulunu guidúʼyanu xi guca últimu gueelaʼ guyuuné Jesús ca apóstol stiʼ.

Primé la? bíʼninebe laacaʼ Pascua, ti guendaroxhi guizáʼ risaca ni raca ti biaje si lu ti iza para gusietenalaʼdxiʼ ni ca judíu que ximodo gulee Dios laacaʼ de Egipto ora guyuucaʼ casi esclavu raqué. Despué, biʼniʼ Jesús sti guendaroxhi nabé risaca ne ca apóstol stiʼ, deruʼ primé ngue bíʼnicabe guendaroxhi que. Despué zazíʼdinu ximodo zacané guendaroxhi riʼ laanu guietenaláʼdxinu Jesús. Biluxe gudoxhísicabe, Jesús guníʼ xhupa xhonna diidxaʼ para uguube gana ca apóstol stibe ne yenebe laacaʼ ndaaniʼ jardín stiʼ Getsemaní, ra nabé guyuuláʼdxicabe chécabe.

Yendásicabe raqué la? biyubi Jesús ra chuʼ stubi para guni orar. Ne laaca gúdxibe Pedru, Jacobo ne Juan guni orarcaʼ, peru laacaʼ gúsicaʼ. Chonna biaje bixaleʼ Jesús para guni orar, ne cada guibiguétabe la? rindabe Pedru ne stuudxi apóstol que nisiaasicaʼ (Mateo 26:36-47). Ñee nánnaluʼ xi pur naquiiñeʼ ñatanácabe para ñuni orárcabe la?... Guidúʼyanu xi pur.

Judas Iscariote guyuube ora biʼniʼ Jesús Pascua que ne xcaadxi apóstol stiʼ gueelaʼ queca. Zándaca rietenaláʼdxiluʼ beeda gaca Judas ti gubaanaʼ, peru yanna, maʼ bidxiidéchepebe Jesús. Laabe nánnabe paraa riuu Jesús ne ca apóstol stiʼ ora maʼ zecaʼ ndaaniʼ jardín stiʼ Getsemaní que, ngue runi yenebe ca soldadu que raqué para guinaazecabe Maestru Ni Jma Nanna Gusiidiʼ que. Ora biʼyaʼ Jesús laacabe la? gunabadiidxaʼ: «Tu [c]uyubi tu».

Ca soldadu que bicábicaʼ: «Jesús». Laabe qué nidxíbidibe, ne gúdxibe laacaʼ: «Rarí nuaaʼ». Guizáʼ bidxagayaa ca soldadu que xiñee qué nidxíbibe, dede guricaʼ atrá ne biábacaʼ. Jesús gudxi laacabe óraque: Pa naa cuyúbitu la? lagudii lugar cheʼ ca apóstol stinneʼ (Juan 18:1-9).

Ora gunaazeʼ ca soldadu que Jesús ne bindiibicabe nabe la? ca apóstol que bidxíbicaʼ ne bixooñecaʼ. Peru Pedru ne Juan nuucaʼ gánnacaʼ xi chigúnicabe Jesús, ngue runi yenándacabe laabe zitu zitu. Últimu la? yenécabe Jesús ralidxi Caifás, xaíque stiʼ ca ni ruzaaquiʼ guʼxhuʼ que. Cumu Juan runibiáʼ laabe la? baʼdudxaapaʼ ni cayapa ra puertaʼ que bidii lugar guyuube lu patiu que laabe ne Pedru.

Ca ni ruzaaquiʼ guʼxhuʼ que maʼ nuucaʼ ralidxi Caifás para guiniʼcaʼ xi gácabe. Nuucabe guuticabe Jesús, ne pur ngue bisendacaacabe tuudxi hombre para guiníʼ paraa bicheebe neca cadi dxandíʼ ni guiniʼcaʼ. Ne raqué ca binni que bizulú gudíñecaʼ laabe ne gudápacaʼ lube. Laga cayaca guiráʼ ngue la? Pedru nuu gaxha de raqué.

Baʼdudxaapaʼ ni rapa puertaʼ, ni bidii lugar guyuu Pedru ne Juan que biiyaʼ chaahuibe Pedru ne gúdxibe laa: ¡Lii laaca xpinni Jesús lii! Peru laabe nabe qué liica runibiaʼbe Jesús. Despué de ngue sti baʼdudxaapaʼ binibiáʼ Pedru ne gúdxibe cani nuu raqué: Hombre riʼ xpinni Jesús laa. Pedru bibiguetaʼ guníʼ qué runibiáʼ laabe. Jma huadxí que, biiyaʼ tuudxi binni laabe ne nacaʼ: «Dxandí de laacabe lii». Para na Pedru rabi laacabe: «Qué racabiaʼya laabe». Ne ndiʼ maʼ chonna tiru guiniʼbe qué runibiaʼbe Jesús ne dede guniʼbe dxandipeʼ ni caniʼbe que. Oraqueca bidxiguetalú Jesús ne biiyadxí laabe (Mateo 26:57-75; Lucas 22:54-62; Juan 18:15-27).

Ñee nannuʼ xiñee bisiguii Pedru la?... Purtiʼ bidxíbibe. Peru xiñee bidxíbibe yaʼ. Guyuu xiixa ni qué ñúnibe ni ñacané laabe para cadi nidxíbibe la? Guníʼ ique ndiʼ: xi biʼniʼ Jesús para cadi nidxibi.... Laabe biʼniʼ orarbe Dios, ne Dios gucané laabe gácabe nadxibalú. Bietenalaʼdxiʼ, Jesús gúdxibe Pedru chonna biaje naquiiñeʼ gataná. Peru, xi guca yaʼ....

Guiráʼ biaje guyé Jesús ra nuu Pedru que laa nisiaasiʼ. Qué ñuni orárdibe ne qué ñatanádibe. Ngue runi, cadi cabézadibe pa ninaazecabe Jesús. Ora nuucabe nezalú juez que la? Pedru bidxíbibe ora bíʼyabe caguíñecabe Jesús ne caníʼcabe gátibe. Peru ante gaca ndiʼ, xi gudxi Jesús ca apóstol stiʼ zuni binni laacaʼ yaʼ.... Guniʼbe zacananalaʼdxiʼ binni laacaʼ cásica gucananaláʼdxicabe laabe.

Guiníʼ íquenu paraa zanda gueeda gácanu cásica guca Pedru. Guníʼ ique nuuluʼ ra scuela ne raqué gunadiágaluʼ caníʼcabe de binni ni qué runi saludar bandera o ni qué runi Navidad. Málasi, chuʼ tu gabi lii: «Ñee dxandíʼ nga qué runi saludarluʼ bandera la?». O zándaca gábicabe lii: «Huayábicabe laadu nin Navidad qué rúniluʼ». Ñee nidxíbiluʼ niniʼluʼ dxandíʼ la?... Nuquiinde lii nusiguiiluʼ, casi biʼniʼ Pedru la?...

Pedru guizáʼ guyuu triste ora guníʼ qué runibiáʼ Jesús. Ora gúnnabe xi bíʼnibe la? bireebe de raqué ne biinabe. Ya, Pedru bibiguetaʼ ra nuu Jesús (Lucas 22:32). Yanna, xi raʼbuʼ zanda gacané laanu ti cadi guidxíbinu ne gácanu casi Pedru yaʼ.... Bietenalaʼdxiʼ, laabe qué ñuni orárdibe ne qué ñatanabe. Nga runi, xi riquiiñeʼ gúninu para gácanu xpinni Maestru Ni Jma Nanna Gusiidiʼ ca yaʼ....

Naquiiñeʼ guni orarnu Jiobá ne gábinu laabe gacanebe laanu. Ora biʼniʼ orar Jesús, nannuʼ xi biʼniʼ Dios pur laabe la?... Biseendabe ti ángel para gudii stipa Jesús (Lucas 22:43). Nouʼ zanda gacané ca ángel stiʼ Dios laanu la?... Biblia na: «Ángel stiʼ Jiobá cayapa ne culá cani ridxibi laabe» (Salmo 34:7). Peru para gacané Jiobá laanu la? cadi riquiiñeʼ guni orársinu. Ñee nannuʼ xiruʼ riquiiñeʼ gúninu la?... Jesús gúdxibe cani zinanda laabe que gatanacaʼ. Ximodo raʼbuʼ zanda gúninu ni yaʼ....

Naquiiñeʼ gucaadiaga chaahuinu xi rieeteʼ ora maʼ ziuunu ra rusiidicabe de Dios ne ni rúʼndanu ndaaniʼ Biblia. Ne laaca naquiiñeʼ guni orarnu Jiobá guiráʼ ora ne guinábanu laabe gacanebe laanu gácanu xpínnibe. Pa gúninu cani la? laabe zacanebe laanu para cadi guidxíbinu. Ne ziéchenu stale ora ganda guinínenu binni de Maestru Ni Jma Nanna Gusiidiʼ ca ne de Bixhózebe.