Xi raca binni ora rati

NAA nannadxicheʼ nánnaluʼ rioʼxhoʼ binni, raca huará ne rati. Dede ne baʼduʼ rati. Ñee naquiiñeʼ guidxíbiluʼ gátiluʼ o guidxíbiluʼ ca gueʼtuʼ ca la?... Nánnaluʼ xi raca binni ora gati la?...

Dxandíʼ nga guirutiʼ tu huabani despué de maʼ guti para gusiene laanu xi raca binni ora gati. Peru dxi bibani Jesús, Maestru Ni Jma Nanna Gusiidiʼ que lu Guidxilayú riʼ la? guyuu ti hombre ni guca zacá. Pa gúʼndanu historia stibe la? ziénenu xi raca binni ora gati. Cuzeeteʼ ni de ti xhamigu Jesús ni guleza Betania, ti guidxihuiiniʼ ni nuu gaxha de Jerusalén. Hombre riʼ la? biree labe Lázaro ne gúpabe chupa bizáʼnabe, Marta ne María. Guidúʼyanu ximodo na Biblia guca ni.

Ti dxi, guizáʼ guca huará Lázaro. Cumu Jesús nuu zitu de raqué dxi que la? Marta ne María biseendacabe tu chitidxi laabe. Gúdxicabe laabe gueedabe purtiʼ nánnacabe zanda gusiándabe bizáʼnacaʼ. Jesús cadi doctor diʼ laa, peru Dios bidii laabe poder para cueebe guiráʼ xixé guendahuará (Mateo 15:30, 31).

Peru ante chindá Jesús raqué, Lázaro guyuu jma malu ne guti. Jesús gúdxibe ca discípulo stibe nisiaasiʼ Lázaro ne chebe raqué para gucuaanibe laa. Laacabe qué ñenedícabe xii ngue gucalaʼdxiʼ Jesús niníʼ, ngue runi bisiene chaahuibe laacaʼ ne nabe: «Ma guti Lázaro». Xi rusiidiʼ ca diidxaʼ riʼ yaʼ.... Rusiidiʼ cani laanu zeeda gaca guendaguti ca casi ti bacaandaʼ, ne ora maʼ nisiaasipenu la? dede nin riníʼ xcaandanu.

Jesús biree zeʼ ralidxi Marta ne María. Raqué maʼ nuu stale de ca xhamígucabe ni zigannacaʼ laacabe purtiʼ guti bizáʼnacabe. Ora gunna Marta maʼ zidxiña Jesús la? bireebe yedxagalube laa. Ratuhuiiniʼ que laaca bidxiña María, nuu triste ne ziyuunaʼ zeʼ ra nuu Maestru Ni Jma Nanna Gusiidiʼ que ne biábabe xañee. Xcaadxi de ca xhamígucabe ni nuuné laacabe que laaca cayuunacaʼ.

Jesús gunabadiidxaʼ paraa bicaachicabe Lázaro. Óraque yenécabe Jesús ra nuu ti cueva, raqué nuu baʼ stibe. Ora biʼyaʼ Jesús cayuunaʼ guirácabe la? laaca bizulú biinaʼ, purtiʼ nánnabe pabiáʼ naná nga gati binnilidxi binni.

Cumu nutaaguʼ ti guié ruaa baʼ que la? Jesús guníʼ: «Lacuee guie ca ruaa ni». Ñee naquiiñeʼ gúnicabe ni la?... Marta guníʼ ique cadi jneza diʼ ngue ni na Jesús que ngue runi guniʼbe: «Ma rindáʼ yuudxu be, Señor, purti ma napa be tapa gubidxa».

Óraque na Jesús rabi laabe: «Ñee cadi ma gudxe lii pa guni cre lu zuuyu pabiáʼ nandxóʼ Dios la?». Ni na Jesús nga chiguuya Marta xiixa ni gusisaca Dios. Xii nga chiguni Jesús yaʼ. Ora guleecabe guié que la? Jesús biʼniʼ orarbe Jiobá nadipaʼ ne despué bicaabe ti ridxi, nabe: «¡Lázaro, gudáʼ raríʼ!». Zareebe de raqué la? Zanda gúnibe ni la?...

Ñee zanda gucuaaniluʼ tuuxa ora maʼ nisiaasiʼ la?... Zanda pue, pa guiniʼluʼ nadipaʼ. Peru, zanda gucuaaniluʼ tuuxa ni maʼ guti la?... Coʼ. Neca guiniʼluʼ nadípapeʼ, qué zunadiágadibe lii. Qué zanda gúniluʼ gastiʼ, nin naa nin sti binni para gucuaaninu tuuxa ni maʼ guti.

Peru Jesús maʼ gadxé laa purtiʼ Dios bidii laabe poder ni guirútiruʼ tu gapa. Ngue runi, ora bicaa ridxi Jesús Lázaro la? guca ti guendaridxagayaa. Hombre ni napa tapa gubidxa de guti que biree ndaaniʼ cueva que. ¡Bibiguetaʼ bibánibe! Gunda gucuaabe bi, guzabe ne guniʼbe sti biaje. Ya, Jesús bisibani Lázaro ora guti (Juan 11:1-44).

Yanna guníʼ ique si ndiʼ: xi guca Lázaro ora guti yaʼ. Biree xiixa de laabe, ti alma o ti espíritu, lu xcuérpube ne zeʼ sti ladu la? Ñee guyé alma stiʼ Lázaro guibáʼ la? Bibaniné ni Dios guibáʼ ne ca ángel chaʼhuiʼ que tapa gubidxa la?...

Coʼ. Bietenalaʼdxiʼ, Jesús guníʼ nisiaasiʼ Lázaro. Xi raca ora maʼ nisiaasiluʼ yaʼ. Pa capeʼ bacaandaʼ lii la? nin qué liica zánnaluʼ xi cayaca ra nuuluʼ, cadi dxandíʼ nga la?... Ne ora guibániluʼ, nin gánnaluʼ panda ora gúsiluʼ dede pa cadi gúʼyaluʼ lu ti reló.

Zaqueca ni ne ca gueʼtuʼ ca, qué gánnacabe gastiʼ ne qué runi sentírcabe gastiʼ ne qué zanda diʼ gúnicabe gastiʼ. Zacá nga guyuu Lázaro ora guti. Guendaguti ca zeeda gácani casi ora capeʼ bacaandaʼ binni ne qué liica rietenalaʼdxiʼ gastiʼ. Biblia na: «Peru cani maʼ guti la? laacabe qué liica gánnacabe gastiʼ» (Eclesiastés 9:5, 10).

Ne laaca guníʼ ique ndiʼ: pa ñuu Lázaro guibáʼ tapa gubidxa, cadi niniʼbe ni la?... Ñee raʼbuʼ nucaa Jesús laabe nusaanabe lugar sicarú que para nibiguétabe lu Guidxilayú riʼ la?... ¡Coʼ xa!

Peru stale binni na nápanu ti alma ni ribániruʼ neca maʼ gútinu. Para laacabe la? alma stiʼ Lázaro guyuu ni sti lugar ra bibani ni. Peru cadi nga diʼ na Biblia, sínuque rusiene ni biʼniʼ Dios primé hombre Adán que, ti «alma ni nabani». Adán guca ti alma. Stiidxaʼ Dios laaca rusiidiʼ, gútibe despué de bicheebe. Óraque beeda gácabe ti «alma ni maʼ guti» ne bibiguetaʼ gúcabe yu ni guyáʼnebe que. Biblia laaca caníʼ biaanané guiráʼ xiiñibe guendaruchee ne guendaguti (Génesis 2:7; 3:17-19; Números 6:6; Romanos 5:12).

Zacá ránnanu qué gápadinu ti alma gadxé lu xcuérpunu. Cada tobi de laanu nácanu ti alma. Ne Biblia cusiene xi rácanu pur biaananenu donda stiʼ Adán, primé hombre que. Nani: Alma ni guchee zati (Ezequiel 18:4).

Nuu binni ridxibi ca gueʼtuʼ ca. Qué ridxiñadícabe ra pantión purtiʼ riníʼ íquecabe riree alma stiʼ ca gueʼtuʼ ca de xcuérpucaʼ ne randa runinacaʼ binni nabani. Peru, ñee dxandíʼ nga la?... Coʼ, cadi dxandíʼ diʼ nga.

Ne nuucabe dede riníʼ íquecabe zanda guibiguetaʼ ca gueʼtuʼ ca casi espíritu para chigánnacaʼ binni nabani. Pur nga rusaanacabe guendaró para laacaʼ. Peru binni ni runi zacá cadi dxandíʼ diʼ runi cré ni riníʼ Dios de ca gueʼtuʼ ca. Peru pa laanu runi crenu ni la? qué zadxíbidinu ca gueʼtuʼ ca. Ne pa dxandipeʼ nuunu gudiʼnu xquíxepeʼ Dios pur guendanabani ni cudii laanu la? zusihuínninu ni ra gúninu guiráʼ ni riuláʼdxibe.

Peru zándaca guinabadiidxaluʼ laca lii: «Ñee zusibani Dios ca baʼduʼ ni maʼ guti ca la? Zanabe gúnibe ni la?». Zaninu de nga lu sti capítulo ca.