Caadxi diidxaʼ ni chiguireeche lu guidubi naca guidxilayú

¡Mayaca guinitilú religión ni cadi dxandíʼ!

▪ Xii nga religión ni cadi dxandíʼ

▪ Ximodo chiguinitilú ni

▪ Zalaluʼ ora guinitilú religión ni cadi dxandíʼ ca la?

Xii nga religión ni cadi dxandíʼ.

Ñee racaná ladxidoʼloʼ ora ruuyaluʼ cayati jma binni purtiʼ ca religión ca rucaacaʼ laacabe chiguuticabe la? Pa lii riuuláʼdxiluʼ gaca ca cosa ca jneza, ñee ridxiichiluʼ ora ruuyaluʼ ca binni ni nacaʼ cayúnicaʼ ni na Dios nuucaʼ lu ca guendaridinde stiʼ ca guidxi ca, cayuuticaʼ binni para guchíbicaʼ gobiernu o cabáʼnacaʼ la? Xiñee ruluíʼ napa ca religión ca donda pur guiráʼ guendanagana ni nuu yanna riʼ yaʼ. Cadi guiráʼ diʼ ca religión ca nápacaʼ donda pur guiráʼ ni cayaca, sínuque religión si ni cadi dxandíʼ. Jesucristu, ti hombre ni nabé runi respetar binni laa pur religión ni gupa, guniʼbe religión ni cadi dxandíʼ ca nga rucaa binni guni cosa malu, cásica «ti yaga yuudxu la? zudii cuananaxhi ni qué zaquiiñeʼ» (Mateo 7:15-17). Xi rucaa religión ni cadi dxandíʼ ca binni guni yaʼ.

Religión ni cadi dxandíʼ...

◼ ... RIUU RA RIDINDE CA GUIDXI CA NE LU POLÍTICA. Ti revista na: «Cumu neza Asia ne xcaadxi lugar ca xaíque stiʼ ca religión ca racaláʼdxicaʼ guni mandarcaʼ jma la? rucaacabe ca xpínnicabe gúnicaʼ ni racalaʼdxisícabe». Ne laaca caniʼni «maʼ cayaca ique binni guidxilayú» pur guiráʼ ni cayúnicabe ca (Asiaweek). Xaíque stiʼ ti religión ni nabé runibiáʼcabe Estados Unidos guníʼ: «Para maʼ cadi gátiruʼ binni la? naquiiñeʼ gati cani cayuuti binni para guchibi gobiernu». Ndiʼ nga nabe naquiiñeʼ gaca para guibani binni galán: «Naquiiñeʼ gati guirácabe purtiʼ nga nga ni na Señor». Peru Biblia na: «Pa nuu tu na nadxii Dios peru nanalaʼdxi stobi la? rusiguii» (1 Juan 4:20). Ne Jesús peʼ bidii conseju riʼ: «Laganaxhii cani nanalaʼdxi laatu» (Mateo 5:44). Panda religión raʼbuʼ ruseendaʼ ca xpinni ra ridinde ca guidxi ca yaʼ.

◼ ...RUSIIDINI BINNI NI CADI DXANDÍʼ. Stale religión rusiidiʼ nápanu ti alma o ti espíritu ni qué rihuinni, ne ora gátinu qué rati ni. Ne cumu stale religión laaca ngaca runi crecaʼ la? ráxhacabe bueltu ca xpínnicabe para guni orárcabe pur ca binnilídxicaʼ ni maʼ guti. Peru Biblia gadxé ni rusiidiʼ: «Alma ni guchee... zati» (Ezequiel 18:4). «Purtiʼ cani nabani nánnacaʼ záticaʼ; peru cani maʼ guti la? laacabe qué liica gánnacabe gastiʼ.» (Eclesiastés 9:5.) Jesús bisiidiʼ ziasa ca binni ni maʼ guti, nga runi pa ñaca ñapa binni ti alma ni qué rati la? maʼ qué niquiiñeʼ diʼ ñasa cani maʼ guti (Juan 11:11-25). Ñee rusiidiʼ religión stiluʼ qué rati alma ca la?

◼ ...RUDIINI LUGAR CHUʼNÉ BINNI NI CADI XHEELAʼ. Ndaaniʼ caadxi guidxi, nuu religión rudii lugar gaca ca muxe ne ca nguiuʼ o gunaa nguiuʼ xaíque ndaaniʼ cani, ne dede rucaacabe gobiernu cuaquiʼ ley ni gudii lugar guichaganáʼ gunaa ne gunaa, hombre ne hombre. Dede ne religión ni rusiidiʼ cadi jneza chuʼné binni ni cadi xheelaʼ, rudii lugar guni ca xaíque ca dxiiñaʼ ndaaniʼ cani neca guiláxoocaʼ cani nahuiiniʼ. Peru xi rusiidiʼ Biblia yaʼ. Laani cusiene chaahuini: «Cadi quite ique tu laatu, purti nin cani napa jnadxii, nin cani runi cre bidóʼ, nin cani riuu né xheela stobi, nin ca muxeʼ, nin cani riuu né muxeʼ, [...] ziuu ra runi mandar Dios» (1 Corintios 6:9, 10). Ñee huayunadiágaluʼ de xiixa religión ni rudii lugar chuʼné binni ni cadi xheelaʼ la?

Xi chiguizaaca ca religión ni rusiidiʼ binni guni ni cadi jneza yaʼ. Jesús guníʼ: «Irá yaga ni qué rudii cuananaxhi chaʼhui la? rugá cabe laa para icá gui» (Mateo 7:19). Zacapeʼ nga zácani, religión ni cadi dxandíʼ ca zanitilú ni. Peru ximodo chiguizaaca ndiʼ ne padxí gácani yaʼ. Ti visión ni caníʼ de cani chiguizaacaruʼ cacabi ni gunabadiidxanu ca lu libru stiʼ Apocalipsis capítulo 17 ne 18.

Ximodo chiguinitilú religión ni cadi dxandíʼ

Bixuiʼlú cayuuyaluʼ ti gunaa dxabaʼ dxiʼbaʼ deche ti maniʼ guizáʼ feu ni napa gadxe ique ne chii cachu (Apocalipsis 17:1-4). Tuu nga zeeda gaca gunaa dxabaʼ riʼ yaʼ. Laabe nga rucaabe «irá rey ni nuu ndaaniʼ guidxilayú» gúnicaʼ ni nabe, nácube lari moradu, riquiiñebe guʼxhuʼ ni rindá naxhi ne guizáʼ nápabe bidxichi. Ne laaca riguítebe «ique irá binni» ne brujería stibe (Apocalipsis 17:18; 18:12, 13, 23). Biblia na gunaa dxabaʼ riʼ nga zeeda gaca guiráʼ religión ni cadi dxandíʼ ni nuu lu guidubi naca Guidxilayú. Nga runi, gunaa riʼ cadi ti religión si nga zeeda gácabe, sínuque guiráʼ religión ni rucaa binni guni ni cadi jneza.

Maniʼ guizáʼ feu ca nga zeeda gaca ca gobiernu políticu ni cayuni mandar lu guidubi naca guidxilayú riʼ (Apocalipsis 17:10-13).a Luguiame nga dxiʼbaʼ religión ni cadi dxandíʼ ca, ne nisi cuyubi chuʼ lu ni racaláʼdxime gúnime ne guni mandar laame.

Maʼ cadi candaa zazaaca xiixa ni guizáʼ zadxagayaa binni: «Ne zaca nanalaʼdxi chii cachu ni napa mani que dxa gunaa dxaba que, ne zusaana ca laabe xie ladi be sin gastiʼ. Zo ca xpeela be ne zuzaaqui ca laabe» (Apocalipsis 17:16). Guizáʼ nagueenda ne guizáʼ feu modo chigucaalú ca gobiernu políticu ni nuu lu guidubi naca guidxilayú riʼ religión ni cadi dxandíʼ ca, ne zunitilúcabe laa. Xi zucaa laacabe gúnicabe ndiʼ yaʼ. Biblia ruzeeteʼ lu Apocalipsis xiñee chigácani: «Uluu Dios ni ndaani ladxidóʼ cabe para gaca ni ma gudixhe gacaʼ» (Apocalipsis 17:17). Dios zabidxi cuenta religión ni cadi dxandíʼ ca pur guiráʼ guendaquéiquiiñeʼ maʼ bíʼniʼ purtiʼ rusiidini Dios nga na gaca cani. Ni chiguni Dios riʼ nabé jneza ni, purtiʼ ca políticu ni zeeda gaca casi jnadxii gunaa dxabaʼ ca nga chiguiquiiñebe para gunduuxhebe laa.

Xi naquiiñeʼ guʼnuʼ para cadi guizaacaluʼ ni chiguizaaca religión ni cadi dxandíʼ ca yaʼ. Ángel stiʼ Dios na: «Lairee de ndaaniʼ guidxi ca, xpinne caʼ» (Apocalipsis 18:4). Yanna nga naquiiñeʼ guireʼnu de ndaaniʼ religión ni cadi dxandíʼ ca. Peru paraa chuunu yaʼ. Cadi gácanu casi cani na gastiʼ Dios, purtiʼ laaca naná ni cabeza laacaʼ (2 Tesalonicenses 1:6-9). Ra zanda si guilanu nga ndaaniʼ religión ni dxandíʼ ca. Ximodo zanda gannuʼ gunáʼ nga religión ni dxandíʼ ca yaʼ.

Ximodo zanda gannuʼ gunáʼ nga religión ni dxandíʼ

Xi ca cosa galán ndiʼ naquiiñeʼ gusihuinni religión ni dxandíʼ ca yaʼ (Mateo 7:17).

Religión ni dxandíʼ...

◼ ... RUSIIDINI BINNI GANNAXHII. Cani dxandíʼ xpinni Dios «cadi zinanda cabe [binni] guidxilayú», qué rúnicabe menu binni purtiʼ si gadxé raza laa ne gadxé modo biniisi, ni rúnicabe nga rusihuínnicabe nadxiisaacabe (Juan 13:35; 17:16; Hechos 10:34, 35). Ne qué ruutisaacabe, sínuque rudiicabe xquendanabánicabe pur xcaadxi binni (1 Juan 3:16).

◼ ... RUCAANI BINNI GUNI CRÉ NI NA STIIDXAʼ DIOS. Religión ni dxandíʼ qué rusiidini ni riníʼ ique binni guidxilayú ne ni runi, ni rusiidini nga ni cá lu Biblia, Stiidxaʼ Dios (Mateo 15:6-9). Xiñee yaʼ. Purtiʼ «irá Xquiʼchi Dios, Espíritu Santu uníʼ xi icá, ne nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu» (2 Timoteo 3:16).

◼ ... RACANENI BINNI CHUʼNÉ BINNILIDXI TOBI SI NE RUSIIDINI LAACABE GUIBÁNICABE JNEZA. Religión ni dxandíʼ ca rudiini conseju ca hombre ni maʼ bichaganáʼ gannaxhiicaʼ xheelacaʼ casi nadxiicaʼ xcuérpucaʼ, racaneni ca gunaa ni maʼ bichaganáʼ gúnicaʼ ni na xheelacaʼ, ne xiiñicabe la? racaneni laacaʼ guzuubacaʼ stiidxaʼ bixhózecaʼ ne jñaacaʼ (Efesios 5:28, 33; 6:1). Ne ni gapa xiixa dxiiñaʼ de gusiidiʼ ndaaniʼ religión ni dxandíʼ ca, naquiiñeʼ gácabe ti binni ni zanda chinándacabe ejemplu stiʼ (1 Timoteo 3:1-10).

Ñee nuu religión runi cani maʼ guninu riʼ la? Ti libru ni biree lu iza 2001, na: «Pa ñuu jma binni nibani casi modo rusiidiʼ ca testigu stiʼ Jiobá ne modo rúnicabe la? maʼ qué ñuuticabe ca judíu que lu guiropa guendaridinde guca lu Guidxilayú riʼ, ne maʼ qué ñuuruʼ tu ñuuti binni purtiʼ si de gadxé raza laa» (Holocaust Politics).

Ca testigu stiʼ Jiobá ni nuu lu 235 guidxi cadi rusiidisícabe cani zeeda lu Biblia, sínuque rúnicabe ni na ni. Zanda guinábaluʼ laacabe gacanécabe lii gánnaluʼ xi canabaʼ Dios guni cada tobi de laanu para guni adorarnu laabe casi modo riuuláʼdxibe. Yanna nga naquiiñeʼ gúniluʼ ni. Cadi guindaaluʼ. Purtiʼ ¡mayaca guinitilú religión ni cadi dxandíʼ! (Sofonías 2:2, 3.)

Pa racaláʼdxiluʼ gánnaluʼ jma de ni rusiidiʼ ca testigu stiʼ Jiobá la? zanda gucaaluʼ ra nuu tobi de ca lugar ni cá xagueteʼ riʼ.

□ Ni racaladxesiáʼ nga guicaa folletu Xi canabaʼ Dios lii guʼnuʼ

Bicaa xi diidxaʼ riniʼluʼ.

□ Racalaʼdxeʼ gábitu naa ximodo rusiiditu binni de Biblia ra lidxi sin quixe.

[Cani cá ñee yaza]

«Lairee de ndaaniʼ guidxi ca, xpinne caʼ»

Religión ni cadi dxandíʼ rucaani «irá rey ni nuu ndaani guidxilayú» gúnicaʼ ni racalaʼdxiʼ ni