Ca diidxaʼ riuundaʼ ni rusiidiʼ ne riguixhedxí ladxidoʼno

LIBRU ni jma ziuulaʼ zeeda lu Biblia nápani stale diidxaʼ riuundaʼ para gusisaca Jiobá ne biaʼ ti mil iza yenécabe para bicaacabe cani. Nabé sicarú modo bicaacabe ca salmo ca purtiʼ bisihuínnicabe pabiáʼ fe gúpacabe. Laaca bicaacabe guiráʼ ni runi sentírcabe, casi pa nuucabe nayecheʼ o cayuubaʼ ladxidóʼcabe, pa cudiicabe xquíxepeʼ pur xiixa ni gucuaacabe o cayaca arrepentírcabe pur ni bíʼnicabe, pa cusisácacabe Dios o nuucabe triste. Guirácabe nadxiicabe Dios ne biʼniʼ sentírcabe nuucabe gaxha de laa. Guidúʼyanu chupa chonna de ca tema ni zeeda lu libru stiʼ Salmos.

Jiobá si nga napa derechu de guni mandar lu guidubi naca guibáʼ ne Guidxilayú, nga runi caquiiñeʼ gusisácanu ne guni adorarnu laabe. Salmo 83:18 cusiene chaahuiʼ: «Lii, ni laluʼ Jiobá ca, lii si nga Ni Nuu Jma Luguiáʼ lu guidubi naca guidxilayú». Stale de ca salmo riʼ rusisácacani Jiobá purtiʼ laa bizáʼ guibáʼ ne ca beleguí ca, guiráʼ ni nabani nuu lu Guidxilayú ne modo bizaʼbe laanu (Salmos 8, 19, 139 ne 148). Stale de laacani rusisácacani Jiobá purtiʼ rápabe ne rulabe cani qué rusaana laabe (Salmos 18, 97 ne 138). Ne xcaadxi de laacani rusisácacani laabe purtiʼ nácabe ti Dios ni runi ni jneza racanebe cani qué gapa donda ne rusabanabe ca binni malu (Salmos 11, 68 ne 146).

Jiobá racané ne riguixhedxí ladxidóʼ cani nadxii laa. Zanda guininu Salmo 23 nga ni jma runibiáʼ binni, purtiʼ luni cuzeeteʼ David zeeda gaca Bixhózenu ni nuu guibáʼ casi ti pastor ni rapa ca dendxuʼ stiʼ, ne ruluíʼ laacame pa neza chécame. Salmo 65:2 rusietenalaʼdxiʼ laanu naca Jiobá ti Dios «Ni rucaadiaga oración». Dede ca binni ni huayuni cosa nabé malu lu xquendanabani huaguixhedxí ca Salmo 39 ne 51 ladxidoʼcaʼ. Lúcani cusihuinni David pabiáʼ cayuubaʼ ladxidóʼ pur guiráʼ ca cosa ni nabé malu biʼniʼ ne nánnabe zutiidilaʼdxiʼ Jiobá stóndabe. Ne Salmo 55:22 cayabi laanu guni crenu zacané Jiobá laanu ne gudiʼnu lugar gacanebe laanu lu ca guendanagana stinu.

Jiobá zaquiiñeʼ Reinu stiʼ Mesías para guni chaahuiʼ Guidxilayú riʼ. Lu libru stiʼ Salmos ridxélanu stale lugar ra cuzeeteʼ de Mesías, Rey ni nexheʼ gueeda que. Casi lu Salmo 2 caníʼ ximodo zunitilú Rey riʼ intiica guidxi ni gucaalú laa. Salmo 72 cuzeeteʼ ximodo zabeebe guendapobre, ca cosa ni cadi cayaca jneza ne maʼ qué zudiibe lugar chuʼ tu guquichináʼ binni. Salmo 46:9 na zaquiiñeʼ Dios Reinu stiʼ para gunduuxeʼ guiráʼ guendaridinde ne zunidé guiráʼ ca guiibaʼ ni ruutinécabe binni. Ne lu Salmo 37 ridúʼndanu ora maʼ gaca Guidxilayú riʼ ti paraísu maʼ qué ziuu binni malu luni ne ca binni nachaʼhuiʼ zabánicaʼ galán ne ziuucaʼ tobi si.

(Zeedani lu libru stiʼ Salmos.)