Ndaa 14
Dios biquiiñeʼ caadxi profeta para guiniʼcaʼ pur laabe
Jiobá biquiiñeʼ caadxi profeta para gabi ca binni que zaca juzgarcaʼ ne zabiguetaʼ zuni adorarcaʼ Jiobá jneza ne laaca guniʼcaʼ de Mesías
DXI biʼniʼ mandar ca rey que ndaaniʼ guidxi Israel ne Judá, guyuu caadxi hombre ni guníʼ pur Dios ne gúdxicabe laacaʼ profeta. Para gunda guníʼcabe guiráʼ ni gudxi Dios laacabe gúcacabe binni nadxibalú ne gúpacabe stale fe. Guidúʼyanu chupa chonna tema ni guníʼcabe:
1. Zanitilú Jerusalén. Maca stale iza ante guníʼ ca profeta stiʼ Dios casi Isaías ne Jeremías zanitilú Jerusalén ne ziaanani stubi ni. Laacabe qué nutálecabe diidxaʼ para bisiénecabe xiñee bichiichi ca binni de guidxi que Jiobá. Neca ca binni de Jerusalén guniʼcaʼ cayúnicaʼ ni na Jiobá, peru cani bíʼnicabe bisihuínnicani cadi dxandíʼ ni nácabe que. Xiñee yaʼ. Purtiʼ biʼniʼ adorárcabe xcaadxi dios ni cadi naquiiñeʼ ñuni adorárcabe, bíʼnicabe stale guendaquéiquiiñeʼ ne nabé gudíndecabe (2 Reyes 21:10-15; Isaías 3:1-8, 16-26; Jeremías 2:1–3:13).
2. Zabiguetaʼ zuni adorárcabe Dios jneza. Guníʼcabe tiidiʼ si setenta iza de chuʼ guidxi que de esclavu Babilonia zabiguétacaʼ xquídxicaʼ, zucuicaʼ yuʼduʼ stiʼ Jerusalén ne zabiguetaʼ zuni adorarcaʼ Dios jneza (Jeremías 46:27; Amós 9:13-15). Biaʼ chupa gayuaa iza ante, Isaías guníʼ Ciro nga chigunitilú Babilonia ne zabeebe xquidxi Dios de raqué. Dede guniʼbe xi zuni Ciro para gunitilú guidxi que (Isaías 44:24–45:3).
3. Modo gueeda Mesías ne guiráʼ ni bizaaca. Guníʼcabe zale Mesías ndaaniʼ ti guidxi láʼ Belén (Miqueas 5:2). Laaca bizeetecabe qué zudxiibabe laca laabe, ne ziuube Jerusalén dxíʼbabe deche ti burru huiiniʼ (Zacarías 9:9). Ne neca zácabe nachaʼhuiʼ ne zannaxhiibe binni, peru stale tu zuni menu laabe (Isaías 42:1-3; 53:1, 3). Ne laaca guníʼcabe naná modo gátibe. Ñee raqué nga biluxe xquendanabani Mesías que la? Coʼ, purtiʼ ziásabe de lade gueʼtuʼ ne pur guendaguti stibe zanda gutiidilaʼdxiʼ Dios stonda binni guidxilayú (Isaías 53:4, 5, 9-12).
4. Ni chiguni Mesías ora guni mandar. Ca binni gulené donda qué zanda guni mandarcaʼ lu Guidxilayú riʼ, peru Mesías zanda gúnini. Ne zábicabe laabe Príncipe ni rudii Guendariuudxi (Isaías 9:6, 7; Jeremías 10:23). Ora guni mandarbe lu Guidxilayú riʼ ziuu guendariuudxi luni ne tobi si zabaniné binni ca maniʼ ca (Isaías 11:3-7). Maʼ qué ziuu nin ti clase guendahuará (Isaías 33:24). Dede maʼ qué ziuu guendaguti (Isaías 25:8). Ne zabani millón de ca binni ni maʼ guti sti biaje (Daniel 12:13).
(Zeedani lu libru stiʼ Isaías, Jeremías, Daniel, Amós, Miqueas ne Zacarías.)