Gudixhe Rahab guidubi ladxidóʼ lu náʼ Jiobá

Chigüeniáʼ lii historia stiʼ ti guidxi guyuu dxiqué. Laani nga Jericó ne guyuuni Canaán. Yanna, bixuiʼlú nuunu ndaaniʼ guidxi riʼ, ne maʼ bidiʼnu cuenta qué runi cré ca binni riʼ Jiobá. Peru raríʼ nabeza ti gunaa gadxepeʼ laa de ca binni riʼ. Gunaa riʼ nga Rahab.

Dede nahuiiniʼ Rahab binadiaga stale historia ra rieeteʼ cani biʼniʼ Jiobá. Ngue runi nánnabe ximodo gucané Jiobá ca israelita para biʼniʼ ganarcaʼ ca xhenemígucaʼ. Casi dxi biquiiñeʼ Jiobá Moisés para gulee ca israelita de Egipto. ¡Dede bixheleʼ Jiobá ti neza ndaaniʼ nisadóʼ Xiñáʼ para tiidiʼ guidxi que! Yanna maʼ qué guidxela Rahab xi guni. Xiñee yaʼ. Purtiʼ maʼ gúnnabe nuu ca israelita gaxha de Jericó, guidxi ra nabézabe.

Ti gueelaʼ, nagaʼchiʼ guyuu chupa israelita ndaaniʼ guidxi Jericó para gúʼyacaʼ ximodo nuu guidxi riʼ. Yendácabe ra lidxi Rahab, ne laa gunabaʼ laacabe guiaanacabe raqué. Gueelaʼ que gunna rey stiʼ Jericó nuu chupa hombre ra lidxi Rahab ni zeeda gundaachiʼ guidxi que. Ngue runi, biseendaʼ rey que caadxi hombre chiyubi laacabe. Xi guni Rahab yaʼ. Bicaachibe ca israelita que ique lídxibe ne gúdxibe ca hombre ni biseendaʼ rey que: «Maʼ zeʼ ca hombre beeda gundaachiʼ guidxi riʼ. Peru pa guxooñetu la? zugaandarutu laacabe». ¡Zacá nga biʼniʼ Rahab para bilá ca israelita que! Ñuulaʼdxuʼ ñannuʼ xiñee gucanebe ca hombre riʼ la?... Purtiʼ runi crebe Jiobá. Nánnabe zacané Jiobá ca israelita guni ganarcaʼ guidxi Jericó ne Canaán.

Ante guiree ca hombre zigundaachiʼ que ra lidxi Rahab, bidii stiidxacaʼ laabe, zalabe ne zalá binnilídxibe ora gunitilú Dios Jericó. Peru, xi caquiiñeʼ guni Rahab para guilá yaʼ... Guidúʼyanu xi gudxi ca hombre que laabe: «Bigaanda doo xiñáʼ riʼ ra ventana stiuʼ ne bitagulisaa binnilídxiluʼ ndaaniʼ liʼdxuʼ». Biʼniʼ Rahab módopeʼ gudxi ca hombre que laa. Ñuulaʼdxuʼ ñueniáʼ lii xi bizaaca despué la?...

Gudiʼdiʼ si chupa chonna gubidxa, bidii ca israelita que stale vuelta guidubi guidxi Jericó. Cada dxi rudiicabe ti vuelta guidxi que ne zaqué bíʼnicabe xhoopaʼ gubidxa ne qué nucaacabe nin ti ridxi. Peru lu gadxe gubidxa que bidiicabe gadxe vuelta guidxi que ne óraque guirácabe bicaacabe ti ridxi nadipaʼ. Málasi bizaaca xiixa ni nabé bidxagayaa binni: ¡Bisaba Jiobá ca lindaa ngola ni naguu leʼ guidxi Jericó! Peru, ñee laaca biaba lidxi Rahab la? Coʼ, purtiʼ nanda ti doo xiñáʼ ra ventana stini. Ñee cayuuyuʼ doo cá lu dibuju riʼ la?... ¡Zacá nga bilá Rahab ne binnilidxi!

Ñee biiyuʼ modo bilá Rahab purtiʼ bizuubaʼ stiidxaʼ Jiobá la?... Laabe nánnabe zapa Dios laabe ngue runi, gudíxhebe guidubi ladxidoʼbe lu náʼ. Ora byuiʼnécabe laabe guiráʼ ni biʼniʼ Dios gucaneni laabe guiziidibe guni crebe Jiobá. Lii laaca caziidiluʼ stale cosa de Jiobá. Ñee zuzuubaluʼ stiidxabe casi biʼniʼ Rahab la?... ¡Nanna dxíchidu zúniluʼ ni!