Bixooñecabe de ti rey malu

Bicuaaniʼ José María ne gúdxibe laa ti cosa ni naquiiñeʼ gúnicabe nagueenda. Lu ti bacaandaʼ biiyaʼ José ti ángel stiʼ Jehová, ne gudxi ángel que laabe: «Biasa, gucuaa hombrehuiiniʼ ca ne jñaa ne guyé Egipto, ne biaana raqué dede ora gabeʼ lii guibiguétaluʼ, purtiʼ maʼ chiyubi Herodes hombrehuiiniʼ ca para guuti» (Mateo 2:13).

Ngue runi huaxhinni queca bixooñeʼ José, María ne Jesús de ra lidxi. Ne biaʼsi peʼ ora bíʼnicabe ni, purtiʼ maʼ gunna Herodes gudxite ca astrólogo que laa. Gudxi Herodes ca astrólogo riʼ guibiguétacaʼ para gábicaʼ laabe paraa nuu hombrehuiiniʼ que, peru gucuaacaʼ sti neza ne zecaʼ xquídxicaʼ. Ngue runi guizáʼ bidxiichi Herodes. Cumu nuube guutibe Jesús la? ngue runi biseendabe tu guuti guiráʼ hombrehuiiniʼ de chupa iza o menu ni nuu Belén ne ca guidxihuiiniʼ nuu gaxha. Biʼniʼ mandarbe gaca ndiʼ purtiʼ biʼniʼ calcularbe panda iza napa Jesús pur ni gudxi ca astrólogo de Oriente que laabe.

Cadi dxandíʼ guizáʼ feu ni biʼniʼ mandar Herodes gaca la? qué gánnanu panda hombrehuiiniʼ biiticabe, peru pur modo biʼnaʼ ne bicaa ca gunaa que ridxi, guca cumplir ni maca guníʼ Dios de ruaa profeta Jeremías (Jeremías 31:15).

Peru ante guizaaca guiráʼ nga, mápeca zeʼ José ne familia stiʼ Egipto ne biaanacaʼ raqué. Gudiʼdiʼ si ti tiempu, biiyaʼ José ti ángel stiʼ Jehová lu ti bacaandaʼ dxi nuu Egipto ne gudxi ángel que laabe: «Biasa, gucuaa hombrehuiiniʼ ca ne jñaa, ne bibiguetaʼ guidxi Israel, purtiʼ maʼ guti ca ni racalaʼdxiʼ guuti hombrehuiiniʼ ca» (Mateo 2:20). Cumu biiyaʼ José maʼ guti ca ni nuu guniná hombrehuiiniʼ que la? bibiguetanebe familia stibe xquídxibe. Ne zacá guca cumplir sti profecía ni zeeda lu Biblia, ni ná zucaa ridxi Dios xiiñiʼ para guiree de Egipto (Oseas 11:1).

Ruluíʼ si napa José gana guibiguetané familia stiʼ Judea, zándaca gaxha de Belén, purtiʼ racá nga gulézacabe ante chécabe Egipto. Peru gúnnabe maʼ Arquelao, ti hombre malu xiiñiʼ Herodes, naca rey stiʼ Judea. Ngue runi gudxi Dios laabe lu sti bacaandaʼ cadi chebe raqué. Ngue runi guyé José ne familia stiʼ yendézacaʼ jma guiá de Judea, ndaaniʼ guidxi Nazaret, lu territorio stiʼ Galilea, zitu de Jerusalén. Lugar que nga biniisi Jesús ne zaqué guca cumplir ni maca guníʼ ca profeta: «Zábicabe laabe Nazarenu» (Mateo 2:23).