Bisihuinni Jesús racalaʼdxiʼ guni adorárcabe Dios jneza

Despué de guendaxheelaʼ ni guca ndaaniʼ guidxi Caná que, yené Jesús jñaaʼ ne ca biʼchiʼ: Santiago, José, Simón ne Judas guidxi Capernaúm.

Peru ¿xiñee chebe Capernaúm yaʼ? Purtiʼ guidxi riʼ jma runibiáʼ binni ni que Nazaret o Caná ne jma naroʼbaʼ ni. Ne stale de ca primé discípulo stibe nabézacaʼ ndaaniʼ guidxi riʼ o gaxha de laani. Ti ganda gusiidiʼ Jesús laacabe ndaaniʼ xquídxicabe.

Laaca biʼniʼ Jesús stale milagru ndaaniʼ guidxi Capernaúm, ne stale binni de guidxi que ne ca ni nuu gaxha de raqué cayunadiágacaʼ caníʼcabe de ca milagru cayúnibe raqué. Despué yené Jesús ca discípulo stiʼ Jerusalén para guni celebrarcaʼ Pascua stiʼ iza 30, casi runi ca judíu ni rinanda ni ná Stiidxaʼ Dios.

Yendásicabe ndaaniʼ templu stiʼ Jerusalén, biʼniʼ Jesús xiixa ni bidxagayaa ca discípulo stiʼ, purtiʼ qué huayuuyacaʼ gúnibe xiixa zaqué.

Gunabaʼ Ley stiʼ Dios ca israelita gudiicaʼ maniʼ casi sacrificiu ndaaniʼ templu ni nuu Jerusalén. Ca ni zeeda de sti guidxi naquiiñeʼ guyúbicaʼ ni iquiiñecaʼ purtiʼ ziaanacaʼ ndaaniʼ guidxi que chupa chonna gubidxa. Cumu de zitu zeedacabe, ngue runi bidii Ley que lugar sícabe yuze, dendxuʼ, chiva ne intiica cosa ni iquiiñecabe (Deuteronomio 14:24-26). Nga runi, bitoo ca binni de Jerusalén paloma ne xcaadxi maniʼ lu patiu roʼ ni nuu ndaaniʼ templu que. Peru stale de laacaʼ riguítecaʼ ne ribáʼnacaʼ binni, purtiʼ rudxiibacaʼ lu guiráʼ cosa ni cutoocaʼ.

Ora biʼyaʼ Jesús ni cayúnicabe guizáʼ bidxiichi, bicheeche moneda stiʼ ca ni cuchaa bueltu ne bitiixhi mexaʼ stícabe ne guladxi laacabe de ndaaniʼ templu que. Ne gudxi Jesús ca binni que: «¡Lacuee guiráʼ ndiʼ de raríʼ! ¡Cadi gúnitu lidxi Bixhozeʼ ti luguiaa!» (Juan 2:16).

Ora biʼyaʼ ca discípulo ni cayuni Jesús que la? bietenaláʼdxicaʼ xa profecía ni ná xi zuni Xiiñiʼ Dios: «Tantu nadxieeʼ lídxiluʼ dede zeeda gaca ni casi ti bele ni cacaguí ndaaniʼ ladxiduáʼ». Ngue runi gunabadiidxaʼ caadxi judíu laabe: «¿Xi señal guluiʼluʼ laadu ti guidúʼyadu dxandíʼ nápaluʼ autoridad para gúniluʼ ndiʼ pue?». Para bicabi Jesús laacabe: «Laguxhiá templu riʼ ne chonna si gubidxa zandisaʼ ni» (Juan 2:17-19; Salmo 69:9).

Zácaxa ca judíu que caníʼ Jesús de templu ni nuu Jerusalén, ngue runi nacaʼ: «Bindaa 46 iza para gurí templu riʼ, ¿ne yanna naluʼ lu chonna si gubidxa zandísaluʼ ni la?» (Juan 2:20). Peru ora guníʼ Jesús diidxaʼ templu caníʼ de cuerpu stiʼ. Gudiʼdiʼ si chonna iza, dxi maʼ biasa Jesús de lade gueʼtuʼ, bietenalaʼdxiʼ ca discípulo stiʼ ca diidxaʼ riʼ.