¿Zanda gacanécabe binni sábadu la?

Stale cosa maʼ biʼniʼ Jesús biaʼ tiempu ziné de cayuni xhiiñaʼ Dios lu región de Galilea. Peru ora guniʼbe: «Laaca naquiiñeʼ guneʼ predicar ca noticia galán stiʼ Reinu stiʼ Dios ndaaniʼ xcaadxi guidxi», cadi caniʼbe chiguni predicarbe ca guidxi si ni nuu Galilea. Nga runi, laaca riebe riguni predicarbe ndaaniʼ ca sinagoga ni nuu Judea (Lucas 4:43, 44). Nánnanu biaʼsi guyebe Judea, purtiʼ maʼ primavera ne maʼ zedadxiña dxi gaca saa stiʼ Pascua, ni raca celebrar Jerusalén lu ca beeu marzo ne abril.

Huaxiéʼ riete lu ca Evangeliu ni biʼniʼ Jesús Judea, jma nga riete dxiiñaʼ ni bíʼnibe región de Galilea. Zándaca huaxiéʼ galán modo bidxaagalú binni laabe Judea, peru qué nusaana Jesús de guni predicar ne de guni cosa galán neza zeʼ.

Qué nindaa, guyé Jesús Jerusalén, capital stiʼ Judea, para guni celebrar Pascua de iza 31. Gaxha de ra Puertaʼ stiʼ ca Dendxuʼ, ti lugar ra ridiʼdiʼ stale binni, nuu ti tanque naroʼbaʼ napa jma pilar, ni láʼ Betzata. Rié stale ciegu, ni nachiitaʼ ñee ne binni huará raqué, purtiʼ riníʼ íquecaʼ ziándacaʼ pa chuʼcaʼ ora guiniibi nisa ni nuu ndaaniʼ tanque riʼ.

Ti sábadu gudiʼdiʼ Jesús nezaqué, biiyabe ti hombre ni maʼ ziné treinta y ocho iza de huará. Ngue runi, bidxíñabe ne gunabadiidxabe laa: «¿Ñee racaláʼdxiluʼ guiándaluʼ la?». Para ná hombre que: «Señor, qué gápadiaʼ tu cuʼ naa ndaaniʼ tanque ca ora riniibi nisa stini. Cada biaje ora maʼ chichuaaʼ, ridiʼdiʼ stobi luaʼ ne riete primé que naa» (Juan 5:6, 7).

De raqué, gudxi Jesús hombre riʼ xiixa ni nabé bidxagayaa ne laaca bidxagayaa ca ni cucaadiaga Jesús: «¡Biasa! Gundisaʼ camilla stiluʼ ne guzá» (Juan 5:8). Ne oraqueca bianda hombre riʼ ne biʼniʼ ni gudxi Jesús laa: gundisaʼ camilla stiʼ ne guzá.

Ora biʼyaʼ ca judíu ni bizaaca hombre riʼ, lugar de ñéchecaʼ laga gúdxicaʼ laabe: «Yannadxí sábadu. Cadi naquiiñeʼ gualuʼ camilla stiluʼ». Para bicábibe: «Laca hombre bisianda naa que gudxi naa: “Gundisaʼ camilla stiluʼ ne guzá”» (Juan 5:10, 11). Para ca judíu que cadi jneza nga gusiándacabe binni sábadu.

Para gunabadiidxacaʼ laabe: «¿Tu hombre nga gudxi lii: “Gundisaʼ camilla stiluʼ ne guzá” yaʼ?». Peru qué gánnabe tu láʼ hombre ni bisianda laabe, purtiʼ maʼ biaaziʼ Jesús lade guiráʼ ca binni que (Juan 5:12, 13). Gupa si ratu, biiyabe Jesús ndaaniʼ templu ne raqué bidiibe cuenta tu laa.

Para biree hombre riʼ ziyubi ca judíu ni gunabadiidxaʼ laabe que, ti gábibe laacaʼ Jesús ngue bisianda laabe. Nga runi, guyé ca hombre que ra nuu Jesús para guiniʼnécabe laa, cadi purtiʼ racaláʼdxicaʼ gánnacaʼ ximodo rúnibe milagru, sínuque para tíndenecaʼ laabe xiñee rúnibe milagru sábadu. Ngue runi, guzanándacaʼ Jesús.