Guxha Ca Discípulo Caadxi Espiga Dxi Sábadu

Maʼ gunda primavera ne ziné Jesús ca discípulo stiʼ ladu guiaʼ de Galilea. Ti dxi, laga zididiné Jesús ca discípulo stiʼ lu ca layú ra nuu trigu, bindaanacaʼ, nga runi bizulú gúxhacaʼ espiga ne cayocaʼ trigu. Guca ni ti sábadu, ne biiyaʼ ca fariseu ni cayuni ca discípulo riʼ.

Guietenaláʼdxinu, cadi xadxí gucalaʼdxiʼ caadxi judíu de Jerusalén ñuuticaʼ Jesús purtiʼ nacaʼ bicheenebe ley stiʼ sábadu. Peru qué ñuulaʼdxiʼ ca fariseu ni biʼniʼ ca discípulo stiʼ Jesús, ngue runi guniʼcaʼ: «¡Biiyaʼ! Cayuni ca discípulo stiluʼ ni cadi naquiiñeʼ gaca sábadu» (Mateo 12:2).

Para ca fariseu la? pa tuuxa gaxha espiga ne gutunani para cuee trigu, casi ñaca nindisaʼ cosecha ne niguibi ni (Éxodo 34:21). Nabé naguidxi ladxidóʼ ca fariseu, ngue runi para laacaʼ cadi jneza guni binni xiixa dxi sábadu, ngue runi beeda gaca ley riʼ ti carga. Peru ni racalaʼdxiʼ Dios nga chuʼ binni nayecheʼ dxi ca ne guquídxicaʼ fe sticaʼ ora guni adorarcaʼ laabe. Ngue runi, guluu jneza Jesús ca fariseu riʼ, ne biquiiñeʼ chupa ejemplu ni cusihuinni qué racalaʼdxiʼ Jehová gaca ley stiʼ sábadu modo nácabe que.

Primeru, gudxi Jesús laacabe ni bizaaca David ne ca hombre ni ziné, ora bindaanacaʼ ne gudocaʼ ca pan de presentación ni nuu ndaaniʼ tabernáculo. Ca sacerdote si nga zanda gó ca pan ni nexheʼ ndaaniʼ tabernáculo riʼ, ora guindísacaʼ ca pan riʼ riguíxhecaʼ xcaadxi pan ni deruʼ guca. Peru cumu candaana David ne ca hombre que la? qué nidxiichiné Dios laacabe neca gudócabe ca pan que (Levítico 24:5-9; 1 Samuel 21:1-6).

De raqué, gudixhe Jesús guiropa ejemplu riʼ: «¿Ñee qué huayuundatu lu Ley ra ná runi ca sacerdote dxiiñaʼ ndaaniʼ templu sábadu, peru cadi pur nga riguiʼbaʼ donda íquecaʼ purtiʼ si qué rúnicaʼ ni ná ley stiʼ sábadu la?». Zacá ni, dede né dxi sábadu runi sacrificar ca sacerdote maniʼ ne rúnicaʼ xcaadxi dxiiñaʼ ndaaniʼ templu. Nga runi, guníʼ Jesús: «Peru naa cayabeʼ laatu, nuu tobi raríʼ jma risaca que templu» (Mateo 12:5, 6; Números 28:9).

Sti biaje ca bizeeteʼ Jesús ni cá lu Stiidxaʼ Dios para guluíʼ laacabe cadi jneza modo riníʼ íquecabe: «Peru pa ñénetu xi riníʼ ca diidxaʼ riʼ: “Ni racalaʼdxeʼ nga guiatu binni que gudiitu sacrificiu”, qué ñuni condenartu ca ni qué gapa donda». Biluxené Jesús ca diidxaʼ riʼ: «Purtiʼ Xiiñiʼ Hombre nga Señor stiʼ sábadu». Ca diidxaʼ guníʼ Jesús riʼ, rusihuínnicani zedanebe paz lu Guidxilayú ora guni mandarbe ti mil iza (Mateo 12:7, 8; Oseas 6:6).

Maʼ xadxí de cayuniná Binidxabaʼ binni pur guiráʼ guerra de guendanagana nuu lu Guidxilayú riʼ. ¡Guizáʼ maʼ gadxé si zabáninu ora guni mandar Cristu! Zácani casi ti sábadu naroʼbaʼ, purtiʼ guiranu zaziiláʼdxinu o zatadxí ladxidoʼno, ne nga peʼ nga ni caquiiñenu yanna riʼ.