Naroʼbaʼ fe gupa ti oficial stiʼ ejércitu

Biluxe bidii si Jesús discursu que zeʼ guidxi Capernaúm. Raqué bidxiña chupa chonna ancianu stiʼ ca judíu laabe ni biseendaʼ ti hombre de sti guidxi, ti oficial stiʼ ejércitu de Roma.

Ti mozo ni nabé nadxii oficial riʼ guizáʼ huará, dede biaʼ qué gati si. Bidii ti parálisis laabe ne «néxhebe ra yoo ne guizáʼ cayuubabe» (Mateo 8:6). Neca cadi judíu oficial riʼ peru biyúbibe gacané Jesús laabe. Ca ancianu que gúdxicaʼ Jesús runi merecer hombre que gacanebe laa ne bisiénecaʼ laabe xiñee: «Purtiʼ nadxiibe guidxi stinu ne laabe bicuibe sinagoga stidu» (Lucas 7:4, 5).

Para biree Jesús ziné laacabe ra lidxi oficial que. Peru ora mayaca chindácabe ra yoo que biseendaʼ oficial stiʼ ejércitu que chupa chonna xhamigu para chitídxicaʼ Jesús: «Señor, cadi gápaluʼ dxiiñaʼ gueeduʼ, purtiʼ qué runeʼ merecer chuʼluʼ ndaaniʼ lidxeʼ. Laaca qué runeʼ merecer chaaʼ ra nuuluʼ» (Lucas 7:6, 7). Neca maʼ biaa hombre riʼ gudii orden peru guizáʼ gúcabe humilde. Bisihuinni ca diidxaʼ guniʼbe riʼ, cadi nácabe casi ca romanu, purtiʼ laacaʼ runi maltratarcaʼ ca esclavu sticaʼ (Mateo 8:9).

Nanna oficial riʼ qué riná ca judíu guidxaagacaʼ binni de sti guidxi (Hechos 10:28). Zándaca pur nga biseendabe ca xhamígube chitídxicaʼ Jesús: «Guníʼ si ti diidxaʼ ne zianda mozo stinneʼ» (Lucas 7:7).

Guizáʼ bidxagayaa Jesús ora binadiaga ndiʼ ne gudxi laacabe: «Chitidxeʼ laatu nin ndaaniʼ guidxi Israel qué huadxelaʼ tuuxa ni napa fe biaʼ napa hombre riʼ» (Lucas 7:9). Ora biguetaʼ ca hombre que ra lidxi oficial que gúnnacaʼ maʼ bianda mozo stibe que.

Pur ni biʼniʼ Jesús riʼ, bisiene binni zanda guicaa ca ni cadi naca judíu ndaayaʼ stiʼ Dios pa gápacaʼ fe. Guniʼbe: «Cayabeʼ laatu zeeda stale binni de neza este ne de neza oeste ne zabinecaʼ Abrahán ne Isaac ne Jacob ruaa mexaʼ lu Reinu ni nuu guibáʼ». Peru ¿xi zazaaca ca judíu ni qué gapa fe yaʼ? Jesús guníʼ: «Zulaacabe laacaʼ fuera ra nacahui racá nga gúʼnacaʼ ne guquiichiʼ láyacaʼ» (Mateo 8:11, 12).

Ca judíu nga cudii Dios oportunidad primeru para chuʼcaʼ lu Reinu né Cristu, peru tu qué náʼ guicaani la? záxhabe ni laa. Peru ziuu caadxi binni ni cadi naca judíu ni zabiné Jesús «ruaa mexaʼ lu Reinu ni nuu guibáʼ».