Cabeza Juan guicabi Jesús laa

Maʼ biaʼ ti iza de deguyoo Juan Bautista. Peru binadiágabe guiráʼ cosa galán cayuni Jesús. Bixuiʼlú xi biʼniʼ sentirbe ora gudxi ca discípulo stibe laabe bisibani Jesús xiiñiʼ ti viuda de Naín. Yanna, racalaʼdxiʼ Juan gabi Jesús laabe pa laa nga Mesías. Ngue runi, biseendabe chupa discípulo stibe ra nuu Jesús para guinabadiidxacaʼ laa: «¿Ñee lii nga ni chigueeda que la? o zabézadu gueeda stobi?» (Lucas 7:19).

¿Xiñee gunabadiidxaʼ Juan ndiʼ? Runi Juan ni ná Dios. Guietenaláʼdxinu dxi guluunísabe Jesús raca biaʼ chupa iza, biiyabe biete espíritu santu luguiáʼ Jesús ne binadiágabe guníʼ Dios cusiecheʼ Jesús ladxidóʼ. Nga runi, qué zanda guininu maʼ cará fe stibe. Ne pa ñaca zacá ni la? qué niníʼ diʼ Jesús bien de laabe casi biʼniʼ ni biaje riʼ. Peru pa nánnabe guiráʼ ndiʼ ¿xiñee canabadiidxabe ndiʼ yaʼ?

Zándaca ni nuu Juan nga Jesús peʼ gabi laabe laa nga Mesías, purtiʼ zaguuni gana Juan para guni huantar ndaaniʼ cárcel. Peru cadi ngasi nuube gánnabe. Runibiaʼbe ca profecía ni zeeda lu Biblia ni caníʼ zaca Ungidu stiʼ Dios rey ne zulá binni, peru maʼ gudiʼdiʼ stale beeu de dxi guluunísabe Jesús, ne nuurube ndaaniʼ cárcel. Nga runi, nuu Juan ganna pa zeeda sti binni despué de Jesús, ni zuni cumplir xcaadxi profecía ni caníʼ de Mesías.

Qué ñabi diʼ Jesús ca discípulo stiʼ Juan laa nga ni nexheʼ gueeda que, sínuque biluiʼbe laacaʼ cayacané Dios laabe para gusiándabe binni ni napa intiica guendahuará. Despué gúdxibe laacaʼ: «Laché ne lagabi Juan ni cayuuyatu ne ni cayunadiágatu: maʼ ruuyaʼ ca ciegu, maʼ rizá ca ni nachiitaʼ ñee, maʼ bianda ca ni napa lepra, maʼ runadiaga ca diagacuaataʼ, maʼ bibani ca ni maʼ guti ne maʼ cayunadiaga ca pobre ca noticia galán» (Mateo 11:4, 5).

Zándaca gunabadiidxaʼ Juan ndiʼ, purtiʼ cabeza guni Jesús jma stale cosa qué biaʼ huayuni ne cuee laabe de ra deguyoobe que. Peru gudxi Jesús laabe cadi cuézabe guni xcaadxi cosa que ca milagru ni cayuni.

Zeʼ si ca discípulo stiʼ Juan, gudxi Jesús ca binni que naca Juan jma que ti profeta. Nácabe «mensajeru» stiʼ Jehová casi cá ni lu Malaquías 3:1 ne nácabe profeta Elías ni riete lu Malaquías 4:5, 6. Bisiene Jesús: «Gábecaʼ laatu, qué huayuu dxi gale tuuxa jma risaca que Juan Bautista. Peru ni nahuiiniʼ lu Reinu ni nuu guibáʼ jma risaca que laabe» (Mateo 11:11).

Ra guníʼ Jesús ni nahuiiniʼ lu Reinu ni nuu guibáʼ jma risaca que Juan, cusiénebe qué ziuu Juan lu Reinu ni nuu guibáʼ. Bixhele Juan ti neza para ora gueeda Cristu, peru zátibe ante guxheleʼ Jesús ti neza para ca ni cheʼ guibáʼ (Hebreos 10:19, 20). Neca zacá, gúcabe ti profeta fiel stiʼ Dios ne zabánibe lu Guidxilayú riʼ ora guni mandar Reinu stiʼ Dios.