Biándabe Ra Gudáʼnabe Xhaba Jesús

Maʼ gunna ca judíu ni nabeza ladu noroeste de nisadóʼ stiʼ Galilea maʼ biguetaʼ Jesús de región stiʼ Decápolis. Zándaca stale de laacaʼ gúnnacaʼ bicueezadxí Jesús bi ne nisadóʼ lu ti tormenta ne zándaca xcaadxi gunna bisiándabe chupa hombre ni guyuu demonio luguiáʼ. Ngue runi bidxiña «stale binni» guriá nisadóʼ, zándaca gaxha de Capernaúm, para guidxagalucaʼ Jesús (Marcos 5:21). Guiráʼ ca binni que nuucaʼ gúʼyacaʼ xiruʼ chiguni Jesús ora guiete de ndaaniʼ canuá que.

Lade ca binni que nuu ti hombre ni cuyubi guʼyaʼ Jesús. Hombre riʼ láʼ Jairo ne presidente stiʼ ti sinagoga laabe, zándaca ni nuu Capernaúm. Ora bíʼyabe Jesús, biábabe xañee ne biʼniʼ rogarbe laa: «Guizáʼ huará dxaapahuiiniʼ stinneʼ. Gudáʼ, por favor, ne gudixhenáʼ luguiabe, ti guiándabe ne guibánibe» (Marcos 5:23). ¿Ñee zuni Jesús xiixa la? 12 iza napa xiiñiʼ Jairo ne guizáʼ nadxiibe laa (Lucas 8:42).

Laga zeʼ Jesús ra lidxi Jairo, biiyabe sti cosa ni biniibi ladxidoʼbe. Zinanda jma binni laabe purtiʼ caníʼ íquecaʼ zúnibe sti milagru. Ládecabe nuu ti gunaa ni cuyubi guianda de guendahuará malu stiʼ.

Judía gunaa riʼ ne maʼ 12 iza de caxii rini. Maʼ guyebe ra nuu stale doctor, maʼ binítibe xpuéltube lu stale tratamientu peru qué ganda guiándabe. Jmaruʼ si bininácabe laabe (Marcos 5:26).

Zándaca huaxiéʼ stipa nápabe pur guendahuará riʼ. Zándaca rusituí guendahuará riʼ lube ne guni sentirbe qué risácabe. Tuuxa ni napa guendahuará riʼ, qué lica ñé nitidxi ni binni. Ley stiʼ Moisés que ná cadi nayá diʼ ti gunaa ni guixii rini ne qué zanda chuʼ lade binni para guni adorar Dios. Nga runi, tutiica canaʼ gunaa riʼ o xhábabe ni naze rini la? naquiiñeʼ quiʼbiʼ ladi ne zaca impuro o nabiidiʼ dede ora guiaaziʼ Gubidxa (Levítico 15:25-27).

Huayunadiaga gunaa riʼ xi guiráʼ huayuni Jesús ne pur nga biree ziyubi laabe. Peru cumu nabiidiʼ nuube casi ná Ley que, ngue runi biuube lade ca binni que pa ñanda si guirutiʼ nudii cuenta pa nuube raqué. Ne ziníʼ íquebe: «Nannaʼ ziandaʼ pa canaʼ neca xhábasibe». Ora gudáʼnabe ñee xhaba Jesús oraqueca gulezadxí rini que. ¡Maʼ bianda gunaa riʼ de «guendahuará ni cayuniná laa»! (Marcos 5:27-29).

Óraque gunabadiidxaʼ Jesús: «¿Tu gudaʼnaʼ naa?». ¿Ruxuíʼluluʼ ximodo biʼniʼ sentir gunaa que ora binadiaga ndiʼ la? Zácaxa Pedro caguite Jesús, ngue runi bicabi: «Naguu ca binni riʼ leʼ lii ne cuquiichicaʼ lii». Yanna, ¿xiñee gunabadiidxaʼ Jesús tu gudaʼnaʼ laa yaʼ? Laa guníʼ: «Nuu tu gudaʼnaʼ naa, purtiʼ bineʼ sentir biree poder luguiaʼyaʼ» (Lucas 8:45, 46). Dxandíʼ, bianda gunaa que pur poder ni biree luguiáʼ Jesús.

Biiyaʼ si gunaa que maʼ bidii Jesús cuenta xi biʼniʼ la? bidxiña ra nuube dede cayacaditi ne biaba xañeebe. Nezalú guiráʼ ca binni que gudxi gunaa que Jesús xi guendahuará gupa ne yanna maʼ bianda. Óraque gudxi Jesús laabe caadxi diidxaʼ ni gudixhedxí ladxidoʼbe: «Xiiñeʼ, fe stiluʼ nga bisianda lii. Guyé ne maʼ cadi chuʼluʼ xizaa, maʼ biándaluʼ de guendahuará ni cayuniná lii» (Marcos 5:34).

Rusihuinni ni bizaaca riʼ guizáʼ nachaʼhuiʼ ne riá rey ni gulí Dios para guni mandar Guidxilayú. Ne aparte de rizaaláʼdxibe binni laaca nápabe poder para gacanebe binni.