PREGUNTA 5

Xi guneʼ pa guni acosárcabe naa ra scuela

XIÑEE RISACA NI

Pur ni guʼnuʼ, zanda gacachaahuiʼ guendanagana ca o guiroobaʼ ni.

LII, XI ÑUʼNUʼ

Bixuiʼlú ndiʼ: qué náʼ Thomas cheʼ scuela yannadxí, nin guixíʼ, ne qué ziuuruʼ dxi. Bizulú guníʼ íquebe zacá raca chonna beeu, dxi guníʼ ca xcompañérube caadxi cosa ni cadi dxandíʼ de laabe. De raqué maʼ gudíxhecabe apodo stibe. Nuu tiru, ruyúbicabe modo guilácabe Thomas ne gusábacabe ca libru stiʼ, peru rúnicabe ni casi ora cadi laapecabe biyúbicabe guilácabe laabe. Nuu biaje la? rireepeʼ tobi lade grupu que ne rulaanáʼ laabe, ora udxiguetalube la? guiracaʼ rutiixhilucaʼ sti ladu. Peru neegueʼ huaxa gudidisúcabe: biʼniʼ amenazárcabe Thomas lu Internet...

Pa ñácaluʼ Thomas, xi ñuʼnuʼ.

GULEZA NE GUNÍʼ IQUE

Zándaruʼ guʼnuʼ xiixa. Zanda gudxiiluluʼ tuuxa sin tíndeluʼ. Ximodo yaʼ.

CADI GULÁBILUʼ LAACABE. Biblia ná: «Ti binni huati rusihuínnica guiráʼ xiana stiʼ, peru tobi ni nuu xpiaaniʼ rucueeza ni» (Proverbios 29:11). Pa guʼnuʼ stipa cadi guidxiichiluʼ la? zándaca guireecabe gana ne gusaana de guni búrlacabe lii.
CADI GUQUÍXELUʼ NI. Biblia cayabi laanu: «Neca uchee né cabe laatu, cadi uquixe tu ni laacabe» (Romanos 12:17). Jmaruʼ si nagana zácani para lii pa guquíxeluʼ ni.
BIXOOÑELÚ DE GUENDANAGANA. Biblia ná: «Binni nuu xpiaaniʼ la? rucaachilú ora guʼyaʼ maʼ zeeda xiixa guendanagana ni zuniná laa» (Proverbios 22:3). Ora ganda la? biree ra nuu binni o lugar ni zanda uguu lii lu guendanagana.
GUNÍʼ XIIXA NI CADI CABÉZACABE. Biblia caníʼ: «Ora ricábinu né diidxaʼ nadóʼ la? rindeteʼ ni xiana» (Proverbios 15:1). Dede zanda gusixídxiluʼ laacabe. Guzéʼtenu ti ejemplu. Pa chuʼ tu gabi lii gordo la? zanda gaʼbuʼ laa: «Dxandíʼ, zuluaʼsiaʼ jma galán pa ñeteʼ chupa chonna kilu, njaʼ».
BIREE DE RAQUÉ. Nora, de 19 iza, ná: «Pa guireeluʼ de ra nuucabe la? zahuinni riníʼ íqueluʼ casi binni huaniisi, nadípaluʼ ne nannuʼ gucueezuʼ laca lii, nga nga ni qué runi cani runi burla binni» (2 Timoteo 2:24).
GUPA CONFIANZA LII. Cani runi acosar stobi rudiicaʼ cuenta tuu nga qué gapa confianza laca laa ne zándaca qué zaca defender. Peru pa gúʼyacabe cadi cadxíbiluʼ la? zusaana de guni búrlacabe lii.
GUDXI NI TUUXA. Ti gunaa ni guca profesora guníʼ: «Cadi gucaachiluʼ ni, guníʼ tu laacabe. Nga nga ni naquiiñeʼ gúnibe, purtiʼ zacané ni para cadi guninácabe sti binni».

Cadi cadxibi ti joven ni napa confianza laca laa ti binni ni runi acosar stobi — Pa napuʼ confianza lii la? zusihuínniluʼ jma nadípaluʼ que laabe.

**XI NANNUʼ**
DXANDÍʼ LA? O CADI DXANDÍʼ	RESPUESTA
1 Maʼ raca mil iza de nuu ca binni runi acosar stobi.	1 Dxandíʼ. Biblia ruzeeteʼ de caadxi binni ni binibiáʼcabe laacaʼ casi nefilim, diidxaʼ riʼ riníʼ ni «cani rusaba xcaadxi binni» (Génesis 6:4).
2 Zanda gúnicabe bullying tuuxa, cadi málupeʼ ni.	2 Cadi dxandíʼ. Huayuuti stale joven laca laa pur bullying.
3 Para ganda gucueezuʼ tuuxa ni cayuni acosar lii la? gudiñe laa.	3 Cadi dxandíʼ. Stale biaje la? jma nga nadipaʼ ca acosador riʼ ngue runi pur gana si gacaláʼdxiluʼ quíñeluʼ laacabe.
4 Cadi guiniʼluʼ gastiʼ pa guʼyuʼ cayuni acosárcabe tuuxa.	4 Cadi dxandíʼ. Pa qué guiniʼluʼ la? maʼ cayácaluʼ cómplice. Lugar de ñacaneluʼ ñacachaahuiʼ problema ca la? jmaruʼ si zacaneluʼ guiroobaʼ ni.
5 Stale biaje, runi si ca binni riʼ nadxibalucaʼ ti cadi gudii binni cuenta qué gápacaʼ confianza laca laacaʼ.	5 Dxandíʼ. Nécapeʼ nuu de laacabe rusihuinni nadxibalú la? stale biaje qué gápacabe confianza laca laacabe, nga runi rusituícabe lú binni para guni sentírcabe galán.
6 Zanda guchaa ca binni riʼ modo laacaʼ.	6 Dxandíʼ. Zanda guchaa modo riníʼ ique ca binni riʼ ne modo laacaʼ, pa chuʼ tu gacané laacaʼ.