Bihuinni pa dxandíʼ nápabe fe

Bisiidiʼ Abrahán xiiñiʼ, Isaac, gannaxhii Jiobá ne gapa confianza ca promesa stiʼ. Peru dxi napa Isaac 25 iza, gunabaʼ Jiobá laabe gúnibe ti cosa guizáʼ nagana. ¿Nánnaluʼ xii ni la?

Gudxi Dios Abrahán: «Gucuaa tobi lucha xiiñiluʼ ne bidii laabe casi ti ofrenda lu tobi de ca dani stiʼ Moria». Neca cadi cayene Abrahán xiñee canabaʼ Jiobá ndiʼ laa, bizuubabe diidxaʼ.

Sti dxi que, siadóʼ guieʼruʼ, biree Abrahán ziné Isaac ne chupa mozo stiʼ lu tobi de ca dani stiʼ Moria. Despué de chonna dxi biiyacabe ca dani que de zitu. Óraque gudxi Abrahán ca mozo stiʼ cuézacaʼ laacabe raqué purtiʼ laabe ne Isaac chécabe chigudiicabe sacrificiu. Gucuaa Abrahán gudxíu que ne bidiibe yaga ni chichaquiʼ que Isaac. De raqué gunabadiidxaʼ Isaac bixhoze: «¿Paraa nuu maniʼ ni chigudiʼnu sacrificiu yaʼ?». Para ná Abrahán rabi laabe: «Zudii Jiobá laanu tobi xiiñeʼ».

Ora yendácabe lu dani que, bíʼnicabe ti altar. De raqué gucuaa Abrahán bindiibi ñee ne náʼ Isaac ne gudíxhebe laa lu altar que.

Maʼ naaze Abrahán gudxíu que. Óraque guníʼ ti ángel stiʼ Jiobá de guibáʼ ná: «¡Abrahán! ¡Cadi guninaluʼ hombrehuiiniʼ ca! Yanna huaxa maʼ nannaʼ nápaluʼ fe Dios, purtiʼ guyuuluʼ dispuestu guni sacrificarluʼ xiiñiluʼ». Málasi, biiyaʼ Abrahán ti dendxuʼ barracu renda cachu stiʼ lade caadxi guiʼxhiʼ. Nagueendaca bixhéguebe Isaac ne maʼ dendxuʼ que biʼniʼ sacrificarbe.

Dede dxi que guníʼ Jiobá xhamigu Abrahán. ¿Nannuʼ xiñee la? Purtiʼ bíʼnibe guiráʼ ni gunabaʼ Jiobá laabe, neca cadi cayénebe xiñee gunabaʼ Jiobá laabe gúnibe ni.

Bibiguetaʼ gudxi Jiobá Abrahán promesa stiʼ: «Zaguaaʼ ndaayaʼ lii, ne zutaleʼ cani za de lii, zápaluʼ stale xiiñiluʼ». Ndiʼ riníʼ pur familia stiʼ Abrahán, zudii Jiobá stale cosa galán guiráʼ binni ni gaca nachaʼhuiʼ.