Ti yagahuiiniʼ naze bele

Bibani Moisés 40 iza Madián. Raqué bichaganabe ne gúpabe xiiñibe. Ti dxi laga cayápabe dendxuʼ gaxha de dani Sinaí biiyabe ti cosa ni guizáʼ bidxagayaabe. Ti yagahuiiniʼ naze bele, ¡peru cadi cayaʼquiʼ ni! Ora bidxiña Moisés ziguuya xi cayaca, binadiaga biree ti ridxi de lu yagahuiiniʼ que. Ridxi que gudxi laabe: «¡Moisés! Maʼ cadi guidxíñaluʼ. Gulee elaguidi ca ñeeluʼ, purtiʼ nayá lugar ra zuhuaaluʼ». Jiobá ngue biquiiñeʼ ti ángel stiʼ para guiniʼné Moisés.

Bidxibi Moisés, ngue runi bichii lú. Para bisiene ridxi que laabe: «Maʼ biiyaʼ pabiáʼ naná yuubaʼ ni cadiʼdiʼ ca israelita. Chigulaʼyaʼ laacabe de lu náʼ ca egipciu ne ziniáʼ laacabe lu ti layú galán. Ne napaʼ gana cueeluʼ guidxi stinneʼ de Egipto». ¿Ñee bidxagayaa Moisés ni cayaca que la?

Para gunabadiidxaʼ Moisés: «¿Xi gabeʼ laacabe ora guinabadiidxacabe tu biseendaʼ naa yaʼ?». Bicabi Dios laabe: «Gudxi laacabe Jiobá, Dios stiʼ Abrahán, Dios stiʼ Isaac ne Dios stiʼ Jacob biseendaʼ lii». Para ná Moisés: «¿Pa qué gulabi guidxi ca naa yaʼ?». Biluíʼ Jiobá laabe ti prueba para chuʼbe seguru zacané laabe. Gudxi Jiobá laabe gusábabe bastón stibe layú ne ora bíʼnibe ni la? ¡guca bastón que ti beendaʼ! Despué, gunaazeʼ Moisés xcola beendaʼ que ne gúcame ti bastón sti biaje. Óraque bisiene Jiobá laabe: «Ora gúniluʼ milagru riʼ, zusihuínniluʼ naa biseendaʼ lii».

Peru Moisés guníʼ: «Huaxiéʼ nannaʼ guiniéʼ nezalú binni». Biʼniʼ prometer Jiobá laabe: «Naa gabeʼ lii xi guiniʼluʼ ne laaca zuseendaʼ bíʼchiluʼ Aarón para gacané lii». Yanna maʼ nanna Moisés zacané Jiobá laa, biguétabe Egipto ne zinebe xheelabe ne ca xiiñibe.