Bidii Jiobá stipa Elías

Gunna Jezabel ni guca ca profeta stiʼ Baal ne guizáʼ bidxiichi. Ngue runi biseendabe ti hombre para gabi Elías: «Guixíʼ zátiluʼ, cásica gutiʼ ca profeta stiʼ Baal». Guizáʼ bidxibi Elías ne bixooñeʼ yegucaachilú lu desiertu. Raqué biʼniʼ orarbe: «Jiobá, maʼ qué zanda diʼ. Napaʼ gana gateʼ». Guizáʼ maʼ bidxaga Elías dede gusi xaʼnaʼ ti yaga.

Bicuaaniʼ ti ángel laabe ne guniʼné laabe né diidxaʼ nadóʼ: «Biasa ne gudó». Biiyaʼ Elías nexheʼ ti pan lu caadxi guié ndaʼ ne zuhuaa ti jarra nisa. Gudobe ne güeʼbe ne bibiguetaʼ gúsibe sti biaje. Bicuaaniʼ ángel que laabe sti biaje, ne gudxi laabe: «Gudó para gápaluʼ stipa, purtiʼ zitu chisaluʼ». Ngue runi gudobe sti ndaa. De raqué guzabe 40 dxi ne 40 gueelaʼ dede yendabe lu dani Horeb. Raqué guyuube ndaaniʼ ti cueva para gásibe. Óraque guniʼné Jiobá laabe: «¿Xi cayúniluʼ raríʼ Elías?». Bicabi Elías laabe: «Qué huayuni cumplir ca israelita promesa bíʼnicaʼ lii. Binitilucaʼ ca altar stiluʼ ne maʼ biiticaʼ ca profeta stiluʼ. Ne yanna nuucaʼ guuticaʼ naa».

Gudxi Jiobá Elías: «Biree ne bizuhuaa lu dani riʼ». Óraque bindubi ti bi guizáʼ reciu, de raqué guca ti xu naroʼbaʼ ne despué biree ti bele. Últimu la? binadiaga Elías caniʼné tuuxa laa né diidxaʼ nadóʼ. Ngue runi gucuaabe xhábabe, bichiibe lube ne bizuhuaabe ruaa cueva que. Gunabadiidxaʼ Jiobá laabe xiñee bixooñebe. Bicabi Elías laabe: «Maʼ naasiaʼ nga profeta ni riaana». Peru gudxi Jiobá laabe: «Cadi stúbiluʼ nuuluʼ. Nuuruʼ gadxe mil binni ndaaniʼ guidxi Israel ni runi adorar naa. Guyé ra nuu Eliseo ne gudxi laa, laa nga chigaca profeta despué de lii». Nagueendaca yeguni Elías ni gudxi Jiobá laa. ¿Ñee rábiluʼ laaca zacané Jiobá lii pa guzuubaluʼ stiidxabe la? Zacanebe pue. Yanna guidúʼyanu xi guca ca dxi qué ñaba nisaguié que.