Bisiidiʼ Esdras Ley stiʼ Dios guidxi que

Maʼ gudiʼdiʼ 70 iza de bibiguetaʼ ca israelita de esclavu Jerusalén, peru nuu de laacaʼ nabézarucaʼ ndaaniʼ caadxi guidxi stiʼ Imperiu persa. Tobi de ca israelita riʼ nga Esdras, ti sacerdote ni bisiidiʼ Ley stiʼ Jiobá. Gunna Esdras maʼ cadi zinandaʼ ca binni de Jerusalén Ley stiʼ Dios, ngue runi nuu cheʼ raqué para gacané laacabe. Artajerjes, rey stiʼ Persia gudxi laabe: «Maʼ bidii Dios lii guendabiaaniʼ para gusiidiluʼ Ley stiʼ. Nga runi guyé ne yené guiráʼ binni gacalaʼdxiʼ chiné lii». Guca reunir Esdras né guiráʼ ca binni nuu guibiguetaʼ Jerusalén. Gunábacaʼ Jiobá gapa laacaʼ neza checaʼ ne óraque bireecaʼ zecaʼ.

Tapa beeu despué yendácabe Jerusalén. Ca príncipe de guidxi que gúdxicaʼ Esdras: «Maʼ bicheené ca israelita Jiobá ne bichaganacaʼ ca gunaa ni runi adorar dios falsu». ¿Xi biʼniʼ Esdras yaʼ? Bizuxibi nezalú guidxi que ne biʼniʼ orar: «Jiobá, lii maʼ huayúniluʼ stale cosa galán pur laadu, peru laadu maʼ bichéʼnedu lii». Guca arrepentir guidxi que, peru caquiiñerucaʼ tu gacané laacaʼ gúnicaʼ ni jneza. Ngue runi gulí Esdras binnigola ne juez para gúʼyacaʼ xiñee cayuni ca israelita que zaqué. Lu chonna beeu, guleecabe ca binni ni qué racalaʼdxiʼ guni adorar Jiobá.

Gudiʼdiʼ 12 iza. Biluxe gurí si ca muru stiʼ guidxi Jerusalén sti biaje, biʼniʼ reunir Esdras guidxi que lugar ra maca riecaʼ para gúʼndanebe laacaʼ Ley stiʼ Dios. Ora bixhélebe libru ra cá Ley stiʼ Dios, bizuhuaa guiráʼ ca binni que. Bisisaca Esdras Jiobá, ne gundísanaʼ ca israelita para guiniʼcaʼ cayuuláʼdxicaʼ ni cayúnibe. Despué, biindaʼ Esdras ne bisiene Ley stiʼ Dios. Bicaadiaga chaahuiʼ guidxi que ne bidiicaʼ cuenta maʼ bixélecaʼ de Jiobá sti biaje, óraque bizulú biinacaʼ. Sti dxi que, biindaneruʼ Esdras laacabe Ley stiʼ Dios. Bidii ca israelita que cuenta maʼ zedadxiña dxi gúnicabe Saa ra rucuícabe Ranchuhuiiniʼ ne oraqueca bizulú guluucabe listu guiráʼ ni chiguiquiiñeʼ para gaca saa que.

Gadxe gubidxa ni bindaa saa que, guizáʼ nayecheʼ guyuu ca israelita. Bidiicabe xquíxepeʼ Jiobá pur cosecha galán ni bitópacabe. Qué huayúnicabe ti Saa ra rucuícabe Ranchuhuiiniʼ casi ni bíʼnicabe riʼ dede ca dxi bibani Josué. Biluxe si saa que, guca reunir guidxi que ne biʼniʼ orarcaʼ: «Jiobá, guleelú laadu de esclavu. Bidiiluʼ laadu ni guidoʼdo ca dxi guzadu lu desiertu ne maʼ bidiiluʼ laadu layú sicarú riʼ. Peru maʼ stale biaje bichéʼnedu lii ne neca biseendaluʼ stale profeta para gábicaʼ laadu guzúʼbadu stiidxaluʼ, qué nulábidu laacaʼ. Neca zaqué, gúpaluʼ paciencia laadu. Qué ñuu dxi nusiaandaluʼ promesa bíʼniluʼ Abrahán. Yanna cayuni prometerdu lii maʼ zuzúʼbadu stiidxaluʼ». Ni biʼniʼ prometer guidxi que bicaacabe ni lu ti guiʼchiʼ ne biʼniʼ firmar ca príncipe, ca levita ne ca sacerdote ni né ti sellu.