Yeganna ángel Gabriel María

María nga ti baʼdudxaapaʼ ni guleza Nazaret, ti guidxi stiʼ Galilea, ne familia stibe nga Elisabet. Chiguichaganáʼ María ti carpinteru láʼ José. Maʼ ziné Elisabet xhoopaʼ beeu de nacaxiiñiʼ dxi guyé ángel Gabriel ra nuu María ne gudxi laabe: «María, Jiobá maʼ guluu ndaayaʼ lii». Qué ñene María xi gudxi Gabriel laa, ngue runi bisiene ángel riʼ laabe: «Zacaxiiñiluʼ ne zápaluʼ ti baʼduhuiiniʼ. Zabee laluʼ laabe Jesús. Zácabe rey, ne qué ziuu dxi guinitilú Reinu stibe».

Peru María guníʼ: «¿Ximodo ndiʼ nouʼ gapaʼ ti baʼduhuiiniʼ pa binnidxaapaʼ naa yaʼ?». Bicabi Gabriel laabe: «Para Jiobá gastiʼ ni nagana. Zeeda espíritu santu stibe luguialuʼ ne zápaluʼ ti xiiñiluʼ. Elisabet, familia stiluʼ, laaca nacaxiiñiʼ neca maʼ huaniisi». Para bicabi María: «Raríʼ nuaaʼ para guneʼ ni ná Jiobá. Zaa gacaʼ casi naluʼ ca».

Yeganna María Elisabet ndaaniʼ ti guidxi nuu lade dani. Ora yendabe, bigapadiúxibe Elisabet ne laa biʼniʼ sentir biniibi baʼduhuiiniʼ stiʼ ndaaniʼ. Gucuaa Elisabet espíritu santu ne guníʼ: «Maʼ guluu Jiobá ndaayaʼ lii María. Ti ndaayaʼ nga beeda ganna jñaa Mesías naa ra lidxeʼ». Bicabi María laabe: «De guidubi ladxiduáʼ rusisacaʼ Jiobá». Chonna beeu biaana María ra lidxi Elisabet ne despué bibiguetaʼ ra lidxi, ni nuu Nazaret.

Ora gunna José nacaxiiñiʼ María, maʼ qué ninagá nichaganáʼ laabe. Peru lu ti bacaandaʼ gudxi ti ángel laabe: «Cadi guidxíbiluʼ, bichaganáʼ laabe. Qué huayúnibe cosa malu». Ngue runi bichaganáʼ José laabe ne yebiʼné laabe ra lidxi.