Beeda gaca Jesús Mesías

Dxi biʼniʼ predicar Juan, guníʼ ca diidxaʼ riʼ: «Mayaca gueeda tobi jma risaca que naa». Dxi napa Jesús biaʼ 30 iza, bireebe de Galilea ne guyebe ra guiiguʼ Jordán. Raqué caguunisa Juan binni. Ngue runi gudxi Jesús Juan cúʼnisa laabe, peru bicabi Juan laabe: «Cadi naa nga naquiiñeʼ cuaanisaʼ lii. Lii nga naquiiñeʼ cúʼnisaluʼ naa». Óraque bicabi Jesús laabe: «Racalaʼdxiʼ Jiobá cúʼnisaluʼ naa». Ngue runi guyuucabe ndaaniʼ guiiguʼ que, ne guluu Juan guidubi nácabe ndaaniʼ nisa.

Bireesibe de ndaaniʼ nisa que, biʼniʼ orarbe Jiobá. Óraque, bixeleʼ guibáʼ, ne biete espíritu stiʼ Dios luguiabe casi ti paloma. Ne guníʼ Jiobá dede guibáʼ: «Lii nga xiiñeʼ ni nadxieeʼ ne ni rusiecheʼ naa».

Zaqué nga gucuaa Jesús espíritu santu stiʼ Jiobá ne dede óraque beeda gácabe Cristu o Mesías. Yanna huaxa maʼ zanda guzulube dxiiñaʼ ni bidii Jiobá laabe gúnibe ndaaniʼ Guidxilayú riʼ.

Despué de guyuunisa Jesús guyé lu desiertu ne raqué biaanabe 40 dxi. Ora bibiguétabe, guyebe ra nuu Juan. Ora biʼyaʼ Juan zedadxiña Jesús, guníʼ: «Ndiʼ nga Dendxuhuiiniʼ stiʼ Dios ni zabee pecadu stiʼ binni Guidxilayú». Guniʼbe zaqué para gudii ca binni que cuenta Jesús nga Mesías. ¿Nannuʼ xi bizaaca Jesús biaʼ tiempu guyuu lu desiertu que la? Guidúʼyanu ni lu sti capítulo ca.