Guniʼné Jesús ti gunaa ruaa ti bizé

Ti tiempu despué de guca saa Pascua que, bibiguetaʼ Jesús ne ca discípulo stiʼ Galilea. Neza zécabe gudíʼdicabe Samaria ne gulezadxícabe gaxha de guidxi Sicar, ra nuu bizé stiʼ Jacob. Biaana Jesús raqué para guiziilaʼdxiʼ laga zeʼ ca discípulo stiʼ zisicaʼ guendaró ndaaniʼ guidxi.

Guyé ti gunaa zindee nisa ra bizé que, ne gudxi Jesús laabe: «Bisigaʼdeʼ naa caadxi nisa gueeʼ». Gunaa que gudxi laabe: «Qué riniʼné ca judíu ca samaritanu, ¿xiñee caníʼneluʼ naa pa samaritana naa yaʼ?». Jesús bicabi: «Pa ñánnaluʼ tuu naa la? ninábaluʼ naa nisa, ne naa nudieeʼ lii nisa ni rudii guendanabani». Gunaa que gunabadiidxaʼ laabe: «¿Xi nuuluʼ gábiluʼ naa yaʼ? Pa nin ni cueeneluʼ nisa ndaaniʼ bizé riʼ qué gápaluʼ». Para bicabi Jesús: «Tu gueʼ nisa ni gudieeʼ laa la? maʼ qué ziuu dxi gatiʼ nisa». Gunaa que guníʼ: «Dané naa nisa ni naluʼ ca, señor».

Despué guníʼ Jesús: «Yetidxi xheelaluʼ gueeda». Para bicabi gunaa que: «Qué gapaʼ xheelaʼ». Gudxi Jesús laabe: «Dxandíʼ, purtiʼ maʼ gaayuʼ biaje bichaganaluʼ ne yanna nabézaneluʼ ti hombre, ni cadi xheelaluʼ». Gunaa que bicabi: «Zuluaʼsiaʼ profeta lii njaʼ. Xquidxeʼ runi cré zanda guni adorardu Dios lu dani riʼ, peru ca judíu ná ndaaniʼ guidxi Jerusalén si nga naquiiñeʼ gaca adorar Dios. Naa rabeʼ dede ora gueeda Mesías nga gusiidiʼ laadu ximodo guni adorardu Dios». Óraque gudxi Jesús laabe xiixa ni qué huayabi guirutiʼ: «Naa nga Mesías ca».

Ziguxooñeʼ gunaa que zeʼ ndaaniʼ guidxi ne gúdxibe ca samaritanu: «Zuluaʼsiaʼ maʼ bidxelaʼ Mesías. Nánnabe xi guiráʼ huayuneʼ. Latáʼ gúʼyatu laabe». Ngue runi yenécabe laabe ra bizé que para gucaadiágacabe ni cusiidiʼ Jesús.

Gunabaʼ ca samaritanu guiaana Jesús raqué. Chupa gubidxa biaana Jesús ndaaniʼ guidxi que ne bisiidibe ca binni que stale cosa, ne stale de laacaʼ gúpacaʼ fe laabe. Despué de ngue gúdxicabe gunaa que: «Binadiágasidu ni ná hombre riʼ, maʼ nánnadu laabe nga ni chigueeda gulá binni Guidxilayú».