Biʼniʼ predicar Jesús de Reinu stiʼ Dios

Guyuunisa si Jesús, bizulú biʼniʼ predicar: «Mayaca gueeda Reinu stiʼ Dios». Yenanda ca discípulo stibe laabe guidubi Galilea ne Judea. Ora bibiguetaʼ Jesús xquidxi, Nazaret, guyebe ndaaniʼ sinagoga que, bixhélebe rollo stiʼ Isaías ne biindabe ni para gunadiaga guiráʼ binni nuu raqué: «Maʼ bidii Jiobá naa espíritu santu para guneʼ predicar ca noticia galán stibe». ¿Xii nga gucaláʼdxibe niniʼbe yaʼ? Ca binni que nuucaʼ gúʼyacaʼ ca milagru runi Jesús. Peru laabe qué nicaabe espíritu santu para gúnisibe milagru, purtiʼ ni jma bisaca para laabe nga guni predicarbe ca noticia galán stiʼ Reinu. Bilúxesibe, gúdxibe ca binni cucaadiaga laabe: «Yannadxí cayaca cumplir profecía riʼ».

Despué, guyé Jesús ra nisadóʼ stiʼ Galilea. Raqué biiyabe tapa pescador ne gúdxibe laacaʼ: «Latananda naa ne zuneʼ laatu pescador para guyúbitu binni». Ca hombre que lacaʼ Pedro, Andrés, Santiago ne Juan. Oraqueca bisaanacaʼ xhiiñacaʼ ne zinándacaʼ laabe. Biʼniʼ predicárcabe de Reinu stiʼ Jiobá guidubi guidxi Galilea, ndaaniʼ ca sinagoga que, luguiaa ne lu calle. Stale binni yenanda laacabe guiráʼ ladu zécabe. Dede ca lugar ra jma zitu casi guidxi Siria gúnnacabe de Jesús.

Despué, bidii Jesús poder caadxi de cani zinanda laa para gusiándacaʼ ne cueecaʼ demonio luguiáʼ binni. Xcaadxi de laacaʼ yeguni predicarnecaʼ laabe ndaaniʼ ca guidxi roʼ ne guidxihuiiniʼ. Ládecabe zeʼ ti grupu de gunaa ni racané Jesús ne cani zinanda laa. Casi María Magdalena, Juana, Susana ne xcaadxi gunaa.

Bisiidiʼ si Jesús ca discípulo stiʼ, biseendaʼ laacabe chiguni predicárcabe. Laga zidíʼdicabe Galilea, stale binni gúcacaʼ discípulo stiʼ Jesús ne guyuunísacaʼ. Stale binni nuu chinanda Jesús, ngue runi bichaagabe laacaʼ né ti layú nuu listu para guiasa cosecha. Laabe guniʼbe: «Laguni orar Jiobá para guseendaʼ jma binni gutopa cosecha riʼ». Despué, gulibe 70 de ca discípulo stibe ne biseendabe laacaʼ chupa chupa chiguni predicarcaʼ guidubi guidxi Judea. Guniʼnécabe guiráʼ binni de Reinu stiʼ Dios. Ora bibiguétacabe, gúpacabe gana ñábicabe Jesús xi guiráʼ bizaacacabe. Qué ñanda nucueeza Binidxabaʼ de ñuni predicárcabe.

Bisiidiʼ chaahuiʼ Jesús ca discípulo stiʼ para cadi gusaanacaʼ de gúnicaʼ dxiiñaʼ risaca riʼ ora guibiguétabe guibáʼ. Gúdxibe laacaʼ: «Laguni predicar ca noticia galán stiʼ Reinu lu guidubi naca Guidxilayú. Lagusiidiʼ binni xi ná Stiidxaʼ Dios ne lacuunisa laacabe».