LECCIÓN 12
¿Xi zacané lii cadi gusaana de guni estudiarluʼ Biblia?
Neca galán nga gúʼndaluʼ Biblia peru nuu tiru raca ni nagana. Zándaca guiníʼ íqueluʼ pa zándaruʼ guni estudiarluʼ Biblia. ¿Xiñee galán cadi gusaana de guni estudiarluʼ ni yaʼ? ¿Xi zacané lii cadi guireeluʼ gana neca gápaluʼ guendanagana?
1. ¿Xiñee galán nga cadi gusaana de guni estudiarluʼ Biblia?
«Purtiʼ nabani stiidxaʼ Dios ne napa poder» (Hebreos 4:12). Naca Biblia ti libru nabé risaca purtiʼ luni cá ni riníʼ ique Dios ne ni runi sentir pur lii. Qué zacané si ni lii gánnaluʼ stale cosa, laaca zacaneni lii guicaaluʼ decisión jneza ne zudiini esperanza lii. Ne ni jma risaca nga zanda gacané Biblia lii gaca xhamíguluʼ Jehová. Cada biaje guni estudiarluʼ Biblia, casi ñaca cudiiluʼ lugar gacaneni lii lu xquendanabániluʼ.
2. ¿Xiñee galán gánnanu pabiáʼ risaca guiráʼ ni rusiidiʼ Biblia?
Guiráʼ ni rusiidiʼ Biblia zeeda gácani casi tesoro nabé risaca. Biblia cayabi laanu: «Guzíʼ ni dxandíʼ ne qué chuʼ dxi gutooloʼ ni» (Proverbios 23:23). Pa gánnanu pabiáʼ risaca guiráʼ ni rusiidiʼ Biblia, zúninu stipa para cadi gusaana de guni estudiarnu neca guidxaagalunu guendanagana (biindaʼ Proverbios 2:4, 5).
3. ¿Ximodo zacané Jehová lii para cadi gusaana de guni estudiarluʼ?
Cumu Jehová nga Dios ni bizáʼ laanu, laabe nga ni jma napa poder ne xhamígube lii la? runibiáʼ chaahuibe lii ne racaláʼdxibe gacanebe lii gunibiaʼluʼ laabe jma. Zanda gudii Dios lii «deseu ne poder» para gúniluʼ guiráʼ ni riuuláʼdxibe (biindaʼ Filipenses 2:13). Nga runi, pa maʼ careeluʼ gana guni estudiarluʼ o gúniluʼ ni caziidiluʼ la? zacané Jehová lii. Ne pa cadíʼdiluʼ lu xiixa guendanagana o nuu tu cucueeza lii de guni estudiarluʼ la? zudiibe stipa lii para cadi guireeluʼ gana. Gunabaʼ Jehová gacané lii cadi gusaana de guni estudiarluʼ Biblia (1 Tesalonicenses 5:17).
GUIZÍʼDIRUNU JMA
Guidúʼyanu xi zanda gúniluʼ para cadi gusaana de guni estudiarluʼ Biblia neca chuʼ tu gacalaʼdxiʼ gucueeza lii o nabé riuu xhiiñaluʼ. De racá zadúʼyanu ximodo zacané Jehová lii para cadi guireeluʼ gana.
4. Biiyaʼ pabiáʼ risaca para lii guni estudiarluʼ Biblia
Nuu tiru nabé riuu xhiiñanu ne qué gápanu tiempu para guni estudiarnu Biblia. ¿Xi zanda gúniluʼ yaʼ? Laguundaʼ Filipenses 1:10 ne laiquiiñeʼ ca pregunta riʼ para güitu diidxaʼ:
Para lii, ¿«xii nga ni jma risaca»?
¿Xi zanda gúniluʼ para gusihuínniluʼ rusisácaluʼ guni estudiarluʼ Biblia?
Pa guchaluʼ yuxi ndaaniʼ ti vasu ne despué cuʼluʼ caadxi guié, qué zanda chuʼ guiráʼ ni ndaaniʼ vasu ca.
Peru pa primeru cuʼluʼ ca guié ca, de racá maʼ yuxi ca la? biaʼsi ziaba guiráʼ ni ndaaniʼ vasu ca. Zaqueca pa gúniluʼ ca cosa «ni jma risaca» primeru lu xquendanabániluʼ la? dede ziaana tiempu para gúniluʼ xcaadxi cosa.
Pa guni estudiarnu Biblia zacaneni laanu gunibiáʼ chaahuinu Dios ne guni adorarnu laa. Laguundaʼ Mateo 5:3 ne laiquiiñeʼ pregunta riʼ para güitu diidxaʼ:
Pa qué gudiʼnu lugar gucueeza gastiʼ laanu de guni estudiarnu Biblia, ¿ximodo zacaneni laanu?
5. Cadi guireeluʼ gana neca chuʼ tu gucueeza lii
Zándaca ziuu tu zabi lii gusaanaluʼ de guni estudiarluʼ Biblia. Biiyaʼ xi bizaaca Francesco. Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
¿Xi guníʼ familia stiʼ Francesco ne ca xhamigu ora gúdxibe laacaʼ ni caziidibe?
¿Xiñee galán nga qué nireebe gana?
Laguundaʼ 2 Timoteo 2:24, 25 ne laiquiiñeʼ ca pregunta riʼ para güitu diidxaʼ:
¿Xi riníʼ ique familia stiluʼ ne ca xhamíguluʼ de ni caziidiluʼ?
¿Xi zanda gúniluʼ pa chuʼ tu gucueeza lii de guni estudiarluʼ Biblia? ¿Xiñee riníʼ íqueluʼ zacá yaʼ?
6. Gupa confianza zacané Jehová lii
Laga jma ziyaca xhamígunu Dios, jma racaláʼdxinu gusiéchenu laabe. Peru neca zacá, zándaca gaca nagana para laanu guibáninu modo racaláʼdxibe. Pa zacá cayuni sentirluʼ la? cadi guireeluʼ gana, zacané Jehová lii. Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
Casi bíʼyaluʼ lu videu riʼ, ¿xi bichaa Jim de modo laa para ganda guni ni ná Jehová?
¿Xi jma ridxagayaaluʼ de ni bizaacabe?
Laguundaʼ Hebreos 11:6 ne laiquiiñeʼ ca pregunta riʼ para güitu diidxaʼ:
¿Xi zuni Jehová pur guiráʼ «ca ni ruyubi laabe sin guiree gana» o ca ni runi stipa gunibiáʼ laabe ne guni ni nabe?
¿Ximodo rábiluʼ runi sentir Jehová ora ruuyaʼ cayúniluʼ stipa pur guni estudiarluʼ Biblia?
NUU TU RINABADIIDXAʼ: «¿Xi para cayuni estudiarluʼ Biblia?».
¿Xi nicábiluʼ?
XI BIZÍʼDINU
Neca gaca nagana para lii guni estudiarluʼ Biblia, zanda gacaneni lii guibániluʼ nayecheʼ. Pa gápaluʼ confianza Jehová, zaguube ndaayaʼ lii.
Xi biziidiluʼ
¿Xiñee naquiiñeʼ gusisácaluʼ guiráʼ ni rusiidiʼ Biblia?
Ora maʼ nánnaluʼ «xii nga ni jma risaca», ¿xi caquiiñeʼ gúniluʼ?
¿Xiñee naquiiñeʼ guinábaluʼ Jehová gacané lii cadi gusaana de guni estudiarluʼ Biblia?
BIIYAʼ XIRUʼ ZANDA GUIZIIDILUʼ
Biiyaʼ xi tapa cosa huayacané caadxi binni iquiiñeʼ tiempu stiʼ jneza.
«Ximodo iquiiñeluʼ tiempu stiluʼ jneza» (¡Gutaná! febrero de 2014)
Biiyaʼ ximodo gucané Jehová ti gunaa ni biʼniʼ stipa guni ni nabe neca qué ñacané xheelaʼ laa.
Rudii Jiobá laanu stipa para gudxíʼlunu ca guendanagana stinu (5:05)
Biiyaʼ ximodo qué niree ti gunaa gana de guni estudiar Biblia ne ximodo gucanebe xheelabe.
Nuu tiru riníʼcabe ruchiá ca testigu stiʼ Jehová ca familia ca. ¿Ñee dxandíʼ nga la?