LECCIÓN 29
¿Xi rizaaca binni ora gatiʼ?
¿Ñee huayati tuuxa binni ni nadxiiluʼ la? Zándaca ora cayuubaʼ ladxidoʼloʼ guinabadiidxaluʼ: «¿Xi rizaaca binni ora gatiʼ? ¿Ñee ziuu dxi guibiguetaʼ guuyaʼ ca binni ni nadxieeʼ ni maʼ guti la?». Lu lección riʼ ne lu stobi ca zuuyaluʼ ximodo riguixhedxí Biblia ladxidoʼno ora ricabi ca pregunta riʼ.
1. ¿Xi rizaaca binni ora gatiʼ?
Bichaaga Jesús guendaguti casi ora nisiaasiʼ tuuxa. ¿Ximodo nga casi ñaca nisiaasiʼ binni ora gatiʼ yaʼ? Purtiʼ ora nisiaasiʼ ti binni la? qué ranna xi cayaca. Zaqueca ora gatiʼ tuuxa la? maʼ qué runi sentir nin ti clase yuubaʼ ne maʼ qué runi sufrir. Biblia ná: «Ca ni maʼ guti la? qué lica gánnacaʼ gastiʼ» (biindaʼ Eclesiastés 9:5).
2. ¿Xiñee ratadxí ladxidoʼno gánnanu xi rusiidiʼ Biblia de guendaguti?
Stale binni ridxibi gatiʼ ne laaca ridxíbicaʼ ca binni ni maʼ guti. Pa zacá runi sentirluʼ, zatadxí ladxidoʼloʼ gánnaluʼ xi rusiidiʼ Biblia. Jesús guníʼ: «Zuni ni dxandíʼ riʼ laatu libre» (Juan 8:32). Maʼ gadxé ni rusiidiʼ Biblia de ni rusiidiʼ stale religión, qué rusiidiʼ Biblia napa binni ti alma ni qué rati. Nga runi, guirutiʼ zanda gacaná despué de gatiʼ. Cumu maʼ caziilaʼdxiʼ ca binni ni maʼ guti ne qué gánnacaʼ gastiʼ la? qué zanda diʼ guninácabe laanu. Laaca cadi caquiiñeʼ guni orarnu pur laacabe o gúninu xiixa para cadi guidxiichinécabe laanu ninca qué runi adorarnu laacabe.
Nuu tu ná zanda guiniʼné ca binni ni maʼ guti, peru qué zanda gaca nga. Casi bizíʼdinu nagasi que la? ca binni ni maʼ guti qué «gánnacaʼ gastiʼ». Ca binni ni ná riniʼné ca gueʼtuʼ, ca demonio nga caguite laacaʼ para guiníʼ íquecaʼ caníʼnecaʼ ca binni ni maʼ guti. Nga runi, ora gánnanu ni dxandíʼ rusiidiʼ Biblia de ca binni ni maʼ guti, rapa ni laanu para cadi gusiguii ca demonio laanu. Ne Jehová peʼ cayabi laanu cadi guyúbinu guinínenu ca gueʼtuʼ, purtiʼ nánnabe malu nga guiniʼné binni ca demonio ne zanda gueeda gacaná ca binni guni ni (biindaʼ Deuteronomio 18:10-12).
GUIZÍʼDIRUNU JMA
Guidúʼyanu xiruʼ rusiidiʼ Biblia de xi rizaaca binni ora gatiʼ. Ne ximodo zanda chuʼluʼ jma gaxha de Dios ni nadxii laanu ne ni qué runi castigar ca binni ni maʼ guti.
3. Xi peʼ nga rizaaca binni ora gatiʼ
Gadxé gadxé nga ni runi cré binni lu guidubi naca Guidxilayú de ca gueʼtuʼ ca. Peru cadi guiráʼ ni nga dxandíʼ.
¿Xii nga ca cosa ni runi cré binni de ca gueʼtuʼ neza ra nabézaluʼ?
Para gánnatu xi rusiidiʼ Biblia, laguuyaʼ VIDEU riʼ.
Laguundaʼ Eclesiastés 3:20 ne laiquiiñeʼ ca pregunta riʼ para güitu diidxaʼ:
Casi ná versículo riʼ, ¿xi rizaaca binni ora gatiʼ?
Ora gatiʼ ti binni, ¿ñee rié alma o espíritu stibe sti lugar la?
Biblia ruzeeteʼ dxi gutiʼ Lázaro, ti xhamigu Jesús. ¿Ximodo guníʼ Jesús nuu Lázaro? Laguundaʼ Juan 11:11-14 ne laiquiiñeʼ ca pregunta riʼ para güitu diidxaʼ:
¿Xi bichaaga Jesús guendaguti?
¿Xi rusiidiʼ ni guníʼ Jesús riʼ laanu de ca binni ni maʼ guti?
¿Ñee rábiluʼ biaʼsi nga ni rusiidiʼ Biblia de ca binni ni maʼ guti la?
4. Maʼ qué zaguítecabe laanu ora gánnanu ni dxandíʼ rizaaca binni ora gatiʼ
Ora guizíʼdinu xi rusiidiʼ Biblia de ca gueʼtuʼ, maʼ qué ridxíbinu laacaʼ. Laguundaʼ Eclesiastés 9:10 ne laiquiiñeʼ pregunta riʼ para güitu diidxaʼ:
¿Ñee zanda guniná ca binni ni maʼ guti laanu la?
Ora gánnanu ni dxandíʼ rusiidiʼ Biblia de ca binni ni maʼ guti, maʼ qué zudiʼnu lugar quítecabe laanu caquiiñeʼ ca binni ni maʼ guti guni orarnu pur laacaʼ, ninca guni adorarnu laacaʼ para cadi guidxiichinecaʼ laanu. Laguundaʼ Isaías 8:19 ne Apocalipsis 4:11, ne laiquiiñeʼ pregunta riʼ para güitu diidxaʼ:
¿Ximodo rábiluʼ runi sentir Jehová ora runi adorar binni gueʼtuʼ o ruyubi gacané ca gueʼtuʼ ca laa?
Ra gánnanu ni dxandíʼ rusiidiʼ Biblia de ca binni ni maʼ guti, maʼ qué rinándanu ca costumbre stiʼ binni ni qué riuulaʼdxiʼ Jehová.
5. Ratadxí ladxidoʼno gánnanu xi rusiidiʼ Biblia de ca binni ni maʼ guti
Stale binni runi cré ora gatiʼ zaguixe guiráʼ cosa malu ni biʼniʼ dxi nabani. Peru ratadxí ladxidoʼno gánnanu guirutiʼ zacaná despué de gatiʼ nin ca binni ni biʼniʼ cosa ni cadi jneza. Laguundaʼ Romanos 6:7 ne laiquiiñeʼ pregunta riʼ para güitu diidxaʼ:
Biblia rusiidiʼ ora gatiʼ binni raca perdonar ca pecadu stiʼ. Yanna, pa zacá ni, ¿ñee rábiluʼ cayacaná ca binni ni maʼ guti para quíxecaʼ ca pecadu ni bíʼnicaʼ la?
Ra jma gunibiaʼnu Jehová, jma zudiʼnu cuenta qué ziuu dxi guninabe ca binni ni maʼ guti. Laguundaʼ Deuteronomio 32:4 ne 1 Juan 4:8, ne laiquiiñeʼ ca pregunta riʼ para güitu diidxaʼ:
¿Ñee rábiluʼ zudii ti Dios ni runi ni jneza ne nadxii binni lugar guni sufrir ca binni ni maʼ guti la?
¿Ñee rábiluʼ ratadxí ladxidoʼno ra gánnanu ni dxandíʼ rusiidiʼ Biblia de ca binni ni maʼ guti la? ¿Xiñee riníʼ íqueluʼ zacá yaʼ?
NUU TU NÁ: «Ridxibeʼ guni castigar Dios naa ora gateʼ».
¿Xi textu zeeda lu Biblia niquiiñeluʼ para niguixhedxiluʼ ladxidóʼ ti binni riníʼ ique zacá?
XI BIZÍʼDINU
Ora gatiʼ ti binni la? riluxe xquendanabani. Cadi dxandíʼ nga racaná ca binni ni maʼ guti ne laaca qué zanda guninácabe guirutiʼ.
Xi biziidiluʼ
¿Xi rizaaca binni ora gatiʼ?
¿Xiñee maʼ qué zaguítecabe laanu ra gánnanu ni dxandíʼ rusiidiʼ Biblia de ca binni ni maʼ guti?
¿Xiñee ratadxí ladxidoʼno gánnanu ni rusiidiʼ Biblia de ca binni ni maʼ guti?
BIIYAʼ XIRUʼ ZANDA GUIZIIDILUʼ
Biiyaʼ xi rusiidiʼ Biblia raca significar diidxaʼ alma.
Biiyaʼ pa dxandíʼ runi castigar Dios binni malu ndaaniʼ infiernu.
¿Ñee ti lugar ra cayacaná ca ni maʼ guti nga infiernu la? (3:07)
¿Ñee caquiiñeʼ guidxíbinu ca binni ni maʼ guti la?
Biiyaʼ ximodo gutadxí ladxidóʼ ti hombre ora gunna ni dxandíʼ rusiidiʼ Biblia de ca binni ni maʼ guti.