LECCIÓN 30
¡Zabani ca binni ni nadxiiluʼ ni maʼ guti!
Guizáʼ naná yuubaʼ riaana ora gatiʼ ti binni ni nadxiinu. Nga runi, Biblia ná naca guendaguti ca ti enemigu stinu (1 Corintios 15:26). Lu lección 27 que, biziidiluʼ zunitilú Jehová enemigu riʼ. Peru ¿xi zazaaca ca binni ni maʼ guti yaʼ? Lu lección riʼ, zaziidiluʼ pabiáʼ sicarú promesa cayuni Jehová: zusibánibe stale millón de binni ni maʼ guti para ganda guibánicaʼ lu Guidxilayú riʼ sin qué chuʼ dxi gáticaʼ. ¡Ya, zabánicabe stiʼ biaje! Peru ¿ñee dxandíʼ nga la? Pa zacá ni, paraa chiguibánicabe, ¿zabánicabe guibáʼ la? o lu Guidxilayú riʼ?
1. ¿Xi racalaʼdxiʼ Jehová guni pur ca binni ni nadxiinu ni maʼ guti?
Guizáʼ napa Jehová gana gusibani ca binni ni maʼ guti. Job, ti hombre ni gupa fe, gunna qué zusiaandaʼ Dios laa neca gatiʼ ne igaachiʼ «ndaaniʼ baʼ». Laabe gúdxibe Dios: «Lii zucaa riʼdxuʼ, ne naa zacabeʼ lii» (biindaʼ Job 14:13-15).
2. ¿Ximodo nánnanu zanda guibani ca binni ni maʼ guti?
Dxi guyuu Jesús ndaaniʼ Guidxilayú riʼ, bidii Dios laabe poder para gusibánibe ca binni ni maʼ guti. Nga runi, bisibani Jesús ti dxaapahuiiniʼ de 12 iza ne xiiñiʼ ti viuda (Marcos 5:41, 42; Lucas 7:12-15). Despué guti Lázaro xhamígube. Neca maʼ ziné Lázaro tapa gubidxa de bicaachicabe laa, bisibani Jesús laabe. Despué de guniʼné Jesús Dios, bicaa ti ridxi: «¡Lázaro biree!». Ne «óraque biree hombre ni guti que», ¡ne maʼ nabani! (Juan 11:43, 44). Bixuiʼlú pabiáʼ nayecheʼ guyuu familia stiʼ Lázaro ne ca xhamigu ora bíʼyacaʼ ni bizaaca que.
3. ¿Zabani ca binni ni nadxiiluʼ ni maʼ guti la?
Biblia ná zusibani Dios «ca ni maʼ guti» (Hechos 24:15). Ca binni ni bisibani Jesús dxi guyuu lu Guidxilayú riʼ qué ñédicabe guibáʼ (Juan 3:13). Gulézacabe guibánicabe ndaaniʼ Guidxilayú riʼ sti biaje. Maʼ cadi candaa, zuni Jesús ndiʼ sti biaje, zusibánibe stale millón de binni para guibánicaʼ ndaaniʼ Guidxilayú riʼ sin qué chuʼ dxi gáticaʼ ora maʼ nácani ti paraísu. Laabe guniʼbe zabani «guiráʼ ca ni nuu ndaaniʼ baʼ»—o ca ni nuu lu xquendabiaaniʼ Dios—dede né ca ni maʼ qué rietenaláʼdxicabe laacaʼ (Juan 5:28, 29).
GUIZÍʼDIRUNU JMA
Guidúʼyanu xiñee zanda guni crenu dxandíʼ zabani ca binni ni maʼ guti. Ne ximodo riuʼnu gana ne ratadxí ladxidoʼno ora gánnanu xi rusiidiʼ Biblia.
4. Bisihuinni Jesús zanda guindisaʼ ca binni ni maʼ guti
Biiyaʼ xiruʼ bizaaca dxi gundisaʼ Jesús Lázaro. Laguundaʼ Juan 11:14 ne 38-44, ne laiquiiñeʼ ca pregunta riʼ para güitu diidxaʼ:
¿Ximodo nánnanu dxandíʼ guti Lázaro? (Laguuyaʼ versículo 39).
Pa ñé Lázaro guibáʼ, ¿ñee rábiluʼ galán nga bisibani Jesús laabe sti biaje lu Guidxilayú riʼ la?
5. ¡Zabani stale binni ni maʼ guti!
Laguundaʼ Salmo 37:29 ne laiquiiñeʼ pregunta riʼ para güitu diidxaʼ:
¿Paraa chiguibani guiráʼ binni ni guiasa de lade gueʼtuʼ?
Cadi ca binni si ni biʼniʼ adorar Jehová nga chindisaʼ Jesús de lade gueʼtuʼ; laaca zusibánibe stale binni ni qué niziidiʼ de Dios. Laguundaʼ Hechos 24:15 ne laiquiiñeʼ pregunta riʼ para güitu diidxaʼ:
¿Tu ñuuláʼdxiluʼ ñuuyaluʼ ora guibani ca binni ni maʼ guti?
Guníʼ ique ndiʼ: qué zaca nagana para Jesús gusibani ca ni maʼ guti cásica qué raca nagana para ti padre gucuaaniʼ xiiñiʼ ora nisiaasiʼ.
6. Zanda gatadxí ladxidoʼloʼ ne chuʼluʼ gana ora gánnaluʼ zabani ca binni ni maʼ guti
Stale binni ni maʼ guti ti familia stiʼ nabé riuucaʼ gana ora gúʼndacaʼ lu Biblia modo bisibani Jesús xiiñiʼ Jairo. Laguundaʼ ni bizaaca riʼ lu Lucas 8:40-42 ne 49-56.
Ante gusibani Jesús xiiñiʼ Jairo, sicaríʼ gúdxibe laa: «Cadi guidxíbiluʼ, gupa si fe» (laguuyaʼ versículo 50). Ra maʼ nánnaluʼ ziasa ca ni maʼ guti, ¿ximodo zacané ni lii...
... ora gatiʼ ti binni ni nadxiiluʼ?
... ora chuʼ xquendanabániluʼ ra naxoo?
Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
¿Ximodo huayacané esperanza riʼ jñaa ne bixhoze Phelicity?
NUU TU RINABADIIDXAʼ: «¿Nanna pa dxandíʼ zabani ca binni ni maʼ guti ndaaniʼ Guidxilayú riʼ yaʼ?».
¿Lii xi riníʼ íqueluʼ yaʼ?
¿Xi textu zeeda lu Biblia niquiiñeluʼ para nusiéneluʼ dxandíʼ zabani ca binni ni maʼ guti ndaaniʼ Guidxilayú riʼ?
XI BIZÍʼDINU
Biblia ná zabani stale millón de binni ni maʼ guti lu Guidxilayú riʼ. Racalaʼdxiʼ Jehová guibani ca binni ni maʼ guti sti biaje ne maʼ bidiibe poder Jesús para ganda gusibani laacabe.
Xi biziidiluʼ
¿Ximodo nánnanu racalaʼdxiʼ Jehová ne Jesús gusibánicaʼ ca binni ni maʼ guti?
Paraa chiguibani guiráʼ binni ni guiasa de lade gueʼtuʼ, ¿guibáʼ la? ¿O lu Guidxilayú riʼ? ¿Xiñee riníʼ íqueluʼ zacá ni yaʼ?
¿Xiñee runi creluʼ dxandíʼ zabani ca binni ni nadxiiluʼ ni maʼ guti?
BIIYAʼ XIRUʼ ZANDA GUIZIIDILUʼ
Biiyaʼ caadxi conseju ni zanda gacané lii ora gatiʼ ti familia stiluʼ.
«Xi zacané lii gatadxí ladxidoʼloʼ ora gatiʼ ti familia stiluʼ» (¡Gutaná! núm. 3 2018)
¿Ñee zanda gacané Biblia tuuxa ni gutiʼ ti familia stiʼ la?
Biiyaʼ ximodo zanda gacaneluʼ ti xcuidihuiiniʼ gatadxí ladxidóʼ ora gatiʼ ti binni ni nadxii.
¿Ñee ziasa tuuxa ni maʼ guti para guibani guibáʼ la? ¿Ñee ziuu binni ni maʼ guti ni maʼ qué zabani la?
«¿Ximodo zabani ca binni ni maʼ guti?» (Tema ni zeeda lu jw.org)