LECCIÓN 34
¿Ximodo zanda gusihuínninu nadxiinu Jehová?
¿Ñee cayuni sentirluʼ jma gaxha nuuluʼ de Dios dede dxi bizulú cacaaluʼ estudiu la? ¿Ñuuláʼdxiluʼ ñaca xhamíguluʼ laabe jma ra zidiʼdiʼ dxi la? Pa zacá ni la? cadi guiaandaʼ lii ora guʼyaʼ Jehová ra ziyannaxhiiluʼ laa, laaca zannaxhii lii ne zapa lii. ¿Ximodo zanda gusihuínniluʼ nadxiiluʼ Jehová yaʼ?
1. ¿Ximodo zanda gusihuínninu nadxiinu Jehová?
Rusihuínninu nadxiinu Jehová ora ruzúʼbanu stiidxaʼ (biindaʼ 1 Juan 5:3). Qué runi obligar diʼ Jehová guirutiʼ guzuubaʼ stiidxaʼ. Sínuque rudiibe lugar guiráʼ binni nga cuí pa zuzuubaʼ stiidxabe o pa coʼ. ¿Xiñee yaʼ? Purtiʼ riuuláʼdxibe gúninu ni nabe de guidubi ladxidoʼno (Romanos 6:17). Ni racalaʼdxiʼ Jehová nga guzúʼbanu stiidxaʼ, peru cadi purtiʼ cayuni obligarbe laanu, sínuque purtiʼ nadxiinu laabe. Zacané sección 3 ne 4 stiʼ libru riʼ lii para gusihuínniluʼ nadxiiluʼ Jehová de chupa modo, ra gúniluʼ guiráʼ ni riuuláʼdxibe ne ra gucaanaluʼ ca cosa ni qué riuuláʼdxibe.
2. ¿Xiñee zándaca gaca nagana para laanu gusihuínninu nadxiinu Jehová?
Biblia ná: «Stale guendanagana ridxaagalú binni nachaʼhuiʼ» (Salmo 34:19). Guiranu nga raca nagana para laanu gúninu xiixa. Peru cadi ngasi laaca rudxíʼlunu stale guendanagana, nuu ora huaxiéʼ rugaanda bueltu stinu o rúnicabe laanu xiixa injusticia. Ne óraca nga jma raca nagana para laanu guzúʼbanu stiidxaʼ Jehová. Purtiʼ jma fácil raca para binni cadi guzuubaʼ diidxaʼ. Peru pa gúniluʼ stipa gúniluʼ ni ná Jehová la? zusihuínniluʼ nadxiiluʼ laabe jma que intiica cosa. Laaca zusihuínniluʼ qué racaláʼdxiluʼ guixéleluʼ de laabe, ne laabe laaca qué zaxélebe de lii (biindaʼ Salmo 4:3).
GUIZÍʼDIRUNU JMA
Guidúʼyanu xiñee riuu Jehová nayecheʼ ora guzúʼbanu stiidxaʼ ne xi zacané laanu para gúninu ni.
3. Dede né laanu rugaanda ti cosa ni bizulú raca stale iza
Casi riete lu libru stiʼ Job, guníʼ Binidxabaʼ ti cosa ni cadi dxandíʼ de Job, ne rugaandani dede né ca binni ni racalaʼdxiʼ guni ni ná Jehová. Laguundaʼ Job 1:1 ne 1:6–2:10, ne laiquiiñeʼ ca pregunta riʼ para güitu diidxaʼ:
¿Xi pur guníʼ Binidxabaʼ ruzuubaʼ Job stiidxaʼ Jehová? (Laguuyaʼ Job 1:9-11).
¿Xi ti cosa cadi dxandíʼ guníʼ Binidxabaʼ de binni? (Laguuyaʼ Job 2:4).
Laguundaʼ Job 27:5b ne laiquiiñeʼ pregunta riʼ para güitu diidxaʼ:
¿Ximodo bisihuinni Job dxandíʼ nadxii Jehová?
Bizuubaʼ Job diidxaʼ purtiʼ nadxii Jehová.
Zusihuínninu nadxiinu Jehová pa guzúʼbanu stiidxaʼ.
4. Bisiecheʼ ladxidóʼ Jehová
Laguundaʼ Proverbios 27:11 ne laiquiiñeʼ ca pregunta riʼ para güitu diidxaʼ:
¿Ximodo runi sentir Jehová ora ruzuubaluʼ stiidxaʼ ne ora ricaaluʼ decisión jneza? ¿Xiñee rábiluʼ zacá ni yaʼ?
5. Zanda guzuubaluʼ stiidxaʼ Jehová
Guendarannaxhii ni nápanu Jehová rucaani laanu guinínenu xcaadxi binni de laabe. Ne pa guzúʼbanu stiidxabe la? zúninu ni neca gaca ni nagana para laanu. Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
¿Ñee raca nagana para lii guiníʼneluʼ xcaadxi binni de Jehová la?
Casi bihuinni lu videu riʼ, ¿xi gucané Grayson para cadi guidxibi guiníʼ xi runi cré?
Qué zaca nagana para laanu guzúʼbanu stiidxaʼ Jehová pa gannaxhiinu ni jneza ne gaca nanaláʼdxinu ni cadi jneza. Laguundaʼ Salmo 97:10 ne laiquiiñeʼ ca pregunta riʼ para güitu diidxaʼ:
Pur guiráʼ ni maʼ biziidiluʼ, ¿gunáʼ nga ca cosa ni rábiluʼ riuulaʼdxiʼ Jehová? ¿Ne gunáʼ nga ca cosa ni qué riuuláʼdxibe?
¿Ximodo zanda gannaxhiiluʼ ni jneza ne gaca nanaláʼdxiluʼ ni cadi jneza yaʼ?
6. Jma galán ziuʼnu pa guzúʼbanu stiidxaʼ Jehová
Jma galán nga guzúʼbanu stiidxaʼ Jehová. Laguundaʼ Isaías 48:17, 18 ne laiquiiñeʼ ca pregunta riʼ para güitu diidxaʼ:
¿Xiñee rábiluʼ nanna Jehová xii nga ni jma galán para laanu? ¿Xiñee riníʼ íqueluʼ zacá yaʼ?
Biaʼ tiempu zineluʼ de cayuundaluʼ Biblia ne cayunibiaʼluʼ Jehová, ¿ximodo huayacaneni lii?
NUU TU NÁ: «Nin xa ganna Dios xi cayuneʼ».
¿Xi textu de lu Biblia niquiiñeluʼ para nusiéneluʼ tuuxa zanda gusiéchenu Jehová o cuʼnu laa triste pur ni gúninu?
XI BIZÍʼDINU
Zanda gusihuínniluʼ nadxiiluʼ Jehová pa guzuubaluʼ stiidxabe neca gaca ni nagana para lii.
Xi biziidiluʼ
¿Xi rusiidiʼ ejemplu stiʼ Job lii?
¿Ximodo zanda gusihuínniluʼ nadxiiluʼ Jehová?
¿Xi zacané lii guzuubaluʼ stiidxaʼ Jehová?
BIIYAʼ XIRUʼ ZANDA GUIZIIDILUʼ
Biiyaʼ xi zanda gúniluʼ para cadi gusaanaluʼ Jehová ne congregación.
«Ti binni ni qué gusaana lii laaca qué zusaanaluʼ laa» (16:49)
Biiyaʼ xii nga ca cosa ni cadi dxandíʼ guníʼ Binidxabaʼ.
Biiyaʼ ximodo dede né ca xcuidi ca zanda gusihuínnicaʼ nadxiicaʼ Jehová.
Biiyaʼ ximodo zanda guzuubaʼ ca joven stiidxaʼ Dios ora chuʼ tu gucaa laacaʼ gúnicaʼ xiixa ni cadi jneza.