LECCIÓN 52
Xiñee risaca guzuchaahuinu jneza
Guiranu nga maʼ nápanu modo riuuláʼdxinu gácunu lari ne guzuchaahuinu. Peru zanda guzuchaahuinu modo riuuláʼdxinu ne zaqueca gusiéchenu Jehová pa chinándanu chupa chonna principiu zeeda lu Biblia. Guidúʼyanu chupa chonna de laacani.
1. ¿Xi principiu zanda chinándanu para gácunu lari jneza?
Guiráʼ xpinni Cristu «naquiiñeʼ gácucaʼ lari jneza cadi tidisucaʼ ora guzuchaahuicaʼ ne gúnicaʼ ni né guendabiaaniʼ». Laaca naquiiñeʼ guihuínnicaʼ nayá ti gusihuínnicaʼ dxandíʼ runi adorarcaʼ Dios (1 Timoteo 2:9, 10). Biiyaʼ guidapaʼ principiu ni zeeda lu textu riʼ. 1) Caquiiñeʼ gácunu lari «jneza». Casi huayuuyaluʼ lu ca reunión ni rieluʼ, gadxé gadxé ni riuulaʼdxiʼ ca xpinni Jehová, peru pur modo rácudu lari ne modo ruzuchaahuidu rusihuínnidu runi respetardu Dios ni runi adorardu. 2) Qué rididisudu ora ruzuchaahuidu o qué rácudu lari ni guiʼchiʼ, para cadi guyadxí binni laadu ne guiníʼ ique cosa ni cadi jneza. 3) Rúnidu ni «né guendabiaaniʼ» purtiʼ qué rácudu intiica ni guiree de moda. 4) Pur modo ruzuchaahuidu rudii binni cuenta runi adorardu Dios ni dxandíʼ (1 Corintios 10:31).
2. ¿Ximodo zanda guʼyaʼ xcaadxi xpinni Cristu laanu pur modo ruzuchaahuinu?
Dxandíʼ, zanda cuinu gácunu lari ni chuuláʼdxinu. Peru pa qué gápanu cuidadu la? zanda gucaʼnu xcaadxi guiníʼ ique ni cadi jneza. Rúnidu stipa cadi gácudu lari ni gucaa stobi guchee. Rinándadu conseju riʼ: «Cada tobi de laanu naquiiñeʼ guni ni chuulaʼdxiʼ prójimo stiʼ ti gacanenu laa guzuhuaa dxiichiʼ» (biindaʼ Romanos 15:1, 2).
3. ¿Ximodo zanda gacané modo ruzuchaahuinu xcaadxi binni gunibiáʼ Jehová?
Rúninu stipa gácunu lari jneza. Jmaruʼ si para chuunu reunión ne ora chiguni predicarnu. Qué racaláʼdxinu pur modo guzuchaahuinu cadi gusisaca binni mensaje ni zinenu. Sínuque gucaani laacabe guiziidicabe, «ti zacá guʼyaʼ binni pabiáʼ sicarú guiráʼ ni rusiidiʼ Dios ni bilá laanu» (Tito 2:10).
GUIZÍʼDIRUNU JMA
Guidúʼyanu ximodo zanda gánnanu pa jneza modo ruzuchaahuinu o modo rácunu lari.
Pur modo ruzuchaahuinu zusihuínninu pa runi respetarnu binni ni napa autoridad. Neca ni ruuyaʼ Jehová nga ni nuu ndaaniʼ ladxidóʼ binni la? zanda gusihuínninu runi respetarnu laabe pur modo ruzuchaahuinu.
4.Rusihuínninu runi respetarnu Jehová pur modo ruzuchaahuinu
¿Xi razón risaca nápanu para guizaaláʼdxinu xi riníʼ ique binni ora guʼyaʼ laanu? Laguundaʼ Salmo 47:2 ne laiquiiñeʼ ca pregunta riʼ para güitu diidxaʼ:
Ra gánnanu zinenu lá Jehová, ¿ximodo zanda gacané ni laanu cuinu xi lari gácunu o modo guzuchaahuinu?
¿Ñee rábiluʼ risaca nga guidúʼyanu pa jneza modo ruzuchaahuinu para chuunu reunión ne chiguni predicarnu la? ¿Xiñee riníʼ íqueluʼ zacá yaʼ?
5. Xi zacané laanu cuí chaahuinu xi lari gácunu ne modo guzuchaahuinu
Cadi naquiiñeʼ peʼ gaca lari stinu caru. Ni jma risaca nga gácani nayá ne guidúʼyanu pa biaʼsi ni para cada lugar chuunu. Laguundaʼ 1 Corintios 10:24 ne 1 Timoteo 2:9, 10. Despué laguiníʼ xiñee cadi naquiiñeʼ gácunu lari...
... nabiidiʼ o nabé informal.
... ni guiʼchiʼ o ni gucaa binni guyadxí laanu ne guiníʼ ique ni cadi jneza.
Dxandíʼ, maʼ cadi zinanda ca xpinni Cristu Ley stiʼ Moisés, peru racané ni laanu gánnanu xi riníʼ ique Jehová. Laguundaʼ Deuteronomio 22:5 ne laiquiiñeʼ pregunta riʼ para güitu diidxaʼ:
¿Xiñee cadi jneza guzuchaahuiʼ ti gunaa ne gacuʼ lari casi ti hombre o ti hombre guzuchaahuiʼ ne gacuʼ lari casi ti gunaa?
Laguundaʼ 1 Corintios 10:32, 33 ne 1 Juan 2:15, 16, ne laiquiiñeʼ ca pregunta riʼ para güitu diidxaʼ:
Pa cadi jneza modo ruuyaʼ binni neza ra nabézanu o tuuxa de congregación modo ruzuchaahuinu, ¿ñee naquiiñeʼ guizaaláʼdxinu ni la? ¿Xiñee riníʼ íqueluʼ zacá yaʼ?
¿Ximodo maʼ biaa binni guzuchaahuiʼ o gacuʼ lari neza ra nabézaluʼ?
¿Ñee rábiluʼ jneza ni para ti xpinni Cristu la? ¿Xiñee riníʼ íqueluʼ zacá yaʼ?
Zanda gácunu lari ne guzuchaahuinu modo riuuláʼdxinu peru zaqueca para gusiéchenu Jehová.
NUU TU NÁ: «Libre naa gacuaʼ intiica lari chuulaʼdxeʼ».
¿Lii xi riníʼ íqueluʼ? ¿Xiñee riníʼ íqueluʼ zacá yaʼ?
XI BIZÍʼDINU
Zusihuínninu runi respetarnu Jehová ne binni ora cuí chaahuinu xi lari gácunu o ximodo guzuchaahuinu.
Xi biziidiluʼ
¿Xiñee risaca para Jehová modo ruzuchaahuinu?
¿Xi conseju zanda gacané laanu guidúʼyanu pa jneza modo ruzuchaahuinu?
¿Ñee zanda gacané modo ruzuchaahuinu xcaadxi binni guiziidicaʼ de Jehová la? ¿Ximodo rábiluʼ zanda gaca ndiʼ yaʼ?
BIIYAʼ XIRUʼ ZANDA GUIZIIDILUʼ
Guníʼ ique ximodo ruuyaʼ binni lii pur modo ráculuʼ lari.
«¿Xi riníʼ ique binni ora guʼyaʼ naa?» (Tema ni zeeda lu jw.org)
Biiyaʼ xiñee naquiiñeʼ guiníʼ íqueluʼ ante guicaluʼ ti tatuaje.
«¿Ñee jneza guicá binni tatuaje la?» (Tema ni zeeda lu jw.org)
Biiyaʼ xi principiu zanda gacané lii guicaaluʼ decisión jneza.
«Ñee rusisácanu Dios pur modo rácunu lari la?» (Torre stiʼ ni rapa, septiembre de 2016)
¿Xi gucané ti gunaa guni respetar modo ruzuchaahuiʼ xcaadxi?
«Cadi jneza ruuyaʼ modo ruzuchaahuiʼ xcaadxi» (¡Gutaná! 22 de diciembre de 2003)