«Lainíʼ né Dios. Lainaba laa irá ni caquiiñe tu»
«Lainíʼ né Dios. Lainaba laa irá ni caquiiñe tu, ne laudii diuxquixe laa.» (FILIPENSES 4:6.)
1. Tu binni risaca nga zanda guinínenu, ne xiñee nabé galán guinínenu laabe.
GUNÍʼ ique ninábaluʼ niníʼneluʼ presidente stiʼ xquídxiluʼ. Xi rábiluʼ ñábicabe lii yaʼ. Zándaca guicabi cani runinebe dxiiñaʼ lii galán, peru nagana zaca para guiníʼneluʼ presidente ca. Peru cadi zacá diʼ raca ne Jiobá, Señor Ni Jma Nandxóʼ ni runi mandar guidubi naca guibáʼ ne guidxilayú. Zanda guinínenu laabe ratiica nuunu ne ora tiica si. Laabe rucaadiágabe ca oración ni rúninu, jma pa rúninu ni casi modo riuuláʼdxibe (Proverbios 15:29). ¡Guizáʼ galán nga njaʼ! Nayecheʼ nga riuʼnuʼ purtiʼ zanda guinínenu Dios «Ni rucaadiaga oración» stinu. Yanna, ñee cadi naquiiñeʼ gúninu ni gatigá la? (Salmo 65:2.)
2. Xi naquiiñeʼ gúninu para gucaadiaga Dios ca oración stinu.
2 Neca nánnanu rucaadiágabe laanu, zándaca chuʼ tu guinabadiidxaʼ: «Xi naquiiñeʼ gúninu para gucaadiaga Dios ca oración stinu». Biblia cayabi laanu xi naquiiñeʼ gúninu: «Qué zanda guni binni ni riulaʼdxi Dios pa qué [gapa fe]. Purti para idxiña cabe laabe la? napa cabe xidé guni cre cabe nuu be ne rulabi be cani uyubi laabe» (Hebreos 11:6). Casi modo bisiene tema ni maʼ bidúʼndanu que, para ganda guidxíñanu ra nuu Dios caquiiñeʼ gápanu fe. Laabe zucaadiágabe ca oración stinu pa laanu gápanu fe, pa racaláʼdxinu gúninu ni jneza, pa ni canábanu ca careeni de ndaaniʼ ladxidoʼno ne pa canábanu ni modo racaláʼdxibe.
3. 1) Xi zanda guinábanu ora guni orarnu, cásica biʼniʼ ca xpinni Dios ni bibani dxiqué. 2) Ximodo zanda guinínenu Dios.
3 Apóstol Pablu gúdxibe ca xpinni Cristu ni bibani ca dxi stibe: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa» (Filipenses 4:6, 7). Lu Biblia zeeda stale ejemplu stiʼ binni ni gunábacaʼ Dios ni caquiiñecaʼ, casi Ana, Elías, Ezequías ne Daniel (1 Samuel 2:1-10; 1 Reyes 18:36, 37; 2 Reyes 19:15-19; Daniel 9:3-21). Galán gúninu casi biʼniʼ ca binni ni maʼ bizéʼtenu ca. Ca diidxaʼ ni guníʼ Pablu ca laaca culuíʼ cani ximodo zanda guinínenu Dios. Zanda gudiʼnu xquíxepeʼ laabe pur xiixa ni bíʼnibe pur laanu ne ora gúninu ni zanda gusisácanu laabe. Ne ora runi rogarnu Dios para gacané laanu la? rusihuínninu qué runi crenu laca laanu ne rusihuínninu cayúninu ni de guidubi ladxidoʼno. Ne zanda guni orarnu para guinábanu laabe xiixa ni caquiiñenu (Lucas 11:2, 3). Zacá nga riuulaʼdxiʼ Bixhózenu ni nuu guibáʼ guinínenu laa.
4. Pa nanna Jiobá xi caquiiñenu, xiñee caquiiñeʼ guinábanu ni laabe.
4 Yanna, zándaca guinabadiidxanu: «Ñee qué ganna xa Dios xi caquiiñenu». Nánnabe pue (Mateo 6:8, 32). Pa nánnabe ni, xiñee racaláʼdxibe guinábanu ni laabe yaʼ. Zeeda gácani casi ti hombre ni napa ti tienda. Laabe racaláʼdxibe gusigáʼdebe chupa chonna cosa cani rizíʼ lube, peru para ganda guicaacabe ni cusigáʼdebe la? guniʼbe caquiiñeʼ chécabe ra nuube para guicaacabe ni. Cani qué naʼ cheʼ ra nuube zusihuínnicaʼ qué racaláʼdxicaʼ ni chigudiibe laacaʼ. Zacaca nga laanu, pa qué guidxíñanu ra nuu Jiobá para gábinu laa xi caquiiñenu la? zusihuínninu qué rusisácanu ni cudiibe laanu. Jesús guníʼ ca diidxaʼ riʼ: «Lainaba [ne] zacaa tu» (Juan 16:24). Ora gúninu zacá, rusihuínninu dxandíʼ runi crenu zacané Dios laanu.
Ximodo zanda guidxíñanu Dios
5. Xiñee naquiiñeʼ guni orarnu lu lá Jesús.
5 Neca cadi canabaʼ Jiobá laanu stale cosa ni caquiiñeʼ gúninu para guidxíñanu ra nuube, nápanu xidé guizíʼdinu modo naquiiñeʼ gúninu ni, casi modo cusiene Biblia. Jesús gudxi cani canazá nanda laa: «Pa guinábatu Bixhozeʼ xiixa, laabe zudiibe ni laatu ora guinábatu ni lu laʼyaʼ» (Juan 16:23, NM). Nga runi, naquiiñeʼ guni orarnu lu lá Jesús, purtiʼ zacá zusihuínninu laabe nga ni riquiiñeʼ Dios para uguu ndaayaʼ binni guidxilayú.
6. Ñee caquiiñeʼ guzuxíbinu o cuinu para guni orarnu la?
6 Ñee caquiiñeʼ guzuxíbinu o cuinu para guni orarnu la? Biblia cadi cayabi diʼ laanu ximódopeʼ gúninu para gucaadiaga Dios oración stinu (1 Reyes 8:22; Nehemías 8:6; Marcos 11:25; Lucas 22:41). Ni jma risaca nga guni orarnu Dios de guidubi ladxidoʼno ne gánnanu xi pur cayúninu ni (Joel 2:12, 13).
7. 1) Xi rusiénecabe de diidxaʼ amén. 2) Ximodo zanda guiníʼcabe diidxaʼ riʼ.
7 Xiñee naquiiñeʼ guininu amén guilúxesinu de guni orarnu. Diidxaʼ hebreu ʼa·mén riniʼni «zacá gácani». Stiidxaʼ Dios na galán iquiiñenu diidxaʼ riʼ ora guiluxe guni orarnu, jmaruʼ si ora gúninu ni nezalú xcaadxi binni (Salmo 72:19; 89:52). Casi na Diccionario Enciclopédico Espasa 1, riquiiñeni ora riluxe ti oración «para gusihuínninu racaláʼdxinu o canábanu gaca ca diidxaʼ ni caninu». Nga runi, ora guiluxe guni orarnu ne guininu «amén», cusihuínninu caree ca diidxaʼ ca de ndaaniʼ ladxidoʼno. Ora ti xpinni Cristu guni orar pur ca binni ridagulisaa ne guiluxené diidxaʼ riʼ, xi zanda guni ca binni ni cucaadiaga yaʼ. Zanda guiníʼcabe diidxaʼ amén riʼ ndaaniʼ ladxidóʼcabe o pacaa zanda guiníʼcabe ni nadipaʼ, para guluíʼcabe tobi si nuunécabe ne ni bieeteʼ lu oración ca (1 Corintios 14:16).
8. Ora guni orarnu, ximodo zanda gúninu casi biʼniʼ Jacob ne Abrahán, ne xi rusihuínninu ora rúninu zacá.
8 Nuu tiru rudii Dios lugar gusihuínninu pa dxandíʼ racaláʼdxinu ni canábanu laabe. Zándaca caquiiñeʼ gúninu casi biʼniʼ Jacob. Laabe gudindenebe ti ángel guidubi ti gueelaʼ para uguu ndaayaʼ laabe (Génesis 32:24-26). Laaca zándaca caquiiñeʼ gácanu casi Abrahán, purtiʼ gatigá guniʼbe pur Lot ne de tutiica binni ni ñaca nachaʼhuiʼ ndaaniʼ guidxi Sodoma (Génesis 18:22-33). Zacaca, zándaca caquiiñeʼ guinábanu Jiobá gaca ni jneza, gácabe nachaʼhuiʼ ne guilaseláʼdxibe laanu ti ganda gacanebe laanu lu xiixa nabé risaca para laanu.
Xi zanda guinábanu
9. Xi jma naquiiñeʼ guinábanu ora maʼ cayuni orarnu.
9 Guietenaláʼdxinu ni guníʼ Pablu: «Lainíʼ né Dios. Lainaba laa irá ni caquiiñe tu» (Filipenses 4:6). Ca diidxaʼ riʼ culuíʼ cani laanu zanda guinábanu Dios intiica cosa ni caquiiñenu ora maʼ cayuni orarnu laabe laasinu, peru ni jma naquiiñeʼ guinábanu nga gacanebe laanu gúninu ni nabe. Ejemplu stiʼ Daniel ruluíʼ xi naquiiñeʼ guinábanu. Dxi gunábabe Jiobá guilaselaʼdxiʼ ca israelita ora cayacanacaʼ pur bicheecaʼ la? guniʼbe: «Cadi guindaaluʼ, purtiʼ pur lii, Dios stinneʼ, ca binni de guidxi roʼ ne de guidxi huiiniʼ rucaacaʼ ridxi laluʼ» (Daniel 9:15-19). Cásica Daniel, ñee rusihuínninu ora maʼ cayuni orarnu jma risaca para laanu gusisácanu lá Jiobá ne racaláʼdxinu gaca ni nabe la?
10. Ximodo nánnanu zanda guinábanu Dios xiixa ni caquiiñenu.
10 Dxandíʼ, laaca zanda guinábanu Dios xiixa ni caquiiñenu, casi para guiénenu jma xiixa ni cadi cayénenu de lu Stiidxabe. Zacá biʼniʼ hombre ni bicaa salmo riʼ, laabe gunábabe: «Bisiene naa, para guneʼ ni na stiidxaluʼ, ne guneʼ ni na ni de guidubi ladxiduáʼ» (Salmo 119:33, 34; Colosenses 1:9, 10). Jesús laaca «unaba lu Dios nulá laa de enda guti» (Hebreos 5:7). Zacá bisihuínnibe galán nga guinábanu Dios gudii stipa laanu ti ganda gudxíʼlunu ca guendanagana ni gápanu ne ora chuʼ xquendanabáninu ra naxoo. Ne dxi bisiidibe oración stiʼ padrenuestro, bizeetebe zanda guinábanu Dios gudii ni guidoʼno guiráʼ dxi.
11. Ximodo racané oración ca laanu ti ganda gudxíʼlunu ni uquiinde Binidxabaʼ laanu.
11 Lu oración ni bisiidiʼ Jesús que, laaca gunábabe Dios: «Cadi udiiu lugar cuba yu binidxaba laadu, sínuque bilá laadu de lu ná be» (Mateo 6:9-13). Gudiʼdiʼ si dxi Jesús laaca guníʼ ca diidxaʼ riʼ: «Lagataná ne lainíʼ né Dios ti qué uquiinde binidxaba laatu» (Mateo 26:41). Nga runi, naquiiñeʼ guni orarnu ora guidúʼyanu cuquiinde laanu gúninu xiixa ni malu, casi pa ra dxiiñaʼ o ra scuela chuʼ tu gucaa laanu guchéʼnenu Dios. Zándaca guni invitar ca binni ni qué ruundaʼ Biblia laanu para gúninu xiixa ni gucaa laanu guchéʼnenu Dios o guinábacabe laanu gúninu xiixa ni nanalaʼdxiʼ Dios. Galán guinábanu Dios gudii stipá laanu para gudxíʼlunu ca guendanagana ni maʼ nápanu o para cani málasi gueeda luguianu. Peru laaca galán chinándanu conseju stiʼ Jesús ora guniʼbe guinábanu lú Dios gacané laanu ti cadi gucheʼnu.
12. Xi guendanagana zanda gábinu Jiobá lu oración stinu, ne xi zanda cuézanu gúnibe.
12 Ca xpinni Dios laaca runiná stale yuubaʼ ne guendanagana laacaʼ. Ca guendahuará ne ca cosa ni riguu laanu xizaa runiná cani laanu. Laaca qué randa diʼ ratadxí ladxidoʼno ora ridúʼyanu guiráʼ ca guendaridinde ni cayaca, ne ora huaxiéʼ dxiiñaʼ nuu la? raca nagana para laanu guidxélanu ni guidoʼno. Nga runi, guizáʼ riéchenu gánnanu rucaadiaga Jiobá laanu ora gábinu laa guiráʼ ni runiná laanu. Salmo 102:17 na: «[Jiobá] zacábibe ca oración stiʼ ca binni ni qué gapa gastiʼ ne qué zucaanabe ca oración sticaʼ».
13. 1) Casi xi zanda guinábanu Dios. 2) Bizeeteʼ ti ejemplu.
13 Laanu zanda guinábanu intiica cosa lu oración stinu para ganda gúninu jma lu xhiiñaʼ Jiobá o ti ganda chuʼnu gaxha de laabe (1 Juan 5:14). Galán nga guinábanu Dios gacané laanu ante quixhe íquenu guichagananu, cuinu ti dxiiñaʼ o gacaláʼdxinu gúninu jma lu xhiiñabe. Sicaríʼ guníʼ ti baʼdudxaapaʼ de Filipinas ni racalaʼdxiʼ gaca precursora regular peru qué gapa dxiiñaʼ: «Ti sábadu gunabaʼ Jiobá gacané naa gaca precursora. Dxi queca, laga canagucheecheʼ diidxaʼ bisananiáʼ ti baʼdudxaapaʼ ti libru. Nagueendaca gúdxibe naa: “Galán ñeluʼ ra scuela stinneʼ lunes riʼ ziadoʼroʼ”. Óraque gunabadiidxaʼ laabe: “Xi para yaʼ”. Laabe gúdxibe naa caquiiñecabe ti binni para guni dxiiñaʼ raqué, peru caquiiñecabe binni que nagueendaca. Guyaa ne oraqueca bidiicabe dxiiñaʼ que naa. ¡Guizáʼ nagueenda guca ca cani...!». Stale Testigu ni nuu lu guidubi naca Guidxilayú huayácacaʼ zacá. Nga runi, galán nga gábinu Dios ni nuu ndaaniʼ ladxidoʼno ne gábinu laabe xi caquiiñenu.
Pa maʼ bicheʼnu yaʼ
14, 15. 1) Xiñee cadi naquiiñeʼ gusaananu de guni orarnu neca maʼ bicheʼnu. 2) Nécapeʼ zanda guinábanu Dios xiixa ni caquiiñenu, xiruʼ zanda gacané laanu chuʼnu galán ne laabe.
14 Ximodo racané oración ca tuuxa ni maʼ bichee yaʼ. Nuu tu laa ora guchee maʼ qué runi orar purtiʼ rituilú; peru cadi jneza diʼ gúnibe zacá. Guchaaganu ni ne ti hombre ni rusá avión. Laabe nánnabe zanda guinábabe gacané ca binni ni runi dxiiñaʼ ra riasa avión ca laabe pa guinítibe. Yanna, xi zándaca gaca pa pur catuílube qué guinábabe ca binni que gacanecaʼ laabe yaʼ. Zándaca guizaaca ti desgracia. Zacaca nga rizaaca tuuxa ni maʼ bichee ne pur catuilú maʼ qué guni orar Dios, zándaca guizaacabe xiixa. Neca guituílube pur bicheebe, peru cadi pur nga maʼ gusaanabe de guni orarbe Jiobá. Ne ca binni ni maʼ biʼniʼ xiixa guizáʼ malu, Dios cayabi laacaʼ guni orarcaʼ laabe. Isaías, ti ni riguixhená stiʼ Dios, gúdxibe ca binni ni bibani ca dxi stibe ni bicheenecaʼ Dios que gucaacaʼ ridxi Jiobá sti biaje purtiʼ laabe zutiidiláʼdxibe donda sticaʼ (Isaías 55:6, 7). Dxandíʼ, para ganda gucuudxinu lú Jiobá, o para ganda guyúbinu chuʼnu galán ne laabe la? primeru caquiiñeʼ gucuudxinu ladxidoʼno, o cadi guni crenu laca laanu. Para nga la? naquiiñeʼ gúninu stipa pur cadi guchéʼrunu ne dxandipeʼ gaca arrepentirnu (Salmo 119:58; Daniel 9:13).
15 Nuu sti razón nabé risaca para guni orar tuuxa ora maʼ bichee. Discípulo Santiago guníʼ pa tuuxa caquiiñeʼ gacanécabe laa para chuʼ galán ne Dios caquiiñeʼ «useenda caa ca hermanu gola de lade cani runi cre, [ti] iníʼ né ca Dios pur laabe [...,] ne zandisa Señor laabe» (Santiago 5:14, 15). Ya, binni ni maʼ bichee ca caquiiñeʼ gábibe Jiobá xi bíʼnibe, peru laaca caquiiñeʼ gábibe ni ca binnigola ti guni orarcaʼ pur laabe, purtiʼ nga zacané laabe chuʼbe galán ne Dios sti biaje.
Gadxé gadxé modo ricabi Dios ca oración stinu
16, 17. 1) Ximodo ricabi Dios ca oración stinu. 2) Xii nga cani huayaca ni rusihuinni stale tiru pur oración ni runi binni ridxélanu laacaʼ ora maʼ ziucheechenu diidxaʼ.
16 Ximodo ricabi Dios ca oración stinu yaʼ. Nuu tiru nagueenda ricábibe laanu ne rihuínnica ora rúnibe ni (2 Reyes 20:1-6). Peru nuu tiru rindaa para guicábibe laanu ne qué rihuínnipeʼ ora gúnibe ni. Zándaca caquiiñeʼ guinínenu Dios sin guireʼnu gana casi ejemplu ni guníʼ Jesús de ti viuda ni qué niree gana de ninabaʼ ñacané ti juez laa (Lucas 18:1-8). Peru pa guinábanu Jiobá xiixa para gacanebe laanu gúninu ni nabe la? qué ziuu dxi gábibe laanu casi juez ni bizeeteʼ Jesús que: «Cadi uchiiña lu naa» (Lucas 11:5-9).
17 Laanu ca xpinni Jiobá maʼ huadúʼyanu ricábibe ca oración stinu. Ora maʼ canagucheechenu diidxaʼ ridúʼyanu ximodo ricabi Dios ca oración ni runi binni. Guidúʼyanu chupa chonna de laacani. Ora canagusaana chupa gunaa Testigu de Filipinas libru ne revista ni cusiene de Biblia ti lugar ni nuu zitu de xquídxicaʼ la? bisaananécabe ti gunaa ti tratadu. Óraque na gunaa que rabi laacabe dede daʼ nisa lú: «Nuchiʼ gunabaʼ Dios guseendaʼ tuuxa ni gusiene naa ni cá lu Biblia, ne zuluaʼsiaʼ maʼ cacábibe naa». Qué nindaa diʼ guyé gunaa riʼ ca guendaridagulisaa ni raca ndaaniʼ Yoo stiʼ Reinu. Stobi de laacani nga ni bizaaca ti hombre Testigu de ti guidxi ni nuu ladu gueteʼ de Asia. Laabe bidxíbibe chigucheechebe diidxaʼ ndaaniʼ ti yoo roʼ ra nabeza stale binni, purtiʼ cayápacabe raqué. Guníʼnebe Jiobá ne óraque guyuube. Ora bixhidxinabe ra puertaʼ stiʼ tobi de ca cuartu que, biree ti baʼdudxaapaʼ. Ora bisiénebe laa xi pur nuube raqué, baʼdudxaapaʼ que bizulú biinaʼ ne gudxi laabe canayúbipeʼ ca testigu stiʼ Jiobá ne gunábabe Dios gacané laabe guidxélabe laacaʼ. Testigu que gudxi laabe paraa ridagulisaacabe.
18. 1) Xi naquiiñeʼ gúninu ora guicabi Dios ca oración stinu. 2) Xi ndaayaʼ zacaanu ora guni orarnu Dios guiráʼ ora.
18 Oración ca nga tobi de ca cosa sicarú ni maʼ bidii Jiobá laanu, ne nuube listu para gucaadiágabe ne guicábibe laanu (Isaías 30:18, 19). Peru naquiiñeʼ chuʼnu listu para guidúʼyanu ora guicábibe laanu, purtiʼ cadi guiráʼ diʼ ora ricábibe laanu modo cabézanu. Ne ora gudiʼnu cuenta cayacanebe laanu la? cadi guiaandaʼ laanu gudiʼnu xquíxepeʼ ne gusisácanu laabe (1 Tesalonicenses 5:18). Cadi gusiaandanu ca diidxaʼ ni guníʼ apóstol Pablu riʼ: «Lainíʼ né Dios. Lainaba laa irá ni caquiiñe tu, ne laudii diuxquixe laa». Nga runi, guinínenu Dios guiráʼ ora. Pa gúninu zacá la? zadúʼyanu modo guicábibe laanu ne zacaanu ca ndaayaʼ ni guníʼ Pablu: «Zaguixhe dxí [Dios] ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu» (Filipenses 4:6, 7).
Xi guicábiluʼ
• Ximodo zanda guinínenu Dios.
• Ximodo naquiiñeʼ guidxíñanu Dios.
• Xi zanda guinábanu lu oración stinu.
• Ximodo racané oración ca tuuxa ni maʼ bichee.