Qué chuʼ dxi gusaana de gusisácanu ni rusiidiʼ Jiobá laanu
«¡Guizáʼ sicarú guiráʼ ni riníʼ íqueluʼ! Dios stinneʼ, ¡qué zanda diʼ ugabaʼ guirácani!» (SALMO 139:17.)
1, 2. Xiñee riquiiñeʼ gusisácanu guiráʼ ni zeeda lu Stiidxaʼ Dios. Xi guníʼ David para bisihuinni pabiáʼ risaca Stiidxaʼ Dios para laa.
GUIZÁʼ sicarú ngue ni bidxélacabe que. Dxi cayaca chaahuiʼ yuʼduʼ stiʼ Jiobá ni guyuu ndaaniʼ guidxi Jerusalén que la? xaíque stiʼ cani ruzaaquiʼ guʼxhuʼ Hilquías bidxela «ti libru ra cá ley stiʼ Jiobá ni bicaa Moisés». Zándaca laani ngue primé libru ni guyuu dxiqué ni gucuá xhono gayuaa iza ante guidxélacabe ni. Guníʼ ique si xi biʼniʼ sentir rey Josías, ti hombre ni biʼniʼ adorar Dios ora biluíʼcabe ni laa. Cumu nánnabe pabiáʼ risácani la? oraqueca gunábabe Safán, secretariu stibe gúʼndani nadipaʼ (2 Crónicas 34:14-18).
2 Ca dxi stinu riʼ millón de binni maʼ zanda guʼndaʼ guidubi naca Stiidxaʼ Dios o ti ndaa de laani. Yanna, ñee pur nga si zanda guininu maʼ huaxiéʼ risaca Stiidxaʼ Dios la? Coʼ, purtiʼ luni zeeda guiráʼ ni guníʼ Dios ni jma nandxóʼ ne naquiiñeʼ gúninu cani para guibáninu jma galán (2 Timoteo 3:16). Sicaríʼ guníʼ David de Stiidxaʼ Dios: «Para naa la? ¡guizáʼ sicarú guiráʼ ni riníʼ íqueluʼ! Dios stinneʼ, ¡qué zanda diʼ ugabaʼ guirácani! (Salmo 139:17).
3. Ximodo nánnanu pabiáʼ bisaca para David chuʼ gaxha de Jiobá.
3 Qué ñuu dxi nusaana David de nusisaca Jiobá, de nusisaca Stiidxabe ne de nusisaca modo biʼniʼ adorar Dios, ne zacá nga rihuínnini lu ca salmo sicarú ni bicaabe. Casi lu Salmo 27:4 ridúʼndanu xi bicaabe: «Ti cosa maʼ gunabaʼ Jiobá... ne laani nga chiyubeʼ, cueza ndaaniʼ lidxi Jiobá biaʼ dxi guibaneʼ, ti guuyaʼ pabiáʼ nacháʼhuibe ne chuaa nayecheʼ guuyaʼ yuʼduʼ stibe». Xi riníʼ ca diidxaʼ «chuaa nayecheʼ guuyaʼ» ni bicaa salmista riʼ yaʼ. Lu diidxaʼ hebreu riníʼcani cadi gusaana de guidúʼyadxinu xiixa, guʼyaʼ chaahuinu ni, guiéchenu ora guidúʼyanu ni, chuuláʼdxinu ni ne guidxagayaanu ni. Rihuínnica nanna David pabiáʼ risaca ngue chuʼ gaxha de Jiobá ne gusisaca cani cudiibe laa. Guiráʼ ni biziidibe lu Stiidxaʼ Dios la? gucuaa xnixenebe cani cásica ora ñobe ti guendaró nabé nanixe. Galán gúninu chinándanu ejemplu stibe (Salmo 19:7-11).
Gusisácanu guiráʼ ni rusiidiʼ Stiidxaʼ Dios laanu
4. Pora ndiʼ «bichá Espíritu Santu ladxidóʼ Jesús de enda nayecheʼ».
4 Randa riene binni ni cá lu Stiidxaʼ Dios peru cadi purtiʼ nuu xpiaaniʼ o pur guiráʼ ni maʼ biziidiʼ ndaaniʼ guidxilayú riʼ, purtiʼ ca nga rucaacani binni guiníʼ ique jma risaca que xcaadxi. Ca binni ni riene ni cá lu Stiidxaʼ Dios la? riénecaʼ ni purtiʼ nachaʼhuiʼ Jiobá ne laacaʼ, ne laabe rusiénebe ni binni ni riuulaʼdxiʼ guiziidiʼ, binni ni nayá ladxidóʼ ne nanna naquiiñeʼ chuʼ gaxha de laabe (Mateo 5:3; 1 Juan 5:20). Ngue runi, dxi caníʼ ique Jesús zacá lá xcaadxi binni ni gulené donda lu ti guiʼchiʼ napa Dios guibáʼ la? bicaa ngue laabe gusisácabe Jiobá. Biblia na: «Óraque pe bichá Espíritu Santu ladxidóʼ[be] de enda nayecheʼ, ne na[be]: Diuxquixe lii, Bixhozeʼ. Lii nga xpixuaana ibáʼ ne guidxilayú. Rudiee diuxquixe lii purti qué nudiiu lugar ñene cani riene ne cani nuu xpiaani irá ndiʼ, sínuque bicaachi lu ni para biluíʼ lu ni cani zeda gaca casi baʼduʼ» (Lucas 10:17-21).
5. Xiñee cadi naquiiñeʼ nusaana de nusisaca ca discípulo stiʼ Jesús guiráʼ ni ziyánnacaʼ de Reinu stiʼ Dios.
5 Biluxe biʼniʼ orar si Jesús de guidubi ladxidóʼ la? biiyadxibe ca discípulo stibe ne gúdxibe laacaʼ: «Dichoso laatu pur irá ni cayuuya tu riʼ. Purti stale profeta ne stale rey ucalaʼdxi ñuuya ni cayuuya tu riʼ, ne qué ñuuyaʼ. Ne ucalaʼdxi ca ñuna diaga ca ni cayuna diaga tu riʼ, peru qué ñuu dxi ñuna diaga caʼ». Raríʼ ridúʼyanu gucané Jesús ca discípulo stiʼ para cadi gusaana de gusisácacaʼ guiráʼ cani caziidicaʼ de Reinu stiʼ Dios. Purtiʼ ca xpinni Dios ni bibani ante de laacabe la? qué ñánnadicaʼ xipeʼ nga Reinu ca, nin ca binni nuu xpiaaniʼ de dxiqué (Lucas 10:23, 24).
6, 7. 1) Xiñee naquiiñeʼ gusisácanu guiráʼ ni maʼ nánnanu de Dios. 2) Xiñee qué liica zanda guchaaganu cani rusiidiʼ religión ni cadi dxandíʼ ca de cani rusiidiʼ religión ni dxandíʼ.
6 Yanna riʼ jma nápanu razón para gusisácanu guiráʼ ni cazíʼdinu de Jiobá purtiʼ dxandíʼ cani, ne laabe riquiiñebe «mozo ni nuu xpiaaniʼ ne ni runi jneza» para gusiénebe laanu Stiidxabe (Mateo 24:45; Daniel 12:10). Sicaríʼ bicaa Daniel ni riguixhená que ora bizeeteʼ de ca dxi mayaca gueeda fin: «Stale tu zuyubi guiráʼ ladu, ne guendananna ni dxandíʼ zadale ni» (Daniel 12:4). Ñee cadi raʼbuʼ maʼ stale nga ni maʼ bizíʼdinu de Dios yanna, ne nápanu guiráʼ ni caquiiñenu para chuʼnu gaxha de laabe la?
7 Guiráʼ ni maʼ nánnanu de Dios la? qué liica zanda guchaaganu cani ne cani rusiidiʼ ca religión stiʼ Babilonia guidxi roʼ que; nga runi ca binni ni maʼ qué chuulaʼdxiʼ ni rusiidiʼ ca religión ni cadi dxandíʼ ca maʼ cadxíñacaʼ ra cayaca adorar Jiobá jneza. Laacabe nga ca binni nachaʼhuiʼ ni qué naʼ chuʼ «lu enda ruchee sti [Babilonia guidxi roʼ ca], ne qué [naʼ] inaaze enda naná ni gueeda luguiá» ni laacaʼ. Jiobá ne ca xpinni cayuni invitarcaʼ guiráʼ ca binni riʼ para guiuucaʼ ndaaniʼ xquidxi (Apocalipsis 18:2-4; 22:17).
Guiráʼ binni ni rusisaca ni caziidicaʼ de Dios cadxíñacaʼ laabe
8, 9. Ximodo cayaca ni na Ageo 2:7 yanna riʼ.
8 Sicaríʼ guníʼ Jiobá modo guni adorárcabe laa: «Zuniibeʼ guiráʼ ca guidxi roʼ ca, ne guiráʼ ca cosa ni jma risaca stiʼ ca guidxi ca ziuucaʼ; ne dxandipeʼ zusisacaʼ yoo riʼ» (Ageo 2:7). Ca diidxaʼ riʼ guca ni na cani dxi bibani Ageo, dxi biree caadxi israelita de esclavu ne bibiguétacaʼ Jerusalén para gucuicaʼ yuʼduʼ que sti biaje. Yanna riʼ laaca cayaca ni na ca diidxaʼ ca sti biaje pur modo cayuni adorárcabe Jiobá.
9 Millón de binni maʼ cayuni adorar Dios jneza ne rúnicaʼ ni de guidubi ladxidoʼcaʼ, zacá nga casi ñaca ora cayuucabe ndaaniʼ yoo stiʼ Dios. Guiráʼ iza cadaaguʼ jma de 200,000 binni ni zeeda gaca «ca cosa ni jma risaca stiʼ ca guidxi ca» laacabe (Juan 4:23, 24). Zacá rihuínnini lu dxiiñaʼ ni guca iza 2006, purtiʼ guyuunisa 248,327 binni ni bidiicaʼ laacaʼ Jiobá: ¡casi ora ñuunisa 680 binni guiráʼ dxi! Cumu riuuláʼdxicabe guiráʼ ni maʼ biziidicabe de Jiobá ne dxandíʼ racaláʼdxicabe gucheechecabe stiidxaʼ Reinu para gúnicabe ni nabe la? nga rusihuinni Jiobá nga cuchiña laacabe ra nuu (Juan 6:44, 65).
10, 11. Guníʼ ti ejemplu ni cusihuinni pabiáʼ rusisaca stale binni ni rusiidiʼ Biblia.
10 Stale de ca binni ni nayá ladxidóʼ riʼ guyuuláʼdxicaʼ guiziidicaʼ ni dxandíʼ de Dios purtiʼ biiyacaʼ «tuu nga runi ni jneza ne tuu nga runi ni qué iquiiñeʼ, tuu nga runi ni na Dios ne ni qué huayuni ni nabe» (Malaquías 3:18). Zacá nga guca Wayne ne Virginia. Guendaxheelaʼ riʼ guyuucaʼ lu ti religión ni rábicabe protestante, peru guyuu stale ni gucaláʼdxicabe ñánnacabe ne guirutiʼ tu nicabi cani laacabe. Qué riuulaʼdxidicabe ora ridinde ca guidxi ca, peru ridxagayaacabe ora ruuyacabe riguu xaíque stícabe ndaayaʼ guiráʼ ca soldadu ca ne guiibaʼ ni chitíndenecaʼ. Dxi maʼ zigólacabe biʼniʼ sentírcabe maʼ qué nulabi ca binni de religión stícabe laacabe, ne biʼniʼ ca binni que laacabe zaqué neca stale iza bisiidiʼ Virginia ra scuela stícabe guiráʼ domingu. Sicaríʼ guníʼcabe ni qué ñuuláʼdxicabe: «Guirutiʼ niganna laadu ne guirutiʼ tu nizaalaʼdxiʼ pa cazíʼdirudu de Dios. Ni gucalaʼdxiʼ si yuʼduʼ que nga xpuéltudu. Guizáʼ triste guyuʼduʼ». Ne jmaruʼ si guyuucabe zacá ora biiyacabe biaʼ si ruuyaʼ ca xaíque stiʼ yuʼduʼ ra riécabe que gaca binni muxeʼ.
11 Gupa si iza la? ti dxaapahuiiniʼ xhiágacabe beeda gaca testigu stiʼ Jiobá ne despué laaca guca ti xiiñiʼ dxaapacabe Testigu. Neca primé que nabé bidxiichi Wayne ne Virginia la? despué maʼ gunácabe chuʼ tu gusiidiʼ laacabe de Biblia. Sicaríʼ guníʼ Wayne: «Lu chonna beeu si guizáʼ bizíʼdidu stale de Biblia que ni bizíʼdidu lu setenta iza gudiidiʼ ca. Qué ñuu dxi nusiidicabe laadu Jiobá nga láʼ Dios; ne qué ñánnadu de Reinu nin de Paraísu ni chigaca lu Guidxilayú riʼ». Qué nindaa maʼ guyé guendaxheelaʼ riʼ ca guendaridagulisaa ni rapa ca testigu stiʼ Jiobá ne bizulú bicheechecaʼ diidxaʼ. Dede guníʼ Virginia: «Racaláʼdxidu guinínedu guiráʼ binni xipeʼ nga rusiidiʼ [Biblia de Dios]». Guyuunisa guirópacabe lu iza 2005 dxi maʼ nápacabe jma de 80 iza. Laacabe guníʼcabe: «¡Maʼ bidxéladu ti grupu ni dxandíʼ zinanda Cristu ne laacabe zeeda gácacabe casi binnilídxidu!».
Gusisácanu cani racané laanu gúninu «irá ni riree ndu»
12. Xi cayuni Jiobá guiráʼ ora pur ca xpinni, ne xi caquiiñeʼ gúninu para cueendunu ni galán.
12 Guiráʼ ora rusiidiʼ Jiobá laanu para gúninu ni na. Casi bíʼnibe ne Noé, gúdxibe laa ximódopeʼ naquiiñeʼ guni arca que, purtiʼ naquiiñeʼ gácani jnézapeʼ dede ora guzuluni. Ne zaqué gúcani, purtiʼ Noé «biʼniʼ guiráʼ ni biʼniʼ mandar Dios laa guni. Bíʼnibe zaqué zaquepeʼ» (Génesis 6:14-22). Yanna riʼ laaca cusiidiʼ chaahuiʼ Jiobá ca xpinni para ganda gúnicaʼ ni nabe. Dxiiñaʼ ni jma risaca stinu nga gucheechenu ca diidxaʼ nacubi ne galán stiʼ Reinu ni guluu Dios guibáʼ ne gacanenu binni gácacaʼ discípulo stiʼ Jesucristu. Ne zareendú guiráʼ ni gúninu pa guzúʼbanu diidxaʼ cásica biʼniʼ Noé. Naquiiñeʼ chinándanu ni cusiidiʼ Jiobá laanu lu Stiidxaʼ ne ni cusiidiʼ xquídxibe laanu (Mateo 24:14; 28:19, 20).
13. Xi riquiiñeʼ Jiobá para gusiidiʼ laanu.
13 Para gúninu dxiiñaʼ ca la? nápanu xidé guiziidiʼ chaahuinu iquiiñenu Stiidxaʼ Dios, purtiʼ laani «nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios, ti iziidi chaahui ca xpinni Dios para ganda guni irá ni riree ndu» (2 Timoteo 2:15; 3:16, 17). Cásica bisiidiʼ Jiobá ca xpinni lu primé siglu que la? yanna riʼ laaca zaqueca cusiidibe laanu lu ca guendaridagulisaa stinu. Lade 99,770 neza binni ridagulisaa ni nuu lu guidubi naca Guidxilayú riʼ ridiʼdiʼ Scuela stiʼ cani Rucheeche Diidxaʼ ne raca Guendaridagulisaa stiʼ Dxiiñaʼ Stinu para guizíʼdinu gucheechenu diidxaʼ. Ñee riuunu guiráʼ ca guendaridagulisaa ca ne rúninu ni cazíʼdinu lúcani para gusihuínninu rusisácanu cani la? (Hebreos 10:24, 25.)
14. Ximodo rusihuinni ca xpinni Jiobá rusisácacaʼ xhiiñabe. (Laaca zanda guzeeteluʼ cani cá lu La Atalaya 1 stiʼ febrero 2007, yaza 27-30 diidxastiá.)
14 Stale de ca xpinni Dios ni nuu lu guidubi naca Guidxilayú riʼ rusihuínnicaʼ rusisácacaʼ guiráʼ ni caziidicaʼ ora rúnicaʼ stipa para gucheechecaʼ diidxaʼ dede biaʼ gándatiʼ. Zacá rihuínnini lu iza dxiiñaʼ ni bíʼnicabe 2006, purtiʼ guyuu 6,741,444 ni rucheeche diidxaʼ ne bíʼnicaʼ 1,333,966,199 hora para bicheechecaʼ diidxaʼ, ne lade ca hora ca laaca zeeda tiempu ni biquiiñecaʼ para biindanecaʼ 6,286,618 binni ra lidxi. Cani guninu ca zeedacani ra cá pabiáʼ dxiiñaʼ guca lu guidubi naca Guidxilayú. Xiñee qué gúʼndaluʼ cani. Zacaneni lii cásica gucaneni ca bíʼchinu ne ca bizáʼnanu ni guyuu lu primé siglu que ora gúnnacaʼ paraa guiráʼ careeche diidxaʼ dxiqué (Hechos 1:15; 2:5-11, 41, 47; 4:4; 6:7).
15. Xiñee cadi naquiiñeʼ chuʼnu triste pur ni cudiʼnu Jiobá pa de ladxidoʼno careeni.
15 Ca xpinni Cristu cadi cusaanacaʼ de gusisácacaʼ Jiobá ne nuucaʼ nayecheʼ purtiʼ maʼ runibiaʼcaʼ laabe ne nácacaʼ Testigu stibe (Isaías 43:10). Nga runi, biaʼ runi ca bíʼchinu ne ca bizáʼnanu ni huará o ni maʼ nagola para gusisácacaʼ Jiobá la? zeeda gácani casi ni bisigaʼdeʼ viuda que Dios. Peru cadi guiaandaʼ laanu nabé rusisaca Jiobá ne Xiiñiʼ ca binni ni cayuni ni nácabe de guidubi ladxidoʼcaʼ, purtiʼ zacá nga cudii ca binni ca ni jma galán nápacaʼ (Lucas 21:1-4; Gálatas 6:4).
16. Gunáʼ nga ca libru ni huadii Dios laanu para gusíʼdinu binni.
16 Jiobá cusiidiʼ laanu ximodo gucheechenu diidxaʼ, peru laaca riquiiñebe xquídxibe ti gudii laanu cani iquiiñenu para gusíʼdinu binni. Dxiqué biree libru La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ne yanna riʼ biree sti libru cubi Xipeʼ ndiʼ cusiidiʼ Biblia. Cani dxandíʼ rusisaca ca libru ca la? riquiiñecaʼ guirácani jneza ora rucheechecaʼ diidxaʼ.
Iquiiñenu libru Xipeʼ ndiʼ cusiidiʼ Biblia
17, 18. 1) Xi jma riuuláʼdxiluʼ iquiiñeluʼ ora maʼ cucheecheluʼ diidxaʼ de cani zeeda lu libru Xipeʼ ndiʼ cusiidiʼ Biblia. 2) Xi guníʼ ti binnigola ni riganna ca binni ridagulisaa de libru ca.
17 Nabepeʼ nga sicarú libru Xipeʼ ndiʼ cusiidiʼ Biblia ca para gucheechenu diidxaʼ, purtiʼ nápani diecinueve capítulo ne ti apéndice ni cusiene jma de ni zeeda lu capítulo ca, ne cadi nagana modo rusiene libru riʼ cani. Casi capítulo 12 ni láʼ «Modo riuulaʼdxiʼ Dios guibáninu» la? cusiéneni binni ni cadúʼndanenu ca ximodo gaca xhamigu Dios, ti cosa ni qué liica ridiʼdiʼ ndaaniʼ ique binni ne nabé nagana rácani para laa (Santiago 2:23). Xi maʼ huaníʼ cani gucuaa libru riʼ.
18 Ti binnigola ni riganna ca binni ridagulisaa de Australia guníʼ: «Nabé riuulaʼdxiʼ binni libru ca cásipeʼ guʼyaʼ ni, purtiʼ rucaani laacabe guinabadiidxacabe para guiziidicabe jma». Ne cumu laaca guniʼbe maʼ cadi nagana para iquiiñeʼ libru ca la? «maʼ qué ridxibi cani rucheeche diidxaʼ para gusiidicaʼ binni ne riéchecaʼ ora chigucheechecaʼ diidxaʼ. Nga runi cadi guendaridxagayaa diʼ gábicabe ni ti Ndaa Oro».
19-21. Bizeeteʼ caadxi ejemplu ni rusihuinni pabiáʼ risaca libru Xipeʼ ndiʼ cusiidiʼ Biblia.
19 Sicaríʼ gudxi ti gunaa de Guyana ti precursor ni bixhidxináʼ ra puertaʼ tienda stibe: «Dios biseendaʼ lii». Guníʼ gunaa riʼ zaqué purtiʼ hombre nabezanebe que casi bisaana laabe ne guiropaʼ xiiñihuiinibe. Precursor que bixheleʼ libru Xipeʼ ndiʼ cusiidiʼ Biblia lu capítulo 1 ne biindaʼ párrafo 11, ra na «Ximodo runi sentir Dios ora qué raca ni jneza». Precursor que guníʼ xi guca bicaadiágasibe ca diidxaʼ que, nabe: «Yendá ca diidxaʼ que dede ndaaniʼ ladxidoʼbe, dede biásabe ne nabé naná modo yeguunabe ndaaniʼ negocio que». De raqué la? maʼ bizulú cayuundané ti gunaa Testigu laabe ne yanna maʼ cahuinni caziidibe stale cosa ni zeeda lu Biblia.
20 José, ti hombre de España, guti xheelabe ora bidxelasaa carru stícabe. Para gusiaandabe ni guca ca la? bizulú gudúʼbabe guixi ne laaca guyebe ra nuu caadxi psicólogo, peru ca binni riʼ qué nicábidicaʼ ti cosa ni runiná laabe ora guietenaláʼdxibe laa: «Xiñee bidii Dios lugar guti xheelaʼ». Ti dxi binibiáʼ José ti hombre láʼ Francesc, ni runi dxiiñaʼ laaca ra rúnibe que. Francesc biʼniʼ invitar laabe gúʼndabe capítulo 11 stiʼ libru Xipeʼ ndiʼ cusiidiʼ Biblia, lu tema ni láʼ: «Xiñee cudii Dios lugar nuu guendananá». Guizáʼ bidxagayaabe modo cusiene libru que ni cá lu Biblia ne ejemplu ni zeeda luni de ti maestru ne ti baʼduscuela. Óraque jma ne gana bizulú José cayuundaʼ Biblia, guyebe ti guendaridagulisaa de chupa gubidxa ne yanna maʼ riebe guiráʼ ca guendaridagulisaa ni raca ndaaniʼ Yoo stiʼ Reinu.
21 Roman nga ti hombre de Polonia ni napa 40 iza ne runi negocio raqué. Laabe nabé runi respetarbe Stiidxaʼ Dios, peru cumu nabé riuu xhiiñabe la? maʼ qué ñanda diʼ niziidirube jma de Dios. Peru guyebe ti guendaridagulisaa de chonna gubidxa ne raqué gucuaabe libru Xipeʼ ndiʼ cusiidiʼ Biblia. Bihuínnica bichaabe stale ora bizulú cayuundabe libru que. Roman guníʼ: «Ne libru riʼ la? cada tema stini racané guieneʼ sti tema, nga runi maʼ cadi nagana diʼ para guieneʼ guiráʼ cani naquiiñeʼ gannaʼ de Biblia». Dede yanna cayuundaʼ Roman Biblia ne maʼ ziziidibe stale de Dios.
Qué chuʼ dxi gusaana de gusisácanu ni rusiidiʼ Jiobá laanu
22, 23. Xiruʼ naquiiñeʼ gúninu para gusihuínninu rusisácanu ni chigudii Jiobá laanu.
22 Casi bisiénecabe lu ca guendaridagulisaa de chonna gubidxa «¡Mayaca guilanu!» que, cani dxandíʼ xpinni Cristu maʼ cabézasicaʼ dxi gulá Dios laacaʼ casi guníʼ que, ne zácani pur rini bixhii Jesucristu. Zusihuínninu dxandíʼ rusisácanu ni chiguni Jiobá pur laanu pa gudíʼrunu lugar gusiabe «ladxidóʼ no de irá ni bichéʼ nu chiqué, ne uchaa[be] laanu ti ibani nu casi na[be]» (Hebreos 9:12, 14).
23 Cumu yanna riʼ nabé ricá ique binni guyubi puru para laasi la? ti milagru nga gánnanu nuu jma de xhoopaʼ millón de binni ni cadi cusaana de guni ni na Dios. Laaca rusihuínnini rusisácanu dxiiñaʼ ni bidii Jiobá laanu, purtiʼ «cadi pur gana si cayuni [n]u ni». Nga runi, qué chuʼ dxi gusaana de gusisácanu ni rusiidiʼ Jiobá laanu (1 Corintios 15:58; Salmo 110:3).
Xi nicábiluʼ
• Xi rusiidiʼ David laanu de modo naquiiñeʼ gusisácanu Dios ne cani rudii laanu.
• Ximodo cayaca ni na Ageo 2:7 yanna riʼ.
• Ximodo cusiidiʼ Jiobá ca xpinni para gúnicaʼ ni nabe jneza.
• Xi naquiiñeʼ gúninu para guihuinni risaca para laanu gaca Jiobá nachaʼhuiʼ.
[Tabla ni zeeda lu yaza 25]
Jiobá cusiidiʼ laanu ximodo gúninu xhiiñaʼ
[Ca dibuju/foto ni zeeda lu yaza 25]
Xipeʼ ndiʼ CUSIIDIʼ BIBLIA