Ni rinabadiidxaʼ cani ruundaʼ

Xii nga guendaridinde stiʼ Dios ni jma nandxóʼ ni chigaca lu Armagedón, ne xi zaca guiluxe si ni (Apocalipsis 16:14, 16).

Guendaridinde ni láʼ Armagedón ca nga dxi chigunitilú Jiobá guiráʼ ca xhenemigu ne maʼ gulibe Jesucristu para guni ni. Stiidxaʼ Dios na guiráʼ cani «runi mandar ndaani guidxilayú», o ca xhenemigu Dios, rucaa «Espíritu sti binidxaba laacaʼ» guidxíñacaʼ lu guendaridinde stiʼ Dios ni jma nandxóʼ, «lugar rabi cabe Armagedón, diidxa hebreu» (Apocalipsis 16:14, 16).

Lugar ni cayeeteʼ lu textu ca cadi ti lugar diʼ ni nuu lu Guidxilayú riʼ ni. Diidxaʼ Armagedón ca riniʼni «Dani stiʼ Meguidó» (Apocalipsis 16:16). Qué huayuu dxi chuʼ ti dani guiree lá zacá. Ne qué zanda diʼ gutaagucabe guiráʼ ca «rey sti guidxilayú ne ejércitu sticaʼ» ti lugar si (Apocalipsis 19:19). Diidxaʼ «lugar» ni rieeteʼ lu Apocalipsis 16:16, nga nga modo chichuu cani runi mandar lu guidxilayú ne cani zinanda laacaʼ nezalú Dios, lu guendaridinde ni láʼ Armagedón. Xiñee yaʼ. Purtiʼ zucaalúcabe Jiobá ne ca «ejércitu ni nuu ibáʼ» cani cayuni mandar Jesucristu, «xaíque sti irá rey ne irá ni runi mandar» (Apocalipsis 19:14, 16).

Ora rieeteʼ diidxaʼ «Armagedón» lu Biblia la? rusietenaláʼdxini laanu de ti guidxi ni guyuu Israel, ni biree lá Meguidó. Guidxi riʼ guyuuni neza rindani gubidxa, cueʼ dani Carmelo. Ca binni ni rutoo ne ca soldadu gupa xidé gudíʼdicaʼ ndaaniʼ guidxi que. Ne laaca lu ca layú stiʼ guidxi riʼ gudinde stale guidxi ne guyuu tobi ni biʼniʼ ganar. Ne tobi de ca guendaridinde riʼ nga ni guca guriá nisa stiʼ Meguidó. Raqué biʼniʼ ganar juez israelita Barac ti ejércitu cananeu nabé nadipaʼ ni biʼniʼ mandar Sísara (Jueces 4:12-24; 5:19, 20). Ne laaca lu ca layú stiʼ guidxi riʼ nga biʼniʼ ganar juez Gedeón ca madianita (Jueces 7:1-22). Ora ruzéʼtenu diidxaʼ Armagedón rietenaláʼdxinu guidxi Meguidó ne nánnanu ora guedané Jiobá guendaridinde stiʼ pur Xiiñiʼ zunduuxebe guiráʼ cani gucaalú laabe.

Xi zaca guiluxe si guendaridinde riʼ yaʼ. Maʼ qué ziuuruʼ guiráʼ guendaquéiquiiñeʼ ni cayaca lu Guidxilayú riʼ ne oracaruʼ zabani binni jma galán (Apocalipsis 21:1-4). Reinu stiʼ Dios zuuyaʼ gaca Guidxilayú riʼ ti paraísu ne guibani binni nachaʼhuiʼ ndaaniʼ ni sin qué chuʼ dxi gati (Salmo 37:29).