Cani ruundaʼ revista riʼ racaláʼdxicaʼ gánnacaʼ

Ñee nuu Reinu stiʼ Dios ndaaniʼ ladxidoʼno la?

Zándaca nuu binni guiníʼ nuuni ndaaniʼ ladxidóʼ. Guidúʼyanu xi na Enciclopedia Católica: «Reinu stiʼ Dios ca nga ni cayuni mandar ndaaniʼ ladxidoʼno». Stale religión rusiidiʼ zacá. Peru, ñee dxandíʼ nga nuu Reinu stiʼ Dios ndaaniʼ ladxidóʼ binni la?

Nuu binni runi cré Jesús peʼ nga bisiidiʼ nuu Reinu stiʼ Dios ndaaniʼ ladxidóʼ binni. Dxandíʼ nga guníʼ Jesús ca diidxaʼ riʼ: Laguuyaʼ «ma cayuni mandar Dios lade tu [«Reinu stiʼ Dios nuu ládetu», NM]» (Lucas 17:21). Peru xcaadxi Biblia rutiixhi textu riʼ sicaríʼ: «Reinu stiʼ Dios ca nuuni ndaaniʼ ladxidoʼto». Ñee riníʼ ca Biblia ca cásipeʼ modo guníʼ Jesús la? O, ni gucaláʼdxibe niniʼbe nga Reinu stiʼ Dios ca nuuni ndaaniʼ ladxidóʼ binni la?

Peru, para guiénenu ca diidxaʼ ca primeru naquiiñeʼ gánnanu xii nga ladxidóʼ ni cayeeteʼ lu textu ca. Ora ruzeeteʼ Biblia de ladxidóʼ la? riniʼni de ni nuu ndaaniʼ ladxidoʼno, ni riníʼ íquenu, ne ni runi sentirnu. Nga runi, stale binni riuulaʼdxiʼ guni cré nuu Reinu stiʼ Dios ndaaniʼ ladxidoʼcaʼ, ne nga ruchaa modo nácacaʼ ne rusisaca ni laacaʼ. Peru ñee jneza modo riníʼ ique ca binni ca la?

Biblia cayabi laanu: «Ladxidóʼ binni nga ni jma riguite laa que intiica si cosa, ne qué ridxélani xi gúnini. Tu zanda gunibiaʼni yaʼ» (Jeremías 17:9). Ne Jesús peʼ guníʼ: «De ndaani ladxidóʼ cabe riree irá ni riníʼ ique cabe guni cabe: chuʼ né cabe ni cadi xheela cabe, gapa cabe jnadxii cabe, guuti cabe binni, cuana cabe, acalaʼdxi cabe gapa cabe jma que stobi, guni cabe ni nadxabáʼ» (Marcos 7:20-22). Guníʼ ique si ndiʼ: Xiñee nuu stale binni pobre, guenda ruuti ne guendaridinde ndaaniʼ guidxilayú riʼ. Ñee cadi de ndaaniʼ ladxidóʼ binni riale guni cani la? Yanna, ximodo zanda chuʼ Reinu ni runi jneza stiʼ Dios ca ndaaniʼ ladxidóʼ binni yaʼ. Rihuinni dxíchica cásica qué zanda gudii yaga bii duʼgaʼ la? Reinu stiʼ Dios qué zanda diʼ chuʼ ndaaniʼ ladxidóʼ binni (Mateo 7:16).

Peru, tu gudxi Jesús ca diidxaʼ ni zeeda lu Lucas 17:21 yaʼ. Ti versículo ante de textu riʼ na: «Oraque unaba diidxa ca fariseu laabe padxí uzulú guni mandar Dios. Para rabi be laacaʼ» (Lucas 17:20). Ca fariseu que guca xhenemígucaʼ Jesús. Ne laapebe guniʼbe rusiguiicaʼ ne qué ziuudicaʼ ndaaniʼ Reinu stiʼ Dios (Mateo 23:13). Nga runi, ximodo zanda chuʼ Reinu stiʼ Dios ndaaniʼ ladxidóʼcabe pa laapecabe qué ziuucabe ndaaniʼ ni yaʼ. Naganahuiiniʼ nga nja. Peru yanna guidúʼyanu xii ngue gucalaʼdxiʼ Jesús niníʼ.

Nuu caadxi Biblia rutiixhicaʼ ca diidxaʼ guníʼ Jesús cásica runi Traducción del Nuevo Mundo ni. Casi nuu Biblia riníʼ Reinu stiʼ Dios ca nuuni «ládetu». Ximodo ndiʼ guyuu Reinu stiʼ Dios lade ca binni de dxiqué ne dede lade ca fariseu que yaʼ. Jiobá gulí Jesús para gaca Rey stiʼ Reinu ca. Ne cumu Jesús ngue Rey que la? guyuube lade ca binni que, bisiidibe laacaʼ stale cosa ni chiguni Reinu ca. Ne laaca bíʼnibe stale milagru ni bisihuinni xi chiguni Reinu stiʼ Dios. Zaqué la? Reinu stiʼ Dios guyuu lade ca binni que.

Ne cani maʼ bidúʼyanu ca rudiʼnu cuenta qué rusiidiʼ diʼ Biblia nuu Reinu stiʼ Dios ca ndaaniʼ ladxidóʼ binni, sínuque casi guníʼ cani riguixhená, nácani ti gobiernu ni chiguni chaahuiʼ ca cosa ni nuu ndaaniʼ Guidxilayú (Isaías 9:6, 7; Daniel 2:44).