Ñee ridúʼyanu xcaadxi binni casi ruuyaʼ Jiobá laacabe la?
«Cadi chuʼ dinde irá [ndaa stiʼ cuerpu ca] sínuque gapa saa cani laacani.» (1 COR. 12:25.)
1. Ximodo biʼniʼ sentirluʼ ora guyuuluʼ ndaaniʼ xquidxi Jiobá.
ÑEE rietenaláʼdxinu modo biʼniʼ sentirnu ora bixélenu de guidxilayú malu riʼ ne ora bizulú bidagulisaanenu xquidxi Jiobá la? Zándaca biʼniʼ sentirnu nayecheʼ purtiʼ sicarú modo bidxagalúcabe laanu ne gúcacabe nachaʼhuiʼ ne laanu. ¡Pabiáʼ gadxé laacabe de ca binni ni runi mandar Binidxabaʼ laacaʼ, purtiʼ ca binni ca nadúxhucaʼ, malu laacaʼ ne nisi cadxiichicaʼ! Dxandipeʼ guyuʼnu ti lugar ni zeeda gaca casi ti paraísu, purtiʼ cadi cadíndecabe racá ne nuucabe tobi si (Isa. 48:17, 18; 60:18; 65:25).
2. 1) Xi zándaca gucaa laanu guidúʼyanu xcaadxi binni gadxé modo. 2) Xi naquiiñeʼ gúninu para guchaʼnu modo ridúʼyanu laacabe.
2 Peru ra maʼ zidiʼdiʼ iza la? zándaca maʼ gadxé modo guidúʼyanu ca bíʼchinu ne ca bizánanu. Cumu gulenenu donda la? zándaca guidúʼyanu ra cucheesicaʼ casi ñaca niquiiñenu ti lupa para guidúʼyanu cani, zacá maʼ qué zadúʼyanu ca guenda sicarú ni cusihuínnicaʼ. Pa gúninu zacá la? maʼ qué zadúʼyanu laacabe casi ruuyaʼ Jiobá laacabe. Pa chuʼ dxi guizaacanu zacá la? gúninu stipa pur guuyaʼ chaahuinu laacabe casi ruuyaʼ Jiobá laacabe (Éxo. 33:13).
Ximodo ruuyaʼ Jiobá ca bíʼchinu ne ca bizánanu
3. Xi ruchaagané Biblia ca binni ridagulisaa.
3 Lu 1 Corintios 12:2-26, bichaaga apóstol Pablu ca binni ridagulisaa ni bibí ne espíritu que casi «ti cuerpu [ni] napa stale ndaa». Ti cuerpu la? gadxé gadxé ca ndaa stiʼ. Zacaca nga cada tobi de ca binni ridagulisaa, gadxé gadxé modo laacaʼ ne gadxé gadxé ni randa rúnicaʼ. Neca zacá, riná Jiobá guidxíñacabe laa. Nadxiibe ne rusisácabe cada tobi de laacaʼ. Nga runi cayabi Pablu cada tobi de ca binni ridagulisaa gapasaacaʼ laacaʼ. Peru nánnanu nagana nga chinándanu conseju ca, jmaruʼ si pa gadxepeʼ laanu de laacabe.
4. Xiñee zándaca naquiiñeʼ guchaʼnu modo ridúʼyanu xcaadxi.
4 Casi maʼ bidúʼyanu ca, zándaca nabé ruuyadxinu ra ruchee si ca bíʼchinu ne ca bizánanu. Ora gúninu zacá casi ora niquiiñenu ti cámara ni ruchiña binni dede gaxha para ganda guidúʼyanu ti ndaa si de laa. Jiobá qué runi zacá, purtiʼ laabe ruuyabe guidubi naca binni casi ora niquiiñebe ti cámara ra rihuinni guidubi ti binni ne cani nuu gaxha de laa. Yanna, laanu la? zándaca guuyadxinu xiixa cosa huiiniʼ ni qué riuuláʼdxinu de tuuxa, peru Jiobá ruuyaʼ guidubi naca binni dede ne ca guenda galán napa. Nga runi, gúninu stipa para gácanu casi Jiobá ne zacá zacanenu gannaxhiisaa ca binni ridagulisaa ne chuʼcaʼ tobi si (Efe. 4:1-3; 5:1, 2).
5. Xiñee cadi jneza guni juzgarnu xcaadxi.
5 Jesús nanna dxichi ruquiinde laanu guininu de stobi purtiʼ nácanu binni ruchee. Ngue runi guniʼbe: «Cadi gudxiiba lu donda ique stobi, ti qué quiba donda ique luʼ» (Mat. 7:1). Lu diidxaʼ griegu ra gucuá Biblia primé la? qué niníʼ si Jesús: «Cadi gudxiiba lu donda ique stobi», sínuque guniʼbe: «Lagusaana de gudxiibatu donda ique stobi». Guniʼbe zacá purtiʼ nánnabe nabé riníʼ cani cucaadiaga laabe que binni. Ñee zacá laanu la? Pa zacá laanu la? naquiiñeʼ gúninu stipa pur guchaʼnu modo nácanu ne zacá qué zudxiibacabe donda íquenu o qué zaca juzgarnu. Dxandíʼ, guirutiʼ nácanu para guni juzgarnu tuuxa ni gulí Jiobá o para guininu cadi naquiiñeʼ diʼ chuʼbe lade ca binni ridagulisaa. Zándaca nuu xiixa ni qué randa runi ti bíʼchinu, peru pa cudii Jiobá lugar nuube ndaaniʼ xquidxi la? qué gápanu xi pur gucáʼnanu laabe (Juan 6:44). Ñee qué runi crenu pa Jiobá nga cayuuyaʼ ximodo cayuni xquidxi dxiiñaʼ, ne pa caquiiñeʼ guni chaahuibe xiixa zúnibe ni ora naquiiñeʼ gúnibe ni la? (Biindaʼ Romanos 14:1-4.)
6. Xi ruuyaʼ Jiobá de ca xpinni.
6 Jiobá nanna dxichi pabiáʼ maʼ caniisi cada tobi de laanu ndaaniʼ xquídxibe. Ne dede randa ruuyabe xi zanda guni ca xpínnibe ora maʼ guibánicaʼ lu guidxilayú cubi stibe sin donda. Nga runi, gastiʼ razón para guuyadxísibe ra cucheʼnu. Sicaríʼ cá lu Salmo 103:12: «Biaʼ zitu nuu de ra rindani gubidxa ne dede ra riaazini la? biáʼcaca zitu riguíxhebe ca stóndanu de laanu». ¡Guizáʼ rudiʼnu xquíxepeʼ Jiobá pur ni runi ca! (Sal. 130:3.)
7. Xi rizíʼdinu de ejemplu stiʼ Jiobá pur modo biiyabe David.
7 Lu Biblia rihuinni dxichi pabiáʼ sicarú modo naca Jiobá purtiʼ ruuyadxí ca guenda ni galán si napa binni. Guidúʼyanu ximodo guniʼbe de David: «Siervu stinneʼ, ni yenanda ca mandamientu stinneʼ ne beeda nanda naa de guidubi ladxidoʼ, ne bíʼnibe ni jneza si neza luaʼ» (1 Rey. 14:8). Nánnanu bichee David chupa chonna biaje. Peru Jiobá biiyaʼ nayá ladxidoʼbe ne biiyadxí ra bíʼnisibe jneza (1 Cró. 29:17).
Guidúʼyanu ca bíʼchinu ne ca bizánanu modo ruuyaʼ Jiobá laacaʼ
8, 9. 1) Xi tobi de ca cosa ni runi Jiobá zanda gúninu. 2) Xi ejemplu zanda guininu, ne xi rusiidini laanu.
8 Jiobá zanda ganna xi nuu ndaaniʼ ladxidóʼ binni, peru laanu coʼ. Ne nga nga ti razón ni nápanu para cadi guni juzgarnu tuuxa. Laanu qué gánnadinu xi nuu ndaaniʼ ladxidóʼ tuuxa. Nga runi, naquiiñeʼ gúninu stipa pur gácanu casi Jiobá ne cadi guuyadxinu ra cuchee si tuuxa, purtiʼ chaahuiʼ chaahuiʼ zuchaabe. Ñee cadi galán nga gúninu zacá la? Pa gúninu zacá la? zacanenu stálepeʼ para cadi chuʼdinde ca bíʼchinu ne ca bizánanu (Efe. 4:23, 24).
9 Guidúʼyanu ti ejemplu. Guiníʼ íquenu ti yoo yuxe ni maʼ cayaba tubu ra riete nisa stiʼ, maʼ gulaa ca ventana stiʼ ne ridxuuniʼ ique. Stale binni ora biiyaʼ ni la? guniʼcaʼ jma galán nibiani purtiʼ guizáʼ feu modo rihuínnini. Peru despué beeda stobi ne maʼ gadxé modo guníʼ. Ngue qué ñuuyadxí si modo rihuínnini, sínuque biiyaʼ naguídxiruʼ nuuni, ngue runi guníʼ zanda gaca chaahuiʼ yoo que. Laabe guziʼbe ni ne bíʼnibe stale dxiiñaʼ para biʼniʼ chaahuibe ra guca feuni ti guihuínnini galán. Despué maʼ guníʼ ca binni ni ridiʼdiʼ neza ra nuuni que pabiáʼ sicarú rihuínnini. Ñee zanda gácanu casi binni ni biʼniʼ stipa para biʼniʼ chaahuiʼ yoo que la? Lugar de guidúʼyanu ra cuchee xcaadxi, ñee cadi jma jneza guidúʼyanu ca guenda sicarú ni nápacabe ne pabiáʼ caniisicabe ndaaniʼ xquidxi Dios la? Ra gúninu zacá la? zannaxhiinu laacabe pa guidúʼyanu ca guenda sicarú ni nápacabe cásica runi Jiobá (biindaʼ Hebreos 6:10).
10. Ximodo racané conseju ni cá lu Filipenses 2:3, 4 ca laanu.
10 Apóstol Pablu bidii ti conseju ca xpinni Cristu de Filipo ni zacané chuʼ ca binni ridagulisaa galán. Sicaríʼ gúdxibe laacaʼ: «Cadi guni tu xiixa para si tidi tu lú stobi, nin para chuʼ tu udxiiba laatu, sínuque cada tobi gaca nadóʼ ne usisaca stobi, ne cadi laca laa. Cadi sti si tu ma cá ique tu, sínuque laucaa ique ni caquiiñe stobi» (Fili. 2:3, 4). Ora qué rudxíʼbanu laanu la? racané nga laanu para guiníʼ íquenu jneza de ca bíʼchinu ne ca bizánanu. Pa guizaaláʼdxinu laacabe ne guidúʼyanu ca guenda sicarú ni nápacabe la? qué zaca nagana para laanu guidúʼyanu laacabe casi ruuyaʼ Jiobá laacabe.
11. Xi huayaca lade stale de ca neza binni ridagulisaa.
11 Guiráʼ cani cazaaca lu guidubi naca Guidxilayú riʼ cucaacani stale binni chindeza sti guidxi. Nga runi nuu guidxi ra nabeza stale binni de sti ladu. Ne stale de ca binni ca racaláʼdxicaʼ guiziidicaʼ de Stiidxaʼ Dios ne maʼ cayuni adorarnécabe laanu Jiobá. Laacabe nga ca «binni de irá ladu, de irá guidxi, [ne] ni riníʼ adxé adxé idioma» (Apo. 7:9). Nga runi, nuu binni de guiráʼ ladu lade stale neza binni ridagulisaa.
12. Ximodo naquiiñeʼ guidúʼyanu guiráʼ ca bíʼchinu ne ca bizánanu, ne xiñee nuu tiru nagana raca para laanu guiénenu laacabe.
12 Nga runi, zándaca caquiiñeʼ gúninu stipa pur guiníʼ íquenu jneza de ca bíʼchinu ne ca bizánanu ni ridagulisaanenu. Cadi gusiaandanu conseju ra na apóstol Pedru «ganaxhii [n]u hermanu sti[n]u» ne «ganaxhii saa[nu] de idubi ladxidóʼ [n]o» (1 Ped. 1:22). Peru, zándaca gaca nagana para laanu gannaxhiinu de guidubi ladxidoʼno ca bíʼchinu ne ca bizánanu ni zeedacaʼ de gadxé gadxé guidxi, purtiʼ gadxé costumbre nápanu, de gadxé raza laanu, o purtiʼ nuu de laanu nabé biindaʼ o qué ñuundapeʼ ne laaca nuu de laanu pobre o ricu. Ñee raca nagana para laanu guiénenu xiñee maʼ gadxé modo riníʼ íquecabe o xiñee maʼ gadxé si modo ruuyacabe xiixa ni rininu o ni rúninu la? Zándaca laaca zacaca riuucabe. Tutiica nácanu, guiranu nga naquiiñeʼ gúninu ni na ca diidxaʼ riʼ: «Laganaxhii irá ca hermanu» (1 Ped. 2:17).
13. Xiñee zándaca naquiiñeʼ guchaʼnu modo riníʼ íquenu de xcaadxi binni.
13 Zándaca naquiiñeʼ guchaʼnu modo riníʼ íquenu de ca bíʼchinu ne ca bizánanu para gannaxhiinu laacaʼ jma (biindaʼ 2 Corintios 6:12, 13). Nuu tu riníʼ: «Cadi purtiʼ cayuneʼ juzgar laacabe, peru...», de raqué maʼ guzeetecaʼ xiixa ni runi xcaadxi binni de sti raza, purtiʼ si cadi jneza ni para laacaʼ. Ñee huayúninu zacá la? Pa zacá laanu la? cusihuínninu caʼruʼ gusaananu de guni juzgarnu binni ante gunibiaʼnu laa. Galán guiníʼ íquenu ndiʼ: «Ñee runeʼ stipa pur gunebiaayaʼ chaahueʼ binni ni napa gadxé costumbre la?» Pa guiníʼ ique chaahuinu ximodo laanu la? zándaca qué zaca nagana para laanu gannaxhiinu binni ni napa gadxé gadxé costumbre.
14, 15. 1) Guníʼ ejemplu stiʼ ca binni ni bichaacaʼ modo laacaʼ. 2) Ximodo zanda gúninu casi bíʼnicabe.
14 Lu Biblia zeeda ejemplu stiʼ caadxi binni ni bichaacaʼ modo guníʼ íquecaʼ. Tobi de laacabe nga apóstol Pedru. Cumu judíu laabe la? de laasibe qué nuyúbidibe ñuube ralidxi tuuxa ni cadi judíu. Guiníʼ íquenu xi biʼniʼ sentirbe ora gúdxicabe laabe chebe ralidxi Corneliu, ti hombre ni cadi judíu ne qué ñaca circuncidar. Peru bichaa Pedru modo riníʼ ique ora gunna racalaʼdxiʼ Dios chuʼ ca binni de xcaadxi guidxi lade ca xpinni Cristu (Hech. 10:9-35). Saulo, ni beeda gaca apóstol Pablu que, gupa xidé bichaa modo laa ne bisaana de guni juzgar sti binni ante gunibiáʼ laacabe. Laabe guniʼbe gucananaláʼdxibe ca xpinni Cristu dxiqué dede guzanándabe laacaʼ ne gucaláʼdxibe nunitilube laacaʼ. Peru ora gudxi Jesús laabe cadi jneza ni cayúnibe la? oraqueca bichaabe ne bíʼnibe ni guníʼ cani guzanándabe dxiqué (Gál. 1:13-20).
15 Maʼ bidúʼyanu zanda guchaʼnu ora gacané espíritu stiʼ Jiobá laanu. Nga runi, pa guidúʼyanu caʼruʼ gusaananu de guni juzgarnu binni la? naquiiñeʼ gúninu stipa pur gusaananu de gácanu zacá ti ganda gacané espíritu stiʼ Dios laanu chuʼnu tobi si (Efe. 4:3-6). Biblia cudii conseju riʼ laanu: «Jma naquiiñe ganaxhii saa tu, purti zacá zaca pe tu tobi si» (Col. 3:14).
Gácanu casi Jiobá ora gucheechenu diidxaʼ
16. Xi racalaʼdxiʼ Jiobá guni binni.
16 Sicaríʼ bicaa Pablu: «Nezalú [Dios] biaʼca risaca irá binni» (Rom. 2:11). Ni racalaʼdxiʼ Jiobá nga guni adorar binni de guiráʼ guidxi laa (biindaʼ 1 Timoteo 2:3, 4). Nga runi gudíxhebe guireeche ca diidxaʼ nacubi ne galán ca ra nuu ca «binni de irá ladu, de irá guidxi, [ne] ni riníʼ adxé adxé idioma» (Apo. 14:6). Jesús laacaʼ guníʼ: «Layú que nga guidxilayú» (Mat. 13:38). Xi naquiiñeʼ gúniluʼ ne binnilídxiluʼ para gaca ni na ca diidxaʼ ca yaʼ.
17. Ximodo zanda gacanenu guiráʼ clase binni.
17 Cadi guirádinu zanda cheʼ sti guidxi zitu para chigucheecheʼ stiidxaʼ Reinu. Peru zanda gusíʼdinu ni ca binni de sti guidxi ni nabeza ladu rucheechenu diidxaʼ. Ñee rinínenu guiráʼ binni de Stiidxaʼ Dios ratiica chuunu, lugar de guinínenu ca binni si ni nuu ra maca rucheechenu diidxaʼ la? Xiñee qué quixhe íquenu chuunu ra nuu ca binni ni nuu ra huaxiéʼ rucheechenu diidxaʼ yaʼ (Rom. 15:20, 21).
18. Ximodo biluíʼ Jesús racalaʼdxiʼ gacané binni.
18 De ladxidóʼ Jesús biale gacané guiráʼ binni, nga runi cadi ti lugar si bicheechebe diidxaʼ. Tobi de ca historia ni zeeda lu Biblia na guyé Jesús «irá guidxi roʼ ne irá guidxi huiiniʼ». Ne «ora biʼya be irá ca binni que la? biá be laacaʼ» ne guniʼbe caquiiñeʼ gacanebe laacaʼ (Mat. 9:35-37).
19, 20. Ximodo zanda gusihuínninu rizaaláʼdxinu guiráʼ clase binni cásica runi Jiobá ne Jesús ni.
19 Ximodo zanda gúninu casi biʼniʼ Jesús yaʼ. Nuu de cani rucheeche diidxaʼ maʼ gudixhe íquecaʼ chigacanecaʼ ra huaxiéʼ rireeche diidxaʼ, casi ra nuu stale negocio, ra parque ra ribézacabe carru o ra nuu ca yoo roʼ ra rinábacabe permisu para chúʼcabe. Xcaadxi cayuni stipa pur guiziidiʼ sti diidxaʼ ni riníʼ ca binni ni nacubi yendeza ladu rucheechecaʼ diidxaʼ o ra nuu cani huaxieʼ rigánnacabe laacaʼ. Neca ugapadiúxisinu ca binni ca lu diidxaʼ ni riniʼcaʼ la? zusihuinni nga pabiáʼ rizaaláʼdxinu laacabe. Dxandíʼ nga cadi guirádinu zanda guizíʼdinu sti diidxaʼ, peru zanda cuʼnu gana cani cayuni ni. Ni cadi liica naquiiñeʼ gúninu nga cueenu gana laacabe o guininu xiñeepeʼ nuucabe gucheechecabe diidxaʼ ra nuu ca binni de sti guidxi. Para Jiobá risaca xquendanabani ca binni ca, ne laanu laaca naquiiñeʼ guidúʼyanu ni zacaca (Col. 3:10, 11).
20 Pa laanu ridúʼyanu binni casi ruuyaʼ Jiobá laacabe la? zanínenu laacabe de stiidxaʼ Dios neca gadxé modo nabánicaʼ. Zanínenu laacabe neca qué gápacabe lídxicabe, neca qué chuuláʼdxinu modo rihuínnicabe o neca cadi jneza cani rúnicabe. Ne cadi purtiʼ chuʼ tu guni feu laanu guininu guiráʼ ca binni xquídxibe o raza stibe zacá laacaʼ. Casi Pablu la? guyuu tu biʼniʼ feu laabe, peru cadi pur nga nusaanabe de niníʼnebe xcaadxi binni xquídxicaʼ de stiidxaʼ Dios (Hech. 14:5-7, 19-22). Laabe gúnnabe ziuu binni ni ziuulaʼdxiʼ gucaadiaga Stiidxaʼ Dios.
21. Xi ribeendunu ora ridúʼyanu xcaadxi binni casi ruuyaʼ Jiobá laacaʼ.
21 Yanna maʼ nánnanu naquiiñeʼ guidúʼyanu guiráʼ ca bíʼchinu ne ca bizánanu casi ruuyaʼ Jiobá laacaʼ neca de gadxé gadxé guidxi laacaʼ. Ra jma gúninu stipa para gácanu casi Jiobá la? jma zacanenu para cadi chuʼdinde guiráʼ ca binni ridagulisaa ne zacá chuʼcaʼ tobi si. Laaca zacá nga naquiiñeʼ guidúʼyanu ca binni ni nuu ra rucheechenu diidxaʼ. Ne zacá jma zanda gacanenu laacabe gannaxhiicabe Jiobá, purtiʼ «biaʼca risaca irá binni» nezalú ne qué runi jma pur stobi. Laabe rizaaláʼdxibe guiráʼ binni, purtiʼ laabe bizaʼbe guiracaʼ (Job 34:19).
Xi nicábiluʼ
• Ximodo zuluinu maʼ cadi jneza modo ridúʼyanu ca bíʼchinu ne ca bizánanu.
• Xi zanda gúninu para guidúʼyanu ca bíʼchinu ne ca bizánanu casi ruuyaʼ Jiobá laacaʼ.
• Ximodo naquiiñeʼ guidúʼyanu ca bíʼchinu ne ca bizánanu ni zeedacaʼ de gadxé gadxé guidxi.
• Xi naquiiñeʼ gúninu para guidúʼyanu ca binni ni nabeza ra rucheechenu diidxaʼ casi ruuyaʼ Jiobá laacaʼ.
[Dibuju/foto ni zeeda lu yaza 26]
Ximodo zanda gunibiáʼ chaahuinu ca binni de sti guidxi
[Ca dibuju/foto ni zeeda lu yaza 28]
Xi zanda gúninu para ganda guinínenu jma binni de stiidxaʼ Dios