Bidxiña Dios
Laabe nánnabe xi runi sentirnu ora riuubaʼ ladxidoʼno
GALÁN nga guni sentirnu ximodo nuu binni ora cayuubaʼ ladxidóʼ. Jiobá nga Dios ni jma nanna xi runi sentir binni ora nuu zacá. Laabe riuubaʼ ladxidoʼbe pur ca yuubaʼ ridiʼdiʼ xquídxibe. Ximodo nánnanu zacá ni yaʼ. Bihuinni dxichi pabiáʼ nanna Jiobá xi runi sentir binni pur cani biʼniʼ Jesús dxi guyuu ndaaniʼ Guidxilayú riʼ (Juan 5:19). Guidúʼyanu ti ejemplu ni cá lu Juan 11:33-35.
Dxi guti Lázaro la? guyé Jesús xquídxibe purtiʼ nabé xhamigu laabe. Cumu bizaʼnaʼ Marta ne María ngue guti la? nga runi, nabé biuubaʼ ladxidóʼcabe. Cumu nabé gunnaxhii Jesús laacabe stálepeʼ la? guidúʼyanu xi bíʼnibe ora biiyabe nuu familia que zaqué (Juan 11:5). Biblia na: «Ora biʼya Jesús cayuuna [María], laabe ne ca judíu zinanda laabe que, uyuu yuuba ladxidóʼ dede uca diti, ne na: Paraa gudixhe tu Lázaro. Chuu, guʼyuʼ, Señor, na cabe. Biina Jesús óraque» (Juan 11:33-35). Xiñee biinaʼ Jesús pue. Dxandíʼ nga guti Lázaro, xhamígube ni nadxiibe que, peru laabe zandísabe laa para guibani sti biaje (Juan 11:41-44). Ñee nuuruʼ sti cosa ni bicaa laabe gúʼnabe la?
Guiduʼyaʼ chaahuinu xi guca raqué. Ca versículo ca cuzeetecaʼ «uyuu yuuba ladxidóʼ [Jesús] dede uca diti» ora biiyaʼ cayuunaʼ María ne xcaadxi binni que. Lu diidxaʼ gucuá Biblia ca primé la? ca diidxaʼ ca riníʼcani biuubaʼ ladxidoʼbe stálepeʼ pur ni biiyabe. Ne pur naná nuu ladxidoʼbe nga biinabe óraque.a Nga rusihuinni runi sentir Jesús yuubaʼ ni nuu ndaaniʼ ladxidóʼ xcaadxi binni. Ñee huayuu dxi gúʼnaluʼ ora gúʼyaluʼ cayuunaʼ tuuxa ni nadxiiluʼ la? (Romanos 12:15.)
Ra bihuinni runi sentir Jesús pabiáʼ naná nga yuubaʼ rapa binni la? racaneni laanu guiénenu ca guenda stiʼ Bixhózebe, Jiobá, ne xi runi ora guʼyaʼ cayacaná binni. Jesús bisihuinni ca guenda stiʼ Bixhoze jnézapeʼ, ngue runi gunda guniʼbe: «Ni ma biiya naa la? ma biiya Bixhozeʼ» (Juan 14:9). Nga runi, ora ridúʼndanu ra na «biinaʼ Jesús» la? nánnanu laaca riuubaʼ ladxidóʼ Jiobá ora guʼyaʼ cayuubaʼ ladxidóʼ ca xpinni. Xcaadxi hombre bicaa Biblia laaca ruzeetecaʼ de laani (Isaías 63:9; Zacarías 2:8). ¡Guizáʼ nadxii Jiobá binni!
Laanu riuuláʼdxinu chuʼnu gaxha de ca binni ni naca zacá. Ora maʼ nuunu triste ne ora guiníʼ íquenu qué rulábicabe laanu, riuuláʼdxinu chuʼnu gaxha de ca binni ni nanna modo nuunu ne riuubaʼ ladxidóʼ pur ni cazaacanu. Nga runi, jmaruʼ si riuuláʼdxinu chuʼnu gaxha de Jiobá, purtiʼ laabe nga ti Dios ni riá laanu ne nanna pabiáʼ naná yuubaʼ stinu, ne laasibe nga jma riénebe xiñee rúʼnanu (Salmo 56:8).
[Cani cá ñee yaza]
a Diidxaʼ griegu ni biquiiñeʼ para guiníʼcabe ora biinaʼ Jesús la? riniʼni «biinabe chaahuidugá», peru diidxaʼ biquiiñeʼ para guiníʼcabe modo biinaʼ María ne xcaadxi binni que, zándaca riniʼni «bicaacabe ridxi ora cayuunacabe, biinacabe reciu».