Gucané xiiñiluʼ guni huantar yuubaʼ ca

ND AANIʼ ti libreriá ra dxaʼ stale binni, biree ti gunaa cadxiichi purtiʼ qué nidxela ni canayubi ne bicaabe ridxi gunaa ni cutoo raqué, rábibe laa: «¡Qué guiráʼ guidxagayaa ndiʼ, dxaʼ libru ndaaniʼ tienda riʼ ne qué nidxelaʼ nin tobi ni gacané xiiñeʼ!». Gunaa riʼ cuyubi xiixa ni gacané xiiñiʼ guni huantar yuubaʼ biaanané pur guti ti binnilidxi.

Napa gunaa riʼ stale razón chuʼ xizaa. Xiñee yaʼ. Purtiʼ nabé nagana raca para ti baʼduhuiiniʼ guiene maʼ guti ti binnilidxi ni nadxii. Ca baʼduhuiiniʼ ca riéchecaʼ ora gúʼyacaʼ nápacaʼ binnilídxicaʼ para gapa laacaʼ, peru ora gati tuuxa ni nabé nadxiicabe la? nabé triste riuucabe. Yanna, ximodo zanda gacaneluʼ xiiñiluʼ ora maʼ guti tuuxa binnilídxitu o mayaca gati yaʼ.

Dxandíʼ, ora maʼ guti ti binnilídxiluʼ la? laaca ziuuluʼ triste ne ziuuluʼ xizaa, nga runi zuyúbiluʼ ximodo gudxiiluluʼ yuubaʼ stiluʼ. Peru cadi guiaandaʼ lii laaca caquiiñeʼ gacaneluʼ xiiñiluʼ. Ti yoo ni nuu Minnesota (Estados unidos), ra rápacabe ca baʼduhuiiniʼ ni qué gapa bixhoze, riguiiziʼ ti libru ni na sicaríʼ: «Ca baʼduhuiiniʼ ca runadiágacaʼ caadxi de ni riníʼ binni ora gati tuuxa, ne pa qué gusiene binni laacabe xi caniʼcaʼ la? zándaca maʼ gadxé modo guiénecabe ni». Laaca caniʼruʼ libru ca sicaríʼ: «Caquiiñecabe gabi binni laacabe xipeʼ nga cazaaca». Nga runi, zándaca caquiiñeʼ gusiene binni laacabe xii nga cazaaca, peru guyubi ximodo guiníʼ para guiénecabe ni. Nagana nga para gaca ni guninu ca, purtiʼ cadi guiráʼ diʼ baʼduhuiiniʼ nga nagueenda ziene ni cayábicabe laa (1 Corintios 13:11).

Ximodo gusiénenu laacabe xii nga guendaguti

Caadxi binni ni biindaʼ de laani nacaʼ cadi galán diʼ gábicabe ca baʼduhuiiniʼ ca «nisiaasiʼ» si ti tuuxa ni maʼ guti o «maʼ zebe». Pa qué gusiénecabe laabe xi caníʼcabe la? zándaca guchéndani laabe. Dxandíʼ nga guníʼ Jesús zeeda gaca guendaguti ca casi ti bacaandaʼ, peru bietenalaʼdxiʼ, cadi baʼduhuiiniʼ diʼ ngue caníʼnebe óraque. Ne Jesús bisiene xipeʼ ngue caníʼ. Primé la? gúdxibe ca apóstol stibe: «Nisiaasi Lázaro xhamigu nu». Neca maʼ huaniisicaʼ «zácaxa ca cuzeete be [dxandíʼ] nisiaasi si Lázaro». Ngue runi bisiene Jesús ni guníʼ ora gudxi laacabe: «Ma guti Lázaro» (Juan 11:11-14). Guníʼ ique ndiʼ: pa ca binni huaniisi ca nuu tiru caquiiñepeʼ gusiénecabe laacaʼ xiixa, ñee raʼbuʼ cadi jma caquiiñeʼ gusiénecabe ni ca baʼduhuiiniʼ ca la?

Sicaríʼ bicaa Mary Ann Emswiler ne James P. Emswiler: «Zándaca ora maʼ cusiene jñaa ti baʼduhuiiniʼ laa xii nga guendaguti la? qué zaná guiníʼ xipeʼ nga laani. Peru ora gúnibe zacá zándaca gucaabe xiiñibe guiníʼ ique xiixa ni guchibi laa o ni guniná laa». Casi pa gábicabe laabe nisiaasiʼ si ti binnilídxicabe ni maʼ guti la? zándaca guidxíbibe gásibe pur guiníʼ íquebe cadi málasi qué guibánibe. O pa gábicabe laabe «maʼ zeʼ» binni ni maʼ guti ca la? zándaca guiníʼ íquebe bisaana binni ca laabe purtiʼ maʼ qué racalaʼdxiʼ laabe.

Stale binni huayuuyaʼ jma riene xiiñiʼ ora guiniʼné laacabe modo guiénecabe ne gabi laacabe ni dxandíʼ, purtiʼ ora guiníʼ xiixa ni qué gánnacabe la? zándaca gadxé modo guiénecabe ni (1 Corintios 14:9). Ca binni ni biindaʼ ca nacaʼ jma galán gábiluʼ xiiñiluʼ guinabadiidxaʼ lii xiixa ni cadi cayene ne gabi lii xi riguu xizaa laa. Pa güitu diidxaʼ zacá gatigá la? zudiini lugar lii gusiéneluʼ laabe xiixa ni cadi jneza caníʼ íquebe ne maʼ zuuyaluʼ pa nuu sti modo gacaneluʼ laabe.

Ni zanda gabi laanu xi gúninu

Biaʼ tiempu chuʼ xiiñiluʼ triste la? zuyúbibe lii para gacaneluʼ laabe ne gusiéneluʼ xiixa ni nuube gánnabe. Yanna, paraa zanda guidxélaluʼ xiixa ni gusiene lii de guendaguti, ni zanda guni creluʼ yaʼ. Stale binni huayuuyaʼ naca Biblia ti libru ni zanda guni cré, ni riguixhedxí ladxidoʼcaʼ ne ni rabi laacaʼ zanda gaca chaahuiʼ ni cayácacaʼ. Cayábini laanu xiñee rati binni, ximodo nuu ca gueʼtuʼ ca ne xi chiguni Dios pur laacabe despué. Laaca cusiidini «qué liica gánnacabe gastiʼ», ora ganna xiiñiluʼ nga zacaneni laabe guiénebe cadi cayacaná diʼ tuuxa binnilídxibe ni maʼ guti (Eclesiastés 9:5). Ne Dios cayabi laanu lu Stiidxaʼ, Biblia, zabiguetaʼ zadúʼyanu ca binnilídxinu ni maʼ guti ndaaniʼ ti paraísu lu Guidxilayú riʼ (Juan 5:28, 29).

Pa iquiiñeluʼ Stiidxaʼ Dios la? zaziidiʼ xiiñiluʼ nuuni para gacaneni laabe ora tiidibe lu ti guendanagana ne zaguixhedxini ladxidoʼbe ora chuʼbe triste. Ne laaca zuuyabe ruyúbiluʼ conseju lu Stiidxaʼ Dios ora caquiiñeʼ quixhe íqueluʼ gúniluʼ xiixa cosa risaca lu xquendanabániluʼ (Proverbios 22:6; 2 Timoteo 3:15).

Zándaca guinabadiidxaluʼ laca lii...

Ora maʼ cayacaneluʼ xiiñiluʼ guni huantar yuubaʼ cadiʼdiʼ la? zándaca nuu tiru qué zadxélaluʼ xi gúniluʼ. Guidúʼyanu caadxi cosa ni zándaca guinabadiidxaluʼ.a

• Ñee galán gucueeza naa para cadi guunaʼ nezalú xiiñeʼ la? Galán nga chuuláʼdxiluʼ gacaneluʼ xiiñiluʼ, peru ñee riníʼ íqueluʼ cadi jneza nga gúʼyabe lii cayuunaluʼ la? Stale binni riníʼ jma jneza nga gusihuinni cayuubaʼ ladxidóʼ, purtiʼ zacá ziene xiiñicabe gasti nacaʼ nga chuʼ binni zacá. Nuu tu huaniʼné xiiñiʼ de caadxi hombre ne gunaa ni ruzeeteʼ Biblia ne ximodo bisihuínnicaʼ ni biʼniʼ sentircaʼ. Casi ra cuzeeteni ora «biina Jesús» pur guti xhamígube Lázaro (Juan 11:35). Laabe qué nucaachidibe ni biʼniʼ sentirbe.

• Ñee naquiiñeʼ cheʼ xiiñeʼ ra pantión, o ra gaca ti mixaʼ stiʼ gueʼtuʼ ca la? Pa gudiicabe lugar chebe la? galán gábicabe laabe xi chigaca racá ne xiñee rúnicabe ni. Nuu tiru bixhoze binni ne jñaa zándaca guiníʼ íquecaʼ qué zanda diʼ cheʼ xiiñicaʼ ca lugar ca para gúʼyacaʼ guiráʼ ni gaca racá. Ca hombrehuiiniʼ ne ca dxaapahuiiniʼ ni rié ora gati tuuxa testigu stiʼ Jiobá la? nabé galán riuucabe ora gunadiágacabe libana ni rudiicabe raqué ni zeeda de lu Biblia, purtiʼ riziidicabe luni. Ne ora gúʼyacabe pabiáʼ nadxiisaa ca binni rié raqué la? riguixhedxini ladxidóʼcabe, neca nahuiinicabe (Romanos 12:10, 15; Juan 13:34, 35).

• Ñee naquiiñeʼ guinieniáʼ xiiñeʼ de binnilídxidu ni guti ca la? Caadxi binni ni biindaʼ de tema riʼ nacaʼ pa qué liica guiniʼluʼ de laani la? zándaca guiníʼ ique xiiñiluʼ cucaachiluʼ xiixa de gueʼtuʼ ca o nuuluʼ gusiaandacabe laabe. Ti gunaa láʼ Julia Rathkey, ni biindaʼ de tema riʼ guníʼ sicaríʼ: «Galán nga gabi binni xiiñiʼ zanda guietenalaʼdxiʼ de binnilídxicabe ni guti ca ne cadi guidxíbibe ora gúnibe ni». Galán zaca para ca baʼduhuiiniʼ ca guiníʼcabe de binni ni maʼ guti ca, zanda guzeetecabe ca cosa galán ni bíʼnibe ne modo gúcabe. Ne casi runi stale testigu stiʼ Jiobá ni napa xiiñiʼ, zanda gabi binni laacabe ziuu ti dxi ziásacabe lade ca gueʼtuʼ ca ti guibánicabe ndaaniʼ ti paraísu lu Guidxilayú riʼ, racá maʼ qué ziuu guendahuará nin guendaguti (Apocalipsis 21:4).

• Ximodo zanda gacaniáʼ xiiñeʼ para chuʼ galán. Ca dxi chuʼ xiiñiluʼ triste pur guti ti binnilídxitu ca la? zándaca gaca nagana para laabe gásibe o dede gaca huarabe. Cumu runi sentirbe qué zanda gúnibe gastiʼ la? zándaca guchiichi nga laabe o guni nga nuu tiru qué zadxélabe xi gúnibe. Cadi guidxagayaaluʼ pa guni sentir xiiñiluʼ napa donda pur ni guca ca, pa quiidxibe lii jma nadipaʼ que dxiqué o guidxíbibe ora chuʼluʼ yoo maʼ huadxí ne ora gaca huaraluʼ. Xi zanda gaca ora guizaaca ndiʼ yaʼ. Xiiñiluʼ caquiiñeʼ ganna cudiiluʼ cuenta de ni cayaca, nga runi biʼniʼ stipa gusihuínniluʼ cayéneluʼ modo runi sentirbe ne biiyaʼ xi gúnibe. Cadi guiníʼ íqueluʼ qué runi sentirbe yuubaʼ pur guti binni ca ne cadi tindeneluʼ laabe pa guʼyuʼ gúnibe xiixa ni rábiluʼ cadi jneza. Gudixhedxí ladxidoʼbe; gudxi laabe zanda guinabadiidxabe lii xiixa ni caníʼ íquebe ne guiniʼbe de laani. Ne zanda gacaneluʼ laabe guni crebe zadxiña dxi zabani ca gueʼtuʼ ca, lii laaca zanda guni creluʼ ora gúʼndaluʼ Biblia, «ti pur laani gata dxí ladxidóʼ [l]o» (Romanos 15:4).

• Padxí maʼ zanda gúnidu ca dxiiñahuiiniʼ ni maca runinedu ca binnilídxidu. Ca binni ni biindaʼ de tema riʼ nacaʼ zanda gúnicabe guiráʼ ni maʼ biaacabe, pa gúʼyacabe zanda, purtiʼ nabé racanécani para gusiaandaʼ binni yuubaʼ cadiʼdiʼ. Ni runi stale testigu stiʼ Jiobá ni napa xiiñiʼ nga ruundacaʼ Biblia ne binnilídxicaʼ ne riecaʼ ca guendaridagulisaa ni rápacaʼ. Ora rúnicabe ca nga la? ruuyacabe racaneni laacabe chúʼcabe naguidxi ne rudiini stipa laacabe para guni huantárcabe (Deuteronomio 6:4-9; Hebreos 10:24, 25).

Cumu caʼruʼ cuee Jiobá guendahuará ne guendaguti la? ziuu ora zuni sentir ca hombrehuiiniʼ ne ca dxaapahuiiniʼ triste ora gati ti binnilídxicaʼ (Isaías 25:8). Peru pa cuʼluʼ gana laacabe ne gacaneluʼ laacabe la? zanda guni huantárcabe yuubaʼ ca.

[Cani cá ñee yaza]

[Ni caníʼ yaza 19]

Gudxi laabe zanda guinabadiidxabe lii xiixa ne gábibe lii xi guiráʼ nga riguu xizaa laabe

[Dibuju/foto ni zeeda lu yaza 20]

Cadi gusaanatu de gúnitu ca cosa ni maʼ biaatu gúnitu, casi gúʼndatu Biblia ne binnilídxitu