Guyúbinu gunibiáʼ chaahuinu Dios «ne stale gana»
GUIRANU, casi xpinni Cristu racaláʼdxinu chuulaʼdxiʼ Jiobá modo runi adorarnu laa. Nga runi, ruyúbinu modo gaca fe stinu jma naguidxi ne gúninu xhiiñaʼ Jiobá ne stale gana. Apóstol Pablu cayabi laanu cadi gácanu casi ca judíu ni guyuu dxi bibánibe que, sicaríʼ guniʼbe: «Rucaa ique cabe guni cabe ni na Dios, peru cuchee cabe modo na cabe guni cabe ni» (Rom. 10:2). Pur ni na textu ca ridúʼyanu naquiiñeʼ gunibiaʼnu Dios ne gánnanu ximodo guni adorarnu laabe para gápanu fe, ne cadi purtiʼ si cá íquenu gúninu ni.
Lu sti carta bicaa Pablu guníʼ ora guiziidiʼ binni de Dios ranna xi naquiiñeʼ guni. Lu ti oración biʼniʼ Pablu gunabaʼ Dios gacané ca xpinni Cristu gunibiáʼ chaahuicaʼ laabe ti zacá «ganda sa[caʼ] modo naquiiñe sa ca xpinni [Jiobá] ne guni[caʼ] ni jma chuʼlaʼdxi[be]. Zacá zaree ndu xpida[caʼ], ne jma ziyunibiáʼ chaahui[caʼ] Dios» (Col. 1:9, 10). Yanna, xiñee naquiiñeʼ gunibiáʼ chaahuinu Dios yaʼ. Ne xiñee naquiiñeʼ guyúbinu gúninu ni guiráʼ dxi yaʼ.
Ni racané chuʼ fe stinu naguidxi
Ora guizíʼdinu de Dios ne xii nga nabe gúninu casi cá lu Biblia la? riguidxi fe stinu. Pa qué gúninu ca nga la? zeeda gaca fe stinu casi ti yaga ni cadi gueteʼ nuu xcu ne nagueendaca zanda guiaba. Pablu cayabi laanu iquiiñenu cani maʼ bizíʼdinu para gúninu xhiiñaʼ Dios ne cueenu guiráʼ ni gucuá íquenu dxiqué (Rom. 12:1, 2). Ni zacané laanu para gúninu ni nga guidúʼndanu Biblia guiráʼ dxi.
Ewa, ti gunaa ni naca precursora regular guidxi Polonia, guníʼ: «Pa ñaca qué ñuundaʼ Stiidxaʼ Dios guiráʼ dxi la? qué ñanda ñunebiaʼyaʼ chaahueʼ Jiobá. Ne maʼ nusaanaʼ de ñacaʼ ti xpinni Cristu ne nusaanaʼ fe ni napaʼ Dios dede nixeleʼ de laabe». ¡Qué chuʼ dxi guizaacanu nga! Guidúʼyanu ejemplu stiʼ tuuxa ni binibiáʼ chaahuiʼ Jiobá ne pur nga guyuulaʼdxiʼ Jiobá modo biʼniʼ adorarbe laa.
«¡Guizáʼ nadxiee ley stiluʼ!»
Hombre bicaa Salmo 119 ca guníʼ lu ti poesía xi runi sentir pur ca ley stiʼ Dios, pur cani rusietenaláʼdxibe laanu, cani runi mandarbe gúninu, pur ca mandamientu stibe ne ley stibe ni caníʼ modo gaca juzgar binni. Hombre ca bicaa: «Nadxiee ca ley stiluʼ. [...] Nadxiee cani rusietenalaʼdxuʼ naa». Ne despué laaca guniʼbe: «¡Guizáʼ nadxiee ley stiluʼ! Guidubi dxi laani maʼ caníʼ iqueʼ» (Sal. 119:16, 24, 47, 48, 77, 97).
Diidxaʼ «nadxiee» ca ne «caníʼ iqueʼ» ca rusihuínnicani riuulaʼdxiʼ salmista ca guʼndaʼ chaahuiʼ xi riníʼ Stiidxaʼ Dios. Nga runi ca diidxaʼ guniʼbe ca rusihuinni pabiáʼ riuuláʼdxibe gúʼndabe ca ley stiʼ Dios. Peru cadi purtiʼ nga si nga ni riuuláʼdxibe gúnibe, sínuque purtiʼ dxandipeʼ racaláʼdxibe guiénebe ni. Zacá rihuinni guyuube gunibiáʼ chaahuibe Dios ne xi canabaʼ laabe gúnibe.
Rihuinni dxíchica de guidubi ladxidóʼ hombre bicaa salmo ca riuulaʼdxiʼ guʼndaʼ Stiidxaʼ Dios. Yanna galán guiníʼ íqueluʼ: «Ñee laaca zacaca riníʼcabe de naa la? Ñee riuuladxeʼ guundaʼ Biblia guiráʼ dxi ne guieneʼ ni la? Ñee runeʼ stipa pur guundaʼ Biblia ca ne rinabaʼ Jiobá gacané naa guieneʼ ni la?»
Ewa guníʼ: «Runeʼ stipa pur guundaʼ Stiidxaʼ Dios jma jneza. Dede dxi gucuaa folletu Veamos ‘la buena tierraʼ que, riquiiñeʼ ni ora guundaʼ Biblia naa si. Laaca riquiiñeʼ guiropaʼ libru ni láʼ Perspicacia para comprender las Escrituras ne xcaadxi libru ni gacané naa».
Yanna guidúʼyanu ejemplu stiʼ Wojciech ne Małgorzata, ti guendaxheelaʼ ni napa stale dxiiñaʼ para guni tender binnilidxi. Ximodo riguixhe chaahuicabe xhiiñacabe para gúʼndacabe Biblia yaʼ. «Cada tóbidu ribee tiempu para guundaʼ Stiidxaʼ Dios stubi si. Despué ora maʼ guundaniáʼ binnilidxeʼ ne ora guinidu diidxaʼ guiráʼ dxi la? ruzéʼtedu ni guyuuláʼdxidu o ni guluu gana laadu». Ni rúnicabe ca racané laacabe chúʼcabe nayecheʼ ne laaca racaneni laacabe gunibiáʼ chaahuicabe Dios.
Bicaa ique guiziidiluʼ xiixa ora gúʼndaluʼ Stiidxaʼ Dios
Laanu, ca xpinni Cristu, nánnanu ni racalaʼdxiʼ Dios nga «ulá irá binni, ne ganna ca ni dxandíʼ» (1 Tim. 2:3, 4). Nga runi, risaca nga guidúʼndanu Biblia ne gúninu stipa guiénenu ni (Mat. 15:10). Ni zacané laanu guiénenu ni nga gucaʼ íquenu guizíʼdinu xiixa ora guidúʼndanu Biblia. Ne zacá nga biʼniʼ ca xpinni Cristu de Berea dxi guniʼné Pablu laacaʼ de stiidxaʼ Dios: «Bicaa diaga ca stiidxa Dios ne stale gana ne irá dxi ma cuyubi ca lu Xquiʼchi Dios pa jneza ni caziidi ca» (Hech. 17:11).
Ñee laaca ruundaluʼ Stiidxaʼ Dios ne stale gana casi ca xpinni Cristu de Berea que la? Ñee ruyúbiluʼ gúʼndaluʼ Biblia ti lugar ra gastiʼ ni guchiiñaʼ lii la? Zanda gúniluʼ stipa pur gúniluʼ cásica biʼniʼ ca de Berea que neca dxiqué qué riuuláʼdxiluʼ gúʼndaluʼ. Dxandíʼ nga nuu binni ora maʼ ziyoʼxhoʼ la? jma huaxiéʼ ruundaʼ, peru ca xpinni Cristu cadi naquiiñeʼ guni zacá. Zaa nahuiininu o maʼ huaniisinu, naquiiñeʼ guyúbinu ti lugar ra cadi guchiiñaʼ xiixa laanu. Ora maʼ cayuundaluʼ la? galán guyúbiluʼ xiixa ni zanda guiníʼneluʼ sti binni. Laaca galán guiníʼneluʼ ni xheelaluʼ o sti xpinni Cristu. Pa gúniluʼ zacá la? zacaneni guiaana ndaaniʼ íqueluʼ ne ndaaniʼ ladxidoʼloʼ cani biziidiluʼ, ne zacá zacaneluʼ xcaadxi.
Zanda chinándaluʼ ejemplu stiʼ Esdras ora gúʼndaluʼ, purtiʼ laa «guluu listu ladxidóʼ ante guʼndaʼ ley stiʼ Jiobá» (Esd. 7:10). Ximodo zanda gúniluʼ zacá yaʼ. Primé la? zanda guyúbiluʼ ti lugar ra ganda gúʼndaluʼ. Óraca gurí ne gunabaʼ Jiobá gudii guendabiaaniʼ lii ne gusiene lii (Sant. 1:5). De racá guníʼ ique: «Xi racalaʼdxeʼ guiziideʼ lu ni chiguundaʼ riʼ yaʼ». Laga cayuundaluʼ biyubi xii nga ni jma cayeeteʼ luni. Dede zanda gucaaluʼ cani lu ti guiʼchiʼ. Laaca zanda gucaaluʼ raya xaʼnaʼ cani racaláʼdxiluʼ guietenalaʼdxuʼ. Guníʼ ique ximodo zanda iquiiñeluʼ ni biindaluʼ ca ora gucheecheluʼ diidxaʼ, ora quixhe íqueluʼ gúniluʼ xiixa ne ora gacaneluʼ tuuxa xpinni Cristu. Ne ora maʼ biluxe biindaluʼ la? biiyaʼ xii nga cani biziidiluʼ, purtiʼ zacá ziaanacani ndaaniʼ íqueluʼ.
Ewa guníʼ: «Ora ruundaʼ Biblia la? ruuyaʼ ca textu ni cá galaa yaza stini ne ruyubeʼ cani lu Índice de las publicaciones Watch Tower ne lu CD-ROM Watchtower Library. Laaca rucaa lu ti guiʼchiʼ cani guundaʼ lúcani para iquiiñeʼ cani ora maʼ zigucheecheʼ diidxaʼ».
Nuu tu maʼ ziné stale tiempu de cayuundaʼ chaahuiʼ Biblia ne jma cá íquecaʼ gúnicaʼ xhiiñaʼ Dios (Pro. 2:1-5). Peru cumu laaca rúnicabe stale dxiiñaʼ la? dede nagana raca para laacabe cueecabe tiempu para gúʼndacabe Stiidxaʼ Dios stubisícabe. Pa zacá cazaacaluʼ, xi zanda gúniluʼ para quíxheluʼ ti hora gúʼndaluʼ yaʼ.
Paraa zanda cueenu tiempu yaʼ
Ni dxandíʼ nga ora riuulaʼdxiʼ binni guni xiixa la? qué zaca nagana para laa guni ni. Stale tu laa huadiicaʼ cuenta ora quixhe íquecaʼ gúʼndacaʼ guidubi naca Biblia stúbicaʼ la? ruuyacaʼ pabiáʼ sicarú nga gúnicaʼ ni. Zándaca nagana nga zaca para laanu guidúʼndanu lu Biblia ra caníʼ de ca familia ni guyuu dxiqué, ne ra cayeeteʼ ximodo guyáʼ templu stiʼ Dios ne de ca diidxaʼ riguixhená ni nagana guiene binni laacaʼ ne ruluíʼ qué zacané laanu lu xquendanabáninu. Peru nuu caadxi cosa ni zacané lii gúniluʼ ni naguixhe íqueluʼ. Casi ante gúʼndaluʼ xiixa ni ruluíʼ nagana zeeda lu Biblia la? zanda gúʼndaluʼ xcaadxi versículo ra caníʼ de laani para guiene chaahuiluʼ ni ne gúʼyaluʼ xi zanda gusiidini lii. Para guʼnuʼ nga la? zanda guyúbiluʼ ni lu libru “Toda Escritura es inspirada de Dios y provechosa”, libru ca maʼ gucuani lu jma de cincuenta diidxaʼ.
Laaca galán guxuíʼluluʼ cani cayúʼndaluʼ lu Biblia casi ñaca cayuuyaluʼ cani. Pa gúniluʼ ca nga la? ziécheluʼ ora gúʼndaluʼ Biblia ne zabeenduluʼ ni galán. Nga zacané lii cueeluʼ tiempu para gúʼndaluʼ ne qué zaca nagana para lii guiaaluʼ gúʼndaluʼ Biblia guiráʼ dxi.
Cani guninu ca la? cada tobi de laanu nga zanda guni ni, yanna xi zanda guni ca familia ni nabé nuu xhiiñaʼ ca yaʼ. Primé la? guiratu zanda cuitu ne guiniʼtu xi zabeendutu pa gúʼndatu Biblia. Ne ora maʼ caniʼtu diidxaʼ ca zándaca guzeetetu xi zanda gúnitu, casi pa guiásatu jma tempranu para gúʼndatu caadxi de Biblia neca caadxi dxi lu ti semana. Ne zándaca racá gudiitu cuenta naquiiñeʼ quixhe chaahuitu xhiiñatu. Nuu familia ruuyacaʼ jma galán gúʼndacaʼ xi textu guiaba guiráʼ dxi o gúʼndacaʼ caadxi de lu Biblia ora guiluxe gocaʼ. Ante gusiácabe lu mexaʼ o chigúnicabe sti cosa la? ribeecabe chii o quince minutu para gúʼndacabe textu ni guiaba dxi ca o gúʼndacabe ndaa ra nexheʼ guiuundaʼ Biblia guiráʼ semana. Nécapeʼ nagana zácani ora guzulú gúnicabe ni la? chaahuidugá maʼ ziaacabe ni ne dede ziuuláʼdxicabe gúnicabe ni.
Wojciech ne Małgorzata guniʼcaʼ xi gucané binnilídxicaʼ: «Primé que la? runítidu stale tiempu lu stale cosa ni qué risaca. Ngue runi, guníʼ íquedu maʼ cadi gunítidu stale tiempu para guseendadu correu lu computadora ne lu xcaadxi cosa. Laaca gudíxhedu ti dxi para guʼndaʼ chaahuidu Biblia». Laacabe qué raca arrepentírdicabe pur bisaanacabe de gúnicabe cani, lii ne binnilídxiluʼ laaca qué zaca arrepentirtu pa gúnitu zacá.
Zabeendunu ni galán pa gunibiáʼ chaahuinu Dios
Pa cadi gusaananu de guidúʼndanu Stiidxaʼ Dios la? zabeendunu ni galán (Col. 1:10). Pa gúninu nga la? zuuyaʼ xcaadxi binni jma cazíʼdinu de Dios. Ne jma ziénenu cani dxandíʼ zeeda lu Biblia. Ne ora quíxhenu gúninu xiixa la? zúninu ni jneza casi na Stiidxaʼ Dios ne zaqueca zaca ora gudiʼnu conseju. Zacá maʼ qué zúninu casi runi cani qué ganna chaahuiʼ de Biblia. Ne laaca jma zadxíñanu Jiobá ne zusisácanu modo nácabe ne zusihuínninu ni ora guininu de laabe nezalú xcaadxi binni (1 Tim. 4:15; Sant. 4:8).
Biaʼ tiica iza nápanu ne biaʼ tiica nánnanu la? gúninu stipa pur chuuláʼdxinu guidúʼndanu Stiidxaʼ Dios, ra guyúbinu guiénenu ni ne gucaʼ íquenu guizíʼdinu xiixa luni. Ne naquiiñeʼ gánnanu qué zusiaandaʼ Jiobá stipa ni gúninu (Heb. 6:10). Dxandipeʼ zaguu ndaayabe laanu stálepeʼ.
[Cuadru ni zeeda lu yaza 13]
NI ZABEENDUNU PA CADI GUSAANANU DE GUNIBIÁʼ CHAAHUINU DIOS
Zaguidxi fe stinu ne zúninu ni riuulaʼdxiʼ Jiobá (Col. 1:9, 10)
Ne zánnanu xii nga ni jneza ne zaníʼ íquenu ante quixhe íquenu gúninu xiixa (Sal. 119:99)
Jma ziuuláʼdxinu gacanenu binni guidxiña Jiobá (Mat. 28:19, 20)
[Ca dibuju/foto ni zeeda lu yaza 14]
Zándaca qué zadxélanu ra guidúʼndanu sin chuʼ tu guchiiñaʼ laanu, peru zabeendunu ni galán pa gúninu stipa pur gúninu ni
[Dibuju/foto ni zeeda lu yaza 15]
Nuu familia ruundaʼ Biblia despué de gó