Gudxíʼlunu Binidxabaʼ cásica biʼniʼ Jesús
«Cadi ulabi tu [B]inidxabaʼ, stubi stubi zaxele de laatu.» (SANT. 4:7.)
1. Xii nga maca gunna Jesús ante gueeda lu Guidxilayú, peru xi guca despué yaʼ.
DEDE ante gueeda Jesucristu lu Guidxilayú maca nanna zazananda Binidxabaʼ laa. Laabe maca nánnabe ni gudxi Dios beendaʼ que ndaaniʼ jardín stiʼ Edén que, ne cumu Binidxabaʼ ngue biquiiñeʼ laame la? Binidxabaʼ ngue gudxi Dios ca diidxaʼ riʼ: «Ne zucaa gacananaláʼdxisaatu, lii ne gunaa ca [ca ángel cayuni ni na Jiobá], ne zaqueca ni za de lii ne ni za de laabe. Ni za de gunaa ca [Jesucristu] zucaache íqueluʼ ne lii zuninaluʼ xatini ñeebe» (Gén. 3:14, 15; Apo. 12:9). Ora guti Jesús que la? casi ñaca ñuniná Binidxabaʼ xatini ñeebe. Peru qué nindaa de ngue gundisaʼ Jiobá laabe de lade gueʼtuʼ para chebe guibáʼ. Peru Binidxabaʼ la? zuuti Jesús laa, zacá nga casi ñaca nucaachebe ique ne maʼ qué ziuu dxi guibani (biindaʼ Hechos 2:31, 32 ne Hebreos 2:14).
2. Xiñee gunna dxichi Jiobá zucaanaʼ Jesús guiráʼ ni gucaa Binidxabaʼ laa guni.
2 Jiobá gunna dxichi zucaanaʼ Jesús guiráʼ ni gucaa Binidxabaʼ laa guni ora gueeda lu Guidxilayú ne zuni dxiiñaʼ ni bidiibe laa guni. Xiñee nanna Jiobá zuni Jesús zacá yaʼ. Purtiʼ maʼ xadxí de bizaʼbe Jesús ne binibiáʼ chaahuibe laa. Gunna dxíchibe Jesús, «tobi ni runi xhiiñabe jnézapeʼ», ni guyáʼ «ante cha irá xixé ni nuu» ca, zuzuubaʼ stiidxabe ne qué zucheené laabe (Pro. 8:22-31; Col. 1:15). Ngue runi ora biseendaʼ Dios Jesús lu Guidxilayú riʼ ne bidii lugar guzananda Binidxabaʼ laabe dede biiti laabe la? gunna dxíchibe zuni huantar Jesús, tobi lucha Xiiñibe, dede dxi gati (Juan 3:16).
Jiobá rapa ca xpinni
3. Xi cá ique Binidxabaʼ guni ca xpinni Jiobá.
3 Jesús guníʼ Binidxabaʼ nga runi mandar binni Guidxilayú ne gúdxibe ca discípulo stibe ziuu tu zazananda laacaʼ cásica guzanándacabe laabe (Juan 12:31; 15:20). Ndaaniʼ guidxilayú ra cayuni mandar Binidxabaʼ riʼ nanaláʼdxicabe cani dxandíʼ xpinni Cristu purtiʼ cayúnicabe ni na Jiobá ne cusiisidicabe binni xii nga ni jneza (Mat. 24:9; 1 Juan 5:19). Ne cani jma canazananda Binidxabaʼ nga ca xpinni Cristu ni bibí, cani chiguni mandarné Cristu guibáʼ. Peru laaca canazanándabe guiráʼ ca testigu stiʼ Jiobá, cani cabeza guibani ndaaniʼ ti paraísu lu Guidxilayú riʼ. Stiidxaʼ Dios caguixhená ca xpinni Cristu: «Canazá [B]inidxabaʼ, enemigu stitu, canananda laatu casi ti lion ni canaguu beedxeʼ, canayubi tu uxuuxe» (1 Ped. 5:8).
4. Ximodo nánnanu cayanda cudxiilú ca xpinni Dios cani cucaa Binidxabaʼ laacaʼ gúnicaʼ.
4 Laanu ca xpinni Jiobá cayanda cudxíʼlunu cani cucaa Binidxabaʼ laanu gúninu purtiʼ cayapa Jiobá laanu. Guidúʼyanu xi gucalaʼdxiʼ caadxi gobiernu ñuni raca ti gayuaa iza. Stale de laacabe nabé malu laacaʼ ne huayacaláʼdxicabe gunduuxecabe ca xpinni Dios. Peru rihuinni qué huayanda gúnicabe ni, purtiʼ yanna maʼ nácanu biaʼ gadxe millón de Testigu ne nuu jma de ti gayuaa mil neza binni ridagulisaa lu guidubi naca Guidxilayú. Yanna xi guca ne ca gobiernu malu ni guzananda laanu ca yaʼ. Maʼ gúticabe.
5. Ximodo cayaca ni na ca diidxaʼ ni cá lu Isaías 54:17 yanna riʼ.
5 Casi ñaca xheelaʼ Jiobá guidxi Israel gúdxibe laa ca diidxaʼ riʼ: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ ne intiica guiníʼcabe para gucaalúcabe lii ora gaca juzgarluʼ la? zudxiibaluʼ donda íquecabe. Ndiʼ nga ni cudiéʼ ca xpinneʼ casi ti herencia, ne pur naa nga cayúnicabe ni jneza» (Isa. 54:11, 17). Lu ca últimu dxi riʼ cayuuyaʼ ca xpinni Dios cayaca ni na ca diidxaʼ ca (2 Tim. 3:1-5, 13). Ne qué zusaananu de gucáʼnanu cani cucaa Binidxabaʼ laanu gúninu, purtiʼ nánnanu cayacané Jiobá laanu ne qué zudiibe lugar gunduuxeʼ Binidxabaʼ guiranu (Sal. 118:6, 7).
6. Xi caníʼ libru stiʼ Daniel zaca ne gobiernu stiʼ Binidxabaʼ.
6 Maʼ qué zandaa zanitilú guiráʼ cosa malu ne zaree guiráʼ modo runi mandar Binidxabaʼ binni. Daniel ni riguixhená que bicaa ca diidxaʼ riʼ: «Ne dxi stiʼ ca rey que la? [ca gobiernu ni nuu yanna] Dios ni nuu guibáʼ zucuí ti reinu [guibáʼ] ni qué ziuu dxi guinitilú. Ne reinu riʼ qué zadíʼdini lu náʼ nin sti guidxi. Zunideni ne zunduuxeni guiráʼ ca reinu riʼ, ne laani ziaanani ne qué ziuu dxi guilúxeni» (Dan. 2:44). Dxi gaca ni na ca diidxaʼ riguixhená ca maʼ qué zuni mandar Binidxabaʼ lu Guidxilayú nin ti binni ni gulené donda. Laaca zanitilú guiráʼ xixé cosa malu ni nuu lu guidxilayú stiʼ Binidxabaʼ riʼ, ne Reinu stiʼ Dios nga zuni mandar lu guidubi naca Guidxilayú (biindaʼ 2 Pedro 3:7, 13).
7. Ximodo nánnanu zanda gucáʼnanu cani gucaa Binidxabaʼ laanu gúninu.
7 Rihuinni dxíchica zalá xquidxi Jiobá ora guinitilú guiráʼ cosa malu nuu lu Guidxilayú riʼ ne zaguu ndaayaruʼ Jiobá xquidxi (biindaʼ Salmo 125:1, 2). Peru xi zanda guininu de cada tobi de laanu yaʼ. Biblia na zanda gudxíʼlunu Binidxabaʼ cásica biʼniʼ Jesús ni. Ne lu ca diidxaʼ riguixhená ni gudxi Jesús apóstol Juan que na zalá stale binni ni chiguibani lu Guidxilayú riʼ ora guinitilú guiráʼ cosa malu riʼ neca cucaalú Binidxabaʼ laacaʼ. Sicaríʼ zaníʼcabe: «Dios stinu ni zuba lu trono bilá laanu, laa ne Dendxu huiiniʼ [Jesucristu]» (Apo. 7:9-14). Biblia na zudxiilú ca xpinni Cristu ni bibí ca Binidxabaʼ ne zaqueca zuni xcaadxi binni ni zeeda gaca «xcaadxi dendxu» ca (Juan 10:16; Apo. 12:10, 11). Peru para ganda gúnicabe ni la? naquiiñeʼ gúnicabe stale stipa para gucaalúcabe Binidxabaʼ ne guinábacabe Dios guxheleʼ Binidxabaʼ de laacabe (Mat. 6:13).
Jesús nga ejemplu stinu purtiʼ bicaalube Binidxabaʼ
8. Xi biʼniʼ Binidxabaʼ primé para gucaa Jesús guchee lu desiertu que, ne xi biʼniʼ Jesús.
8 Jesús, xiiñiʼ Dios que, bicaanabe guiráʼ ni biʼniʼ Binidxabaʼ para gucaa laabe gucheebe. Dxi nuu Jesús lu desiertu que la? Binidxabaʼ biluíʼ laabe chonna cosa para nucaa laabe nucheenebe Jiobá. Cumu nanna Binidxabaʼ guizáʼ maʼ candaana Jesús purtiʼ dede maʼ raca jma de cuarenta dxi ne cuarenta gueelaʼ de caʼruʼ gobe gastiʼ la? gudxi laabe: «Pa dxandí Xiiñi Dios lii la? gudxi ca guie ca gaca pan». Peru Jesús qué niná diʼ niquiiñeʼ poder stiʼ Dios para gacaneni laa, ngue runi bicábibe sicaríʼ: «Maca cá lu Xquiʼchi Dios, cadi pan si nga ibani né binni sínuque irá ca diidxa ni iree de ruaa Dios» (Mat. 4:1-4; Deu. 8:3).
9. Xiñee naquiiñeʼ gucáʼnanu guiráʼ ni runi Binidxabaʼ para gucaa laanu chúʼnenu ni cadi xheelanu.
9 Ca dxi nabáninu riʼ, riquiiñeʼ Binidxabaʼ cani ruquiinde beela ladi ca xpinni Jiobá para gucaabe laacaʼ gucheecaʼ. Casi gucaabe binni chúʼnecaʼ ni cadi xheelacaʼ, ne nabé rúnicabe nga yanna. Nga runi, naquiiñeʼ gúninu stipa para cadi chúʼnenu ni cadi xheelanu. Stiidxaʼ Dios na: «Ñee qué ganna tu pa qué ziuu cani qué runi jneza ra runi mandar Dios la? Cadi quite ique tu laatu, purti nin cani napa jnadxii, nin cani runi cre bidóʼ, nin cani riuu né xheela stobi, nin ca muxeʼ, nin cani riuu né muxeʼ [...] qué ziuu ra runi mandar Dios» (1 Cor. 6:9, 10). Rihuinni dxíchica ca binni ni cayuni cosa dxabaʼ qué zabánicaʼ lu guidxilayú cubi stiʼ Dios.
10. Xi ruzeeteʼ Mateo 4:5, 6 biʼniʼ Binidxabaʼ para gucaabe Jesús gucheené Dios.
10 Stiidxaʼ Dios cuzeeteʼ sti cosa ni biʼniʼ Binidxabaʼ para gucaa Jesús guchee lu desiertu que: «Yené [B]inidxaba que laabe ndaani guidxi Jerusalén ni rabi cabe Guidxi sti Dios, ne bidxiiba laabe ique yuʼdu roʼ ra jma nasoo ne na rabi laabe: Yanna, pa dxandí Xiiñi Dios lii la? uyuu bi de racá, purti cá lu Xquiʼchi Dios zuseenda ca ángel sti para cuʼ ná xiʼque lu ti cadi gacaná lu lu guie» (Mat. 4:5, 6). Ne pa ñuni Jesús ni gunabaʼ Binidxabaʼ laabe que la? nusihuínnibe nácabe Mesías que. Peru laaca nusihuínnibe runi crebe laabe ne qué ñuulaʼdxiʼ diʼ Dios ni ñúnibe ca. Jesús bisihuinni sti biaje qué zucheené Jiobá ne biquiiñebe ni cá lu Stiidxaʼ Dios ora bicábibe Binidxabaʼ: «Peru laca cá lu Xquiʼchi Dios, cadi inaba cabe xiixa Dios para quite si cabe laa» (Mat. 4:7; Deu. 6:16).
11. Xi zándaca guni Binidxabaʼ para gucaa laanu gucheʼnu, ne xi zazaacanu pa gúninu ni.
11 Ca dxi stinu riʼ laaca zanda gucaa Binidxabaʼ laanu gúninu xiixa para guidúʼyanu pa zacané Jiobá laanu. Ximodo rúnibe nga yaʼ. Zándaca gucaabe laanu gúninu xiixa ni riuulaʼdxiʼ binni guidxilayú. O zándaca gucaabe laanu gácunu lari o guzuchaahuinu casi runi binni guidxilayú o zándaca ora chizanu gúninu xiixa ni cadi jneza. Yanna, pa quixhe íquenu cadi chinándanu conseju stiʼ Dios ne gúninu casi runi binni guidxilayú, ñee zabézanu gacané Jiobá laanu para cadi guizaacanu xiixa pur ni gúninu la? Ñee cadi dxandíʼ nga qué zabézanu iquiiñebe ca ángel stibe para gacané laanu la? Nécapeʼ guca arrepentir David de ca pecadu biʼniʼ dxi bicheené Bat-seba la? qué nibee diʼ Jiobá ca guendananá ni gúpabe pur bicheebe que (2 Sam. 12:9-12). Nga runi cadi jneza diʼ nga gúninu ni runi binni guidxilayú para guidúʼyanu pa zacané Jiobá laanu (biindaʼ Santiago 4:4 ne 1 Juan 2:15-17).
12. Xi ruzeeteʼ Mateo 4:8, 9 biʼniʼ Binidxabaʼ para gucaabe Jesús gucheené Dios, ne xi biʼniʼ Jesús.
12 Últimu ni biʼniʼ Binidxabaʼ para nucaa Jesús nuchee nga biluiʼbe laa guiráʼ xixé reinu ne guendanandxóʼ ni nuu lu Guidxilayú ne gúdxibe laa: «Zudiee lii irá ni pa guzuxibi lu xañeeʼ usisaca lu naa» (Mat. 4:8, 9). Ne ca diidxaʼ guníʼ Binidxabaʼ ca bisihuinni dxichi racalaʼdxiʼ guni adorárcabe laa, neca Jiobá si nga naquiiñeʼ gaca adorar, ne laaca bisihuínnibe gucaláʼdxibe nucaabe Jesús nucheené Dios. Laabe riuuláʼdxibe guni adorar binni laabe, ne nga bicaa laabe guixélebe de Dios ne gácabe ti ángel malu ne guchelube gápabe xiixa ni cadi stibe (Sant. 1:14, 15). Peru Jesús gudixhe ique guzuubaʼ stiidxaʼ Bixhoze. Laabe gúdxibe Binidxabaʼ: «Biree de ra nuaa [B]inidxabaʼ, purti cá lu Xquiʼchi Dios, Dios si nga naquiiñe usisaca cabe ne guni cabe ni na». Sti biaje ca bicaanáʼ Jesús Binidxabaʼ ne qué liica niníʼ ique nicaa xiixa ni cudii Binidxabaʼ laabe. ¡Qué liica nicá íquebe ñuni adorarbe Binidxabaʼ, ni bidxiideche Dios ca! (Mat. 4:10; Deu. 6:13; 10:20.)
«Cadi ulabi tu [B]inidxabaʼ, stubi stubi zaxele de laatu»
13, 14. 1) Ora biluíʼ Binidxabaʼ Jesús guiráʼ reinu nuu lu guidxilayú riʼ, xii ngue culuiʼbe laa zanda guni. 2) Ximodo racalaʼdxiʼ Binidxabaʼ gucaa laanu gucheʼnu yanna.
13 Ora biluíʼ Binidxabaʼ Jesús guiráʼ reinu nuu lu Guidxilayú riʼ la? culuiʼbe laa zanda guni mandar ne qué huayuu dxi gábibe stobi zacá. Laabe guníʼ íquebe ñuulaʼdxiʼ Jesús ñaca ti rey ni jma risaca lu Guidxilayú riʼ ora ñuuyaʼ guiráʼ ni cudiibe laa que. Yanna riʼ cadi cayabi diʼ Binidxabaʼ laanu gácanu ti rey, peru rucaabe laanu guidúʼyanu, gucaadiáganu ne guiníʼ íquenu stale cosa ni gucaa laanu gucheʼnu.
14 Cumu lu naʼ Binidxabaʼ nga nuu guiráʼ cosa ni nuu lu guidxilayú riʼ la? pur nga zanda guininu riquiiñebe televisión, radiu, ca libru ca ne ca revista ca para gucaabe laanu gúninu cosa malu. Nga runi, qué ridxagayaanu guidúʼyanu guiráʼ binni cayuundaʼ, cucaadiaga ne cayuuyaʼ ra rihuinni nuunécabe xheelaʼ stobi ne ra cadíndecabe. Nabé ribeecabe anunciu ra ruquiindecabe binni gapa stale cosa ni cadi caquiiñecaʼ. Zacá nga rucaa Binidxabaʼ laanu guicá íquenu gápanu stale cosa risaca. Peru ora qué ridúʼndanu, qué ridúʼyanu ne qué rucaadiáganu ca cosa ni cadi jneza ca la? cayábinu Binidxabaʼ: «Biree de ra nuaa [B]inidxabaʼ». Ora dxandíʼ gucáʼnanu ca cosa ni nuu lu guidxilayú riʼ la? rusihuínninu zinándanu ejemplu stiʼ Jesús. Ne ora gábinu cani runinenu dxiiñaʼ, cani rinenu scuela, ne ca xpecínunu ne ca binnilídxinu nácanu testigu stiʼ Jiobá ne nácanu discípulo stiʼ Jesucristu la? rusihuínninu cadi zinándanu ca xpinni Binidxabaʼ (biindaʼ Marcos 8:38).
15. Xiñee naquiiñeʼ gatananu guiráʼ ora.
15 Biiyaʼ si Binidxabaʼ qué ñanda nucaa Jesús nuchee guionnaʼ biaje que la? «bixale [B]inidxaba que de laabe» (Mat. 4:11). Peru qué niree Binidxabaʼ gana purtiʼ Biblia na: «Biiya si [B]inidxaba ma qué idxela ximodo usaba laabe [lu desiertu que], bisaana laabe caadxi» (Luc. 4:13). Neca gunda bicáʼnanu xiixa ni bicaa Binidxabaʼ laanu gúninu ne bidiʼnu xquíxepeʼ Jiobá pur gucané laanu la? naquiiñeʼ guyúbirunu gacanebe laanu. Naquiiñeʼ gánnanu qué zusaana Binidxabaʼ de gucaa laanu gucheʼnu, ne zúnibe ni ora gacaláʼdxibe, cadi ora cabézanu gúnibe ni. Nga runi, naquiiñeʼ gatananu guiráʼ ora ti ganda gucáʼnanu guiráʼ cani gucaa Binidxabaʼ laanu gúninu ne cadi gusaananu de gúninu ni na Jiobá.
16. Xi zanda gudii Jiobá laanu para gudxíʼlunu Binidxabaʼ, ne xiñee naquiiñeʼ guinábanu ni laabe.
16 Ni zacané laanu gucáʼnanu cani gucaa Binidxabaʼ laanu gúninu nga guinábanu Jiobá espíritu santu stiʼ, stipa ni jma nandxóʼ nuu lu guidubi naca guibáʼ ne Guidxilayú, ne naquiiñeʼ gánnanu zudiibe ni laanu ora guinábanu ni laabe. Espíritu santu ca zanda gacané laanu gúninu xcaadxi cosa ni qué ñanda ñúninu ne stipa si stinu. Jesús gudxi ca discípulo stiʼ zudii Dios laacabe espíritu stiʼ, sicaríʼ gúdxibe laacaʼ: «Pa laatu cadi nachaʼhui tu ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué udii Espíritu Santu ni inaba laa» (Luc. 11:13). Cadi gusaananu de guinábanu Jiobá espíritu santu stiʼ, purtiʼ zacaneni laanu gucáʼlunu Binidxabaʼ para cadi gucaa laanu gucheʼnu. Pa qué racaláʼdxinu «usaba [B]inidxaba laa[nu] ne enda nexhená stiʼ» ne cadi guiábanu lu ca trampa stiʼ la? naquiiñeʼ guni orarnu guiráʼ ora, ne laaca nápanu xidé iquiiñenu guiráʼ ni cudii Jiobá laanu para gudxíʼlunu laabe (Efe. 6:11-18).
17. Xi gucané Jesús gudxiilú Binidxabaʼ.
17 Biblia cuzeeteʼ sti cosa ni gucané Jesús gudxiilú Binidxabaʼ, ne laani laaca zanda gacaneni laanu: «Guietenalaʼdxi nu pabiáʼ naná guca para laabe ra ucuá be lu [yaga] que, peru qué nizaalaʼdxi be gati be zaqué, purti nanna be nabé zieche be ora ma udiʼdi be ni. Ne zaqué uca ni, udiʼdi si irá enda naná stibe que la? ze be ibáʼ, ne ma zuba be cueʼ Dios ni nandxóʼ» (Heb. 12:2). Laanu laaca ziéchenu cásica biecheʼ Jesús pa gusihuínninu napa Jiobá derechu guni mandar, pa gusisácanu labe ne cadi gusiaandanu guendanabani ni qué zaluxe ni cabézanu gudiibe laanu. Nabé nayecheʼ ziuʼnu ora guinitilú Binidxabaʼ ne ca xpinni ne ora gaca ni na ca diidxaʼ riʼ: «Cani nadóʼ ca zacaacaʼ guidxilayú ne dxandipeʼ zadxélacabe guendanayecheʼ purtiʼ ziuu stale guendariuudxi» (Sal. 37:11). Nga runi, naquiiñeʼ chinándanu ejemplu stiʼ Jesús ne iquiiñenu guiráʼ stipa stinu para gucáʼlunu Binidxabaʼ (biindaʼ Santiago 4:7, 8).
Xi nicábiluʼ
• Ximodo nánnanu cayapa Jiobá xquidxi.
• Xiñee nánnanu nabé jneza modo bidxiilú Jesús Binidxabaʼ.
• Ximodo zanda gudxíʼlunu Binidxabaʼ.
[Dibuju/foto ni zeeda lu yaza 29]
Pa gaca xhamígunu binni guidxilayú la? zaca xhenemígunu Dios
[Dibuju/foto ni zeeda lu yaza 31]
Ora biluíʼ Binidxabaʼ guiráʼ gobiernu stiʼ guidxilayú riʼ Jesús la? laabe bicaanabe cani