Tu clase binni riuuláʼdxiluʼ gácaluʼ

TI XAÍQUE stiʼ puliciá de ti guidxi huiiniʼ nuu Filipinas gunabadiidxabe ti precursora: «Xi bíʼniluʼ para gunda bichaa hombre ca pue». Xaíque stiʼ puliciá que biluiʼnaʼ caadxi guiʼchiʼ nexheʼ lu escritorio stiʼ, ne gudxi laabe: «Ñee nánnaluʼ xi cá lu ca guiʼchiʼ ca la? Lu ca guiʼchiʼ ca nga cá xi guníʼ juez gácabe. Ne pur ni bíʼniluʼ ca gucaneluʼ guidxi riʼ». Hombre ni bichaa modo laa ca nabé guxudxi ne nisi maʼ cuyubi tindené binni. Xi bicaa laabe guchaabe nagueendaca yaʼ. Cani zeeda ndaaniʼ Stiidxaʼ Dios.

Millón de binni zinanda conseju bidii Pablu riʼ: «Ma cadi ucaa ique tu ni ucuá ique tu chiqué [...]. Naquiiñe ibani tu modo naguixhe Dios ne usihuinni tu dxandí ma adxé laatu yanna» (Efe. 4:22-24). Guiráʼ cani racalaʼdxiʼ gaca xpinni Cristu la? naquiiñeʼ gúnicaʼ stipa pur guchaacaʼ modo laacaʼ.

Ne ora racalaʼdxiʼ tuuxa chúʼnisa la? napa xidé guchaa modo laa nécaxa naquiiñeʼ guchaarube despué. Ora chúʼnisa ti binni la? zeeda gaca casi xiixa de yaga ni deruʼ cuzáʼ tuuxa. Neca maʼ rihuinni xii nga cuzaʼbe la? nápabe xidé guraarube ni dede guilúxebe ni ne guuyaʼ chaahuibe xiruʼ caquiiñeʼ gúnibe ni para guihuínnini galán. Zaqueca nga ora maʼ guyuunisa ti binni, laaca maʼ nápabe caadxi guenda ni rapa ti xpinni Dios. Peru, deruʼ ngue cuzulú cuchaabe modo laabe para gusihuínnibe maʼ gadxepeʼ laabe. Nápabe xidé gúʼyabe paraaruʼ caquiiñeʼ guchaabe.

Pablu laaca biiyaʼ naquiiñeruʼ guchaa modo laa. Laabe guniʼbe: «Casi naa gacaladxe gune ni jneza, rutaagu pecadu naa» (Rom. 7:21). Pablu gunna ximodo laa ne laaca gunna ximodo racalaʼdxiʼ gaca. Laanu laaca naquiiñeʼ guidúʼyanu paraa naquiiñeʼ guchaʼnu cásica bíʼnibe ca, ne guiníʼ íquenu: «Paraa cayaadxaʼ guchaa modo naa yaʼ. Ximodo naa, ne tu clase binni racalaʼdxeʼ gacaʼ yaʼ».

Paraa cayaadxaʼ guchaa modo naa

Pa ñuni chaahuinu ti yoo yooxhoʼ ni maʼ cayaca feu ca pilar stiʼ, cadi dxandíʼ qué nutiésinu ni la? Pa qué guni chaahuinu ca pilar stini la? jma nagana para gaca chaahuini despué. Zacaca nga raca ne modo laanu: cadi naquiiñeʼ si guchaʼnu lu chupa chonna si cosa. Naquiiñeʼ guiduʼyaʼ chaahuinu ximódopeʼ laanu ne guidúʼyanu paraa naquiiñeʼ guchaʼnu, purtiʼ pa qué gúninu nga zándaca gúninu xiixa ni cadi jneza bíninu dxiqué. Nga runi naquiiñeʼ guiduʼyaʼ chaahuinu ximodo laanu (2 Cor. 13:5). Ora maʼ bidúʼyanu paraa nga naquiiñeʼ guchaʼnu la? naquiiñeʼ gúninu ni nagueenda ne Jiobá zacané laanu.

Pablu bicaa: «Stiidxa Dios la? rudii enda nabani laanu, ne nandxóʼ ni. Jma naduxhu ni que ti puñal ni naduxhu iropa ladu, purti zanda guiaazi ni dede jma gueteʼ, dede ndaani dxita. Ora ma yendá stiidxa be que ndaani ladxidóʼ no la? ribee irá ni nuu ndaani ladxidóʼ no, ne ni cá lu xquenda biaani nu, para ganna nu ximodo laanu» (Heb. 4:12). Ni cá lu Stiidxaʼ Dios ca rucaani laanu guchaʼnu modo laanu. Riaazini dede ndaaniʼ ladxidoʼno ne ndaaniʼ dxita ládinu. Racaneni laanu guidúʼyanu xi nuu lu xquendabiaaninu ne xii nga ni racaláʼdxinu gúninu, zacá rihuinni ximódopeʼ laanu. Laaca zacaneni laanu gudiʼnu cuenta gadxé laanu de modo ruuyaʼ binni laanu ne modo riníʼ íquenu nácanu. ¡Nabé racané Biblia laanu guidúʼyanu paraa naquiiñeʼ guchaʼnu!

Ora guni chaahuicabe ti yoo yooxhoʼ la? qué zuni chaahuisicabe ra guca feuni, sínuque zuuyacabe xiñee guca feuni. Zacá zánnacabe xi gúnicabe para cadi gaca feuni sti biaje. Zacaca nga laanu, cadi naquiiñeʼ si guidúʼyanu ximodo xpiaʼnu, sínuque naquiiñeʼ guidúʼyanu xi bicaa laanu gaca xpiaʼnu zacá, purtiʼ nga zacané laanu gánnanu ximodo guchaʼnu xpiaʼnu. Nuu stale cosa ni rucaa laanu cadi gaca xpiaʼnu galán, caadxi de laacani nga pur nápanu bueltu o qué gápanu bueltu ne pur ca costumbre stiʼ xquídxinu, pur modo biniisinu, pur ca binni ridxaaganu ne pur religión ni gúpanu. Dede ne cani ridúʼyanu lu televisión ne lu ca película ca runi feúcani xpiaʼnu. Pa guidúʼyanu xi bicaa laanu gácanu zacá la? jma nagueenda zánnanu xi gúninu para guchaʼnu xpiaʼnu.

Zándaca ora gudiʼnu cuenta feu xpiaʼnu guininu: «Zacapeʼ naa». Peru cadi ti razón diʼ nga para cadi guchaʼnu modo laanu. Zacá rihuínnini pur ca diidxaʼ ni gudxi Pablu ca xpinni Cristu de Corinto ni guyuunecaʼ ni cadi xheelacaʼ, ne cani gúcacaʼ muxeʼ ne cani guxudxi que. Laabe guniʼbe: «Zacaca guca caadxi de laatu chiqué, peru yanna ma bia ladxidóʼ to [...] pur Espíritu sti Dios stinu» (1 Cor. 6:9-11). Espíritu santu stiʼ Jiobá ca laaca zanda gacané laanu guchaʼnu modo laanu.

Guidúʼyanu ejemplu stiʼ Marcos,a ti hombre ni nabeza guidxi Filipinas. Laabe guniʼbe de modo biniisibe dxiqué: «Lade cani biniiseʼ nabé guyuudíndecaʼ; nga runi ora gupaʼ 19 iza bineʼ ni gupaʼ gana». Stale binni binibiáʼ Marcos purtiʼ nabé gudxítebe apuesta ne bireebe lú binni ne guláʼnabe stiʼ binni. Laabe ne ca xhamígube guníʼ íquecabe gucueezacabe ti avión ne guinábacabe bueltu para cadi guuticabe cani zeeda ndaanini, peru qué ñúnicabe ni. Neca bichaganáʼ Marcos qué nusaana de ñuni ca guendaquéiquiiñeʼ stiʼ ne binítibe guiráʼ ni nápabe lu apuesta. Qué nindaa maʼ guyuube ora ruundané ca testigu stiʼ Jiobá xheelabe. Primé que guníʼ ique Marcos cadi jneza gácabe ti xpinni Cristu pur guiráʼ ni bíʼnibe que. Peru, bizulú bíʼnibe cani caziidibe que ne guyebe ca guendaridagulisaa, ne ngue gucané laabe gusaanabe modo nabánibe que. Yanna, maʼ guyuunisa Marcos ne maʼ rusiidibe binni guchaa modo laa.

Tu clase binni racalaʼdxeʼ gacaʼ

Xi naquiiñeʼ gúninu para ganda guchaʼnu modo laanu yaʼ. Apóstol Pablu bidii conseju riʼ: «Peru lausaana ni yanna. Cadi guni tu xiana, cadi idxiichi tu, cadi uyubi tu guniná tu stobi, cadi cuʼ dí tu binni, ne cadi iníʼ tu diidxa guidxa. Ne cadi usiguii saa tu, purti ma bisaana tu ni uca tu chiqué, ma qué runi tu irá ni biʼni tu. Ma adxé laatu yanna. Ma bichaa Dios laatu, ne ze dxi jma rusi ziuchaa laatu, cayuni laatu casi laa, dede gunibiáʼ chaahui tu laa» (Col. 3:8-10).

Ni jma naquiiñeʼ quixhe íquenu nga gusaananu modo gúcanu dxiqué ne gusihuínninu maʼ gadxé laanu. Yanna, ximodo zanda gúninu nga yaʼ. Sicaríʼ guníʼ Pablu: «Laguiá binni ne lagaca nachaʼhui ne laacaʼ. Cadi udxiiba tu laca laatu, lagaca nadóʼ, cadi idxiichi tu neca uyubi cabe uchiichi cabe laatu. Cadi ixhacalaʼdxi saa tu, ne laguni perdonar ni guni stobi laatu. Casi bini perdonar Cristu laatu, zacaca laguni. Peru jma naquiiñe ganaxhii saa tu, purti zacá zaca pe tu tobi si» (Col. 3:12-14). Pa gúninu stipa pur chinándanu conseju bidii Pablu ca la? ziuulaʼdxiʼ binni modo laanu ne ziuulaʼdxiʼ Jiobá modo laanu (1 Sam. 2:26). Dxi guyuu Jesús lu Guidxilayú riʼ la? nabé bisihuínnibe guiráʼ ni guníʼ Pablu ca. Pa guidúʼndanu ejemplu stiʼ Jesús zacaneni laanu gácanu casi laabe ne casi Bixhózebe (Efe. 5:1, 2).

Sti cosa ni zacané laanu guidúʼyanu paraa zanda guchaʼnu nga guidúʼndanu modo guca ca xpinni Dios ni bibani dxiqué ne guidúʼyanu xi gucané laacabe chuulaʼdxiʼ binni modo laacabe o xi bicaa laacabe gaca xpiáʼcabe feu. Guiníʼ íquenu ejemplu stiʼ José, xiiñiʼ Jacob. Neca guizáʼ feu ngue ni biʼniʼ ca bíʼchibe que laabe la? qué nusaanabe de ñuube nayecheʼ ne qué nuchaabe modo laabe (Gén. 45:1-15). Yanna Absalón, xiiñiʼ David, neca nabé bidxagayaa binni laabe purtiʼ galán laabe ne ruluíʼ si bizaaláʼdxibe chuʼ xquídxibe galán la? bidxiidéchebe bixhózebe ne biitibe binni (2 Sam. 13:28, 29; 14:25; 15:1-12). Casi maʼ bidúʼyanu ca, cadi purtiʼ si galán binni o purtiʼ si rusihuinni nachaʼhuiʼ nga guininu galán modo laa.

Zanda guchaʼnu modo laanu

Pa racaláʼdxinu chuulaʼdxiʼ Jiobá modo laanu la? naquiiñeʼ guiduʼyaʼ chaahuinu paraapeʼ naquiiñeʼ guchaʼnu (1 Ped. 3:3, 4). Casi bidúʼndanu ca, para ganda guchaʼnu modo laanu la? naquiiñeʼ guidúʼyanu paraa feu xpiaʼnu, xi bicaa laanu gaca xpiaʼnu zacá ne gúninu stipa pur gácanu casi Cristu. Ñee zanda gúninu nga la?

Zanda pue. Jiobá zacané laanu guchaʼnu. Zanda guinábanu casi gunabaʼ salmista que: «Biʼniʼ ladxiduáʼ nayá Dios, ne guluu ti espíritu cubi luguiaʼyaʼ, tobi ni qué gusaana naa» (Sal. 51:10). Naquiiñeʼ guinábanu Jiobá espíritu stiʼ para gacaneni laanu chuuláʼdxinu gúninu ni nabe jma jneza. Rihuinni dxíchica zanda gúninu stipa pur chuulaʼdxiʼ Jiobá modo laanu.

[Cani cá ñee yaza]

[Dibuju/foto ni zeeda lu yaza 4]

Ñee zaca chaahuiʼ ti yoo ni bininá ti bi nadipaʼ laa pa gutieesicabe ni la?

[Dibuju/foto ni zeeda lu yaza 5]

Ñee nácaluʼ casi Cristu la?