Bidxiña Dios
Naquiiñeʼ gusisácanu Dios ni bizáʼ laanu
ÑEE huayuu dxi guiníʼ íqueluʼ «xiñee nuunu ndaaniʼ Guidxilayú riʼ» la? Ca binni ni riníʼ ziúpanu de ti maniʼ la? qué randa ricábicaʼ ni. Peru cani runi cré ra nuu Jiobá nga «cadá guendanabani» la? nánnacaʼ xi pur nuunu raríʼ (Salmo 36:9). Nánnacaʼ nuu xi pur bizáʼ Dios binni, nga nga na Apocalipsis 4:11. Guiduʼyaʼ chaahuinu versículo ni bicaa apóstol Juan riʼ para gánnanu xi pur nabáninu ndaaniʼ Guidxilayú riʼ.
Juan cayabi laanu biiyaʼ stale ángel guibáʼ cayuundacaʼ sicaríʼ: «[Jiobá] Dios stidu, lii siouʼ nga naquiiñe udxiʼba du ne usisaca du ne iní du nandxóʼ loʼ [o «gudiʼdu poder lii», NM]. Purti lii bizáʼ lu irá xixé ni nuu. Uyáʼ ni ne nuu ru ni purti nga ni na luʼ». Nga runi, Jiobá si nga naquiiñeʼ guni adorarnu ne guni respetarnu, purtiʼ laabe bizaʼbe guiráʼ cosa. Yanna pa zacá ni, xi naquiiñeʼ guni guiráʼ binni yaʼ.
Textu ca na naquiiñeʼ gudxíʼbanu ne gusisácanu Dios ne gudiʼnu poder laabe. Peru, neca guirútiruʼ jma nandxóʼ que laabe guibáʼ ne lu guidubi naca Guidxilayú la? stale binni qué runi cré pa laabe nga bizaʼbe guiráʼ cosa. Peru galán gánnanu nuu hombre ne gunaa lu guidubi Guidxilayú riʼ ni rudii cuenta «ximodo laabe» pur guiráʼ cani bizaʼbe (Romanos 1:20). Ne para gudiicaʼ xquíxepeʼ laabe pur laacani la? rudxiibacaʼ ne rusisácacaʼ laabe. Nápacabe razón para gábicabe guiráʼ xixé binni Jiobá nga bizáʼ guiráʼ cosa, nga runi, caquiiñeʼ guni respetarnu ne guni adorarnu laabe (Salmo 19:1, 2; 139:14).
Jiobá laaca caquiiñeʼ guicaa poder. Peru ximodo zanda gudiʼnu poder Jiobá pa laabe nga Dios ni jma napa poder yaʼ (Isaías 40:25, 26). Cumu bizáʼ Dios laanu casi laa la? nga runi nápanu caadxi de ca guenda stibe, tobi de laacani nga stipa o poder stinu (Génesis 1:27). Ne pa dxandíʼ rudiʼnu xquíxepeʼ Dios pur guiráʼ ni maʼ biʼniʼ pur laanu la? zucaani laanu iquiiñenu stipa stinu para gudxíʼbanu ne gusisácanu laabe. Lugar de iquiiñenu guiráʼ stipa o poder stinu para gúninu ni racaláʼdxisinu la? zaquiiñenu ni para gúninu ni na Dios (Marcos 12:30).
Yanna, xiñee nuunu ndaaniʼ Guidxilayú riʼ yaʼ. Últimu ndaa stiʼ Apocalipsis 4:11 na: «Lii bizáʼ lu irá xixé ni nuu. Uyáʼ ni ne nuu ru ni purti nga ni na luʼ». Nuunu raríʼ purtiʼ nga nga ni na Jiobá, laabe nga racaláʼdxibe chuʼnu raríʼ, cadi purtiʼ laanu nga racaláʼdxinu ni. Nga runi, binni ni nabani para guni ni racalaʼdxiʼ si la? qué ganna xi pur nuu ndaaniʼ Guidxilayú riʼ. Pa racaláʼdxinu gatadxí ladxidoʼno ne guireendú guiráʼ ni gúninu la? naquiiñeʼ guizíʼdinu xi canabaʼ Dios laanu gúninu ne guibáninu modo nabe. Zacá nga zánnanu xi pur nuunu ndaaniʼ Guidxilayú riʼ (Salmo 40:8).
[Paraa gucuaacabe dibuju o foto ni zeeda lu yaza 23]
NASA, ESA y A. Nota (STScI)