Ñee nannuʼ ni la?

Ñee gupa Poncio Pilatu razón para nidxibi César la?

Ca xaíque stiʼ ca judíu que bicaacaʼ gobernador Poncio Pilatu guni mandar gati Jesús. Ne para gúnibe ni gúdxicabe laabe: «Pa undaa lu laabe la? cadi xhamigu diouʼ César» (Juan 19:12). Tuu nga «César» riʼ yaʼ. Laabe nga Tiberio, emperador stiʼ Roma. Peru gupa Poncio Pilatu razón para nidxibi laabe la?

Guidúʼyanu tu clase binni ndiʼ guca Tiberio César. Ora bigaanda dxi gaca juzgar Jesús la? maʼ napa stale iza de naca Tiberio «ti hombre ni ruyubi guni puru si ni racalaʼdxiʼ ne cada biaje jma feu modo rúnicani», zacá caníʼ The New Encyclopædia Britannica. Ne cumu nabé guníʼ íquebe cudxiideche binni laabe la? bininabe ne biitibe stale de laacaʼ. Libru ca na: «Pa dxandíʼ ni na ca historiador ni bibani tiempu stibe que la? Tiberio nabé guyuulaʼdxiʼ guʼyaʼ modo racaná binni ne xcaadxi cosa ni qué iquiiñeʼ. Guizáʼ malu gúcabe, dede biitibe tutiica ni gucaláʼdxibe».

Nga runi, modo laabe que bicaani Poncio Pilatu guni ni gunabaʼ ca judíu que laa ne biʼniʼ mandar guuticabe Jesús (Juan 19:13-16).

Xiñee gudiibiʼ Jesús ñee ca apóstol stiʼ

Stale de ca binni ni guyuu ndaaniʼ guidxi Israel dxiqué la? xie ñeecaʼ bíʼnicaʼ xhiiñacaʼ guiráʼ dxi. Peru laaca guyuu tu bicaañee guelaguidi de curriá. Cumu nabé nuu yudé ne beñe lu ca neza que ne lu ca layú stícabe la? neca qué nácabe raca biidiʼ ñeecabe.

Ngue runi maʼ biaa binni cuee guelaguidi ñee ora chuʼ ndaaniʼ ti yoo. Ne dueñu stiʼ yoo ca o mozo stibe riguiibiʼ ñee binni ni ziganna laacabe, zacá rusihuínnicabe cayechenécabe laabe. Biblia ruzeeteʼ biʼniʼ binni zacá stale biaje. Casi dxi yeganna caadxi binni Abrahán ra nabeza, gúdxibe ca binni que: «Chicaa caadxi nisa para guiaʼriʼ ñeetu. Óraca maʼ guiziiláʼdxitu xaʼnaʼ yaga ca. Ne lacueza chicaa ti ndaa pan» (Génesis 18:4, 5; 24:32; 1 Samuel 25:41; Lucas 7:37, 38, 44).

Ndiʼ racané laanu guiénenu xiñee gudiibiʼ Jesús ñee ca apóstol stiʼ gueelaʼ bíʼnibe últimu Pascua ne laacaʼ. Raqué qué guinni diʼ dueñu stiʼ yoo que ne nin ti mozo, ne ruluíʼ si nin tobi de ca discípulo stibe qué niníʼ laa guni ni. Ngue runi, ora gucuaabe ti palangana daʼ nisa ne ti tualla para quíʼbibe ne gucuiidxibe ñee ca apóstol que la? bisiidiʼ Jesús laacabe gannaxhiisaacabe ne cadi gudxiibacabe laca laacabe (Juan 13:5-17).