Stiidxaʼ Jiobá nabani

Cani naquiiñeʼ gánnanu de libru stiʼ Apocalipsis (guiropa ndaa)

XI CHIGUIZAACA ca binni ni cayuni ni na Jiobá ne cani cadi cayuni ni nabe yaʼ. Xi chiguizaaca Binidxabaʼ ne ca demonio stiʼ. Xi ndaayaʼ zacaa ca binni guzuubaʼ diidxaʼ ora guni mandar Cristu ti mil iza. Apocalipsis 13:1–22:21 zacabi cani gunabadiidxanu ca ne xcaadxi cosa ni risaca.a Lu ca capítulo riʼ zeeda gaʼ visión ni riaadxaʼ para guizaa dieciséis visión biiyaʼ Juan ra maʼ ziluxe primé siglu que.

Sicaríʼ bicaa Juan: «Dichoso cani guʼnda guiʼchi ri ne cani ucaa diaga ni cá lú ni, ne icaa ni na ni» (Apo. 1:3; 22:7). Pa gúʼndanu libru stiʼ Apocalipsis ne gúninu cani guizíʼdinu luni la? ziuʼnu nayecheʼ ora gúninu ni na Dios, jma zaguidxi fe nápanu laabe ne ni nápanu Xiiñibe Jesucristu, ne nabé sicarú ni zanda cuézanu guicaanu despué (Heb. 4:12).b

BIXII GADXE COPA RA DXÁ XIANA STIʼ DIOS (Apo. 13:1–16:21)

Apocalipsis 11:18 na: «Bidxiichi binni guidxilayú, peru ma bidxiña dxi usaba ná [Dios] laacaʼ ne [...] zuniti[lube] cani binitilú guidxilayú». Xiñee chiguni Dios nga yaʼ. Chigúnibe nga pur cani cayuni «ti mani ngola [ni] napa gadxe ique ne chii cachu» ni bihuinni lu visión xhono que (Apo. 13:1).

Lu visión gaʼ que biiyaʼ Juan «zuhuaa Dendxu huiini que lu dani Sion. Zuhuaa né ti gayuaa cuarenta y cuatro mil binni laabe», laacabe nga cani biree «lade irá binni» (Apo. 14:1, 4). De racá guníʼ caadxi ángel xii nga cani chigaca. Lu chii visión que biiyaʼ Juan «gadxe ángel naaze gadxe plaga». Cani guca lu visión ca cusihuínnicani laaca Jiobá nga cayabi ca ángel ca gundaatecaʼ «gadxe copa ra dxá xiana sti Dios» luguiáʼ ca cosa ni napa Binidxabaʼ. Ndaaniʼ ca copa ca zeeda xi chigaca ora guni juzgar Dios binni ne xi naquiiñeʼ guni binni para guilá (Apo. 15:1; 16:1). Guiropaʼ visión ca culuíʼcani ximódoruʼ chiguni juzgar Reinu stiʼ Dios binni, laaca ngaca nga ni bieeteʼ ora guxidxi ra bizaa gadxe trompeta que ne ra bieeteʼ guionna yuubaʼ que (Apo. 11:14, 15).

Chigusiénenu caadxi textu zeeda lu Biblia:

13:8. Xii nga «guiʼchi sti Dendxu huiini» que. Laani nga guiʼchiʼ, o rollo, ra cá lá cani chiguni mandarné Jesús lu Reinu stiʼ Dios guibáʼ. Lu rollo ca laaca cá lá ca xpinni Cristu ni bibí pur espíritu santu para checaʼ guibáʼ peru nabánirucaʼ lu Guidxilayú riʼ.

13:11-13. Ximodo zanda guiénenu textu ni cuzeeteʼ de ti maniʼ ngola ni napa chupa cachu ni cucaa ridxi casi dragón ne bisaba guí de guibáʼ ca yaʼ. Maniʼ ngola ni napa chupa cachu ca zeeda gaca Gran Bretaña ne Estados Unidos. Laame ruchíbime binni, ne runiname laacaʼ para gudiicaʼ lugar guni mandarme laacaʼ ne ora rúnime zacá casi ñaca nucaame ridxi casi ti dragón. Yanna, ximodo nga rusábame guí de guibáʼ yaʼ. Rúnime ni ora rácame casi tobi ni riguixhená ne name maʼ biʼniʼ ganarme ca binni malu lu guiropaʼ guendaridinde ni guca lu guidubi naca Guidxilayú lu siglu XX que, ne laaca name maʼ biʼniʼ ganarme ca comunista.

16:17. Ra bizaa gadxe copa que bindaatecabe ni daʼ ndaaniʼ ni lu «bi», yanna xii nga bi ca yaʼ. Bi ca zeeda gaca ni modo rucaa Binidxabaʼ binni guiníʼ ique, «espíritu ni runi dxiiñaʼ ndaaniʼ ladxidóʼ cani qué ruzuubaʼ stiidxaʼ Dios». Guiráʼ ca xpinni Binidxabaʼ cacaacaʼ bi ni napa venenu ca (Efe. 2:2, NM).

Xi rusiidiʼ cani laanu:

13:1-4, 18. «Mani ngola», ni biree ndaaniʼ «nisadóʼ» ca nga ni zeeda gaca ca gobiernu nuu lu Guidxilayú. Ne nisadóʼ ca nga zeeda gaca guiráʼ xixé binni ni nuu lu Guidxilayú (Isa. 17:12, 13; Dan. 7:2-8, 17). Binidxabaʼ nga bizáʼ maniʼ ngola ca ne laabe nga bidiibe poder laame, ne nápame númeru 666, nga riníʼ nabé rucheeme. Cumu nánnanu tuu nga maniʼ ngola ca la? qué ridxagayaadinu cani rúnime ne qué runi adorarnu laame casi runi binni guidxilayú (Juan 12:31; 15:19).

13:16, 17. Nécapeʼ jma nagana gaca para laanu sinu o gutoʼno xiixa la? cadi naquiiñeʼ diʼ gudiʼnu lugar gucaa maniʼ ngola ca laanu gúninu ni na. Pa guicá marca stiʼ maniʼ ngola ca lu nanu o lucuanu la? casi ñaca cudiʼnu lugar gábime laanu xi gúninu ne xi guiníʼ íquenu.

14:6, 7. Ca diidxaʼ guníʼ ángel ca cusihuínnicani pabiáʼ naquiiñeʼ gucheechenu ca diidxaʼ nacubi ne galán stiʼ Reinu stiʼ Dios ni maʼ cayuni mandar ca. Naquiiñeʼ gacanenu cani cayúʼndanenu Biblia guidxíbicaʼ Dios ne guiale de ndaaniʼ ladxidoʼcaʼ gusisácacaʼ labe.

14:14-20. Ora guiluxe guidopa cani chiguilá casi raca ne «semiá ora ma nuu para iruuguʼ» la? óraca nga zacaa ti ángel «ca beʼza uvas ni nuu ndaani guidxilayú» ne zuchabe cani «ndaani pila para ixii cani». Racá nga chiguinitilú cani. Ca yaga uvas ca nga guiráʼ ca políticu ni riquiiñeʼ Binidxabaʼ, ne ca «beʼza uvas» ca nga guiráʼ ca cosa malu ni rúnicabe. Qué chuʼ dxi gudiʼnu lugar gucaa ca políticu ca laanu gúninu ni racaláʼdxicaʼ.

16:13-16. Ca «espíritu dxaba» [o ca «diidxaʼ dxabaʼ», NM] ca nga guiráʼ ni rucaa ca demonio ca binni guiníʼ ique. Ne cayúnicabe ni para gucaacabe guiráʼ ca rey ni nuu lu Guidxilayú riʼ cadi gulábicaʼ ora guixii gadxe copa ra dxá xiana stiʼ Dios, ne gucaalucaʼ laabe (Mat. 24:42, 44).

16:21. Dxi mayaca guinitilú ca cosa malu nuu ndaaniʼ guidxilayú riʼ, zándaca nabé naná zaca para stale binni ni cayuni ni na Binidxabaʼ ora gánnacaʼ chigaca juzgarcaʼ ne nga zeeda gaca casi granizu para laacaʼ. Neca zacá zaniʼruʼ stale binni mal de Dios.

MAʼ CAYUNI MANDAR REY NI BIʼNIʼ GANAR CA

(Apo. 17:1–22:21)

Babilonia guidxi roʼ, ni zeeda gaca guiráʼ ca religión ni cadi dxandíʼ, ca nga tobi de ca cosa dxabaʼ nuu lu guidxilayú stiʼ Binidxabaʼ. Lu visión once que biiyaʼ Juan Babilonia casi ti «gunaa dxaba» ni «dxiʼba ti mani ngola xiñáʼ». Ne «chii cachu ni napa mani» ca nga chigunitilú Babilonia guidxi roʼ ca (Apo. 17:1, 3, 5, 16). Lu sti visión ca bihuinni zeeda gaca gunaa dxabaʼ ca casi ti «guidxo roʼ», ne bieeteʼ chiguiaba guidxi ca ne biree ti ridxi de guibáʼ na rabi ca xpinni Dios: «Lairee de ndaani guidxi ca». Stale binni cayuunaʼ purtiʼ biaba guidxi roʼ ca, peru nabé biecheʼ ca ángel guibáʼ purtiʼ «ma bidxiña dxi ichaganá Dendxu huiini que» (Apo. 18:4, 9, 10, 15-19; 19:7). Lu visión trece que biiyaʼ Juan ti hombre ni dxiʼbaʼ «ti caballu quichiʼ» ne cadindené ca guidxi ca ne binduuxebe ca binni malu ni cayuni ni na Binidxabaʼ (Apo. 19:11-16).

Xi chiguizaaca «dxa beenda yooxho ni rabi cabe binidxaba que». Padxí nga gulaacabe laame «lu gui ne azufre» yaʼ. Ndiʼ nga tobi de ca tema ni zeeda lu visión catorce biiyaʼ Juan (Apo. 20:2, 10). Xhupa visión ni zeeda últimu ca culuíʼcani laanu ximodo chiguibani binni lu ti mil iza guni mandar Cristu. Ra maʼ chiguiluxe Juan de cayuuyaʼ ca visión que la? biiyabe ti guiiguʼ ra daʼ «nisa ni rudii enda nabani» ne nisa ca cuxooñeni lu ti neza xilaga, ne binadiágabe cayaca invitar guiráʼ cani «cayati nisa» (Apo. 1:1; 22:1, 2, 17).

Chigusiénenu caadxi textu zeeda lu Biblia:

17:16; 18:9, 10. Xiñee biinaʼ «cani runi mandar ndaani guidxilayú» riʼ ora binitilú Babilonia, guidxi roʼ que, pa laca laacaʼ binitilucaʼ ni yaʼ. Ruluíʼ si despué de binitilúcabe Babilonia ca nga bidiicabe cuenta pabiáʼ biquiiñecabe laa para bíʼnicabe guiráʼ ni gucaláʼdxicabe. Babilonia gucané guihuinni nachaʼhuiʼ ca rey ca neca cuquiichinacaʼ binni, laaca gucanebe laacaʼ gutagulisaacaʼ stale hombrehuiiniʼ para chitíndecaʼ ne bicaabe binni guzuubaʼ stiidxaʼ ca rey ca.

19:12. Ximodo nga guirutiʼ tu nanna lá Jesús, sínuque laasibe yaʼ. Ruluíʼ si lá ni gucuaa Jesús ni qué ganna binni ca nga ni zeeda gaca puestu risaca nápabe ne cani chigúnibe lu dxi sti Señor, casi cani cá lu Isaías 9:6. Cumu lu textu ca na guirútiruʼ tu nanna lá ca la? nga rusihuinni guirutiʼ tu zanda gapa puestu ni nabé risaca ca ne guirutiʼ zanda guiene xi guiráʼ naquiiñeʼ guni tuuxa ni guicaa puestu ca. Peru cani zeeda gaca xnovia Jesús ca zacanecaʼ laabe lu caadxi dxiiñaʼ ca, purtiʼ Jesús nga cudii laacabe derechu ca ne maʼ bidii laacabe «ti lá cubi» (Apo. 3:12).

19:14. Tuu nga cani nuu lu ejércitu ni ziné Jesús para tíndecaʼ lu Armagedón. Laacabe nga ca ángel ne ca xpínnibe ni bibí ne qué nucheecaʼ dede ora gúticaʼ ne maʼ nuucaʼ guibáʼ (Mat. 25:31, 32; Apo. 2:26, 27).

20:11-15. Tu guiráʼ nga cá lá lu rollo o «libru de enda nabani» ca yaʼ. Lu rollo riʼ cá lá guiráʼ ca binni ni chiguibani sin gáticaʼ, casi ca xpinni Cristu ni bibí ca, ne «jma binni» ni biʼyaʼ Juan lu visión que ne zaqueca cani guiasa lade gueʼtuʼ ora gusibani Dios cani nachaʼhuiʼ (Hech. 24:15; Apo. 2:10; 7:9). Yanna, xi zácaxa de ca binni ni cadi nachaʼhuiʼ ni gusibani Dios ca yaʼ. Zacá lácabe lu «libru de enda nabani» ca pa gúnicabe ni cá lu «xcaadxi libru» o rollo ni guixeleʼ lu ti mil iza ca. Neca guicá lácabe luni ra guzulú ti mil iza ca la? zándaca guixiá ni. Peru cani bibí ca qué zaxiá lacaʼ pa gáticaʼ sin gucheecaʼ (Apo. 3:5). Ne ca binni ni chiguibani lu Guidxilayú riʼ laaca qué zaxiá lacaʼ pa qué gudxiidéchecaʼ Jiobá ora maʼ guiluxe guni mandar Jesús ti mil iza (Apo. 20:7, 8).

Xi rusiidiʼ cani laanu:

17:3, 5, 7, 16. «Ni ma bisiene Dios» laanu ca racaneni gánnanu tuu nga zeeda gaca «mani [xiñáʼ] napa gadxe ique ne chii cachu ca ne gunaa ni dxiʼba laame» que (Sant. 3:17). Maniʼ napa gadxe ique ne chii cachu que nga guca Sociedad de Naciones primé ne despué maʼ beeda gácame Organización de las Naciones Unidas. Yanna ra maʼ nánnanu nga, ñee cadi naquiiñeʼ gucaa nga laanu gucheechenu ca diidxaʼ nacubi ne galán ca ne stale gana ne guininu maʼ cadxiña dxi guni juzgar Jiobá binni la?

21:1-6. Zanda guni crenu dxandíʼ zuni Jiobá cani maʼ bizabiruaa ora iquiiñeʼ Reinu stiʼ. Xiñee yaʼ. Purtiʼ ora ruzeeteʼ Biblia cani la? casi ñaca maʼ guca cani. Apocalipsis na: «Ma uca irá ni nexhe acaʼ».

22:1, 17. «Guiigu [ra] riree nisa ni rudii enda nabani» ca nga zeeda gaca cani riquiiñeʼ Jiobá para cuee donda ne guendaguti. Ne dede yanna laaca nuuruʼ nisa para ca binni ni guzuubaʼ diidxaʼ. Dios cayuni invitar laanu guideʼnu «nisa ni rudii enda nabani sin quixe[nu] gastiʼ». Naquiiñeʼ gudiʼnu xquíxepeʼ Jiobá pur invitación ca ne laaca naquiiñeʼ chinenu invitación ca ra nuu binni.

[Cani cá ñee yaza]

[Dibuju/foto ni zeeda lu yaza 5]

Zaquiiñeʼ Dios Reinu stiʼ para uguu ndaayaʼ ca binni ni guzuubaʼ stiidxaʼ