Ora rigaachiʼ ca xpinni Cristu rácani jneza ne modo riuulaʼdxiʼ Dios
GUIRÁʼ ladu runadiáganu cayuunaʼ binni ne cucaacaʼ ridxi purtiʼ guti ti binnilídxicaʼ. Ti grupu de binni nácucaʼ lari yaaseʼ riábacaʼ layú para gusihuínnicaʼ naná nuu ladxidoʼcaʼ purtiʼ guti binnilídxicaʼ. Xcaadxi binni cuyaacaʼ laga caxidxi ti saa, ne xcaadxi cayocaʼ ne cuxidxisacaʼ. Ne stuudxi binni nexheʼ layú maʼ naxúdxicaʼ purtiʼ maʼ güecaʼ cerveza ne vinu. Nuu lugar zacá runi binni ora gati binnilidxi ne stale binni rigucaachiʼ ni guti ca.
Stale testigu stiʼ Jiobá nabézacaʼ ra nuu binni ni ridxibi ca gueʼtuʼ ca. Millón de binni runi cré ora gati tuuxa riree espíritu stiʼ ne nacaʼ zanda gacaneni binni o guninani laacaʼ. Pur ni runi crécabe riʼ nápacabe stale costumbre ni rúnicabe ora gati tuuxa. Laanu nánnanu cadi malu diʼ nga gúʼnanu ora gati tuuxa binnilídxinu, purtiʼ guyuu biaje dede Jesús ne ca discípulo stiʼ biinacaʼ ora guti tuuxa binni ni nadxiicaʼ (Juan 11:33-35, 38; Hech. 8:2; 9:39). Peru qué ñuu dxi ñuunacabe dede ñúnicabe ridxi casi biʼniʼ ca binni de dxiqué (Luc. 23:27, 28; 1 Tes. 4:13). Xiñee yaʼ. Purtiʼ gúnnacabe ximodo nuu cani maʼ guti.
Biblia cusiene ximodo nuu cani maʼ guti: «Cani nabani nánnacaʼ záticaʼ; peru cani maʼ guti la? laacabe maʼ qué liica gánnacabe gastiʼ[...]. Maʼ qué zanda diʼ gannaxhiicabe binni nin gacananaláʼdxicabe laacaʼ ne gápacabe envidia laacaʼ [...] purtiʼ gastiʼ dxiiñaʼ nin guendariníʼ ique nin guendananna nin guendanuuxpiaaniʼ ndaaniʼ Seol [ra rigaachiʼ binni guidxilayú]» (Ecl. 9:5, 6, 10). Ca versículo ni maʼ bidúʼndanu ca rusihuínnicani maʼ qué liica ganna diʼ ca gueʼtuʼ ca gastiʼ. Maʼ qué zanda diʼ guiníʼ íquecabe, guni sentírcabe gastiʼ, nin guiníʼnecabe cani nabani nin ca guiénecabe gastiʼ. Yanna, despué de maʼ bidúʼyanu modo nuu ca gueʼtuʼ ca, ximodo naquiiñeʼ gucaachiʼ ca xpinni Cristu tuuxa binnilídxicaʼ ni gati yaʼ.
«Cadi cana tu ni cadi nayá para naa»
Ratiica gule ca testigu stiʼ Jiobá o intiica costumbre napa ca binni ra nabézacaʼ la? qué runidicaʼ ca costumbre ni gusihuinni nabani ca gueʼtuʼ ca ne zanda gacanecaʼ o guninacaʼ binni. Laaca qué runidícabe mixaʼ ni runi binni ora guizaa gaʼ gubidxa o cuarenta dxi de guti tuuxa, o mixaʼ ni raca ora gusaa ca gueʼtuʼ ca ti iza, ne qué riguíxhecabe cuananaxhi lu bidóʼ ne qué rúnicabe xcaadxi cosa runi binni ora gati tuuxa casi chuʼcaʼ lutu, purtiʼ qué riuulaʼdxiʼ diʼ Dios guiráʼ cani. Laacabe qué runidícabe cani purtiʼ Biblia qué rusiidiʼ diʼ nápanu xiixa ni qué rati, sínuque ca demonio ca nga rucaa ca binni guni cré zacá ni (Eze. 18:4). Ca xpinni Cristu qué rinándadicaʼ ca costumbre ca purtiʼ nánnacaʼ qué zanda diʼ cuicaʼ «ruaa mexa sti [Jiobá] ne ruaa mexa sti ca [demonio]» (1 Cor. 10:21). Nga runi, ca xpinni Dios rúnicaʼ stipa pur chinándacaʼ mandatu riʼ: «Laixele de laacabe, ne cadi cana tu ni cadi nayá para naa» (2 Cor. 6:17). Peru, nuu tiru nagana zaca para laanu gúninu zacá.
Ndaaniʼ guidxi África ne ndaaniʼ xcaadxi guidxi, stale binni runi cré zanda guidxiichi espíritu stiʼ binnilídxicaʼ ni maʼ guti pa qué gúnicaʼ xiixa costumbre ni runi binni. Ne nacaʼ pa qué gúnicaʼ ca costumbre ca zanda guniná ca gueʼtuʼ ca laacaʼ ne zanda guizaaca xiixa desgracia xquídxicaʼ. Stale testigu stiʼ Jiobá nabé riníʼ binnilídxicaʼ ne ca xpesínucaʼ mal de laacaʼ, ridindenecaʼ laacabe ne rúnicaʼ menu laacabe purtiʼ qué rinácabe gúnicabe ca saa ni runi binni ora gati tuuxa binnilidxi. Ne nuu tu riníʼ qué riná ca Testigu ca guidxaagacaʼ binni ne qué gápacaʼ respetu ca gueʼtuʼ ca. Ne nuu biaje ca binni ni cadi naca Testigu ca racaláʼdxicaʼ gucaachicaʼ xpinni Cristu ni guti ca ne ca costumbre sticaʼ. Yanna, xi zanda gúninu ora chuʼ tu tuuxa tindené laanu purtiʼ racalaʼdxiʼ gucaachiʼ tuuxa xpinni Cristu ne ca costumbre ni qué riuulaʼdxiʼ Dios yaʼ. Ne ni jma risaca guiníʼ íquenu nga: xi zanda gúninu para guixélenu de ca costumbre ne de ca cosa ni runi binni ni zanda guxheleʼ laanu de Jiobá yaʼ.
Bisiene chaahuiʼ ximodo racaláʼdxiluʼ igaachiluʼ
Nuu lugar ca binni ni maʼ nagola ni nabeza ndaaniʼ xquidxi ni guti ca ne binnilidxi nga naquiiñeʼ guiniʼcaʼ ximodo igaachibe. Nga runi, naquiiñeʼ gusiene chaahuiʼ ca xpinni Cristu binnilídxicaʼ ca testigu stiʼ Jiobá nga gucaachicaʼ laabe ti gácani modo na Stiidxaʼ Dios (2 Cor. 6:14-16). Guiráʼ ni gaca para igaachiʼ binni ca cadi naquiiñeʼ diʼ guchiiñaʼ ni xquendabiaaniʼ nin ti xpinni Cristu, ne laaca qué riquiiñeʼ diʼ gucaani ca binni ni nanna xi runi crenu ne rusíʼdinu de ca gueʼtuʼ ca guiniʼcaʼ mal de laanu.
Ora guinabaʼ tuuxa familia ca binnigola gúʼyacaʼ ximodo igaachiʼ tuuxa binnilídxicaʼ la? laacabe racanécabe familia ca ne rábicabe laacaʼ xi zanda gaca ti cadi gucheenecaʼ ca conseju rudii Biblia. Pa tuuxa gacalaʼdxiʼ guni xiixa costumbre ni cadi jneza ora chiigaachiʼ ti xpinni Cristu, naquiiñeʼ gusiénenu laabe cani runi crenu sin guidxíbinu ne gúninu ni ne diidxaʼ nadóʼ ne respetu (1 Ped. 3:15). Peru, xi gúninu pa qué nácabe chúʼcabe razón ne nuupecabe gúnicabe modo nácabe yaʼ. Zándaca ni jma jneza guni ca xpinni Cristu nga guireecaʼ de ra lugar que (1 Cor. 10:20). Ora gacaʼ nga la? zanda chuʼ ti libana ndaaniʼ Yoo stiʼ Reinu o sti lugar para gacané cani guti binnilidxi ca gatadxí ladxidoʼcaʼ (Rom. 15:4). Neca cadi nexheʼ diʼ xcuerpu gueʼtuʼ ca ra chuʼ libana ca la? naquiiñeʼ gusisácanu ni ne guluinu nápanu respetu ora chuʼnu racá (Deu. 34:5, 6, 8). Nécapeʼ nabé naná nga yuubaʼ zadiʼdiʼ ca xpinni Cristu ora gacalaʼdxiʼ ca binnilídxicaʼ ni cadi naca Testigu gúnicaʼ ca costumbre sticaʼ ora gucaachicaʼ gueʼtuʼ ca la? zatadxí ladxidóʼcabe gánnacabe qué zusiaandaʼ diʼ Dios stipa ni bíʼnicabe pur gúnicabe ni jneza. Zanda guni crécabe zudii Dios laacabe stipa para guidxagalúcabe ca guendanagana ca (2 Cor. 4:7).
Bicaa ximodo racaláʼdxiluʼ gucaachicabe lii
Ora ti xpinni Cristu gucaa lu ti guiʼchiʼ ximodo racalaʼdxiʼ gucaachicabe laa la? jma nagueenda ziene ca binnilídxibe ni cadi naca Testigu ximodo naquiiñeʼ igaachibe ne zuni respetarcaʼ ni guniʼbe. Ne chupa chonna de ca cosa ni naquiiñeʼ gucaa xpinni Cristu ca nga xi guiráʼ gaca ora igaachiʼ, casi paraa gata xcuérpube ne tu laa guiníʼ ne guʼyaʼ xi guiráʼ gaca dxi ca (Gén. 50:5). Jma zulábicabe ni gucaa xpinni Cristu ca lu ti guiʼchiʼ pa guni firmarbe ni nezalú ti binni o jma. Stiidxaʼ Dios cayabi laanu jma jneza nga chuʼnu listu ante guizaaca xiixa. Cani chinanda conseju ca nánnacaʼ cadi naquiiñeʼ cuézacaʼ dede ora maʼ bióʼxhocaʼ o dede ora mayaca gáticaʼ para gúnicaʼ cani maʼ gúninu ca (Pro. 22:3; Ecl. 9:12).
Nuu xpinni Cristu qué riuuláʼdxicaʼ gucaacaʼ lu ti guiʼchiʼ xi guiráʼ naquiiñeʼ gaca ora gáticaʼ. Peru tobi ni gusaana ni naquiiñeʼ gaca la? zusihuinni maʼ zuhuaa dxiichiʼ ndaaniʼ xquidxi Dios ne zusihuinni nadxii ca binnilidxi ni naca Testigu (Fili. 2:4). Jma galán quixhe chaahuiʼ xpinni Cristu ca guiráʼ ni racalaʼdxiʼ gaca ora gati dede ante, ti cadi gapa ca binnilídxibe Testigu xiixa guendanagana. Purtiʼ naná yuubaʼ zadíʼdicabe ora gátibe ne jmaruʼ si naná ziuucabe pa málasi gacalaʼdxiʼ ca binnilídxibe ni cadi naca Testigu gúnicaʼ xiixa ni qué ñuuláʼdxibe ñaca ne qué runi crebe.
Cadi gusihuínninu casi ora nápanu stale bidxichi ora gucáʼchinu tuuxa binnilídxinu
Stale lugar stiʼ guidxi África riníʼ ique binni pa qué gúnicaʼ xiixa naroʼbaʼ ne de luju ora gati ti binnilídxicaʼ la? zadxiichiné ca gueʼtuʼ ni maʼ xadxí de guti ca laacabe. Ne nuu tu laa ora gati tuuxa binnilidxi runi stale cosa para gusihuinni nezalú binni napa stale bueltu ne naca «tuuxa» nezalúcabe (1 Juan 2:16). Nuu binni riquiiñecaʼ stale tiempu, stipa sticaʼ ne bueltu sticaʼ para gucaachicaʼ binnilídxicaʼ purtiʼ nacaʼ zacá zahuinni jneza modo cayúnicaʼ. Ne rucaacaʼ jma guiʼchiʼ naroʼbaʼ ra cá foto stiʼ binnilídxicaʼ ni guti ca stale lugar para ganna binni tu guti ne checaʼ chigucaachicaʼ laabe. Ne rúnicaʼ playera ra cá foto stiʼ ni guti ca ne rusigáʼdecabe ni guiráʼ cani chigucaachiʼ laabe para gácucaʼ ni dxi ca. Laaca rizíʼcabe caja gueʼtuʼ ni nabé caru para guidxagayaa binni laacabe. Casi ndaaniʼ ti guidxi stiʼ África dede rizíʼcabe caja gueʼtuʼ ni ruluíʼ carru, avión o barcu nabé caru para chuʼ binnilídxicabe ndaaniʼ ti guihuinni nápacabe bueltu. Nuu biaje ribeecabe gueʼtuʼ ca de ndaaniʼ caja ra nuu ca para quíxhecabe laa lu ti cama ni biʼniʼ chaahuicabe para laa. Ne nuu gunaa ni maʼ guti dede rugácucabe laacaʼ vestidu de novia, ne rugaandacabe laacaʼ stale bigáʼ ne rutieecabe lucaʼ. Yanna, ñee raʼbuʼ riuulaʼdxiʼ Dios guni ti xpinni zacá la?
Ca xpinni Dios ni maʼ zuhuaa dxiichiʼ lu stiidxabe nánnacaʼ cadi naquiiñeʼ diʼ gúnicaʼ guiráʼ ni runi binni guidxilayú ni qué ganna ne qué náʼ chinanda cani rusiidiʼ Stiidxaʼ Dios. Ca xpinni Dios ca laaca nánnacaʼ nin tobi de ca costumbre ca «cadi de Dios zeeda [cani], sínuque de binni guidxilayú» (1 Juan 2:15-17). Naquiiñeʼ gápanu laanu para cadi guicá íquenu gusihuínninu nápanu jma qué stobi, casi runi stale binni (Gál. 5:26). Casi maʼ huahuinni ndaaniʼ ca guidxi ra nabé ridxibi binni gueʼtuʼ ora gati tuuxa nabé stale binni rié ne raca nagana para guni tendércabe ca binni ca ne zándaca gaca xiixa ni cadi jneza luni. Cumu racaláʼdxicabe gusisácacabe ca gueʼtuʼ ca la? zanda gucaa nga laacabe gúnicabe ca cosa ni qué riuulaʼdxiʼ Jiobá. Dede zanda gúʼnacabe ne gúnicabe ridxi, quiidxicabe gueʼtuʼ ca, guiníʼnecabe laa casi ñaca nabániruʼ ne uquiidicabe bueltu ne xcaadxi cosa lu lari ni nacu. Pa gaca nga ora igaachiʼ ti xpinni Cristu la? zaníʼ binni mal de Jiobá ne de xquidxi (1 Ped. 1:14-16).
Gánnanu ximodo nuu ca gueʼtuʼ ca naquiiñeʼ gacaneni laanu cadi gúninu ca costumbre ni runi binni ora gucaachiʼ tuuxa binnilidxi (Efe. 4:17-19). Nécapeʼ beeda gaca Jesús ti hombre ni jma risaca lu Guidxilayú riʼ, qué ñúnicabe stale cosa ora bicaachicabe laabe (Juan 19:40-42). Ne cani riníʼ ique casi Cristu, qué zatuílucaʼ ucaachicaʼ binnilídxicaʼ zacá (1 Cor. 2:16). Pa qué racaláʼdxinu gúninu ca cosa ni na Biblia cadi jneza gúninu ora gucáʼchinu tuuxa binnilídxinu la? jma jneza nga cadi gúninu stale cosa ni gusihuinni casi ñaca nápanu stale bidxichi.
Ñee naquiiñeʼ chuʼnu nayecheʼ ora igaachiʼ ti gueʼtuʼ la?
Nuu lugar runi binnilidxi ni guti ca ne ca xpesinu ne xcaadxi invitadu ti saa igaachisibe ne ruyaacabe dxi ca. Lu ca saa riʼ nabé rixúdxicabe ne nabé rúnicabe cosa dxabaʼ. Nuu binni riníʼ ique racané ca saa ca laacaʼ tiidiʼ yuubaʼ sticaʼ pur guti binnilídxicaʼ, ne nuu xcaadxi na rúnicaʼ ni purtiʼ maʼ costumbre stiʼ binni xquidxi ni. Peru stale binni na naquiiñeʼ gaca saa ti gusisácacaʼ gueʼtuʼ ca ne ganda chindá espíritu stiʼ gueʼtuʼ ca ra nuu cani maʼ guti.
Laanu ca xpinni Cristu, nánnanu xi rusiidiʼ conseju riʼ laanu: «Jma galán nga gusihuinni binni nuu triste qué guxidxi, purtiʼ ora rusihuinni binni nuu triste jma galán ziuu ladxidóʼ» (Ecl. 7:3). Ni jma zacané laanu nga guiníʼ íquenu huaxiéʼ dxi ribáninu ne zadxiña dxi guiasa ca gueʼtuʼ ca. Ne para laanu jma galán «dxi gátinu que dxi gálenu» purtiʼ galán nuunenu Jiobá (Ecl. 7:1). Casi maʼ bidúʼyanu, ca costumbre ni napa ca binni ca ora gucaachicaʼ gueʼtuʼ zeedacani de espiritismo ne rucaacani binni guni cosa dxabaʼ, nga runi cadi naquiiñeʼ gúninu cani purtiʼ xpinni Cristu laanu. Ne qué riuudinu ora rúnicabe cani purtiʼ pa chuunu zusihuínninu qué gápanu respetu Dios ne zuchíʼñanu xquendabiaaniʼ xcaadxi xpinni Cristu.
Naquiiñeʼ guʼyaʼ binni gadxepeʼ laanu
Ca dxi stinu riʼ runi binni stale cosa purtiʼ ridxíbicaʼ gueʼtuʼ. Peru laanu la? maʼ qué ridxíbinu ca gueʼtuʼ ca. ¡Nabé rudiʼnu xquíxepeʼ Jiobá pur nga! (Juan 8:32.) Modo rusihuínninu naná nuu ladxidoʼno pur guti tuuxa rusihuinni «ma nuu[nu] ra nayaʼni» ne nánnanu ximódopeʼ nuu ca gueʼtuʼ ca. Cumu nánnanu ziasa ca gueʼtuʼ ca la? qué rúninu ridxi ora maʼ cayúʼnanu (Efe. 5:8; Juan 5:28, 29). Ni cabézanu ca zacané laanu cadi gúninu casi runi ca binni ni qué ganna ziasa ca gueʼtuʼ ca, purtiʼ laacaʼ rúnicaʼ stale cosa para gusihuínnicaʼ naná nuu ladxidoʼcaʼ (1 Tes. 4:13). Ne laaca zanda gusiénenu binni ximodo nuu ca gueʼtuʼ ne qué zadxíbinu laacaʼ (1 Ped. 3:13, 14).
Pa chinándanu ca conseju ni zeeda lu Biblia ca la? zuuyaʼ binni «tuu nga runi ni na Dios ne ni qué [r]uni ni nabe» (Mal. 3:18). Stiidxaʼ Dios na zaree guendaguti (Apo. 21:4). Laga cabézanu guedandá dxi ca la? naquiiñeʼ gúninu stipa «pur idxela [Jiobá] laa[n]u cayuni [n]u jneza ne gasti donda nuu luguiá [n]u», ne cadi liica nuunu tobi si ne binni guidxilayú ne cadi liica cayúninu ca costumbre ni qué riuulaʼdxiʼ Dios (2 Ped. 3:14).
[Dibuju/foto ni zeeda lu yaza 30]
Jma jneza nga gucaʼnu lu ti guiʼchiʼ ximodo racaláʼdxinu gucaachicabe laanu
[Dibuju/foto ni zeeda lu yaza 31]
Jneza modo rucaachiʼ ca xpinni Cristu binnilídxicaʼ ne qué rusihuínnicaʼ nápacaʼ stale bidxichi