Biluxe clase 125 stiʼ Scuela stiʼ Galaad
Gúdxicabe ca misioneru gácacaʼ casi Jeremías
«CLASE riʼ nga ni jma rusihuinni pabiáʼ nga risaca Scuela stiʼ Galaad dede dxi bizulú ni.» Zacá guníʼ Geoffrey Jackson, tobi de cani nuu lu Grupu ni Zaniruʼ, nezalú 6,156 binni ni guyé ora biluxe clase 125 stiʼ Scuela stiʼ Galaad stiʼ Watchtower ni guca 13 stiʼ septiembre iza 2008. Ne sti 56 xpinni Cristu ni binduuxeʼ clase ni maʼ gúninu ca biaʼsi bizaacabe jma de xhono mil misioneru ni maʼ biseendacabe lu «idubi naca guidxilayú» (Hech. 1:8).
Geoffrey Jackson nga bizulú guendaridagulisaa que, ne gunabadiidxaʼ: «Ñee zuni cré binni laatu ora gusiiditu laacaʼ de Dios dede cueendutu ni galán lu guiráʼ ni gúnitu la?». De raqué guniʼbe tapa cosa ni zacané ti xpinni Cristu gusihuinni zanda guni cré binni laa: gaca nachaʼhuiʼ, gudii ti ejemplu galán, guiráʼ ni guiníʼ guireecani de lu Biblia ne gusiidiʼ lá Dios.
David Schafer, tobi ni racané Grupu ni ruuyaʼ xi guicá lu ca guiʼchiʼ ricaanu, bidii libana ni láʼ: «Ñee zanda guiénetu guirani la?». David Schafer gudxi cani binduuxeʼ Scuela stiʼ Galaad que zanda gánnacaʼ xi guiráʼ naquiiñeʼ guni ti misioneru pa qué gusaanacaʼ de guyúbicaʼ Jiobá ne chinándacaʼ ni na «mozo ni nuu xpiaani ne ni runi jneza» (Pro. 28:5; Mat. 24:45).
De racá la? maʼ bidii John E. Barr, tobi de cani nuu lu Grupu ni Zaniruʼ, libana riʼ: «Cadi gudiitu lugar gucaa xiixa laatu guixéletu de Dios ni nadxii laatu». Ca conseju ni bidiibe ca gucanécani guiráʼ cani binduuxeʼ clase ca ne gucanécani bixhózecaʼ ne jñaacaʼ para cadi chúʼpecaʼ xizaa pur dxiiñaʼ de misioneru ca ne guiráʼ ni zadxaagalú cani gucuaa dxiiñaʼ ca. John E. Barr guníʼ: «Jiobá nga ni jma zapa laanu que stobi purtiʼ laa nadxii laanu». Qué ziuu gastiʼ ni guxheleʼ ca misioneru ca de Dios ni nadxii laacaʼ pa qué guixélecaʼ de laabe.
Sam Roberson, tobi de cani runi dxiiñaʼ ndaaniʼ ca Oficina para ca Scuela ni nuu Patterson, gudxi cani nuu raqué gúnicaʼ casi biʼniʼ Cristu. Ne gúdxibe cani binduuxeʼ scuela que zanda «sa né[caʼ] Señor Jesucristu» pa gúʼndacaʼ modo bibánibe ne chinándacaʼ cani bisiidibe (Rom. 13:14). De racá gudiʼdiʼ William Samuelson, ni ruuyaʼ modo naquiiñeʼ gaca dxiiñaʼ ndaaniʼ ca Oficina para ca Scuela ni nuu Patterson, ne guníʼ naquiiñeʼ guni respetar binni laacaʼ purtiʼ rúnicaʼ ni jneza nezalú Dios, ne cadi purtiʼ si stobi guiníʼ naquiiñeʼ guni respetar binni laacaʼ.
Tobi de cani rusiidiʼ ra Scuela stiʼ Galaad ni láʼ Michael Burnett gunábabe cani guyé clase que guzeetecaʼ xiixa ni bizaacacaʼ ora yegucheechecaʼ diidxaʼ dxi canazacaʼ scuela ca ndaaniʼ guidxi Patterson (Nueva York). Nécapeʼ stale de laacaʼ bicheechecaʼ diidxaʼ ca lugar ra nabé rireeche diidxaʼ dxi guzácabe scuela ca la? bidxélacaʼ chupa chonna ni bicaadiaga stiidxaʼ Dios. Gerald Grizzle, ni runi dxiiñaʼ ra Oficina stiʼ ca Guendaridagulisaa roʼ ca, gunabadiidxabe chonna Testigu ni caziidicaʼ ra Scuela stiʼ cani Ruuyaʼ Modo Raca Dxiiñaʼ Betel xi bizaacacaʼ. Ni guníʼ ca Testigu ca gucaneni cani binduuxeʼ scuela ca gánnacaʼ xi zadxaagalucaʼ ra checaʼ.
David Splane, ni guyé lu clase 42 stiʼ Scuela stiʼ Galaad ne nuu lu Grupu ni Zaniruʼ, bitiidiʼ ti libana ni láʼ «Lagaca casi Jeremías». Neca bidxibi Jeremías ora gudxi Jiobá laa guni xhiiñaʼ la? bidiibe stipa laa para ganda guni ni (Jer. 1:7, 8). Ne zacaca zacané Jiobá cani nacubi bizulú de misioneru. David Splane bidii conseju riʼ cani binduuxeʼ Scuela stiʼ Galaad: «Pa nápatu guendanagana ne tuuxa la? lacuí ne lagucaa chii de ca cosa ni jma riuuláʼdxitu de xpinni Cristu ca. Pa qué guidxíñatu chii ca, zahuinni caʼruʼ gunibiáʼ chaahuitu laabe».
Jeremías biʼniʼ xhiiñaʼ Dios neca gucaná. Ora biʼniʼ sentirbe maʼ qué zanda gúnibe ni na Jiobá la? biʼniʼ orarbe laa ne gucané laabe (Jer. 20:11). David Splane bidii conseju riʼ laacabe: «Ora maʼ careetu gana, laguiniʼné Jiobá. Dede zadxagayaatu modo zacanebe laatu».
Para guiluxe guendaridagulisaa que xpinni Cristu ni bizuluni que bisietenalaʼdxiʼ cani nuu raqué maʼ biziidiʼ ca misioneru ca stale cosa ni zanda gúnicaʼ para guni cré binni laacaʼ. Ne ora maʼ gucheechecabe diidxaʼ ra chécabe la? jma zuni cré binni ni gusiidicabe (Isa. 43:8-12).
[Cuadru ni zeeda lu yaza 22]
RA CAYEETEʼ XCAADXI DE LAACABE
Zeedacabe de 6 guidxi roʼ
Zécabe 21 guidxi roʼ
Biaʼsi 56 guirácabe
Nápacabe biaʼ 32.9 iza
Nápacabe biaʼ 17.4 iza de nuucabe ndaaniʼ xquidxi Dios
Nápacabe biaʼ 13 iza de rúnicabe xhiiñaʼ Dios
[Dibuju/foto ni zeeda lu yaza 23]
Clase 125 stiʼ Scuela stiʼ Galaad stiʼ Watchtower
Cani zuhuaa delante nga cani cá lá primé, de racá maʼ zeeda cani nuu neza déchecabe, ne ladu bigaʼ ruzulú lácabe ne rilúxecani ladu derechu.
1) Hodgson, A.; Wall, A.; Beerens, K.; Hortelano, M.; Newman, L.; De Caso, A. 2) Jenkins, J.; Jarzemski, T.; Méndez, N.; Corona, V.; Canalita, L. 3) Fryer, H.; Savage, M.; Tidwell, K.; Erickson, N.; Dyck, E.; McBeath, R. 4) Pérez, L.; Puse, L.; Skidmore, A.; Young, B.; McBride, N.; Rondón, P.; Goodman, E. 5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. 6) Pérez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. 7) Corona, M.; Wall, R.; Puse, S.; Méndez, F.; Jarzemski, S.; Savage, T. 8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. 9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.